လါစဲးပထ့ဘၢၣ် ၅သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၆) ဒူပျၥ်ယၥ်ကီၢ်ရ့ၣ် (နိၣ်တကီကီၢ်ဆၣ်) ဟီၣ်ကဝီၤအပူၤ မဟါလါ စဲးပထ့ဘၢၣ် (၄)သီအနံၤအပူၤ ကညီဒီကလုၥ်တၢ်ထူၣ် ဖျဲးသုးမုၢ်ဒိၣ် (KNLA)သုးရ့ၣ်(၂၈)အရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဒးဘီ လဲၤထံၣ်လိၥ်ဝဲ သုးကရူၢ်အပှၤလၢတၢ်ဖီၣ်န့ၢ်ဝဲဒီး ဟ့ၣ်လီၤသးပၥ်လီၤစုကဝဲၤတဖၣ်အဂ့ၢ်,သ့ၣ်ညါ ဘၣ်န့ၣ်လီၤ.
တၢ်ထံၣ်လိၥ်အိၣ်သကိးအပူၤ သုးခိၣ်ဒိၣ်ဂီၢ်ဂ့ၢ် စီၤဒးဘီ ကဟုကယၥ်ကွၢ်ထွဲဝဲ သုးကရူၢ် သုးပှၤဃိၥ်ဖိ(စ့ၣ်သိးပၣ်)ဒီး ပှၤ ပၥ်လီၤစုကဝဲၤဟ့ၣ်လီၤသးသ့ၣ်တဖၣ်ဂ့ၤဂ့ၤခဲလၢၥ်ဒီး သံကွၢ်သံဒိးဝဲ အတၢ်နုၥ်လီၤလၢသုးပူၤကဲထီၣ်သးအခီၣ်ထံးခီၣ်ဘိ ဟ့ၣ်ဝဲတၢ်ပျဲလၢပှၤသ့ၣ်တဖၣ်အံၤ ကတဲဖျါ ထီၣ်အတၢ်တူၢ်ဘၣ် သဘျ့ ဖျိဖျိဖျါဖျါကိးဂၤအဂ့ၢ်, သ့ၣ်ညါဘၣ်န့ၣ်လီၤ.
တၢ်မၤဝဲတၢ်ထံၣ်လိၥ်အိၣ်ဖှိၣ်တဲသကိးတၢ်ဒီးပှၤဃိၥ်ဖိဒီးပှၤလၢဟ့ၣ်လီၤသးပၥ်လီၤစုကဝဲၤသ့ၣ်တဖၣ် အံၤအတၢ် ပ ညိၣ် မ့ၢ်ဝဲ ဒ်သိး ကရှဲလဲဝဲ သုးကရူၢ် အတၢ်ရၤလီၤကမၣ်တၢ်ဂ့ၢ်တၢ်ကျိၤဒီး ကပၥ်ဖျါထီၣ်တၢ်အိၣ်သး အမ့ၢ်အတီနီၢ်ကီၢ် အဂ့ၢ် သုးခိၣ်ဒိၣ်ဂီၢ်ဂ့ၢ် စီၤဒးဘီ စံးဝဲဒ်အံၤန့ၣ်လီၤ.
အဝဲစံးဝဲလၢ“ပှၤသ့ၣ်တဖၣ်အံၤ ပသ့ၣ်ညါဘၣ်လၢ ဘၣ်တၢ်ဖီၣ်န့ၣ်ဆူၣ်အီၤမၤန့ၣ်ဆူၣ်အီၤလၢ ကျဲအါဘိန့ၣ်လီၤ. အဃိတၢ်ပညိၣ်န့ၣ် မ့ၢ်ဒၣ်တၢ်ပၥ်ဖျါထီၣ် တၢ်မ့ၢ်တၢ်တီလၢ သုးကရူၢ်အံၤ မၤဝဲကမျၢၢ် တဖၣ်ဒ်လဲၣ်န့ၣ်လီၤ. အဂၤတမံၤန့ၣ် တၢ်ဖီၣ်ပှၤ ကဲထီၣ်ဝံၤအလီၢ်ခံ, တၢ်ကဘၣ်ပၥ်ဖှိၣ်မၤသကိးတၢ်ဒီး တၢ်ပၢၢ်ဆၢကရူၢ်ကရၢဒ်လဲၣ်ဒီး ကဘၣ်ဆဲးကျိး ဆဲးကျၢဝဲဒ် လဲၣ်အဂ့ၢ် ပမၤဝဲတၢ်တဲသကိးတၢ်န့ၣ်လီၤ”အဂ့ၢ်ပၥ်ဖျါဝဲန့ၣ်လီၤ.
တၢ်ထံၣ်လိၥ်အိၣ်သကိး ပှၤဃိၥ်ဖိဒီး ပှၤပၥ်လီၤစုကဝဲၤဟ့ၣ်လီၤသးတဖၣ်ဘျီဝဲအံၤအပူၤ သးနံၣ် (၁၇) နံၣ် တုၤ (၄၆)နံၣ် သုးကရူၢ်ပှၤဃိၥ်ဖိဒီးပှၤပၥ်လီၤစုကဝဲၤဟ့ၣ်လီၤသး ပၥ်ဖှိၣ်သး ခဲလၢၥ်အိၣ်ဝဲ (၂၅)ဂၤဒီး ပှၤသ့ၣ်တဖၣ်အံၤ တနီၤဘၣ် တၢ်ဖီၣ်(ပီၤတၤ)အီၤဖဲ အီၤဖဲအိၣ်လၢဟံၣ် အဆၢ က တီၢ်ဒီး တနီၤဘၣ်တၢ်ဖီၣ်အီၤလၢ လဲၤဖံးလဲၤမၤ ဟးထီၣ်လၢ တၢ် ချၢ ကတီၢ်အဂ့ၢ်,သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, တၢ်မၤဝဲတၢ်ထံၣ်လိၥ်အိၣ်သကိးဝံၤအလီၢ်ခံ, ပှၤ(၂၅)ဂၤအကျါ (၇)ဂၤသူၣ်ဆူၣ်သးဂဲၤဝဲဒၣ်လၢ တၢ်ကပၥ်ဖှိၣ်မၤ သကိး ဒီးတၢ်ပၢၢ်ဆၢ ကရူၢ်ကရၢ အဂ့ၢ်, သ့ၣ်ညါဘၣ်န့ၣ်လီၤ.
ကညီဒီကလုၥ်တၢ်ထူၣ် ဖျဲးသုးမုၢ်ဒိၣ် (KNLA)သုးရ့ၣ်(၂၈)အရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤဒးဘီ အံၤ အပူၤကွံၥ် နံၣ်တဖၣ် အပူၤစ့ၢ်ကီး မၤဝဲတၢ်ထံၣ်လိၥ်အိၣ်သကိးပှၤဃိၥ်ဖိဒီးပှၤပၥ်လီၤစုကဝဲၤ ဟ့ၣ်လီၤသးတဖၣ်ဒ်အံၤအိၣ်ဝဲ အဂ့ၢ်, ကတိၤ ပၥ်ဖျါဝဲဒၣ်န့ၣ်လီၤ
ဒ်န့ၣ်အသိး, ပှၤလၢတၢ်ဖီၣ်န့ၢ်ဆူၣ်ဘၣ်နုၥ်လီၤဝဲသုးကရူၢ်ဒုးယၤဂ့ၢ်ဝီတၢ်ဖံးတၢ်မၤဒီး ဃ့ၢ်ပူၤဖျဲးထီၣ်ကွံၥ်ဝဲအသးသ့ၣ် တဖၣ် ကဒိးန့ၢ်ဘၣ်ဝဲတၢ်ကဟုကယၥ်လၢအဂ့ၤဒီး ဆဲးအိၣ်မူဘၣ်ဝဲလၢပှဲၤဒီးပှၤကညီအသူၣ်သ့ၣ်လၤကပီၤ အဂ့ၢ်, သုးခိၣ်ဒိၣ်ဂီၢ်ဂ့ၢ် သုးခိၣ်စီၤဒးဘီ ပၥ်ဖျါဝဲဒၣ်စ့ၢ်ကီးန့ၣ်လီၤ.
သုးကရူၢ်အံၤ ဟံးန့ၢ်တၢ်စိကမီၤဒီး ဘိးဘၣ်ရၤလီၤဝဲ ကမျၢၢ်တၢ်ဘၣ်ကဲသုးဝံၤအလီၢ်ခံ လၢကမၤ အါထီၣ်ဝဲသုးဂံၢ်ဘါ အဂီၢ် မၤဝဲတၢ်ဖီၣ် ကမျၢၢ်ထံဖိကီၢ် လၢကီၢ်ပယီၤဒီတဘ့ၣ်ပတီၢ် အိၣ်ဝဲတပယူၥ်ဃီအဂ့ၢ် သ့ၣ်ညါဘၣ်န့ၣ်လီၤ.
လၢန့ၣ်အဃိ, ကမျၢၢ်ထံဖိကီၢ်ဖိလၢ ဘၣ်တၢ်ဖီၣ်န့ၢ်ဆူၣ်ဒီး အဲၣ်ဒိးဃ့ၢ်ပူၤဖျဲးထီၣ်သးလၢ သုးကရူၢ်အတၢ်မၤအၢမၤနး အပူၤသ့ၣ်တဖၣ်အံၤ ဆဲးကျိးဆဲးကျၢဝဲ တၢ်ပၢၢ်ဆၢကရူၢ်ကရၢ ဘၣ်ထွဲ ပှၤဘၣ်မူဘၣ်ဒါတဖၣ် သ့ဝဲ တပယူၥ်ဃီအဂ့ၢ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) တကပၤကွဲမုၥ်ဒီး ဘိးဘၣ်ရၤလီၤဒုးသ့ၣ်ညါဝဲဒၣ်အိၣ်ဝဲန့ၣ်လီၤ.
