လါအီကူး ၄ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်ကဝီၤ လါယူၤလံတလါအတီၢ်ပူၤ တၢ်ဒုးကဲထီၣ်ဝဲ အဘျီ(၂၀)ဘျဲၣ်ဒီး ပယီၤသုးတကပၤသံဝဲ(၁၀)ဂၤ,ဘၣ်ဒိဘၣ်ထံးဝဲ(၁၅)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီ အပူၤ န့ၣ်လီၤ.
ဘံလ့ကီၢ်ဆၣ်,သထူၣ်ကီၢ်ဆၣ်,ကၠဲးထိၣ်ကီၢ်ဆၣ်ဒီးဖၣ်အၣ်ကီၢ်ဆၣ်အပူၤ အပူၤကွံၥ်လါယူၤလံ ၁ သီတုၤ ၃၁ သီ လၢတလါအတီၢ် ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂, သုးရ့ၣ်-၃, ကညီဒီကလုၥ်ဂၢၤသးကရၢ (KNDO) သုးရ့ၣ်-၂ သုးပၥ်ဖှိၣ်ကရူၢ်အဘၢၣ်စၢၤ တၢ်ဒုးကဲထီၣ်ဝဲ(၂၂)ဘျီန့ၣ်လီၤ.
ဒီးလၢတၢ်ဒုးကဲထီၣ်အံၤအပူၤန့ၣ် ပယီၤသုးသံဘၣ်ဒိဘၣ်ထံး(၂၅)ဂၤအမဲၥ်ညါ (KNLA)တၢ်ပၢၢ်ဆၢသုးပၥ်ဖှိၣ်ကရူၢ် မၤန့ၢ်ဝဲ ပယီၤသုးအသိလ့ၣ်(၃)ခိၣ် ဒီး အသိလ့ၣ်ဟးဂီၤဝဲ(၁)ခိၣ်အဂ့ၢ်န့ၣ် တလါတဘျီတၢ်မၤနီၣ်စရီအပူၤ ပၥ်ဖျါဝဲန့ၣ်လီၤ.
တကးဒံးဘၣ်လၢလါယူၤလံဒီတလါအတီၢ်ပူၤအံၤစ့ၢ်ကီး ဘူးဒးကညီသုးမုၢ်ဒိၣ်(DKBA), နီၣ်ဂံၢ်(၃၁၀)အမျိၥ်သုး, သုးတြိၤ(၄၄) အမျိၥ်သုး, (ခလရ-၈)သုးရ့ၣ်သ့ၣ်တဖၣ်အံၤ ခးလီၤကျိဖးဒိၣ်(၅)ဘျီ,ကဘီယူၤလဲၤခးလီၤတၢ်(၁)ဘျီ ဒီး နုၥ်လီၤဒွဲၣ်ကမျၢၢ် ဟံၣ် (၂)ဘျီအဃိ ကမျၢၢ်ဘၣ်ဒိ(၁)ဂၤဒီး ဟံၣ်,ကျးဆါတၢ်,တၢ်ဘှီစဲးကၢးတၢ်သူၣ်ထီၣ်လီၢ် ဟးဂီၤဝဲ(၁၁)ဖျၢၣ်အမဲၥ်ညါ သိလ့ၣ်ဟးဂီၤ စ့ၢ်ကီးဝဲ (၃)ခိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
(သုးက့ ၁)တၢ်ပၢဟီၣ်ကဝီၤ အပူၤကွံၥ်လါယူၤတလါအတီၢ်ပူၤန့ၣ်စ့ၢ်ကီး ပယီၤသုးဒီးဟီၣ်ကဝီၤ(KNLA),(KNDO) တၢ်ပၢၢ်ဆၢ သုးပၥ်ဖှိၣ်ကရူၢ်အဘၢၣ်စၢၤတၢ်ဒုးကဲထီၣ်(၁၇)ဘျီ ဒီး ပယီၤသုးသံ(၁၃)ဂၤ,ဘၣ်ဒိဘၣ်ထံး(၁၇)ဂၤဒံးဒီး တုၤလၢခဲအံၤ ဟီၣ်ကဝီၤ တၢ်လီၢ်လၢပယီၤသုးဆီလီၤသးဟူးဂဲၤဝဲတဖၣ်န့ၣ် ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢခံခီခံကပၤအဘၢၣ်စၢၤ အဖၢမုၢ် န့ၣ် လီၤ.
