လါအီကူး ၄ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤတဖၣ်အပူၤ ထံဂုၤကီၢ်ဂၤတၢ်ဆီၣ်ထွဲမၤစၢၤတအိၣ်လၢၤဘၣ်ဝံၤလီၢ်ခံ ဒ်သိး အိၣ်ဆၢထၢၣ်လၢနီၢ်ကစၢ်ခီၣ်ကန့ၢ်အဂီၢ် စးထီၣ်ဖဲအပူၤကွံၥ်(၂၀၂၅)အခါန့ၣ် ပှၤဒဲကဝီၤဖိတဖၣ်န့ၢ်လဲၤမၤဘၣ်တၢ်မၤလၢတၢ်ချၢလၢ အဖိးသဲစးဒီး ခဲအံၤပှၤလဲၤမၤတၢ်လၢတၢ်ချၢအိၣ်လံဝဲအဂၤ(၇၀၀၀)ဃၣ်ဃၣ်လံအဂ့ၢ်န့ၣ် (KRC)ပှၤဘၣ်မူဘၣ်ဒါ စံးဝဲန့ၣ်လီၤ.
ဒ်န့ၣ်အသိး လၢကၠီၣ်တဲၣ်တၢ်ဖံးတၢ်မၤကစၢ်အတၢ်ဟဲကိးတၢ်ဖံးတၢ်မၤအံၤအဖီခိၣ် ပှၤဒဲကဝီၤဖိလၢအအိၣ်ဒီး(MOI)နီၣ်ဂံၢ် ၁၃ ဖျၢၣ်လၢ အဟးထီၣ် မၤတၢ်မၤလၢတၢ်ချၢတဖၣ်အံၤ လၢအဝဲသ့ၣ်လဲၤတုၤဖံးမၤတၢ်,အိၣ်ဆိးဝဲကီၢ်ဆၣ်အံၤတဆီ တၢ်ဆဲးဒိန့ၢ်ဝဲ အနံၣ်တဆံတၢ်ဂီၤအံၤ ရုၢ်ရုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်လီၤဆီဒၣ်တၢ်အနံၣ်တဆံတၢ်ဂီၤလၢတၢ်ဒိဆိန့ၢ်ဝဲပှၤဒဲကဝီၤဖိလၢအဟးထီၣ်မၤတၢ်မၤလၢတၢ်ချၢအဂီၢ်တဖၣ်အံၤ ဘၣ်တၢ်စးထီၣ်ဒိန့ၢ်အီၤဖဲအပူၤကွံၥ်လါယူၤလၢ ထါမဟ့ၣ်ဒဲကဝီၤဒီးဘၣ်ဒိၤယါဒဲကဝီၤ(၂)ဘ့ၣ်အံၤအပူၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
စးထီၣ်ဖဲန့ၣ်လီၢ်ခံ ဘၣ်ကီဘၣ်ခဲဒဲကဝီၤ(၂)ဘ့ၣ်အံၤအမဲညါ ပှၤဒဲကဝီၤဖိလၢအဂၤလၢအဟးထီၣ်မၤတၢ်မၤလၢတၢ်ချၢတဖၣ် တၢ်ဒိန့ၢ်စ့ၢ်ကီးဝဲတၢ်ဂီၤလံအဃိ ပှၤဒဲကဝီၤဖိလၢအဒိဘၣ်ဝဲတၢ်ဂီၤအံၤပှၤနီၣ်ဂံၢ်ကအိၣ်လၢ(၄၀၀)ခိၣ်ဃၢၤလံအဂ့ၢ်န့ၣ် (KRC) နဲၣ်ရွဲၣ် စီၤပှဲၢ်စ့ စံးဝဲန့ၣ်လီၤ.
အဝဲစံးဝဲလၢ“ဘၣ်ဃးတၢ်ခါန့ၣ်ပှၤဒိကအိၣ်ဝဲဖဲ(၃၀၀)ဘျဲၣ်,(၄၀၀)ခိၣ်ဃၢၤဒ်န့ၣ်လီၤ. ခဲအံၤစ့ၢ်ကီးလဲၤဝဲအဖၢမုၢ်လီၤ လဲၤဝဲတခီဒီး လဲၤဒိဝဲလၢအဝဲသ့ၣ်အိၣ်ကီၢ်ဆၣ်အလီၢ်န့ၣ်လီၤ. ဒ်သိးပသ့ၣ်ညါအသိးန့ၣ်ကအိၣ်ဝဲဒၣ်လၢထါမဟ့ၣ်ဒဲကဝီၤန့ၣ်(၃၀၀)ဘျဲၣ်, မ့မ့ၢ်လၢဘၣ်ဒီၤယါတကပၤန့ၣ်ကအိၣ်ဝဲ(၅၀)ဘျဲၣ် ခဲအံၤကအိၣ်လၢ(၁၀၀)လံဧါယဆိမိၣ်.” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
ဘၣ်ဃးအနံၣ်တဆံတၢ်ဂီၤလၢတၢ်ဒိန့ၢ်ဝဲပှၤဒဲကဝီၤဖိလၢအလဲၤမၤတၢ်လၢတၢ်ချၢတဖၣ်အံၤအဂီၢ်န့ၣ် မဲၢ်လးဒဲကဝီၤသးစၢ်လၢ အဒိတၢ်ဂီၤအံၤဝံၤတဂၤ ပၥ်ဖျါထီၣ်အတၢ်တူၢ်ဘၣ်ဒ်အံၤန့ၣ်လီၤ.
“လၢညါခါန့ၣ်နကဟးထီၣ်မၤတၢ်န့ၣ်နဘၣ်ဟးခူသူၣ်ခူလ့ၤ, တၢ်ဆီၣ်ထွဲမၤစၢၤစ့ၢ်ကီးတုၤလၢခဲအံၤတအိၣ်လၢၤ ဘၣ်. အဃိ ကဲထီၣ်တၢ်ကသါစ့ၤလၢပဂီၢ်လီၤ. အဃိပှၤဒိန့ၢ်ပှၤတၢ်ဂီၤတၢ်အံၤဖးဂ့ၤညါ, တၢ်ဂီၤတခါအံၤအဂ့ၤဒိၣ်န့ၢ်ဒံးပဟဲလၢပယီၤကီၢ် ပဘၣ်တ့ (ဖးစပိး)ဒ်န့ၣ်မီၤ. အတဘံဘူစ့ၢ်ကီးဘၣ် နကဘၣ်လဲၤတ့မနုၤသ့ၣ်တဖၣ်လဲၣ်န့ၣ်တအိၣ်ဘၣ်. ပအိၣ်ဟဲလၢဒဲကဝီၤပူၤ အဃိ ပတလိၣ်ပျံၤပလ့းဘၣ်, မတဂၤမးလၢကဟဲမၤဘံဘူပှၤကဟဲဖီၣ်ပှၤတအိၣ်ဘၣ်. မ့ဝံၤပဟဲထီၣ်မၤတၢ်အံၤကဲထီၣ်က့ၤတၢ် ဆီၣ်ထွဲ မၤစၢၤလၢပဟံၣ်ဖိဃီဖိအဂီၢ်စ့ၢ်. တၢ်ခွဲးတၢ်ယၥ်သ့ၣ်တဖၣ်အံၤယထံၣ်လၢဖးဂ့ၤညါလၢသးစၢ်အဂီၢ်န့ၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဘၣ်ကီဘၣ်ခဲဒဲကဝီၤဖိအဂၤ(၇၀၀၀)ဃၣ်ဃၣ်လၢအဟးထီၣ်မၤတၢ်မၤတၢ်ချၢလၢအဖိးသဲစးလၢကၠီၣ်တဲၣ်တၢ်မၤကစၢ်ဟဲကိးဝဲတဖၣ်အံၤ တနီၤန့ၣ်လဲၤ မၤဝဲတၢ်လၢမ့ၣ်အူပျံၤတၢ်မၤလီၢ်,တၢ်တ့ဟံၣ်ဘှီဟံၣ်,တၢ်သူၣ်တၢ်ဖျး,စဲးဖီကဟၣ်တၢ်မၤလီၢ်, တၢ်ဘိသိတၢ်ဖံး တၢ်မၤလီၢ်ဃုၥ်ဒီး တၢ်မၤလီၢ်လၢအဂၤအိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.