ပယီၤသုးခးလီၤကျိဖးဒိၣ်ဆူသၣ်တီၣ်–ပၠါစခါသ၀ီပူၤအဃိ ဘၣ်သံ၀ဲဒၣ်ၦၤဒီဖိပၢ် ၂ ဂၤ

လါစဲးပထ့ဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဟီၣ်က၀ီၤ သၣ်တီၣ်ကၠံကီၢ်ဆၣ်အပူၤ ဖဲမဟါလါစဲးပထ့ဘၢၣ် ၅ သီ ဂီၤခီအဆၢကတီၢ် ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢ (ပၠါစခါ)သ၀ီပူၤ ၦၤဟံၣ်ခိၣ်အဃိ ဘၣ်သံ၀ဲဒၣ်ၦၤဟံၣ်ဖိဃီဖိဒီဖိပၢ်(၂)ဂၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ၦၤဒီဖိပၢ်လၢအသံ(၂)ဂၤန့ၣ်မ့ၢ်၀ဲအပါလၢသးနံၣ်အိၣ်(၅၂)နံၣ်ႇအဖိခွါ(၉)နံၣ်ဒီး ၦၤဒီဖိပၢ်ခံဂၤအံၤဘၣ်ဖဲအ၀ဲသ့ၣ် အိၣ်လၢဟံၣ်ပူၤအဆၢကတီၢ်ခီဖျိကျိဖးဒိၣ်လီၤတဲာ်ပိၢ်ဖးထီၣ်လၢဟံၣ်ခိၣ်အဃိဘၣ်သံ၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

“ပနၢ်ဟူလၢတၢ်ခးလိာ်သးကဲထီၣ်မီၤနီၤႉအဃိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢသ၀ီပူၤအဃိ ၦၤဒီဖိပၢ်သံ(၂)ဂၤႉဖဲတဂီၤညါအံၤကျိဖးဒိၣ်ကလုၢ်သီၣ်ဒံးႉတုၤလၢဂီၤခီ ၉ နၣ်ရံၣ်ဘျဲၣ်န့ၣ် နၢ်ဟူကျိသီၣ်တထံၣ်တထံၣ် ဒံးႉတၢ်လီၢ်ဖဲန့ၣ်န့ၣ်တၢ်ခးလိာ်သးတကဲထီၣ်ဘၣ်ကအိၣ်လၢအလါလံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲမဟါလါစဲးပထ့ဘၢၣ် ၅ သီအနံၤန့ၣ်လီၤႉ

ဖဲမဟါလါစဲးပထ့ဘၢၣ် ၅ သီ ဂီၤခီ ၈ နၣ်ရံၣ်ဃၣ်ဃၣ်အဆၢကတီၢ် တၢ်ခးလိာ်သးကဲထီၣ်လၢသၣ်တီၣ်ကၠံကီၢ်ဆၣ် (၅ မဲၤ)တၢ်လီၢ်န့ၣ်ဒီး ခီဖျိ(၇ မဲၤ)ပယီၤသုးကလၢၤအံၤခးလီၤစၢၤကျိဖးဒိၣ်အဃိ ကျိဖးဒိၣ်လီၤတဲာ်ပိၢ်ဖးထီၣ်၀ဲလၢ ကမျၢၢ်တဂၤန့ၣ်အဟံၣ်ခိၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ခံခီခံကပၤတၢ်ခးလိာ်သးကဲထီၣ်၀ံၤလီၢ်ခံလၢ(၄ မဲၤ)ဒီး(၇ မဲၤ)ပယီၤသုးတၢ်သမံသမိးတြဲၤလီၢ်န့ၣ် ပယီၤသုးအိၣ်ခိး သမံသမိးကမျၢၢ်လၢအလ့ၢ်ထီၣ်လ့ၢ်လိၤတဖၣ်ဟဲအါထီၣ်၀ဲဒီးတကးဒံးဒၣ်စှၤသီအတီၢ်ပူၤအံၤလၢတီအူ၀့ၢ်ပူၤန့ၣ် ပယီၤသုးသမံသမိးတၢ်ဟဲအါထီၣ်ႇကဘီယူၤစ့ၢ်ကီးစံၣ်ထီၣ်စံၣ်လီၤလၢတီအူကဘီယူၤပျီတပယူာ်ဃီအဂ့ၢ်န့ၣ် ကမျၢၢ်တဖၣ်စံး၀ဲန့ၣ်လီၤႉ

လၢန့ၣ်အမဲာ်ညါစးထီၣ်ဖဲတီအူ၀့ၢ်ဟးထီၣ်တုၤလၢကညီကီၢ်စဲၣ်အဆၢတီအူ–သၣ်တီၣ်ကျဲႇတီအူ–လ့ၣ်သိၤကျဲ တဖၣ်န့ၣ် ပယီၤသုးဆီလီၤတြဲၤတၢ်သမံသမိးလီၢ်အါမးဒီးတပျဲၦၤစိာ်ထီၣ်စိာ်လီၤဟုသးႇကသံၣ်ကသီတဖၣ်လၢ ဟီၣ်က၀ီၤပူၤဘၣ် အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

သၣ်တီၣ်ကၠံကီၢ်ဆၣ်ပူၤစးထီၣ်ဖဲတနံၣ်အံၤထီၣ်အခါန့ၣ်တၢ်ဒုးဆူၣ်ထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီးပယီၤသုး အဘၢၣ်စၢၤ၀ံၤလီၢ်ခံပယီၤသုးအံၤခးလီၤကျိဖးဒိၣ်တယူာ်ဃီတကးဒံးဘၣ်ခီဖျိအ၀ဲသ့ၣ်သုးကျိၤနုာ်လီၤလၢပျီပူၤႇ ဖီၣ်သမံသမိးတၢ်အဃိလီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲဒီး(၁၃ မဲၤ) သၣ်တီၣ်၀့ၢ်ဒီတ၀့ၢ် ကမျၢၢ်တဖၣ် ဘၣ်သုးလီၢ်သုးကျဲဟးအိၣ်လၢတၢ်လီၢ်အဂၤအဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤႉ

လၢန့ၣ်အမဲာ်ညါပယီၤသုးလၢအိၣ်(၁၃ မဲၤ)တဖၣ်အံၤ နုာ်လီၤဒွဲၣ်အူအီၣ်၀့ၢ်ပူၤကမျၢၢ်အဟံၣ်အဃီခဲအံၤခဲအံၤအသိး တကီၢ်ခါခဲအံၤလၢသၣ်တီၣ်၀့ၢ်(၁၃ မဲၤ)န့ၣ် ပယီၤသုးဒွဲၣ်အူအီၣ်ကမျၢၢ်အဟံၣ်ခဲလၢာ်အိၣ်အဖျၢၣ်(၃၀)ဘျဲၣ်လံဒီး ကျိဖးဒိၣ်လီၤတဲာ်ပိၢ်ဖးထီၣ်အဃိကမျၢၢ်အဟံၣ်အဃီဟးဂီၤ၀ဲအါမးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ