လါအီးကထိဘၢၣ် ၅ သီ, ၂၀၂၆ နံၣ်, ခ့ၣ်အဲးစံၣ်
လၢတၢ်ကသူၣ်ထီၣ်ကီၢ်သူလ့ၤအဂီၢ် ဒ်သိးကညီသးစၢ်ပှၤကူၣ်ဘၣ်ကူၣ်သ့စဲၤနီၢ်ဒီး ကညီဒီကလုၥ်တၢ်ပၢၢ်ဆၢအဘၢၣ်စၢၤတၢ်ပၥ်ဖှိၣ် စဲဘူးကဂၢၢ်ကျၢၤဝဲအဂီၢ်န့ၣ် ၃ ဝီတဝီ (Karen Intergenerational Leadership Conference-KILC)စိၤအါစိၤ ခိၣ်နၢ် တၢ်ကူၣ်လိၥ်တၢၣ်ပီၣ်တၢ်အိၣ်ဖှိၣ်အံၤ ဘၣ်တၢ်မၤဝဲလၢကီၢ်သူလ့ၤတၢ်လီၢ်တတီၤအံၤဖဲအပူၤကွံၥ်လါစဲးပထ့ဘၢၣ် ၂၈ သီတုၤ ၃၀ သီ အံၤန့ၣ် လီၤ.
ကညီစိၤအါစိၤခိၣ်နၢ်တၢ်ကူၣ်လိၥ်တၢၣ်ပီၣ်လၢတၢ်မၤဝဲအခဲအံၤတဘျီန့ၣ် အတၢ်ပညိၣ်မ့ၢ်ဝဲ “Kawthoolie Together-Crossing The Bridge: Committed To Building Kawthoolei Together” တၢ်တၢၣ်ပီၣ်တဲသကိးဝံၤလီၢ်ခံဆူ ပျီပူၤတၢ်မၤသကိးနီၢ်နီၢ်ဒီး စိၤအါစိၤအဘၢၣ်စၢၤဟံန့ၢ်မူဒါတီခိၣ်ရိၣ်မဲပၥ်ဖှိၣ်မၤသကိးတၢ်ဒီးသူၣ်ထီၣ်သကိးကီၢ်သူလ့ၤအဂီၢ် န့ၣ်လီၤ.
လၢတၢ်ကူၣ်လိၥ်တၢၣ်ပီၣ်တၢ်အိၣ်ဖှိၣ်(၃)သီအတီၢ်ပူၤအံၤန့ၣ် ခ့ၣ်အဲၣ်ယူၣ်ခိၣ်နၢ်တဖၣ်ဟ့ၣ်ခီဟ့ၣ်နီၤအတၢ်လဲၤခီဖျိဒီး တဲဖျါထီၣ်ဝဲ တကီၢ်ခါတၢ်အိၣ်သးတၢ်တၤတၢ်အဂ့ၢ်အကျိၤသ့ၣ်တဖၣ်ဒီး တကးဒံးဘၣ်တၢ်ဖံးတၢ်မၤသနၢၣ်လၢကညီသးစၢ်ပၣ်ဃုၥ်ပၥ်ဖှိၣ် မၤသကိးတၢ်သ့သ့ၣ်တဖၣ်အံၤ တၢ်ကတိၤတၢၣ်ပီၣ်တဲသကိးဝဲဒၣ်န့ၣ်လီၤ.
တကးဒံးဘၣ်ကညီသးစၢ်ပှၤကူၣ်ဘၣ်ကူၣ်သ့ဖိ ဒီး ပှၤစဲၤနီၢ်သ့ၣ်တဖၣ်အံၤ ဒ်သိးကသ့စူးကါဝဲတၢ်ကူၣ်ဘၣ်ကူၣ်သ့ အတၢ်လဲၤခီဖျိ တဖၣ်လၢ ခ့ၣ်အဲၣ်ယူၣ် တၢ်ပၢဆှၢရဲၣ်ကျဲၤ,တၢ်ဂုၤထီၣ်ပသီထီၣ်,တၢ်လဲၤထီၣ်လဲၤထီဒီး တၢ်သူၣ်ထီၣ်ကီၢ်သူလ့ၤတၢ်ဖံးတၢ်မၤ တဖၣ်အပူၤကတုၤထီၣ်ထီၣ်ဘးအဂီၢ် ပှၤဂံၢ်ဘါတၢ်အိၣ်ယၢၤ(Human Resources)သ့ၣ်တဖၣ်ကထုးဖှိၣ်ပၥ်ဖှိၣ်သးကသ့အဂီၢ် န့ၣ် တၢ်တၢၣ်ပီၣ်တဲသကိး စ့ၢ်ကီးဝဲလၢတၢ်အိၣ်ဖှိၣ်အပူၤန့ၣ်လီၤ.
ဒီးလၢတၢ်ဖံးတၢ်မၤကိးကပၤဒဲးအပူၤ ဒ်စိၤအတၢ်လဲၤထီၣ်လဲၤထီၣ်အသိးအလီၢ်အိၣ်လၢကဘၣ်လူၤပိၥ်မၤထွဲဝဲအီၤဒီး လၢတၢ်ကူၣ် လိၥ်တၢၣ်ပီၣ်ဒ်အံၤအဖီခိၣ် ကဲထီၣ်ဝဲတၢ်ဂံၢ်ဆူၣ်လၢသးစၢ်တဖၣ်အဂီၢ်အမဲၥ်ညါ လၢတၢ်အိၣ်ဖှိၣ်အံၤအပူၤ လၢတၢ်ဆဲးကျိးဆဲးကျၢ အဂီၢ် တၢ်ဒုးအိၣ်ထီၣ်ဃုၥ်ဝဲ Human Resources Development Unit အဂ့ၢ်န့ၣ် ကညီသးစၢ်ကရၢ(KYO) ကရၢခိၣ် စီၤလၢၢ်နၢၤ စံးဝဲဒၣ်န့ၣ်လီၤ.
“ကညီတၢ်ပၢၢ်ဆၢအံၤဘူးလၢအနံၣ်(၈၀)လံဘၣ်ဆၣ်တမၤနၢၤတၢ်ဒံးဘၣ်အိၣ်လၢတၢ်ဂဲၤလိၥ်အဖၢမုၢ်လီၤ.ပတမၤနၢၤတၢ်ဒံးဘၣ် အဃိပကဘၣ်ဂဲၤလိၥ်တၢ်ဆူညါအဖီခိၣ် စၢၤသွဲၣ်ဆူညါတဆီကဆဲးဟံထီၣ်ဖီၣ်ထီၣ်မူဒါကသ့အဂီၢ်ဘၣ်တၢ်မၤဝဲတၢ်ရဲၣ်တၢ်ကျဲၤ အံၤလီၤ.လၢအပူၤကွံၥ်တၢ်ပၢၢ်ဆၢတၢ်ဂဲၤလိၥ်အခါန့ၣ်တၢ်အိၣ်သးတမံၤ,ခဲအံၤ(နည်းပညာ)အဆၢကတီၢ် စိၤလဲၤထီၣ်လဲၤထီအဃိ ပကြၢးလူၤပိၥ်မၤထွဲအီၤလီၤ.ခီဖျိတၢ်မၤဝဲဒ်အံၤအဃိသးစၢ်တဖၣ်သ့ၣ်ညါဝဲလၢကဘၣ်နုၤလီၤပၣ်ဃုၥ်ပၣ်ဂီၢ်ဝဲဒ်လဲၣ်န့ၣ်သ့ၣ်ညါဝဲအဃိ မ့ၢ်တၢ်ဂံၢ်ဆူၣ်တခါလၢပကပၥ်ဖှိၣ်မၤသကိးတၢ်လၢပမၤထူၣ်ဖျဲးထီၣ်ပပှၤကလုၥ်ကသ့အန့ၢ်အဂီၢ်လီၤ.အဂၤတခါန့ၣ်လၢတၢ် အိၣ်ဖှိၣ်အံၤအပူၤန့ၣ်ကရၢမိၢ်ပှၢ်ဒုးအိၣ်ထီၣ်စ့ၢ်ကီးဝဲ(Human Resources Development Unit)ဒီးယူးနံၣ်ဝဲအံၤကဆဲး ကျိးဒီး ကညီသးစၢ်ပှၤ ကူၣ်ဘၣ်ကူၣ်သ့တဖၣ်လၢကနုၥ်လီၤပၣ်ဃုၥ်လၢတၢ်ပၢၢ်ဆၢပူၤကသ့ဒ်လဲၣ်န့ၣ် မ့ၢ်ဝဲတၢ်လဲၤထီၣ်လဲၤ ထီတခါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးတၢ်တၢၣ်ပီၣ်အပူၤသးစၢ်လၢအဟဲထီၣ်တဖၣ်အကျါတနီၤန့ၣ်ပၣ်ဃုၥ်ဝဲဒီးသးစၢ်လၢတၢ်စဲးဘူးလိၥ်သးတအိၣ် ဒီး ခ့ၣ်အဲၣ်ယူၣ်ကရၢမိၢ်ပှၢ်အတၢ်ဖံးတၢ်မၤတဖၣ်ဘၣ်သနါက့ ပှၤသ့ၣ်တဖၣ်အံၤလၢတၢ်ပၥ်ဖှိၣ်မၤသကိးတၢ်အပူၤ ပၥ်ဖျါထီၣ်ဝဲ အတၢ်သူၣ်ဆူၣ်သးဂဲၤလၢတၢ်ကသူၣ်ထီၣ်ကီၢ်သူလ့ၤအတၢ်ဖံးတၢ်မၤသနၢၣ်အပူၤအဂ့ၢ်န့ၣ် စီၤလၢၢ်နၢၤ စံးအါထီၣ်ဝဲန့ၣ်လီၤ.
လၢကညီစိၤအါစိၤခိၣ်နၢ်တၢ်ကူၣ်လိၥ်တၢၣ်ပီၣ်ဘျီအံၤအပူၤန့ၣ် ကညီသူၣ်ဘီၣ်သးစၢ်,ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိနၢ်ဒိၣ်ထီ ဃုၥ်ဒီးဝဲၤကျိၤတဘိစုၥ်စုၥ်ခၢၣ်စးပှၤဘၣ်မူဘၣ်ဒါ, ပှၤတဝၢတၢ်ကရၢကရိပှၤဘၣ်မူဘၣ်ဒါဒီး တမှံၤတဖၣ်ဟဲထီၣ်ဝဲ (၁၃၀)ဘျဲၣ် အဂ့ၢ်န့ၣ် လီၢ်ခၢၣ်သးခ့ၣ်အဲၣ်ယူၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
ဒီးလၢတၢ်အိၣ်ဖှိၣ်အံၤအပူၤန့ၣ်သးစၢ်ဃုၥ်ဒီးခိၣ်နၢ်လၢအဟဲထီၣ်တၢ်ကူၣ်လိၥ်တၢၣ်ပီၣ်အံၤတဖၣ် လဲၤဟးဃုသ့ၣ်ညါတၢ်လၢ ကညီ ဒီကလုၥ်ဂၢၤသးကရၢ(KNDO) သုးဝဲၤလီၢ်ခိၣ်သ့ၣ်တၢ်လီၢ်အံၤဒီး တကးဒံးဘၣ်ထံၣ်လိၥ်အိၣ်သကိးကတိၤဟ့ၣ်ဂံၢ်ဟ့ၣ်ဘါဝဲ သုးခိၣ်ကျၢၢ်စိ စီၤဘိၣ်မၠး ကၠိလၢအမ့ၢ် (General Bo Mya Memorial High School)တီၤတီကၠိအံၤ ပှၤကၠိဖိသ့ၣ် တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်သူလ့ၤကအိၣ်ဂၢၢ်ဆိးကျၢၤအဂီၢ် ဒ်သိးသးစၢ်ခိၣ်နၢ်လၢကဟံထီၣ်ဖီၣ်ထီၣ်က့ၤမူဒါတဖၣ်ကဟဲအိၣ်ဖျါထီၣ်ဝဲဒီး လၢတၢ်ဖံးတၢ်မၤ အပူၤ စိၤအါစိၤသူၣ်ဘီၣ်သးစၢ်သ့ၣ်တဖၣ်ကသ့ဟ့ၣ်ခီဟ့ၣ်နီၤလီၤဝဲ အတၢ်သ့တၢ်ဘၣ်,တၢ်လဲၤခီဖျိသ့ၣ်တဖၣ်ကသ့ဝဲအဂီၢ် ခ့ၣ်အဲၣ်ယူၣ်ဘၣ်တီခိၣ်ရိၣ်မဲမၤဝဲ ကညီစိၤအါစိၤခိၣ်နၢ်တၢ်ကူၣ်လိၥ်တၢၣ်ပီၣ်တၢ်အိၣ်ဖှိၣ်(KILC)အံၤန့ၣ်လီၤ.
စးထီၣ်ဖဲ(၂၀၂၄)လါမ့ၤအခါန့ၣ် အဆိကတၢၢ်တဝီ တၢ်စးထီၣ်မၤဝဲတၢ်ကူၣ်လိၥ်တၢၣ်ပီၣ်တၢ်အိၣ်ဖှိၣ်အံၤဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ တၢ်လီၢ်တတီၤ, ဖဲ(၂၀၂၅)နိၣ်ဝ့ဘၢၣ် ၂ ဝီတဝီအခါန့ၣ် ဘၣ်တၢ်မၤတ့ၢ်ဝဲဖဲကီၢ်သူလ့ၤ တၢ်လီၢ်တတီၤဒီး အခါဖဲန့ၣ် စ့ၢ်ကီး ကီၢ်ပူၤကီၢ်ချၢ,ထံဆၢကီၢ်ဆၢသးစၢ်လၢအိၣ်ဒီးတၢ်သ့တၢ်ဘၣ်လၢသနၢၣ်ဒၣ်ဝဲအဂၤ(၁၀၀)ဃၣ်ဃၣ်လဲၤထီၣ် ဝဲဒၣ် န့ၣ်လီၤ.
