လါနိၣ်ဝ့ဘၢၣ် ၁၀ သီ, ၂၀၂၆ နံၣ်, ခ့ၣ်အဲးစံၣ်
ဟီၣ်ကဝီၤအပူၤတၢ်ပၢၢ်ဆၢသုးကရူၣ်တဖၣ်ဟူးဂဲၤသုတန့ၢ်တဂ့ၤအဂီၢ် စးထီၣ်ဖဲလါနိၣ်ဝ့ဘၢၣ်ထီၣ် ၃ သီအံၤ ပယီၤသုးလၢ အနီၣ်ဂံၢ်ကအိၣ်(၁၀၀၀)ဃၣ်ဃၣ်အံၤ နုၥ်လီၤဝဲဒၣ်လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒီး ပကိကီၢ်ခီ ဆီထံးကီၢ်ဆၣ် အဆၢဟီၣ်ကဝီၤအပူၤအံၤန့ၣ်လီၤ.
လၢကနုၥ်လီၤမၤဆှဲလဲဝဲကၠဲးထိၣ်ဟီၣ်ကဝီၤပူၤတၢ်ပၢၢ်ဆၢကရူၢ်ကရၢအံၤအဂီၢ် ပယီၤသုးအံၤလၢသ့ၣ်စ့ၣ်ယး(သိမ်ဇရပ်)ဝ့ၢ်အံၤတဆီ နုၥ်လီၤဝဲဒၣ်လၢဆီသုးခံကရူၢ်ပူၤဝံၤ တၢ်ဒုးစးထီၣ်ကဲထီၣ်ဝဲလၢခံခီခံကပၤအဘၢၣ်စၢၤဒီး မၤန့ၢ်ဝဲ(KNLA) သုးရ့ၣ်-၃ ဝဲၤလီၢ်ခိၣ်သ့ၣ် ဒီး(PDF)တၢ်လီၢ် ၂ တီၤ အဂ့ၢ်န့ၣ် ပခ့ၣ်အဲးစံၣ်-ကညီတၢ်ကစီၣ်ဒိးန့ၢ်ဃၥ်တၢ်ကစီၣ်အိၣ်ဝဲန့ၣ်လီၤ.
ဘၣ်ဆၣ်ဘၣ်ဃးတၢ်ထီၣ်မၤန့ၢ်ဝဲတၢ်ပၢၢ်ဆၢသုးကရူၢ်အိၣ်ဆိးလီၢ်ကျဲတၢ်ဂ့ၢ်အံၤ ဒ်သုးမီၤစိရိၤစုတီၤဖီလၥ်(မြန်မာ့အလင်း) ထုးထီၣ် ပၥ်ဖျါဝဲဖဲမဟါအသိးန့ၣ် စးထီၣ်ဖဲလါနိၣ်ဝ့ဘၢၣ် ၅ သီအနံၤန့ၣ် ကီးကးသဝီဃၢၤ(PDF)တၢ်လီၢ်တတီၤ, ၆ သီ ကီးထံထၣ် သဝီဃၢၤ တၢ်လီၢ်(၁)တတီၤဒီး မုၢ်ဆ့ၣ်ထီၣ်လါနိၣ်ဝ့ဘၢၣ် ၇ သီအနံၤန့ၣ် ထီၣ်မၤန့ၢ်ကဒီးဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်-၃ သုးဝဲၤလီၢ်ခိၣ်သ့ၣ်တၢ်လီၢ်အံၤအဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်မၤကဒီးမုၢ်ဆ့ၣ်ထီၣ် ၈ သီအနံၤန့ၣ်စ့ၢ်ကီး ပွဲၣ်(၄၈၀)ကစၢၢ်အဃၢၤ ဒီကလုၥ်ဃူဖိးပဒိၣ် (NUG)ဒီး(CRPH) စုတီၤဖီလၥ် (PDF)တၢ်ပၢၢ်ဆၢကရူၢ်တၢ်လီၢ်(၅)တီၤလၢအိၣ်ပကိကီၢ်ခီဒိၣ် ဆီထံးကီၢ်ဆၣ်အပူၤအံၤဃုၥ်ဒီး တၢ်လီၢ်လၢအဂၤ ပၥ်ဖှိၣ်ခဲလၢၥ်(၁၁)တီၤထီၣ်မၤန့ၢ်ဝဲအဂ့ၢ်န့ၣ် သုးမီၤစိရိၤစံးဝဲန့ၣ်လီၤ.
ဒ်ပှၤလၢဘူးဒီးတၢ်ပၢၢ်ဆၢကရူၢ်တဖၣ်စံးဝဲအသိးန့ၣ် ကၠဲးထိၣ်ကီၢ်ဆၣ်ပူၤ ကီးကး,ကီးထံထၣ် ဒီး ပကိကီၢ်ခီ ဆီထံးကီၢ်ဆၣ် ဟီၣ်ကဝီၤအဆၢအခိၣ်အဃၢၤတၢ်လီၢ်လၢပယီၤသုးထီၣ်န့ၢ်ဝဲတဖၣ်အံၤ မ့ၢ်ဟီၣ်ကဝီၤလၢ(KNLA)ဒီး(NUG)စုတီၤဖီလၥ်(PDF) တၢ်ပၢၢ်ဆၢကရူၢ်ဟူးဂဲၤအိၣ်ဆီလီၤ သးအါဝဲအလီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
လၢတၢ်ထီၣ်န့ၢ်ဝဲဟီၣ်ကဝီၤခံဘ့ၣ်အံၤအဆၢ တၢ်ပၢၢ်ဆၢကရူၢ်တၢ်လီၢ်သ့ၣ်တဖၣ်အံၤအပူၤန့ၣ် မၤန့ၢ်ဝဲကျိအကလုၥ်ကလုၥ် (၁၃၉)ခိၣ်, ကျိချံအကလုၥ်ကလုၥ်(၁၂,၂၈၇)ဖျၢၣ်,သိလ့ၣ်(၂)ခိၣ်,မ့ၣ်ပိၢ်,စုကွံၥ်မ့ၣ်ပိၢ်, ဆဲးကတိၤတၢ်, သုးကူသုးကၤဃုၥ်ဒီး တၢ်ဖိတၢ်လံၤ လၢအဂၤသ့ၣ်တဖၣ်အဂ့ၢ်န့ၣ် သုးမီၤစိရိၤစံးဝဲန့ၣ်လီၤ.
တကီၢ်ခါခဲအံၤပကိကီၢ်ခီဟီၣ်ကဝီၤပူၤတၢ်အိၣ်သးမ့တသ့ၣ်ညါဘၣ်ဆၣ် လီၤဆီဒၣ်တၢ်မ့မ့ၢ်ကၠဲးထိၣ်ဟီၣ်ကဝီၤလၢအမ့ၢ် ကမီၣ်ခွ့ၤ, စံပၠီဒီးခၠီဆီၣ်တကပၤန့ၣ် စးထီၣ်လၢပယီၤသုးနုၥ်လီၤတုၤလၢတနံၤအံၤ ဒုးယၤတၢ်ဖ့ၣ်စၢဆဲးကဲထီၣ်ဝဲလၢဟီၣ်ကဝီၤ(KNLA), (PDF) ဒီး ပယီၤသုးကျိၤလၢအဟဲထီၣ်သ့ၣ်တဖၣ်အံၤအဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤပယီၤသုးဂံၢ်ဘါ(၁၀၀၀)ဃၣ်ဃၣ်လၢအဟဲထီၣ်ဟူးဂဲၤတဖၣ်အံၤ လဲၤထီၣ်တုၤဝဲဒၣ်လၢကၠဲးထိၣ်ကီၢ်ဆၣ်-ပကိကီၢ်ခီ အဆၢ ခၠီဆီၣ်သဝီသီတကပၤကအိၣ်လၢ(၄၀၀)ဃၣ်ဃၣ်ဒီး ဒ်န့ၣ်အသိးလၢလီၢ်ခံခမီၣ်ခွ့ၤတကပၤ စ့ၢ်ကီး ပယီၤသုး အိၣ်တ့ၢ်ဒံးဝဲ အါမးအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိအအိၣ်န့ၣ်လီၤ.
ဘၣ်ဆၣ်ပယီၤသုးအတၢ်ဟဲထီၣ်ဟူးဂဲၤဝဲဘျီဝဲအံၤ အတၢ်ပညိၣ်လၢအဂၤတၢ်မ့တသ့ၣ်ညါဝဲလီၤတံၢ် လီၤဆဲးဘၣ်သနါက့ အတၢ်ဟဲ ထီၣ်အံၤလၢကမၤဆှဲလဲဝဲတၢ်ပၢၢ်ဆၢကရူၢ်ဝံၤ ကက့ၤလီၤကဒါဝဲဆူအဟဲထီၣ်ကျဲအံၤအဂ့ၢ် တၢ်ပဲၥ်ထံနီၤဖး စံးဝဲ မ့အိၣ်ဘၣ်ဆၣ် ပခ့ၣ်အဲးစံၣ်-ကညီတၢ်ကစီၣ် ပၥ်ဂၢၢ်ပၥ်ကျၢၤအီၤတန့ၢ်ဝဲဘၣ်န့ၣ်လီၤ.
ဘၣ်ဃးသုးမီၤစိရိၤထီၣ်မၤန့ၢ်ဝဲတၢ်ပၢၢ်ဆၢကရူၢ်တၢ်လီၢ်(၁၁)တီၤတၢ်ဂ့ၢ်အံၤ ခ့ၣ်အဲၣ်ယူၣ်ဒီး(NUG)ကရူၢ်ကရၢတကပၤ ထုးထီၣ် ပၥ်ဖျါဝဲ တအိၣ်ဒံးဘၣ်ဒီး ဒ်သိးကသ့ၣ်ညါဘၣ်တၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ် ဆဲးကျိးဝဲသုးက့ ၁ ပှၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်ဝဲဘၣ်န့ၣ်လီၤ.
ပှၤလၢဘူးဒီးတၢ်ပၢၢ်ဆၢကရူၢ်တဂၤ စံးဝဲလၢ “ခဲအံၤလၢကခီၣ်ခွ့ၤ-စံပၠီတကပၤန့ၣ် ပှၤခီးတံၢ်ပယီၤသုး. တၢ်သံတၢ်ဘၣ်ဒိဘၣ်ထံး ဒုကအိၣ်လီၤ. ပနၢ်ဟူလၢပှၤဖီၣ်န့ၢ်ပယီၤသုးဖးအါညါ ပှဲၤဂၤလဲၣ်ဒုတသ့ၣ်ညါဒံးဘၣ်. တၢ်ဒုးဒုကဲထီၣ်ကိးမုၢ် နံၤဒဲးလီၤ. ခဲအံၤ အဝဲသ့ၣ် လဲၤထီၣ်ဟူး ဂဲၤဝဲဒၣ်ဖဲ(ခၠီစီၣ်)တကပၤန့ၣ် အါဒၣ်တက့ၢ်ပှၤစုနၢသၢဘိအိၣ်ဆိးတၢ်လီၢ်လီၤ..” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဟီၣ်ကဝီၤပူၤဖဲန့ၣ်အပူၤတချုးပယီၤသုးဟဲထီၣ်ဟူးဂဲၤဒံးဘၣ်န့ၣ် လၢကမၤဆှဲကျဲအဂီၢ်လၢဒြိ,ကျိဖးဒိၣ်ဒီး ကဘီယူၤ အံၤတဆီ ပယီၤသုးလဲၤခးလီၤဝဲတၢ်တပယူၥ်ဃီဒီး တုၤလၢခဲအံၤတၢ်ဒုးဆဲးကဲထီၣ်ဝဲလၢခံခီခံကပၤအဘၢၣ်စၢၤအဃိ ဘၣ်ယိၣ်လၢ ကဘီယူၤ ကဟဲခးလီၤစၢၤတၢ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤဃီဝဲန့ၣ် စံးအါထီၣ်ဝဲန့ၣ်လီၤ.
တချုးပယီၤသုးထီၣ်မၤန့ၢ်ဝဲ(သုးက့ ၁)ကၠဲးထိၣ်ဒီး ပကိကီၢ်ခီ (NUG)စုတီၤဖီလၥ်(PDF)တၢ်လီၢ်အံၤဒံးဘၣ် အပူၤကွံၥ် လါအီးကထိ ဘၢၣ်လၢၥ်အခါန့ၣ်စ့ၢ်ကီး သုးကလၢၤ(၂)ဖျၢၣ်လၢအိၣ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒီး ချၢၣ်လွံၢ်ထူၣ်ကီၢ်ရ့ၣ် (သုးက့ ၃) အဆၢလၢ(KNLA)သုးပၥ်ဖှိၣ်ထီၣ်န့ၢ်တ့ၢ်ဝဲဖဲလါအ့ဖြ့ၣ်အခါအံၤန့ၣ်စ့ၢ်ကီး ပယီၤသုးဟဲက့ၤထီၣ်န့ၢ်ကဒါဝဲအဂ့ၢ်န့ၣ် တၢ်ကစီၣ် ထုးထီၣ်ပၥ်ဖျါဝဲ အသိးသ့ၣ်ညါဘၣ်န့ၣ်လီၤ.
