လါနိၣ်ဝ့ဘၢၣ် ၂၁သီ, ၂၀၂၆နံၣ်, ခ့ၣ်အဲးစံၣ်,
ကီၢ်သူလ့ၤတၢ်ပၢဟီၣ်ကဝီၤအပူၤ ကမျၢၢ်လီၢ်ကဝီၤဖိသ့ၣ်တဖၣ်အံၤ အါတက့ၢ် မ့ၢ်ပှၤလုၢ်အီၣ်နီၢ်ခိ သးသမူလၢ တၢ်ထူစံၥ် ဖဲးဃုးဖဲးသံၣ် ဒီး တၢ်သူၣ်အီၣ်ဖျးအီၣ်န့ၣ်လီၤ. ဒီး တၢ်သူၣ်တၢ်ဖျးအတၢ်ဖံးတၢ်မၤအံၤလၢ အဝဲသ့ၣ်တဖၣ်အဂီၢ်မ့ၢ်ဝဲ တၢ်မၤအခိၣ်သ့ၣ် လၢအရ့ဒိၣ် ကတၢၢ်တခါန့ၣ်လီၤ.
အပူၤကွံၥ်နံၣ် တၢ်ဖံးအီၣ်မၤအီၣ် ဘၣ်ဘျီးဘၣ်ဒါဝဲဖဲ အကြၢးဘၣ်ဆၣ် တနံၣ်အံၤ တုၤဃီၤလၢ လါနီ အပူၤ အခါ ဘၣ်လၢတၢ်ကဘၣ်ကူးဘုကူးဟုကတီၢ်လံဘၣ်ဆၣ် တၢ်ကသုၣ်ကသံၣ် မူခိၣ်ကလံၤသီၣ်ဂီၤ အတၢ်ဆီတလဲ ဒီး ယုၢ်နုၥ် လီၤ အီၣ် မၤဟးဂီၤတၢ်လၢ တၢ်သူၣ်တၢ်ဖျးလီၢ်ကျဲပူၤ အဃိ ပှၤထူစံၥ်ဖိ တဖၣ်အံၤ သဂၢၢ်ဘၣ်ဝဲ ဘုဟု တၢ်ဘၣ်ဒိ ဘၣ် ထံး တၢ်ဟးဂုၤဟးဂီၤဒိၣ်ဒိၣ်မုၢ်မုၢ် န့ၣ်လီၤ.
တကီၢ်ခါခဲအံၤ လီၤဆီဒၣ်တၢ် တုၤဃီၤလၢ လါနီ (၂)နွံတနွံ အပူၤလံ ဒၣ်လဲၥ် မုၢ်ဟါလီၤ ဒီး မုၢ်နၤခီအဆၢကတီၢ် မူခိၣ် စူၤဒိၣ်ဝဲအဃိ ကကူးဘုကူဟုအဂီၢ် ပှၤထူစံၥ်ဖိတဖၣ် ဘၣ်ခိးကွၢ်ဝဲ မူခိၣ်ကလံၤသီၣ်ဂီၤ အတၢ်အိၣ်သး တပယူၥ်ဃီဒီး မၤဝဲ အဂ့ၢ်, သ့ၣ်ညါဘၣ်န့ၣ်လီၤ.
တၢ်အံၤအဖီခိၣ်, သုးက့(၃) ချၢၣ်လွံၢ်ထူၣ်ကီၢ်ရ့ၣ် လီၢ်ကဝီၤဖိတဂၤ စံးဝဲဒၣ်လၢ “မူခိၣ်စူၤစးထီၣ်ဝဲလၢ ၉ သီ တပတုၥ် ဘၣ်, တၢ်က့ၤလီၤလဲကဒါက့ၤဖဲ (၁၂)သီန့ၣ်လီၤ. ဘၣ်ဆၣ် ပှၤတဲလၢ ကလံၤမုၢ်ကလီၤအိၣ်ဒံးအဃိ မ့ၢ်တၢ်အိၣ်သး ကဆဲးအိၣ်ဒ်လဲၣ်ပတသ့ၣ်ညါဒံးဘၣ်” အဂ့ၢ်စံးဝဲန့ၣ်လီၤ.
တနံၣ်အံၤ ခီဖျိ မူခိၣ်စူၤလီၤတဘၣ်ဆၢဘၣ်ကတီၢ်ဘၣ်အဃိ ကီၢ်သူလ့ၤဟီၣ်ကဝီၤတၢ်လီၢ်တနီၤအပူၤ ဘုလၢတၢ် ကဘၣ်ကူးဝဲသ့ၣ်တဖၣ်အံၤ ဘၣ်ဟးဂီၤကွံၥ်ဝဲ ဝဲအါအါဂီၢ်ဂီၢ် တကးဘၣ် ခီဖျိ ယုၢ်နုၥ်လီၤအီၣ် မၤဟးဂီၤကွံၥ်ဝဲ တၢ်လၢ ဃုးပူၤ အိၣ်စ့ၢ်ကီးဝဲအဂ့ၢ်, ပှၤထူစံၥ်ဖိ တဖၣ် စံးဝဲန့ၣ်လီၤ.
ခီဖျိ ယုၢ်နုၥ်လီၤအီၣ်ဟးဂီၤတၢ်အဃိ သုးက့(၆) နိၣ်တကီ ကီၢ်ဆၣ် ဟီၣ်ကဝီၤအပူၤ ဒူသဝီဒ်အမ့ၢ် တအ့ရှ့, ဖါဝါခံ, ဖါဝါကျိ, လ့တီၤထၣ်, မဲၢ်တလါ တဖၣ်အံၤ တၢ်ကူးက့ၤဘု တသ့လၢၤဘၣ်အဂ့ၢ်, သ့ၣ်ညါဘၣ်န့ၣ်လီၤ.
မဲၢ်တလါလီၢ်ကဝီၤ ပိၥ်မုၣ်တဂၤ စံးဝဲလၢ “ကူးဘုန့ၣ် တဲတဂ့ၤ, အခဲအံၤ ယုၢ်နုၥ်လီၤအီၣ်မၤဟးဂီၤဘု လၢဃုးဒီတဘ့ၣ် ညါန့ၣ်လီၤ. သဝီဖဲအံၤခံဖျၢၣ် သၢဖျၢၣ် သနၥ်က့ ပှၤမၤအီၣ်ခုးတဖၣ် ယုၢ်အီၣ်ကွံၥ် အဘုလၢၥ်ပျီလံ, ပှၤတကူးဘၣ်ဘုဘၣ်. ဃုးလၢ အတြီၢ် (၂) နၥ်(၃)နၥ်သ့ၣ်တဖၣ်နါက့ၤဟးဂီၤလၢၥ်လံ ” အဂ့ၢ်စံးဝဲန့ၣ်လီၤ.
မူခိၣ်ကလံၤသီၣ်ဂီၤ တၢ်ဒိဘၣ် ဒီး ယုၢ်တၢ်နုၥ်လီၤအီၣ်မၤဟးဂီၤတၢ်အဃိ ဟီၣ်ကဝီၤ တဖၣ်အံၤအပူၤ ပှၤထူစံၥ် ဖဲးဃုး မၤအီၣ်တၢ်သူၣ်တၢ်ဖျးကစၢ် သ့ၣ်တဖၣ် ကဘှါရှဲက့ၤဝဲ ဟံၣ်ဃီတၢ်အီၣ်မိၢ်ပှၢ် တၢ်လိၣ်ဘၣ် အဂီၢ် မၤက့ၤဝဲ တၢ် ဒိးလဲ ကွးရီဘၢၣ်အတၢ်ဖံးတၢ်မၤ လၢ ဟီၣ်ကဝီၤအပူၤအဂ့ၢ် သ့ၣ်ညါဘၣ်န့ၣ်လီၤ.
ဒီးတၢ်ဘူးတၢ်လဲလၢ ဒိးန့ၢ်ဘၣ်ဝဲ တဖၣ်အံၤ ဘၣ်လဲၤပှ့ၤအီၣ်က့ၤဝဲ ဟုဘ့ၣ်ဟုသးဆူ တၢ်လီၢ်အဂၤ အဂ့ၢ်, သ့ၣ်ညါ ဘၣ်န့ၣ်လီၤ.
နိၣ်တကီ ကီၢ်ဆၣ်ဟီၣ်ကဝီၤ ဒူသဝီတနီၤအပူၤ ပှၤထူစံၥ်ဖိသ့ၣ်တဖၣ်အံၤ တကီၢ်ခါခဲအံၤ ဘၣ်လဲၤဃုပှ့ၤအီၣ်ဝဲ ဘုဟု လၢ ကြုၢ်တုကီၢ်ဆၣ် ဝီၢ်လူ သဝီဟီၣ်ကဝီၤ တကပၤဒီး ဟုးသးတနၥ်န့ၣ်အပှ့ၤအိၣ်ဝဲ (၆၀၀၀၀) ဒီး (၇၀၀၀၀)ကၠး အဂ့ၢ်သ့ၣ်ညါဘၣ်န့ၣ်လီၤ.
ကီၢ်သူလ့ၤ တၢ်ပၢ ဟီၣ်ကဝီၤ ကီၢ်ရ့ၣ်(၇)ဘ့ၣ်အပူၤ ဒ်တၢ်မၤနီၣ်မၤဃါအိၣ်ဝဲအသိးန့ၣ်, လီၢ်ကဝီၤဖိ (၈၅)မျးကယၤ မ့ၢ်ဝဲ ပှၤထူစံၥ် ဖဲးဃုး မၤတၢ်သူၣ်အီၣ်ဖျးအီၣ်တၢ်ဖံးတၢ်မၤတဖၣ် ဒီး (၁၅) မျးကယၤတခီ မ့ၢ်ဝဲ ပှၤဖံးအီၣ်မၤအီၣ်တၢ်လၢ အဂၤတဖၣ် အဂ့ၢ်, သ့ၣ်ညါ ဘၣ်န့ၣ်လီၤ.
ဘၣ်ဆၣ် လီၤဆီဒၣ်တၢ် သုးက့(၄) ဘျံး-ဒဝဲၢ်ကီၢ်ရ့ၣ် ဒီး သုးက့(၂) တီအူကီၢ်ရ့ၣ်ဟီၣ်ကဝီၤအပူၤ ကမျၢၢ်သ့ၣ်တဖၣ်အံၤ အိၣ်ဆိးဝဲ တၢ်လီၢ်တၢ်ကျဲအပူၤ ဖံးအီၣ်မၤအီၣ်ဝဲ တၢ်သူၣ်အီၣ်ဖျးအီၣ်ဘုဟု အမဲၥ်ညါ မၤစ့ၢ်ကီးဝဲ တၢ်သူၣ်အီၣ် သဲး, မးအံး, တခီးလီၣ် တဖၣ် လၢတၢ်ပှ့ၤအီၣ်က့ၤ ဘုဟု အဂီၢ်စ့ၢ်ကီး န့ၣ်လီၤ.
သုးဟံးန့ၢ်တၢ်စိကမီၤအလီၢ်ခံ, ကီၢ်သူလ့ၤ ဟီၣ်ကဝီၤ တၢ်လီၢ်အါတီၤ ခီဖျိ သုးကရူၢ်မၤဝဲ ကဘီယူၤတၢ်ထီၣ်ဒုးအဃိ, လီၢ်ကဝီၤဖိတဖၣ်ဘၣ်ဃ့ၢ်ထီၣ်ဒီး တဖံးအီၣ်မၤအီၣ်ဘၣ်ဝဲ သဘျ့ဘၣ်အဖီခိၣ် ဒိဘၣ်ဝဲ တၢ်ဖံးအီၣ်မၤအီၣ်လီၢ်ကျဲ တဖၣ် အဂ့ၢ်, ခ့ၣ်အဲၣ်ယူၣ် စံၥ်ပှဲၤသူၣ်ဖျးဝဲၤကျိၤ ပှၤဘၣ်မူဘၣ်ဒါတဖၣ် ကတိၤပၥ်ဖျါဝဲ အိၣ်ဝဲန့ၣ်လီၤ.
ပယီၤသုးကရူၢ် ဟံးန့ၢ်တၢ်စိကမီၤဒီတကတီၢ် တၢ်သူၣ်အီၣ်ဖျးအီၣ်လီၢ်ကျဲ ဒီး တၢ်ဘၣ်ဒိဘၣ်ထံး အဖီခိၣ်, ခ့ၣ်အဲၣ်ယူၣ် လီၢ်ခၢၣ်သး စံၥ်ပှဲၤသူၣ်ဖျး ဝဲၤကျိၤခိၣ် ပဒိၣ်စီၤလ့ၢ်စ့ စံးဝဲဒ်အံၤ န့ၣ်လီၤ.
“ဘၣ်မနုၤဃိလၢ ပတဲလၢတၢ်သူၣ်အီၣ်ဖျးအီၣ်ဟးဂီၤဝဲသ့လဲၣ်န့ၣ်, တၢ်လီၢ်တနီၤန့ၣ် ကဘီယူၤ တၢၤဝ့ၤဝီၤ မၤတံၥ်တၥ်တၢ် အိၣ်ထီဘိန့ၣ်လီၤ. တၢ်အံၤအဃိ ကမျၢၢ်လီၢ်ကဝီၤဖိတဖၣ် ဘၣ်က့ၤမၤအီၣ် မၤအီဒၣ် လၢတၢ်ပျံၤ တၢ်ဖုးအပူၤ ဒီး တနီၤလၢအိၣ်ဘူးဒီးဒုးယၤဟီၣ်ကဝီၤတဖၣ်န့ၣ် ဘၣ်ဃ့ၢ်ထီၣ် ဘၣ်တ့ၢ်ကွံၥ် အတၢ်ဖံးအီၣ်မၤအီၣ် စံၥ်လီၢ် ဃုးလီၢ်အဃိ ဘၣ်ဒိ ဟးဂီၤကွံၥ်ဝဲ န့ၣ်လီၤ. ”အဂ့ၢ်စံးဝဲန့ၣ်လီၤ.
ဟီၣ်ကဝီၤအပူၤ ဒုးယၤတၢ်သဘံၣ်ဘုၣ်အဃိ တၢ်ကမၤနီၣ်မၤဃါဝဲ တနံၣ်ဘၣ်တနံၣ် တၢ်သူၣ်အီၣ်ဖျးအီၣ် တၢ်ဟးထီၣ်အအါ ထီၣ်စှၤလီၤအဂီၢ် စံၥ်ပှဲၤသူၣ် ဖျးဝဲၤကျိၤ ပှၤဘၣ်မူဘၣ်ဒါတဖၣ်သဂၢၢ်ဘၣ်ဝဲ တၢ်ကီတၢ်ခဲ အဂ့ၢ်,သ့ၣ်ညါဘၣ်န့ၣ်လီၤ.
တကးဒံးဘၣ်, တၢ်စူၤခါကတီၢ် ခီဖျိ ကျဲတၢ်ဟးထီၣ်က့ၤ လီၤကီခဲဝဲအဃိ လၢတၢ်ကဆီၣ်ထွဲမၤစၢၤဝဲ ပှၤဃ့ၢ်တၢ်ဒုး လီၢ်အိၣ်ကဒု ပှၤထူစံၥ်ဖိတဖၣ်အဂီၢ် သဂၢၢ်ဘၣ်ဝဲ တၢ်စိၥ်ဆှၢခီတၢ်အီၣ်တၢ်အီအဂ့ၢ် စံၥ်ပှဲၤသူၣ် ဖျးဝဲၤကျိၤ တကပၤ ပၥ်ဖျါ ဝဲ စ့ၢ်ကီး န့ၣ်လီၤ.
ကီၢ်သူလ့ၤ ဟီၣ်ကဝီၤအပူၤ ပှၤထူစံၥ်ဖိသ့ၣ်တဖၣ်အံၤ တနံၣ်ညါအံၤအတီၢ်ပူၤ တၢ်ဖံးအီၣ်မၤအီၣ်အဂီၢ် ဖှံလီၤ, ပၥ်လီၤ, ဘျၢလီၤတ့ၢ်ဝဲ ဘုချံ, ဟီၣ်ခိၣ်ညၣ်ထ့ၣ်, ပှၤကညီဂံၢ်ဘါ ကျိၣ်စ့ ကပၢၤကဝါ ဘၣ်ဆၣ်, တၢ်ကသုၣ်ကသံၣ် ဒီး ဆၣ်ဖိ ကီၢ်ဖိ တၢ် နုၥ်လီၤမၤဟး ဂီၤအဖီခိၣ် တကူးဘၣ်က့ၤဝဲတၢ် ဒ် မုၢ်လၢ်ပၥ်ဝဲအသိးဘၣ်န့ၣ်လီၤ.
တနီၤ လီၢ်ခံကတၢၢ်မုၢ်လၢ်ဒံးဝဲဒၣ်လၢ ကဒိးန့ၢ်ဘၣ် ဘုချံ လၢနံၣ်ကဟဲ တၢ်သူၣ်အီၣ်ဖျးအီၣ်အဂီၢ် ဘၣ်ဆၣ်ဘၣ်ဟ့ၣ် ဃၣ်ကွံၥ်ဝဲ အတၢ်ချံတၢ်သၣ် အဖီခိၣ် ဘၣ်ကွၢ်ဆၢၣ်မဲၥ်ကဒီးဝဲ တၢ်ကီတၢ်ခဲလၢ ခါဆူညါနံၣ်လၢကဟဲတၢ်ဖံး အီၣ်မၤ အီၣ် အဂီၢ် အိၣ်ထီၣ်ကဒီး ဝဲ စ့ၢ်ကီးန့ၣ်လီၤ.
ကီၢ်သူလ့ၤဟီၣ်ကဝီၤအပူၤ တနံၣ်အံၤ ဒ်တၢ်လီၢ်အါတီၤ ပှၤထူစံၥ်ဖိအါဂၤ သဂၢၢ်ဘၣ်ဝဲ တၢ်ကသုၣ်ကသံၣ် မူခိၣ်ကလံၤ သီၣ်ဂီၤ အတၢ်ဆီတလဲအသိးန့ၣ် ကီၢ်ပယီၤ အပူၤကလုၥ်ဒူၣ်ဟီၣ်ကဝီၤအဂၤတဖၣ်အပူၤ ပှၤထူစံၥ်ဖိတဖၣ်သဂၢၢ် ဘၣ် ဝဲတၢ် ဒ်သိးသိးန့ၣ်လီၤ.
ဒ်န့ၣ်အသိး, တၢ်ဘၣ်ဟးပှ့ၤအီၣ် ဘုဟုလၢတၢ်လီၢ်အဂၤအဖီခိၣ် ကဲထီၣ်ဝဲ တၢ်ဒိဘၣ်ဒိၣ်ဒိၣ်မုၢ်မုၢ်လၢ ပှၤထူစံၥ်မၤဃုးဖိ တဖၣ် ဟံၣ်ဖိဃီဖိ အဂီၢ် န့ၣ်လီၤ.