လါစဲးပထ့ဘၢၣ် ၄သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်အပူၤ တၢ်မၤကစၢ်သ့ၣ်ခိၣ်လၢအတူၢ်လိၥ်ဝဲ ထံဂုၤကီၢ်ဂၤတဖိးသဲစးခီကီၢ်ပှၤမၤတၢ်ဖိဒီး ဟ့ၣ်ဝဲတၢ်ပျဲ ကဖံးမၤဝဲ တၢ်ဖံးတၢ်မၤလၢပှၤခီကီၢ်မၤတန့ၢ်ဘၣ်သ့ၣ်တဖၣ်န့ၣ် တၢ်ကစံၣ်ညီၣ်ဒီး ဟံးန့ၢ်အရ့လၢ လီၤ ဘၣ်ဃိၥ်ပူၤဒီး စ့အီၣ်လိး တဖၣ်အဂ့ၢ်, ကၠီၣ်တဲၣ်ပဒိၣ်ထုးထီၣ်ပၥ်ဖျါဟ့ၣ်ပလီၢ်ဝဲဒၣ်န့ၣ်လီၤ.
တၢ်ထုးထီၣ်ပၥ်ဖျါအပူၤ, တၢ်မၤကစၢ်ခိၣ်နၢ်လၢအတူၢ်လိၥ်တဖိးသဲစးပှၤမၤတၢ်ဖိ ဒီးဟ့ၣ်တၢ်ပျဲလၢ ထံဂုၤကီၢ်ဂၤ ပှၤမၤ တၢ်ဖိတဖၣ် ကဖံးမၤဝဲ တၢ်ဖံးတၢ်မၤလၢ တၢ်ပၥ်ပနီၣ်ဝဲထဲကၠီၣ်တဲၣ်ထံဖိကီၢ်ဖိတဖၣ်အဂီၢ်အံၤ ကဟံး ထီၣ်ဖီၣ်ထီၣ်ဝဲ အရ့ဒိၣ်ဒိၣ်မုၢ်မုၢ်ဒီး ကစံၣ် ညီၣ်ဝဲလၢ တၢ်ကဘၣ်ဟ့ၣ်စ့အီၣ်လိးလၢပှၤမၤတၢ်ဖိတဂၤအဂီၢ် (၁၀,၀၀၀) ဘး တုၤ (၁၀၀,၀၀၀)ဘး အိၣ်ဝဲအဂ့ၢ်, သ့ၣ်ညါ ဘၣ်န့ၣ်လီၤ.
တကးဒံးဘၣ်, တၢ်မၤကစၢ်အခိၣ်သ့ၣ်တဖၣ်အံၤ မ့ၢ်ဆဲးမၤကမၣ်ဒီးဝဲတၢ်သိၣ်တၢ်သီတၢ်ဘျၢအသီတဘျီန့ၣ် တၢ်က ဒုးလီၤဝဲလၢဃိၥ်ပူၤ(၁)နံၣ်ဃုၥ်ဒီးကဘၣ်ဟ့ၣ်ဝဲစ့အီၣ်လိး (၅၀,၀၀၀)ဘးတုၤ (၂၀၀,၀၀၀)ဘးအသိး, တၢ်ကပံးကွံၥ်ဝဲ အတၢ်ကိးန့ၢ်ထံဂုၤကီၢ်ဂၤပှၤမၤတၢ်ဖိအခွဲး (၃)နံၣ်စ့ၢ်ကီးအဂ့ၢ်,သ့ၣ်ညါဘၣ်န့ၣ်လီၤ.
ကၠီၣ်တဲၣ်ပဒိၣ် အတၢ်ထုးထီၣ်ဟ့ၣ်ပလီၢ် ထံဖိကီၢ်ဖိတၢ်မၤကစၢ်ခိၣ်နၢ်တဖၣ်တၢ်ဖီခိၣ် ပှၤဟူးဂဲၤလၢ ကီၢ်ပယီၤခီ ကီၢ် ပှၤမၤတၢ်ဖိဂ့ၢ်ဝီ အူမိကၠိ ပဲၥ်ထံနီၤဖးစံးဝဲလၢ “တၢ်အံၤမ့ၢ်ဝဲ တၢ်ကနီဟးထီၣ်ကွံၥ်ပှၤထံဂုၤကီၢ်ဂၤဖိတဖၣ် တၢ်သိၣ်တၢ် သီ တၢ်ဘျၢ လၢ ထံလီၢ်ကီၢ်ပူၤဖဲတၢ်ရၤလီၤအီၤလၢ လါအီကူၥ်အပူၤန့ၣ်လီၤ. တုၤခဲအံၤတၢ်ဟံးန့ၢ်အရ့တ အိၣ်ဒံးဝဲဘၣ် န့ၣ် ပတဲလၢ ကၠီၣ်တဲၣ်ထံကီၢ် ပှၤအိၣ်ဒီးမူဒါ(၅)နၢၣ် လၢၥ်သးတလီၤပလိၥ်ဒံးဘၣ်အဃိန့ၣ်လီၤ .ဘၣ်ဆၣ်ထုးထီၣ်ပၥ်ဖျါဝဲ ဝံၤလံအဃိ အဝဲသ့ၣ်စးထီၣ်မၤဝဲတၢ်ဟူးတၢ်ဂဲၤသ့ဝဲလီၤ ” အဂ့ၢ် စံးဝဲဒၣ်န့ၣ်လီၤ.
ကီၢ်ကၠီၣ်တဲၣ်အပူၤ တၢ်တ့သ့ၣ်တၢ်စုသ့ခီၣ်ဘၣ်တၢ်မၤ, တၢ်ဆါလၢၢ်လ့တၢ်မျၢၢ်ပလဲ, တၢ်နဲၣ်တမှံၤကျဲ(Tour guide), တၢ်နီသိလ့ၣ်, တၢ်ကိးဆါတၤတၢ်, တၢ်တံၥ်ခိၣ်, တၢ်တ့ဘူဒးကစၢ်ကျီ ဃုၥ်ဒီးတၢ်မၤလၢအဂၤတဖၣ် လီၤဆီဒၣ်တၢ်ထံဂုၤကီၢ်ဂၤခီကီၢ်ပှၤမၤတၢ်ဖိတဖၣ်အဂီၢ် တၢ်ပၥ်ပနီၣ်တြီတံၥ်ဃၥ်ဝဲ အိၣ်(၂၇)မံၤအဂ့ၢ်,သ့ၣ်ညါဘၣ်န့ၣ်လီၤ.
ဒီးတၢ်ဖံးတၢ်မၤသ့ၣ်တဖၣ်အံၤ ထံဂုၤကီၢ်ဂၤပှၤမၤတၢ်ဖိတဂၤလၢ်လၢ် မ့လဲၤခီပတၥ် မၤကမၣ်ဝဲန့ၣ် တၢ်စံၣ်ညီၣ် ဝဲအီၤ လၢစ့အီၣ် လိး (၅,၀၀၀)ဘးတုၤ(၅၀,၀၀၀)ဘး သ့တၢ်သိၣ်တၢ်သီတၢ်ဘျၢအိၣ်ဝဲအသိး, တၢ်နီဟးထီၣ်ကွံၥ်ဝဲလၢ ကၠီၣ် တဲၣ်ထံကီၢ်ပူၤသ့စ့ၢ်ကီးဝဲအမဲၥ်ညါ တၢ်ပတုၥ်ကွံၥ် ဝဲ အတၢ်နုၥ်လီၤဖံးမၤတၢ်ဆူ ကီၢ်ကၠီၣ်တဲၣ်ပူၤ လံၥ်အုၣ်ကီၤသး (၂) နံၣ်သ့ဝဲအဂ့ၢ်, သ့ၣ်ညါဘၣ်န့ၣ်လီၤ.
လၢတၢ်ရဲၣ်သဲကတီၤက့ၤဝဲထံဂုၤကီၢ်ဂၤခီကီၢ်ပှၤမၤတၢ်ဖိဂ့ၢ်ဝီအဂီၢ် တၢ်ရၤလီၤဝဲ တၢ်နီဟးထီၣ် ထံဂုၤကီၢ်ဂၤ ပှၤမၤကမၣ်တၢ်ဖိတဖၣ်လၢ ထံကီၢ်ပူၤဝံၤအလီၢ်ခံ, ကၠီၣ်တဲၣ်ပဒိၣ်ပပှၢ်ဒီး ပှၤဘၣ်မူဘၣ်ဒါသ့ၣ် တဖၣ်အံၤ မၤဃံးထီၣ်ဝဲ အတၢ်ဟူးတၢ်ဂဲၤလၢ ထံဂုၤကီၢ်ဂၤခီကီၢ်ပှၤမၤတၢ်ဖိဒီး တၢ်မၤကစၢ်တဖၣ်ခံကပၤလၢၥ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး, ဒ်ကၠီၣ်တဲၣ်ပှၤဘၣ်မူဘၣ်ဒါတဖၣ်သမံသမိးဃုထံၣ်ဝဲအသိးန့ၣ် (၂၀၂၆)နံၣ်အပူၤ ကီၢ်ကၠီၣ်တဲၣ်ဒီတဘ့ၣ် ပတီၢ် မုၢ်ကျိၤဝဲၤကွၥ်တၢ်ဖံးတၢ်မၤအတီၤ (၇၄,၀၀၀)ဘျဲၣ်အပူၤ ထံဂုၤကီၢ်ဂၤခီကီၢ်ပှၤမၤတၢ်ဖိတဖၣ် နုၥ်လီၤမၤဝဲ တဖိးသဲစး တၢ်ပၥ်ပနီၣ် တၢ်ဖံးတၢ်မၤအိၣ်ဝဲလၢအတီၤ (၁,၇၀၀)ဘျဲၣ်အဂ့ၢ်, ကၠီၣ်တဲၣ်ပဒိၣ် ပၥ်ဖျါထီၣ်ဝဲဒၣ်န့ၣ်လီၤ.
