လါယူၤလံ ၃၁ သီ, ၂၀၂၆ နံၣ်, ခ့ၣ်အဲးစံၣ်
သုးခိၣ်စီၤကၠီၤသဲၣ် လၢအထုးဖးသးလၢကရၢပူၤအံၤ ဃုၥ်ဒီးအပှၤ(၃၅၀)ဟဲက့ၤပၥ်ဖှိၣ်မၤသကိးတၢ်ဒီး တၢ်ဘၣ်ဘျုး ဒံၣ်မိၣ်ခြ့ၣ်စံၣ် ကညီသုးမုၢ်ဒိၣ်(DKBA)အဂ့ၢ်န့ၣ် DKBA လီၢ်ခၢၣ်သးသုးဝဲၤလီၢ်ခိၣ်သ့ၣ် ပၢဆှၢတၢ်ကမံးတံၥ်(CEC) ထုးထီၣ်ပၥ်ဖျါ ဝဲဖဲတနံၤ အံၤလါယူၤလံ ၃၁ သီအံၤန့ၣ်လီၤ.
ဒ်(DKBA)လီၢ်ခၢၣ်သးသုးဝဲၤလီၢ်ခိၣ်သ့ၣ်အလံၥ်တၢ်ပၥ်ဖျါပူၤစံးဝဲအသိးန့ၣ် ကရၢဖိလီၢ်လံၤ သုးခိၣ်ကျၢၢ်ဖိ စီၤကၠီၤသဲၣ် လၢအမ့ၢ်တ့ၢ်ဝဲ (DKBA)ကျိၣ်ထူဝါ သုးက့ခိၣ်ဃုၥ်ဒီး အပှၤ(၃၅၀)ဟဲက့ၤပၥ်ဖှိၣ်မၤသကိးက့ၤတၢ်အံၤ ပၥ်ပနီၣ်တူၢ်လိၥ်ကဒါဝဲဒီး လၢတၢ်ကရၢ ကရိအပူၤ ပၥ်ထီၣ်ဝဲသုးခိၣ်စီၤကၠီၤသဲၣ်အံၤလၢ သုးက့(၃)သုးက့ခိၣ်အဂ့ၢ်န့ၣ် စံးဝဲန့ၣ်လီၤ.
သုးခိၣ်စီၤကၠီၤသဲၣ် အံၤ ဖဲအပူၤကွံၥ်(၂၀၁၅)နံၣ် မ့ၢ်ဒံးဝဲဒၣ်(DKBA)အခါ မၠၣ်ဝတံၣ်-ကီးတရံးအ့ရှါကျဲဘၢၣ်စၢၤ တြဲၤလၢအဝဲ ဆီလီၤဟူးဂဲၤဝဲတၢ်လီၢ်အံၤ ပယီၤသုးဟ့ၣ်တၢ်ဆီၣ်သနံးလၢကထုးကွံၥ်ဝဲဘၣ်ဆၣ် ခီဖျိတထုးကွံၥ်ဝဲဘၣ် တလူၤပိၥ်မၤထွဲဝဲ တၢ်ကရၢကရိအတၢ်သိၣ်တၢ်သီဘၣ်အဃိ တၢ်ထုးထီၣ်ကွံၥ် သုးခိၣ်စီၤကၠီၤသဲၣ် လၢ အတီခိၣ်ရိၣ်မဲဝဲကျိၣ်ထူဝါသုးကျိၤဒီတကျိၤ အံၤလၢတၢ်ကရၢကရိပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲန့ၣ်လီၢ်ခံ အဝဲဟူးဂဲၤပၥ်ဖှိၣ်မၤသကိးတၢ်ဒီးဟီၣ်ကဝီၤ(KNLA)မ့အိၣ်ဘၣ်ဆၣ် အိၣ်ဆၢထၢၣ်ဝဲလီၤလီၤဆီဆီ ဒီး စးထီၣ်ဖဲ ၂၀၂၁ သုးဟံန့ၢ် တၢ်စိတၢ်ကမီၤအိၣ်ထီၣ်လီၢ်ခံန့ၣ် တီခိၣ်ရိၣ်မဲဒုးအိၣ်ထီၣ်ဝဲ ဘီသိၣ်ဝါသုးကျိၤ(ကျားဖြူစစ်ကြောင်း)ဒီး ဟံစ့ၢ်ကီးမူဒါ ဒ်သုးကျိၤခိၣ် တဂၤအသိးဝံၤ ဟူးဂဲၤဝဲဒၣ်လၢကီးတရံးဟီၣ်ကဝီၤပူၤ ပၢၢ်ဆၢဒုးထီဒါက့ၤဝဲသုးမီၤစိရိၤအံၤတုၤဝဲလၢ (၂၀၂၆)ထီၣ် အံၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးသုးခိၣ်စီၤကၠီၤသဲၣ်အတၢ်ဟဲက့ၤပၥ်ဖှိၣ်မၤသကိးတၢ်ဒီး(DKBA)အံၤအဖီခိၣ် ဖဲပခ့ၣ်အဲးစံၣ်-ကညီတၢ်ကစီၣ် ဆဲးကျိးသံကွၢ် အီၤအခါ စံးဝဲလၢ “ပှၤထုးထီၣ်လံၥ်တဘ့ၣ်အံၤအမ့ၢ်လီၤ. သနါက့ဘၣ်ဃးတၢ်တခါအံၤဘၣ်ကနၣ်ကွၢ်ဒံးလၢခံတဆီ မ့ၢ်တၢ်အိၣ်သး ကမၤအသးဒ်လဲၣ်မီၤ. ခဲအံၤဒုပက့ၤပၥ်ဖှိၣ်ထီၣ်သးကဒဲကဒဲလီၤတံၢ်လံ. အပူၤကွံၥ်ပအိၣ်ယံၤလိၥ်သးခဲအံၤပက့ၤထံၣ် ဖှိၣ်လိၥ်က့ၤ သးကကဲထီၣ်က့ၤတၢ်ဂံၢ်တၢ်ဘါတခါမီၤ”အဂ့ၢ်န့ၣ် စံးဝဲန့ၣ်လီၤ.
(DKBA)ကညီဖီၣ်စုကဝဲၤကရူၢ်လၢ သုးခိၣ်ကျၢၢ်ဖိ စီၤကၠီၤသဲၣ် ဃုၥ်ဒီးအပှၤဟဲက့ၤမၤသကိးတၢ်ခဲအံၤန့ၣ် မ့ၢ်ကရူၢ်တဖုလၢ အမံၤဟူသၣ်ဖျါဝဲလၢအတၢ်ဘၣ်ထွဲအိၣ်ဝဲဒီး(အီၤလါ)ကၠါဖၠၣ်တၢ်ဖံးတၢ်မၤလၢဟီၣ်ခိၣ်ဒီဘ့ၣ်ထီဒါဝဲအံၤအသိး တုၤလၢခဲအံၤ ဟီၣ်ကဝီၤလၢ အဝဲသ့ၣ်ဒိၣ်စိဝဲန့ၢ်တဖၣ်န့ၣ်တၢ်ဖံးတၢ်မၤသ့ၣ်တဖၣ်အံၤလဲၤတရံးအသးဒံးအဖၢမုၢ်အဂ့ၢ်န့ၣ် န့ၣ်လီၤ.
သုးခိၣ်ကျၢၢ်ဖိ စီၤကၠီၤသဲၣ်အမဲၥ်ညါ အပူၤကွံၥ် ၂၀၂၀ လါမးရှးအခါန့ၣ်စ့ၢ်ကီး သုးခိၣ်စီၤဆါအီၤ လၢအထုးဖးသးလၢတၢ်ကရၢ ကရိပူၤလၢ တၢ်ခးလိၥ်သးက့ၤကဲဝဲဒီးသုးခိးကီၢ်ဆၢ (BGF),ပယီၤသုးအံၤန့ၣ် လၢ(DKBA)ခိၣ်နၢ်ဒိၣ်ထီအတၢ်ရဲၣ်တၢ်ကျဲၤအံၤတဆီ အဝဲက့ၤပၥ်လီၤစုကဝဲၤလၢပယီၤသုးအအိၣ်ဝံၤ ဖဲ ၂၀၂၁ လါနိၣ်ဝ့ဘၢၣ်န့ၣ် တၢ်က့ၤတူၢ်လိၥ်ကဒါက့ၤအီၤလၢ(DKBA )တၢ်ကရၢ ကရိ ပူၤဒီး တၢ်ဟ့ၣ်မူဟ့ၣ်ဒါပၥ်ထီၣ်အီၤဒ်သုးဂ့ၢ်ဝီခိၣ်အသိးဒံးန့ၣ်လီၤ.
