လါယူၤလံ, ၃၀သီ, ၂၀၂၆နံၣ် ခ့ၣ်အဲးစံၣ်
ကညီကီၢ်စဲၣ် ရမတံဝ့ၢ်ကလံၤထံး,ဝၣ်မ့ထၣ်သဝီဖိသးစၢ် (၇) ဂၤလၢ အလဲၤထုးထီၣ်က့ၤသိလ့ၣ်ကတၥ်ထီသးသ့ၣ်တဖၣ်လီၤမၢ်ကွံၥ်ဝဲဒၣ်ဒီးတုၤခဲအံၤ အိၣ်(၂)နွံဘျဲၣ်လံဘၣ်ဆၣ် တၢ်တနၢ်ဟူအပရၢနီတမံၤဒံးဘၣ်အဂ့ၢ်သ့ၣ်ညါဘၣ် ဒ်ဟံၣ်ဖိဃီဖိစံးဝဲအသိး သ့ၣ်ညါဘၣ်န့ၣ်လီၤ.
တၢ်ကဲထီၣ်သးခီန့ၣ် ဖဲအပူၤကွံၥ်လါယူၤလံ ၁၁သီအနံၤန့ၣ် ဝၣ်မံၤထၣ်သဝီ(၇)ဂၤအံၤ ဒ်သိးလဲၤထုးက့ၤသိလ့ၣ်လၢကတၥ်ထီသးဖဲ မဲၢ်ကနဲ-ဖလူကျဲအဂီၢ် လဲၤလီၤဝဲဒၣ်ဒီး တၢ်ဆဲးကျိးစးထီၣ်လီၤမၢ်ကွံၥ်ဝဲဒၣ်ဖဲန့ၣ်အဂ့ၢ် သ့ၣ်ညါဘၣ်လၢဟံၣ်ဖိဃီဖိအအိၣ်န့ၣ်လီၤ.
ပှၤသ့ၣ်တဖၣ်အံၤဒိးထီၣ်ဝဲဒၣ် သိလ့ၣ်ထဲၢ်ကျဲလၢကလဲၤထုးထီၣ်က့ၤသိလ့ၣ်လၢကတၥ်ထီသးအဂီၢ်ဒီး တၢ်န့ၣ်ဝံၤအလီၢ်ခံတၢ်ဆဲးကျိးလီၤမၢ်တုၤခဲအံၤလီၤအဂ့ၢ် ပှၤလီၢ်မၢ်အကျါ အဟံၣ်ဖိဃီဖိတဂၤစံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ “ခီဖျိလၢပှၤသိလ့ၣ်အိၣ်ကတၥ်အဃိ လၢအဝဲသ့ၣ်ကလဲၤထုးက့ၤအဂီၢ် လဲၤဝဲဒီးသိလ့ၣ်(ထိၣ်စဲၣ်)န့ၣ်လီၤ. အဝဲသ့ၣ်လဲၤဝဲလၢကစၢၢ်ခိၣ်ကျဲတကပၤ ဃုၥ်ဒီးပှၤဟဲငါသိလ့ၣ်ကစၢ်သ့ၣ်တဖၣ်န့ၣ်လီၤ. ဘၣ်ဃးဒီး ကျဲပံးသးအဂ့ၢ်န့ၣ် ခီဖျိလၢပှၤတတဲအီၤဘၣ်ဒီး တသ့ၣ်ညါဝဲဘၣ်အဃိ လဲၤဝဲဒၣ်န့ၣ်လီၤ. ဖဲလါယူၤလံ, ၁၁သီအနံၤန့ၣ်လဲၤဝဲဒီးပှၤကညီ(၇)ဂၤ ဒီးတုၤခဲကနံၣ်အံၤ တၢ်ကစီၣ်လီၤတံၢ်လီၤဆဲးန့ၣ်တဒိးနံၢ်ဘၣ်.ဒံးဝဲဘၣ်. ပယီၤဖီၣ်ဧါ မ့ၢ်မတဂၤဖီၣ်လဲၣ် တသ့ၣ်ညါဘၣ်အဂ့ၢ်”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ လၢဟံၣ်ဖိဃီဖိတဖၣ် မုၢ်လၢ်ဝဲအဖၢမုၢ်ဒံးလၢ အကအိၣ်မူဒံးဒီး ဃုသ့ၣ်ညါဆဲးကျိးသံကွၢ်ဝဲလၢ ပှၤဘၣ်မူဘၣ်ဒါအအိၣ်ဘၣ်ဆၣ် တုၤခဲကနံၣ်အံၤ တဒိးန့ၢ်ဘၣ်ဝဲ တၢ်ကစီၣ်လီၤတံၢ်လီၤဆဲးဒံးဘၣ်အဂ့ၢ်အဝဲတဲအါထီၣ်ဝဲဒၣ်န့ၣ်လီၤ.
တကီၢ်ခါခဲအံၤန့ၣ် လ့က့ၣ်ကိၥ်, ဖလူ,ဂီၤလ့ၤ,မ့လဲၣ်ပၤ ဟီၣ်ကဝီၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီး ပယီၤသုးအဘၢၣ်စၢၤတၢ်ခးလိၥ်သးကဲထီၣ်ကိးမုၢ်ဒဲး ဒီး တၢ်ဒုးဆူၣ်ဝဲဒၣ်အဃိ ဖလူ-မဲၢ်ကနဲကျဲအံၤ တၢ်သုတလ့ၢ်လိၤအီၤတဂ့ၤအဂီၢ် လီၢ်ကဝီၤတၢ်ပၢၢ်ဆၢကရူၢ်ကရၢတြီဃၥ်ဝဲအိၣ်ဝဲဒၣ်န့ၣ်လီၤ.