လါယူၤ ၂၄ သီ, ၂၀၂၆ နံၣ်, ခ့ၣ်အဲးစံၣ်
ဘုလိၥ်ကျိကပၤ တၢ်မၤထူလီၢ်လၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ် ကရူၢ်(၄)ဘ့ၣ်အပူၤအံၤ ကဘီယူၤလဲၤခးလီၤတၢ်(၃)သီတပယူ ၥ် ဃီအဃိ ပှၤမၤတၢ်ဖိသံဘၣ်ဒိဘၣ်ထံးအိၣ်ဝဲဒီး တၢ်ဖံးတၢ်မၤလီၢ် ဟးဂူၥ်ဟးဂီၤအသိး ကမျၢၢ်ဃုၥ်ဒီး ပှၤမၤတၢ်ဖိတဖၣ် ဃ့ၢ်ထီၣ် ဝဲခဲလၢၥ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
စးထီၣ်ဖဲလါယူၤ ၂၂ သီတုၤ ၂၃ သီ ပယီၤသုးကဘီယူၤပညိၣ်လဲၤတ့ၢ်လီၤဝဲမ့ၣ်ပိၢ်တဖၣ်လၢ မဲးပြ့ခံကရူၢ်, ပံၣ်တံၣ်ခံကရူၢ်, စွ့ၣ်လီအ့ကရူၢ် ဒီး အံစူၢ်ခံကရူၢ် ဘုလိၥ်ကျိ(ဘီးလင်းချောင်း)အခိၣ်အဃၢၤဒူသဝီတဖၣ်အပူၤန့ၣ်လီၤ.
ဖဲလါယူၤ ၂၂ သီ မုၢ်ထူၣ် ၁၂း၀၀ နံၣ်တုၤဃီၤလၢ ဟါခီ ၄း၀၀ နၣ်ရံၣ်တစုန့ၣ် တၢ်မၤထူလီၢ်လၢအိၣ်ပံၣ်တံၣ်ခံကရူၢ် ချၢၣ်လီၤစဲၤ ဒီး အံစူၢ်ခံကရူၢ် ၀ၣ်ကတဲၥ်သဝီအခိၣ်အဃၢၤတဖၣ်အံၤ ကဘီယူၤစးထီၣ်လဲၤတ့ၢ်လီၤဝဲမ့ၣ်ပိၢ်တဖၣ်န့ၣ်လီၤ.
လၢတၢ်န့ၣ်အဃိကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်ပှၤမၤထူဖိလၢဟဲမၤတၢ်မၤတၢ်ဖဲန့ၣ်တဖၣ်သံဝဲ(၁)ဂၤ,ဘၣ်ဒိ ဘၣ်ထံးတစှၤန့ၢ်(၅)ဂၤ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
တကးဒံးဘၣ် ၂၂ သီဝံၤမုၢ်ဆ့ၣ်ထီၣ်မဟါလါယူၤ ၂၃ သီ ဂီၤခီ ၁၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး ကဘီယူၤ ဟဲတ့ၢ်လီၤကဒီးမ့ၣ်ပိၣ်လၢ မဲးပြ့ခံကရူၢ် ညၣ်ဆှုၣ်ထၣ်, ပဒၣ်ဒီၣ်သဝီ တၢ်မၤထူလီၢ်အခိၣ်အဃၢၤတဖၣ်န့ၣ်လီၤ.
ဒ်န့ၣ်အသိးဖဲတနံၤအံၤလါယူၤ ၂၄ သီ ဂီၤခီ ၁၀း၃၀ ဃၣ်ဃၣ်အဆၢကတီၢ်န့ၣ်စ့ၢ်ကီး ကဘီယူၤဟဲခးလီၤကဒီးတၢ်လၢ စွ့ၣ်လီအ့ကရူၢ် နးကၠံတိၤဆၢလၥ် တၢ်ခူၣ်ထူလီၢ်ဒီး တိၤဆၢခိၣ် ဝၣ်ကတဲၥ်သဝီ တၢ်ခူၣ်ထူလီၢ်သ့ၣ်တဖၣ် အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးကဘီယူၤအတၢ်ဟဲခးလီၤတၢ်လၢတၢ်မၤထူလီၢ်ဘျီဝဲအံၤတၢ်ဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဝဲလၢ “ဖဲ ၂၂ သီန့ၣ်ဟဲကွံၥ်လီၤဝဲဒၣ်ဖဲဘီပီၢ်ထၣ်,ချၢၣ်လီၤစဲၤဒီးဝၣ်ကတဲၥ်သဝီခိၣ်ဃၢၤ ထံကျိပူၤ,ထံကျိကၢၢ်ခိၣ်ဝံၤလၢခံတနံၤ ဖဲမဟါ ၂၃ သီန့ၣ် ဟဲကွံၥ်လီၤဝဲလၢဝၣ်ဆှုၣ်ထၣ်,ပတၣ်တီၣ်,စံကိသဝီခိၣ်ဃၢၤဒီးထံကျိပူၤ.ဖဲတနံၤအံၤ ၂၄ သီဖဲမုကၢး န့ၣ်ဟဲကွံၥ် လီၤကဒီးဝဲလံ.ကွံၥ်လီၤဝဲလၢနးကၠံတိၤဆၢလၥ်စွ့ၣ်လီအ့သဝီဒီးနးကၠံတိၤဆၢခိၣ်ဝၣ်ကတဲၥ်လီၤ.ဖဲ ၂၂ သီတနံၤန့ၣ်ပှၤသံတဂၤ ဒီး ဘၣ်ဒိ(၅)ဂၤ.မ့မ့ၢ်လၢချၢၣ်လီၤစဲၤတကပၤခီန့ၣ်အသံတဂၤ,အဘၣ်ဒိဘၣ်ထံးအိၣ်ဘၣ်ဆၣ်တ လီၤတံၢ်ဒံးဘၣ်.မ့မ့ၢ် လၢဝၣ်ကတဲၥ်ခီန့ၣ်ပှၤဘၣ်ဒိတအိၣ်ဘၣ်.အိၣ်ဒၣ်ဘၣ်ဒိဘၣ်ထံးဝဲပှၤမၤတၢ်တၢ်ပီးတၢ်လီတဖၣ်လီၤ”အဂ့ၢ်န့ၣ် စံးဘၣ်ခ့ၣ် အဲးစံၣ်-ကညီတၢ်ကစီၣ်န့ၣ်လီၤ.
တၢ်မၤထူလီၢ်လၢအိၣ်ဟီၣ်ကဝီၤဖဲန့ၣ်ပူၤလၢကဘီယူၤလဲၤခးလီၤတၢ်အံၤန့ၣ် ဘၣ်တၢ်ဟ့ၣ်တၢ်ပျဲလၢလီၢ်ကဝီၤ(ခ့ၣ်အဲၣ်ယူၣ်) ဒီး (PDF)တၢ်ပၢၢ်ဆၢကရူၢ်အသိး တၢ်ခိတၢ်သွဲသ့ၣ်တဖၣ်အံၤကရူၢ်သ့ၣ်တဖၣ်အံၤဒိးန့ၢ်ဘၣ်ဝဲဘၣ်ဆၣ် ခီဖျိထံကီၢ်ပဒိၣ်တဒိးန့ၢ် ဘၣ်ဝဲအဃိ ဘၣ်ဟဲမၤဟးဂီၤဝဲဒ်အံၤအဂ့ၢ်န့ၣ် သုးကရူၢ်က့ၤခီၣ်ဆၢကဒါဝဲလၢအတၢ်ကစီၣ်ပူၤအိၣ်ဝဲဒၣ်န့ၣ်လီၤ.
ဘၣ်ဃးသုးကရူၢ်အတၢ်က့ၤခီၣ်ဆၢအံၤဒီးပျီပူၤတၢ်အိၣ်သးနီၢ်နီၢ်တခီန့ၣ်လီၤဆီလိၥ်အသးဒီးမ့နီၢ်နီၢ်တခီတၢ်မၤထူလီၢ်လၢအိၣ် ဆီလီၤသးဘူးဝဲဒီးပယီၤသုးကလၢၤတဖၣ်န့ၣ် တၢ်ခိတၢ်သွဲတဖၣ်ခ့ၣ်အဲၣ်ယူၣ်အမဲၥ်ညါဘၣ်ဟ့ၣ်စ့ၢ်ကီးဝဲသုးကလၢၤတဖၣ်အံၤ အိၣ်ဝဲအဂ့ၢ်န့ၣ် ပဒိၣ်စီၤအ့နဲၤ စံးအါထီၣ်ဝဲန့ၣ်လီၤ.
အဝဲစံးဝဲလၢ“ဒ်သိးနးကၠံန့ၣ်အိၣ်ဒီးပယီၤသုးကလၢၤအဃိတၢ်ခိတၢ်သွဲန့ၣ်ပှၤဘၣ်ဟ့ၣ်အီၤလီၤ.အအီၣ်ဘၣ်ဝဲလီၤဘၣ်ဆၣ် ပှၤကဟဲမၤဟးဂီၤတၢ်မၤလီၢ်တဖၣ်အံၤနါက့အဝဲသ့ၣ်တြီဝဲတန့ၢ်စ့ၢ်ကီးဘၣ်.ပှၤကမျၢၢ်န့ၣ်ဘၣ်ဟ့ၣ်တၢ်ခိတၢ်သွဲခံကပၤလၢၤလီၤ.မ့မ့ၢ်ပခ့ၣ်အဲၣ်ယူၣ်ခီဒ်တၢ်ပၥ်ပနီၣ်ဝဲအကျိၤအကျဲအသိးဘၣ်ဟ့ၣ်ဝဲလီၤ”အဂ့ၢ်န့ၣ် စံးဝဲန့ၣ်လီၤ.
ဒ်တၢ်ကစီၣ်သန့တနီၤပၥ်ဖျါဝဲအသိးန့ၣ် ဘုလိၥ်ကျိတၢ်မၤထူလီၢ်လၢကဘီယူၤလဲၤခးလီၤတၢ်ခဲအံၤန့ၣ် တရူးထံဖိကီၢ်ဖိပှၤ စ့အိၣ် ဟဲနုၥ်လီၤမၤဝဲအိၣ်ဒီး ဘၣ်ဆၣ်တၢ်ဖံးတၢ်မၤလီၢ်သ့ၣ်တဖၣ်အံၤ ဖဲတၢ်ဃံးတၢ်စ့ၤအကတီၢ်လၢတၢ်လုၢ်အီၣ်နီၢ်သးသမူ တၢ်ဖံးတၢ်မၤတခါဂီၢ်အါဒၣ်တက့ၢ်မ့ၢ်ဝဲလီၢ်ကဝီၤကမျၢၢ်တဖၣ်လဲၤမၤဝဲလီၤအဂ့ၢ်န့ၣ် ပဒိၣ်စီၤအ့နဲၤ စံး ဝဲန့ၣ်လီၤ.
တကီၢ်ခါခဲအံၤ ခီဖျိပယီၤသုးကဘီယူၤဟဲခးလီၤတၢ်လၢဘုလိၥ်ကျိဒီတကျိၤ တၢ်မၤထူလီၢ်လၢ(၃)သီတပယူၥ်ဃီဒီး တၢ်သံ တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအိၣ်ထီၣ်ဒ်အံၤအဖီခိၣ် ဒူသဝီလၢအိၣ်ဘူးဖဲန့ၣ်ဃုၥ်ဒီးပှၤမၤထူဖိခဲလၢၥ်ဃၣ်ဃၣ် ပၥ်တ့ၢ်ကွံၥ်အတၢ်ဖံးတၢ်မၤဃ့ၢ်ထီၣ်ဟးပလဲၥ်သးလၢတၢ်ဘံၣ် တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
