လါအီးကထိဘၢၣ် ၁၃သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆) ဝီၢ်ရ့ၣ်ကီၢ်ဆၣ်အပူၤ တၢ်ဒုးကဲထီၣ်ဝဲလၢ ပယီၤသုးကရူၢ်ဒီး တၢ်ပၢၢ်ဆၢသုးပၥ်ဖှိၣ်အဘၢၣ်စၢၤဖဲ တကူၣ်တၢၣ်သီကရူၢ် ပူၣ်လ့ၤသဝီဃၢၤ ဝံၤ အလီၢ်ခံ, သုးကရူၢ်တ ပၤဖီၣ်က့ၤကိး ဝဲကမျၢၢ်လီၢ်ကဝီၤဖိတစှၤန့ၢ် (၁၀)ဂၤအိၣ်ဝဲအဂ့ၢ်, သ့ၣ်ညါဘၣ်လၢ လီၢ်ကဝီၤဖိအအိၣ်န့ၣ်လီၤ.
မဟါလါအီးကထိဘၢၣ်(၁၂)သီအနံၤအပူၤ, တၢ်ဒုးကဲထီၣ်ဝဲလၢ ပယီၤသုးကရူၢ်ဒီး တၢ်ပၢၢ်ဆၢ သုးကရူၢ်အဘၢၣ်စၢၤ ယံၥ်ဝဲလၢ (၂)နၣ်ရံၣ်ဃၣ်ဃၣ်အတီၢ်ပူၤ ပယီၤသုးကရူၢ်တပၤ သူဝဲ ကျိဖးဒိၣ်, ကျိဖိ မၤတၢ်ခးလီၤတၢ် အိၣ်ဝဲအဂ့ၢ်, လီၢ် ကဝီၤတၢ်ကစီၣ်သန့တဖၣ် ပၥ်ဖျါထီၣ်ဝဲအိၣ်ဝဲန့ၣ်လီၤ.
ဖဲန့ၣ်အလီၢ်ခံ ပယီၤသုးလၢအိၣ်အဘ့ၣ်သုးကလၢၤပူၤတဖၣ်အံၤ ဟးထီၣ်ကွံၥ်ဝဲလၢ သုးကလၢၤအပူၤ ကအိၣ်လၢအဂၤ (၃၀၀)ဃၣ်ဃၣ်ဒီး တုၤလီၤဝဲဖဲသဝီခိးထိးအဆၢကတီၢ် နီၤဖးလီၤသး ခံကရူၢ်အိၣ်ဝဲအသိး, နုၥ်လီၤဝဲဆူ သဝီပူၤ တနီၤအိၣ်ဝဲအဂ့ၢ်, လီၢ်ကဝီၤဖိတဖၣ် စံးဝဲအသိး, ဟီၣ်ကဝီၤတၢ်ကစီၣ်သန့တဖၣ် ပၥ်ဖျါထီၣ်ဝဲစ့ၢ်ကီးန့ၣ်လီၤ.
ပယီၤသုးအတၢ်ဖီၣ်လီၢ်ကဝီၤကမျၢၢ်တဖၣ်အဖီခိၣ်, ပူၣ်လ့ၣ်သဝီဖိတဂၤ စံးဝဲဒၣ်လၢ “သဝီကမျၢၢ်လီၢ်ကဝီၤဖိလၢ ပှၤဖီၣ်နီၢ်ကီၢ်တဖၣ်န့ၣ် အိၣ်လၢ အဂၤ(၁၀)ဘျဲၣ်န့ၣ်လီၤ. တၢ်တပျၢ်လီၤဝဲဒံးဘၣ်, ပယီၤသုးမၤဝဲဒ်အံၤအဃိ,အခဲအံၤ သဝီပူၤ အါတက့ၢ် ပှၤဃ့ၢ်ထီၣ်ကွံၥ်ဝဲ, ပှၤကအိၣ်တ့ၢ် က့ၤ ထဲ ဟံၣ်ခိၣ် (၁၀)ဖျၢၣ်ဃၣ်ဃၣ်န့ၣ်လီၤ ” အဂ့ၢ်စံး ဝဲန့ၣ်လီၤ.
လၢန့ၣ်အမဲၥ်ညါ, ပယီၤသုးအံၤ ခးသံကွံၥ်စ့ၢ်ကီးဝဲ သးနံၣ် (၂၅)နံၣ် လီၢ်ကဝီၤပိၥ်ခွါတဂၤဖဲ အနီ သိလ့ၣ်ယီၢ် အဆၢကတီၢ် အိၣ်ဝဲအဂ့ၢ်, စံးအါထီၣ်ဝဲစ့ၢ်ကီး န့ၣ်လီၤ.
ပူၣ်လ့ၣ်သဝီအံၤ ဟံၣ်ခိၣ်ကအိၣ်ဝဲ အဖျၢၣ် (၂၀၀) ဃၣ်ဃၣ်ဒီး ပှၤလၢဃ့ၢ်ထီၣ်တဖၣ်အံၤ တကီၢ် ခါခဲအံၤ လဲၤထီၣ်အိၣ်ကဒုဝဲအသးလၢသဝီလၢအဘူးဒ်အမ့ၢ် တီၤတံ, ကမီၢ်ဝါ တဖၣ်အပူၤအဂ့ၢ်, လီၢ်ကဝီၤဖိတဖၣ်စံးဝဲ န့ၣ်လီၤ.
တကးဒံးဘၣ် ခီဖျိတၢ်ခးလိၥ်သးအဃိ မဟါလါအီးကထိဘၢၣ်(၁၂)သီအနံၤအပူၤ သိလ့ၣ်တီပနံၥ်တၢ်ကၤလၢ ဟးထီၣ်က့ၤလီၤဝဲဖဲ ဃိၣ်သၢဖျၢၣ်-မူၣ်ဒိၤကျဲသ့ၣ်တဖၣ်အံၤ လဲၤက့ၤဝဲဖဲ နိၣ်တကီ-အဘ့ၣ်သိလ့ၣ် တၢ်ဟးထီၣ် က့ၤလီၤကျဲတသ့ လၢၤ ဘၣ်ဒီး ဘၣ်အိၣ်ကတုၥ်ဝဲဒၣ်ဖဲ ခိၣ်ဃၢၤသဝီလၢအဘူးတဖၣ်အပူၤအဂ့ၢ်, သ့ၣ်ညါဘၣ်န့ၣ်လီၤ.
ဘၣ်ဃးဒီးပယီၤသုးအတၢ်ဖီၣ် ပူၣ်လ့ၣ်သဝီဖိဒီး ကမျၢၢ်တၢ်ဘၣ်စံၢ်ထီၣ်အဖီခိၣ်, သုးရ့ၣ်(၁၆) သုးရ့ၣ်ခိၣ် သုးခိၣ်ဒိၣ် ဂီၢ်ဂ့ၢ် စီၤစွ့ၤဝ့ စံးဝဲဒၣ်လၢ“တၢ်က့ၤဖီၣ်ပှၤကမျၢၢ်ဒု တဲတဘၣ်ဒံးဘၣ်, ပနၢ်ဟူပရၢလၢကမျၢၢ်သိလ့ၣ် က့ၤလီၤတခိၣ် န့ၣ်,ပှၤအိၣ်ပှဲၤပှဲၤ အသုကိးပတုၥ်ဝဲဒ်န့ၣ်ဒုအိၣ်လီၤ.သိလ့ၣ်တၢ်ဟးထီၣ်က့ၤလီၤန့ၣ် ခဲအံၤ ပှၤတြီဃၥ်န့ၣ်လီၤ. မ့မ့ၢ် ပူၣ်လ့ၣ်ကမျၢၢ် တၢ်အိၣ်သးတခီ ခဲအံၤ ဒုးယၤတကွီၢ်ပူၤကတီၢ် အဝဲသ့ၣ် ကထုးပြါဝဲအသးဒီး တနီၤ အတၢ်ဖိတၢ် လံၤကအိၣ်တီၢ်ဝဲ ဒ်န့ၣ်အိၣ်ဝဲလီၤ.” အဂ့ၢ်စံးဝဲန့ၣ်လီၤ.
တကူၣ်တၢၣ် သဝီကရူၢ်အပူၤ ဒူသဝီသ့ၣ်တဖၣ်အံၤ အါတက့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီး တၢ်ပၢၢ် ဆၢသုးပၥ်ဖှိၣ်တဖၣ် ဒိၣ်စိဝဲ ဘၣ်ဆၣ် တကူၣ်တၢၣ် သဝီပူၤ သုးကရူၢ် စံဖၠူၤကိ သုးကလၢၤအိၣ်ဝဲ တဖျၢၣ်အဂ့ၢ်, သ့ၣ် ညါဘၣ်န့ၣ်လီၤ.
ဒီးလၢစံဖၠူၤကိ သုးကလၢၤအဂီၢ် ဖဲမူၣ်ဒိၣ်သုးဂံၢ်ထံး အဘ့ၣ်သုးကလၢၤ သုးကရူၢ်တဖၣ်မၤဝဲ တၢ်ဆီတလဲ သုးဖိ သံၣ်ဖိ ဒီးတၢ်ဆှၢထီၣ်တၢ်အီၣ်တၢ်အီ ကတီၢ် နုၥ်လီၤ သူဝဲ အဘ့ၣ်, ပူၣ်လ့ၤ, တကူၣ်တၢၣ်ကျဲ တၢ်ဟးထီၣ်က့ၤလီၤ အိၣ်ဝဲ အဂ့ၢ်, သ့ၣ်ညါဘၣ်စ့ၢ်ကီးန့ၣ်လီၤ.
တကတီၢ်ဃီ,သုးကရူၢ်အံၤအပူၤကွံၥ် (၂၀၂၅)နံၣ် လါအီးကထိဘၢၣ်အပူၤ လၢအဘ့ၣ်သုးကလၢၤတဆီ သူဝဲ အဘ့ၣ်, ပူၣ်လ့ၤ, ကျဲ လၢ တၢ်ကမၤသုးတၢ်ဆီတလဲဆူ စံဖၠူၤကိသုးကလၢၤ အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, တကီၢ်ခါခဲအံၤ အဘ့ၣ်သုးကလၢၤပူၤ သုးကရူၢ်လၢဟးထီၣ်ဝဲသ့ၣ်တဖၣ်အံၤ အသုးကျိၤတၢ်ဟူးတၢ်ဂဲၤ အခိၣ် လိၤဃီၤဝဲဒၣ်လၢ တၢ်ကလဲၤထီၣ်ဆူ စံဖၠူၤကိသုးကလၢၤဘၣ်ဆၣ် အိၣ်ဝဲဒၣ်လၢ တၢ်ဘၣ်သဂၢၢ်ခးလိၥ်သး ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် ဒီး တၢ်ပၢၢ်ဆၢသုးပၥ်ဖှိၣ်ကရူၢ် အဖၢမုၢ်အဂ့ၢ်, ဟီၣ်ကဝီၤပှၤဘၣ်မူဘၣ်ဒါတဖၣ် စံးဝဲန့ၣ်လီၤ.
