လါအီကူး ၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ထံသဘျုၣ်ထၣ်ကရူၢ်လၢပယီၤသုးကဘီယူၤလဲၤတ့ၢ်လီၤဝဲမ့ၣ်ပိၢ် တပယူၥ်ဃီအံၤ လဲၤခးလီၤကဒီးတၢ်အဃိ ကမျၢၢ်သံ(၂)ဂၤအကျါပၣ်ဃုၥ်ဝဲဖိသၣ်(၆)နံၣ်တဂၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
ထံသဘျုၣ်ထၣ်ကရူၢ် ဘီသိၣ်ထၣ်သဝီအပူၤ လါအီကူး ၅ သီ ဟါခီ ပယီၤသုးကဘီယူၤလဲၤခးလီၤတၢ် ကမျၢၢ်သံဘၣ်ဒိဘၣ်ထံး တၢ်ဟးဂူၥ်ဟးဂီၤကဲထီၣ်ဝံၤ မုၢ်ဆ့ၣ်ထီၣ်လါအီကူး ၆ သီ မုၢ်နၤခီ ၁၁း၃၀ အဆၢကတီၢ် လၢထီးမဲထၣ်သဝီအပူၤ (Y-12) ကဘီယူၤ လဲၤတ့ၢ်လီၤကဒီးဝဲ မ့ၣ်ပိၢ်(၂၀)ဖျၢၣ်ဒီး(Jet fighter)ကဘီယူၤလဲၤတ့ၢ်လီၤစ့ၢ်ကီးဝဲမ့ၣ်ပိၢ်(၂)ဖျၢၣ်န့ၣ်လီၤ.
လၢကဘီယူၤအတၢ်လဲၤခးလီၤကဒီးတၢ်အံၤအဃိ သဝီဖိ နီၢ်မးအ့(၃၉)နံၣ်အံၤဒီး ဖိသၣ်တတီၤကၠိဖိ စီၤဃီဝါထူလၢအသးနံၣ်အိၣ်ဒံး ဒၣ်ထဲ(၆)နံၣ်အံၤသံဝဲဖဲတၢ်ကဲထီၣ်သးလီၢ်န့ၣ်တဘျီဃီတကးဒံးဘၣ် ဟံၣ်စ့ၢ်ကီးဟးဂီၤလီၤပှီၢ်ဝဲ(၅)ဖျၢၣ်အဂ့ၢ်န့ၣ် လီၢ်ကဝီၤ ပှၤဘၣ်မူ ဘၣ်ဒါစံးဝဲန့ၣ်လီၤ.
အပူၤကွံၥ်လါအီကူး ၃ သီ ဒီး ၅ သီ ထံသဘျုၣ်ထၣ်ကရူၢ် ထံလီၤသံးထၣ်သဝီ, ဘီသိၣ်ထၣ်သဝီ ဒီး လါအီကူး ၆ သီ မးထီကရူၢ် ချၢၣ်ခိၣ်သဝီသ့ၣ်တဖၣ်အံၤအပူၤ သုးမီၤစိရိၤပညိၣ်လဲၤတ့ၢ်လီၤဝဲမ့ၣ်ပိၢ်,ကျိဒိၣ်အါအါဂီၢ်ဂီၢ်အဃိ ကမျၢၢ်ပိၥ်မုၣ်သံ(၁)ဂၤ ဒီး ဘၣ်ဒိဘၣ်ထံး ဝဲနးနးကျံၤကျံၤ(၄)ဂၤအသိး ဟံၣ်ဃုၥ်ဒီးသီခါဖၠၣ်တၢ်သူၣ်ထီၣ်ဟးဂီၤလီၤပှီၢ်ဝဲ(၃၂)ဖျၢၣ်ဒံးန့ၣ်လီၤ.
တကီၢ်ခါခဲအံၤလၢကဆဲးလဲၤထီၣ်ဆူဖၣ်ပူၣ်အဂီၢ် ပယီၤသုးလၢအတုၤအိၣ်ဖဲကတၢတံၥ်ကရူၢ် ဖါလိဖိသဝီအံၤတဖၣ်ဒီး ဟီၣ်ကဝီၤ (KNLA)သုးပၥ်ဖှိၣ်အဘၢၣ်စၢၤ တၢ်ဒုးဆဲးကဲထီၣ်ဝဲကိးမုၢ်နံၤဒဲးဃၣ်ဃၣ်အသိး ပယီၤသုးအံၤသဂၢၢ်ဘၣ်ဝဲတၢ်သံတၢ်ဘၣ်ဒိဘၣ်ထံး အဃိ တပဲၥ်ဖးနီၤဖးဝဲတၢ်ပၢၢ်ဆၢကရူၢ်ဒီးကမျၢၢ်ထံဖိကီၢ်ဖိလၢၤဘၣ်မ့မ့ၢ်တခီ လၢကလံၤကျါအံၤတဆီ ပညိၣ်ဟးခးလီၤတၢ်လၢ ကမျၢၢ်အိၣ်ဆိးလီၢ်ကျဲကိးမုၢ်နံၤဒဲးတုၤလၢခဲအံၤ ဆဲးမၤဒံးဝဲအဖၢမုၢ်အဂ့ၢ်န့ၣ် (သုးက့ ၅)ပှၤဘၣ်မူ ဘၣ်ဒါ စံးဝဲန့ၣ်လီၤ.
လၢတၢ်န့ၣ်အဃိ တၢ်သံတၢ်ပှၢ်,တၢ်ဘၣ်ဒိဘၣ်ထံးဒီးဟံၣ်ဃီတၢ်ဟးဂူၥ်ဟးဂီၤလၢကမျၢၢ်ဘၣ်ကွၢ်ဆၢၣ်မဲၥ်ဝဲကိးမုၢ်နံၤဒဲးအံၤ လၢအဟဲခါဆူညါ ကဘၣ်လဲၤခီဖျိသဂၢၢ်ဘၣ်ဝဲတၢ်အိၣ်သးအံၤကဟဲအါထီၣ်ဝဲကွ့ၢ်ကွ့ၢ်သ့ဝဲအဂ့ၢ်န့ၣ် တၢ်ပဲၥ်ထံနီၤ ဖးစံးဝဲန့ၣ်လီၤ.
