လါအီးကထိဘၢၣ် ၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ တနံၤအံၤပယီၤသုး ၄၄ ခီၣ်ချ့သုးဝဲၤလီၢ်ခိၣ်သ့ၣ် ခးလီၤကဒီး ဝဲ ကျိဖးဒိၣ်အဃိ ဘၣ်သံဝဲဖိသၣ်(၃)နံၣ် ၁ ဂၤဒီး ဘၣ်ဒိဘၣ်ထံးဝဲ(၁)ဂၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤ ပှၤဘၣ်မူဘၣ်ဒါအအိၣ် န့ၣ်လီၤ.
ဖဲတနံၤအံၤလါအီးကထိဘၢၣ် ၂ သီ မုၢ်ထူၣ် ၁၂း၂၀ မံးနံးအဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုးကလၢၤဝဲအံၤလၢ အပူၤကွံၥ်ခးလီၤဝဲကျိဖးဒိၣ်တလီၢ်လီၢ်အံၤန့ၣ် ခးလီၤကဒီးဝဲ ၁၂၀ မမ ကျိဖးဒိၣ်(၂)ဖျၢၣ်လီၤတဲၥ်ပိၢ်ဖးထီၣ်ဝဲလၢတကွံပူၤ (ငှက်ပျောတော)ကရူၢ် စံကိ(ဇီးကုန်း)သဝီပူၤတဖျၢၣ်ဒီး လၢအဝဲတဖျၢၣ်န့ၣ်တပိၢ်ဖးထီၣ်ဝဲဘၣ်န့ၣ်လီၤ.
လၢသုးမီၤစိရိၤအတၢ်ခးလီၤကျိဖးဒိၣ်ဘျီဝဲအံၤ ဖိသၣ်ပိၥ်ခွါမီၤခၠံၣ်ကၠီၤလ့(၃)နံၣ်အံၤကျိဖးဒိၣ်အက့အခီဘၣ်ဝဲအခိၣ်သၣ်ဃံ ဒီး သံဝဲဖဲတၢ်ကဲထီၣ်သးအလီၢ်န့ၣ်တဘျီဃီတကးဒံးဘၣ် ဟံၣ်ဟးဂီၤဝဲ(၁)ဖျၢၣ်အဂ့ၢ်န့ၣ် သ့ၣ်ညါ ဘၣ်န့ၣ်လီၤ.
တကတီၢ်ဃီတၢ်တနံၤဃီဝဲအံၤ လၢဝီၢ်ကျီၢ်(ဝင်းကလော)ကရူၢ်အပူၤ ပယီၤသုး(၃၁၀)အမျိၥ်သုးကလၢၤ ခးလီၤစ့ၢ်ကီးဝဲ(၁၂၀ မမ) ကျိဖးဒိၣ် ၂ ဖျၢၣ် လီၤတဲၥ်ပိၢ်ဖးထီၣ်ဝဲလၢ မဲယိကၠံသဝီ တၢ်သွၣ်ခိၣ်ဃၢၤ တၢ်ဖံးအီၣ်မၤလီၢ်ကျီးပူၤအဃိ အူကၠီၤစိ (ကိး)သၤကူၤ အံၤဘၣ်ဒိဘၣ်ထံးစ့ၢ်ကီးဝဲဒၣ်န့ၣ်လီၤ.
ဝီၢ်ကျီၢ်ကရူၢ် မဲယိကၠံသဝီလၢပယီၤသုးခးလီၤကျိဖးဒိၣ်အံၤန့ၣ် ဖဲလါစဲးပထ့ဘၢၣ် ၃၀ သီ ဒီး မဟါလါအီးကထိဘၢၣ် ၁ သီအနံၤ န့ၣ်စ့ၢ်ကီး ၄၄ သုးတြိၤအဝဲၤလီၢ်ခိၣ်သ့ၣ်အံၤခးလီၤဒံးဝဲကျိဖးဒိၣ်ဒီးဒြိတဖၣ် ကဲထီၣ်ဒံးဝဲန့ၣ်လီၤ.
ကၠဲးထိၣ်ကီၢ်ဆၣ် ဝီၢ်ကျီၢ်ကရူၢ်, ပလိၥ်ခံကရူၢ်, ဆီသုးခံကရူၢ်, ဝီၢ်က့ကရူၢ် ဒီး ခရၢၢ်ကရူၢ် ဒူသဝီတဖၣ်အပူၤ စးထီၣ်ဖဲလါစဲးပထ့ ဘၢၣ် ၂၂ သီ အနံၤန့ၣ် တၢ်ဒုးကဲထီၣ်တအိၣ် သုးကလၢၤတဖၣ်အံၤခးလီၤကျိဖးဒိၣ်ဒီးကဘီယူၤစ့ၢ်ကီးလဲၤခးလီၤတၢ် အိၣ်ဝဲကိး မုၢ်နံၤဒဲး အဖီခိၣ် ကမျၢၢ်သံဘၣ်ဒိဘၣ်ထံးအမဲၥ်ညါ ဒူသဝီကမျၢၢ်တဖၣ်ဘၣ်ဃ့ၢ်ထီၣ်ဝဲဒၣ်အါမးစ့ၢ်ကီးန့ၣ်လီၤ.
