လါစဲးပထ့ဘၢၣ် ၁၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်ကဝီၤအပူၤ ဖဲတၢ်မၤလၤကပီၤဝဲ ၃၅ ဝီတဝီ ကညီဒီ ကလုၥ်ပၢၤကီၢ်သုး(KNPF)မုၢ်နံၤတၢ်ရဲၣ်တၢ်ကျဲၤပူၤအခါန့ၣ် ကသံၣ်မူၤဘှီးလၢတၢ်ဖီၣ်န့ၢ်ဝဲတဖၣ်ဘၣ်တၢ်ဒွဲၣ်အူအီၣ်မၤဟးဂီၤဃုၥ်ဝဲ အဂ့ၢ် န့ၣ် ကီၢ်ရ့ၣ်ကစီၣ်ထုးထီၣ်ပၥ်ဖျါဝဲဖဲမဟါလါစဲးပထ့ဘၢၣ် ၁၀ သီအံၤန့ၣ်လီၤ.
ဖဲအပူၤကွံၥ်လါစဲးပထ့ဘၢၣ် ၉ သီလၢအလီၤဘၣ်ဝဲကညီဒီကလုၥ်ပၢၤကီၢ်သုးမုၢ်နံၤပှဲၤထီၣ်ဝဲ ၃၅ ဝီတဝီအံၤ ခ့ၣ်အဲၣ်ယူၣ် ဟီၣ်ကဝီၤအပူၤတၢ်မၤလၤကပီၤဝဲမုၢ်နံၤအံၤလၢတၢ်လီၢ်အါတီၤအကျါ လီၤဆီဒၣ်တၢ်ဒူပျၥ်ယၥ်ကီၢ်ရ့ၣ်အပူၤ တၢ်မၤလၤကပီၤမုၢ်နံၤ တၢ်ရဲၣ်တၢ်ကျဲၤအပူၤန့ၣ် ကသံၣ်ကသ့ၣ်ဃုၥ်ဒီးကသံၣ်မူၤဘှီးအဂၤလၢတၢ်ဖီၣ်န့ၢ်ဝဲဖဲဟီၣ်ကဝီၤအပူၤအံၤတဖၣ် (KNPF) သုးကရူၢ် တီခိၣ်ရိၣ်မဲဒွဲၣ်အူအီၣ်မၤဟးဂီၤကွံၥ်ဝဲလၢဒၣ်န့ၣ်လီၤ.
ဒ်ခ့ၣ်အဲၣ်ယူၣ်အလံၥ်တၢ်ပၥ်ဖျါပူၤအသိးန့ၣ် ကသံၣ်ကသ့ၣ်ကသံၣ်မူၤဘှီးလၢတၢ်ဒွဲၣ်အူအီၣ်မၤဟးဂီၤကွံၥ်ဝဲသ့ၣ်တဖၣ်န့ၣ်မ့ၢ်ဝဲ WY ကသံၣ်ကသ့ၣ် (၁၁၆,၉၃၅)ဖျၢၣ်ဒီး ပံၤဝါ(၁၀၀)ကရၤမ် (၂)ကး, ညါဖီ(၂)ဘိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တချုးဒူပျၥ်ယၥ်မၤဝဲတၢ်ဒွဲၣ်အူအီၣ်မၤဟးဂီၤကသံၣ်မူၤဘှီးအံၤဒံးဘၣ် ကီၢ်ရ့ၣ်/သုးက့ဟီၣ်ကဝီၤလၢအဂၤတဖၣ်စ့ၢ်ကီး ကသံၣ်မူၤဘှီးလၢတၢ်ဖီၣ်န့ၢ်ဝဲတဖၣ်ခ့ၣ်အဲၣ်ယူၣ်ဒီး(KNPF)တီခိၣ်ရိၣ်မဲဒွဲၣ်အူအီၣ်မၤဟးကွံၥ်ဝဲအိၣ်န့ၣ်လီၤ.
ဖဲအပူၤကွံၥ်လါယူၤအခါန့ၣ် တီအူကီၢ်ရ့ၣ်(သုးက့ ၂)ဟီၣ်ကဝီၤအပူၤ WY ကသံၣ်ကသ့ၣ်(၃)ကလီၢ်ဘျဲၣ်ဃုၥ်ဒီး ICE အကံလိ (၁၀၀၀)ဘျဲၣ် လၢတၢ်ဖီၣ်န့ၢ်ဝဲတဖၣ်(KNPF)ဒွဲၣ်အူအီၣ်မၤဟးဂီၤကွံၥ်ဝဲဒံးအသိး မုတြီၢ်ကီၢ်ရ့ၣ်(သုးက့ ၅)ဟီၣ်ကဝီၤ အပူၤကွံၥ် လါမ့ၤထီၣ်အခါန့ၣ်စ့ၢ်ကီး WY ကသံၣ်ကသ့ၣ်အကကွဲၢ်(၁၀)ဃၣ်ဃၣ်လၢတၢ်ဖီၣ်န့ၢ်ဝဲတဖၣ် KNPF မၤဒံးဝဲတၢ်ဒွဲၣ်အူ အီၣ်မၤ ဟးဂီၤတၢ်ရဲၣ်တၢ်ကျဲၤအံၤဒံးန့ၣ်လီၤ.
အဃိမ့ဘၣ်ကွၢ်ထဲဒၣ်တနံၣ်အံၤ(၂၀၂၆)တုၤဝဲဒၣ်ဖဲတလါအံၤလါစဲးပထ့ဘၢၣ်အံၤန့ၣ် ခ့ၣ်အဲၣ်ယူၣ်ဟီၣ်ကဝီၤအပူၤ တၢ်ဒွဲၣ်အူအီၣ် မၤဟးဂီၤကွံၥ်ကသံၣ်မူၤဘှီးလၢတၢ်ဖီၣ်န့ၢ်ဝဲတဖၣ် အိၣ်လံဝဲ(၃)ဘျီလံအဂ့ၢ်န့ၣ် ခ့ၣ်အဲၣ်ယူၣ်အတၢ်ထုးထီၣ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ် ကီၢ်ရ့ၣ်/သုးက့(၇)ဘ့ၣ်အပူၤ သုးဟံန့ၢ်ဆူၣ်ထံကီၢ်တၢ်စိတၢ်ကမီၤဝံၤလီၢ်ခံ တၢ်ထုးထီၣ်ရၤလီၤမၤကၤကသံၣ်မူၤဘှီး ဒီး ပှၤသူဝဲကသံၣ်မူၤဘှီးဟဲအါထီၣ်အါဝဲဒၣ်ဒိၣ်ဒိၣ်မုၢ်မုၢ်အဂ့ၢ်န့ၣ် လီၢ်ကဝီၤဘၣ်ထွဲပှၤဘၣ်မူဘၣ်ဒါတဖၣ် စံးဘၣ်တ့ၢ်ဃၥ် ခ့ၣ်အဲးစံၣ်-ကညီတၢ်ကစီၣ်အိၣ်ဝဲဒၣ်န့ၣ်လီၤ.
ဒ်န့ၣ်အသိးခ့ၣ်အဲၣ်ယူၣ်တၢ်ပၢဟီၣ်ကဝီၤအမဲၥ်ညါ ကီၢ်ကၠီၣ်တဲၣ်-ကီၢ်ပယီၤထံဆၢကီၢ်ဆၢ လၢကၠီၣ်တဲၣ်တကပၤစ့ၢ်ကီးတၢ်ဖီၣ်န့ၢ်ဝဲ ပှၤစိၥ်ဆါကသံၣ်ကသ့ၣ်ကသံၣ်မူၤဘှီးဒီးပှၤသူစွဲတၢ်ဖိတဖၣ်စ့ၢ်ကီးအိၣ်ဝဲခဲအံၤခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.