ခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤ

လါမ့ၤ ၁သီ ၂၀၂၄နံၣ် ခ့ၣ်အဲးစံၣ်

တနံၤအံၤလါမ့ၤ(၁)သီႇလၢအလီၤဘၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤအပူၤႇ၀့ၢ်မဲဆီးခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢတဖၣ်ပာ်ဖှိၣ်သးမၤလၤကပီၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤလၢကီၢ်ကၠီၣ်တဲၣ်-ကီၢ်ပယီၤဆၢမဲဆီး၀့ၢ်တၢ်လီၢ်တတီၤအပူၤဖဲတဟါအံၤ(၄)နၣ်ရံၣ်အဆၢကတီၢ်န့ၣ်လီၤႉ

ဘၣ်ဃးဒီးတၢ်ပာ်ဖှိၣ်မၤသကိး၀ဲဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤတၢ်ရဲၣ်တၢ်ကျဲၤအံၤန့ၣ်ႇအတၢ်ပညိၣ်မ့ၢ်၀ဲဒ်သိးတၢ်ကပာ်ဖျါထီၣ်ခီကီၢ်ၦၤမၤတၢ်ဖိတဖၣ်အကလုၢ်ဒီးကဒုးအိၣ်ထီၣ်တၢ်ပာ်ဖှိၣ်မၤသကိးတၢ်လၢအဂံၢ်ဆူၣ်အဂ့ၢ်ႇၦၤဒုးအိၣ်ထီၣ်(တၢ်မၤဂုၢ်ထီၣ်ပသီထီၣ်ၦၤမၤတၢ်ဖိၦၤတ၀ၢ) Progressive Labor Community’s founder ကိၤသါကၠံစံးလီၤ၀ဲလၢတၢ်ရဲၣ်တၢ်ကျဲၤအပူၤဒ်အံၤန့ၣ်လီၤႉ

အ၀ဲစံး၀ဲလၢ“ဟီၣ်ခိၣ်ဒီဖျၢၣ်ၦၤမၤတၢ်ဖိအမုၢ်နံၤအပူၤႇပမၤတၢ်ရဲၣ််တၢ်ကျဲၤန့ၣ်ပတၢ်ပညိၣ်န့ၣ်မ့ၢ်၀ဲဒ်သိးပကပာ်ဖျါထီၣ်၀ဲၦၤမၤတၢ်ဖိအတၢ်ကီတၢ်ခဲႇၦၤမၤတၢ်ဖိအကလုၢ်လီၤႉဒီးပတၢ်ပညိၣ်အိၣ်စ့ၢ်ကီး၀ဲလၢပကမၤအါထီၣ်တၢ်ပာ်ဖှိၣ်မၤကိးတၢ်လၢအဂံၢ်ဆူၣ်လၢကီၢ်ပယီၤၦၤမၤတၢ်ဖိတဖၣ်အဂီၢ်န့ၣ်လီၤႉဘၣ်မနုၤအဃိလဲၣ်န့ၣ်ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢမဲဆီး၀့ၢ်ပူၤအံၤန့ၣ်ႇပထံၣ်ဘၣ်လၢကီၢ်ပယီၤၦၤမၤတၢ်ဖိသ့ၣ်တဖၣ်န့ၣ်အ၀ဲသ့ၣ်သဂၢၢ်ဘၣ်၀ဲတၢ်ကီတၢ်ခဲအိၣ်အါမံၤဘၣ်ဆၣ်လၢတၢ်ပာ်ဖျါထီၣ်န့ၣ်အ၀ဲသ့ၣ်အကလုၢ်န့ၣ်တအိၣ်၀ဲဘၣ်အမဲာ်ညါၦၤမၤတၢ်ဖိအကလုၢ်န့ၣ်လီၤပံာ်မၢ်ကွံာ်၀ဲအဃိကရူၢ်ကရၢလၢအဘၣ်ထွဲဘၣ်ဃးၦၤမၤတၢ်ဖိတဖၣ်ကတိၤသကိးဒီးပမၤ၀ဲတၢ်ရဲၣ်တၢ်ကျဲၤဒ်အံၤလီၤႉ”အဂ့ၢ်စံးလီၤ၀ဲလၢတၢ်ရဲၣ်တၢ်ကျဲၤအပူၤန့ၣ်လီၤႉ

လၢန့ၣ်အမဲာ်ညါႇတၢ်ပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤအပူၤႇဆီၣ်တခူထီၣ်၀ဲခီကီၢ်ၦၤမၤတၢ်ဖိတဖၣ်လၢကဂဲၤလိာ်အါထီၣ်လၢတၢ်မၤလီၤၦီၢ်ကွံာ်သုးကီၣ်ကးသနူႇလၢတၢ်ကဒိးန့ၢ်ဘၣ်က့ၤတၢ်မၤအဘူးအလဲလၢအကြၢးကၢကီၣ်ဒီးကဒိးန့ၢ်ဘၣ်တၢ်ဘံၣ်တၢ်ဘၢတၢ်ထဲသိးတုၤသိးလၢတၢ်ဖံးတၢ်မၤပူၤအဂ့ၢ်မဲဆီးခီကီၢ်ၦၤမၤတၢ်ဖိဂ့ၢ်၀ီကရူၢ်ကရၢဆီၣ်တခူပာ်ဖျါ၀ဲလၢအလံာ်ဆီၣ်တခူထီၣ်တၢ်အပူၤစ့ၢ်ကီးန့ၣ်လီၤႉ

၂၀၂၁နံၣ်သုးဟံန့ၢ်တၢ်စိကမီၤ၀ံၤအလီၢ်ခံႇကီၢ်ပယီၤၦၤမၤတၢ်ဖိသ့ၣ်တဖၣ်အံၤတၢ်ခွဲးတၢ်ယာ်တၢ်လီၤစှၤကွံာ်၀ဲလၢတၢ်ဃုဖံးဃုမၤတကပၤအိၣ်၀ဲဒီးတနီၤတၢ်မၢဆူၣ်မၢစိးႇမၤပျံၤမၤဖုးအ၀ဲသ့ၣ်လၢတၢ်ဖံးတၢ်မၤအပူၤအိၣ်စ့ၢ်ကီး၀ဲအမဲာ်ညါတၢ်မၤပယွဲမၤထီဒါ၀ဲအခွဲးအယာ်လၢတၢ်ဖံးတၢ်မၤပူၤအိၣ်၀ဲဒၣ်အဂ့ၢ်ၦၤမၤတၢ်ဖိဂ့ၢ်၀ီတဖၣ်စံး၀ဲဒၣ်န့ၣ်လီၤႉ

တကးဒံးဘၣ်ႇသုးဟံန့ၢ်တၢ်စိကမီၤ၀ံၤအလီၢ်ခံခီဖျိကျိၣ်စ့အလုၢ်အၦ့ၤလီၤဒီးပနံာ်တၢ်ဖိတၢ်လံၤတဖၣ်အၦ့ၤဒိၣ်ထီၣ်၀ဲအါတလၢအခၢးအဃိကျိၣ်စ့တၢ်ဟဲနုာ်-ဟးထီၣ်တဘၣ်လိာ်ဖိးမံသးဘၣ်အဃိၦၤမၤတၢ်ဖိတဖၣ်ကွၢ်ဆၢၣ်မဲာ်သဂၢၢ်ဘၣ်၀ဲတၢ်ဃံာ်တၢ်စ့ၤအိၣ်၀ဲအါမးအဂ့ၢ်ပာ်ဖျါစ့ၢ်ကီး၀ဲလၢလံာ်ဆီၣ်တခူထီၣ်အပူၤစ့ၢ်ကီးန့ၣ်လီၤႉ

တကတီၢ်ဃီႇ၂၀၂၄နံၣ်လါဖ့ၤဘြူၤအါရံၤအပူၤသုးကီၣ်ကးထုးထီၣ်၀ဲကမျၢၢ်တၢ်ဘၣ်ကဲသုးတၢ်သိၣ်တၢ်သီအဃိကမျၢၢ်ထံဖိကီၢ်ဖိဃုာ်ဒီးၦၤမၤတၢ်ဖိတဖၣ်ကိးနံၤဒဲးဘၣ်အိၣ်၀ဲလၢတၢ်ပျံၤတၢ်ဖုးတၢ်လီၤဘၣ်ယိာ်အပူၤအဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

တနံၤအံၤႇၦၤမၤတၢ်ဖိဂ့ၢ်၀ီကရူၢ်ကရၢတဖၣ်ပာ်ဖှိၣ်မၤသကိး၀ဲ(၁၃၄)၀ီတ၀ီဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤတၢ်ရဲၣ်တၢ်ကျဲၤအပူၤႇတၢ်ဟ့ၣ်တၢ်ယူးယီၢ်ဆူၦၤဒူၦၤဃိၤၦၤမၤတၢ်ဖိလၢအဟ့ၣ်လီၤတ့ၢ်သးအသးတစိၤဘၣ်တစိၤတဖၣ်ႇတၢ်ဖးဖျါထီၣ်၀ဲၦၤမၤတၢ်ဖိကရူၢ်ကရၢအလံာ်ဆီၣ်တခူထီၣ်တဖၣ်ႇတၢ်တဲပာ်ဖျါထီၣ်၀ဲဟီၣ်ခိၣ်ဒီဖျၢၣ်ၦၤမၤတၢ်ဖိမုၢ်နံၤကဲထီၣ်သးအဂ့ၢ်ဒီးတၢ်ဒုးနဲၣ်၀ဲကီၢ်ပယီၤၦၤမၤတၢ်ဖိတဖၣ်အတၢ်ကိးသတြီအတၢ်ဂီၤမူသ့ၣ်တဖၣ်န့ၣ်လီၤႉ

ဒ်န့ၣ်အသိးႇလၢတၢ်မၤ၀ဲတၢ်ရဲၣ်တၢ်ကျဲၤအပူၤန့ၣ်ႇမဲဆီးကီၢ်ခီၦၤမၤတၢ်ဖိတဖၣ်ႇကီၢ်ပယီၤၦၤမၤတၢ်ဖိကရူၢ်ကရၢခိၣ်နၢ်တဖၣ်ဃုာ်ဒီးၦၤမၤကစီၣ်သန့ၦၤမၤတၢ်ဖိတနီၤပာ်ဖှိၣ်သးဟဲထီၣ်၀ဲအဂၤ(၄၀)ဘျဲၣ်န့ၣ်လီၤႉ