လါယနူၤအါရံၤ ၂၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ ဖဲအဟါဟါခီအဆၢကတီၢ် သုးကီၣ်ကးအကဘီယူၤတဘ့ၣ်လဲၤတ့ၢ်လီၤကဒီး၀ဲမ့ၣ်ပိၢ် လၢဟးတရဲၥ်ကရူၢ် ကျူကၠံသ၀ီဃၢၤအဃိ တၢ်ဟးဂူၥ်ဟးဂီၤကဲထီၣ် အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါယနူၤအါရံၤ ၂၂ သီ ဟါခီ ၈း၁၃ မံးနံးအဆၢကတီၢ်န့ၣ် သုးကီၣ်ကးအ(Jet fighter)ကဘီယူၤ လဲၤတ့ၢ်လီၤကဒီး၀ဲမ့ၣ်ပိၢ် (၂)ဖျၢၣ်လၢကျူကၠံသ၀ီပူၤ လီၤတဲၥ်ပိၢ်ဖးထီၣ်၀ဲလၢကျဲမုၢ်ခိၣ်(၁)ဖျၢၣ်ဒီးကျဲမုၢ်ကပၤရီဘၢၣ်ကျီးပူၤ တဖျၢၣ်အဃိကမျၢၢ်တၢ်သူၣ် ထီၣ် ဟးဂီၤအမဲၥ်ညါဆဲးကဲး(wave)တခိၣ်ဒီးရီဘၢၣ်ထူၣ်ကၢ်လီၤဟးဂီၤ၀ဲအိၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် လီၢ်က၀ီၤကမျၢၢ်လၢတအဲၣ်ဒိးပၥ်ဖျါအမံၤတဂၤစံး၀ဲလၢ“ဖဲမဟါ ၈ နၣ်ရံၣ်ဘျဲၣ်န့ၣ် ကဘီယူၤဟဲကၢလီၤ ကဒီးမ့ၣ်ပိၢ်(၂)ဖျၢၣ်.အလီၤတဲၥ်လၢကျဲပူၤတဖျၢၣ်,ကျဲကပၤတဖျၢၣ်.အလီၤစီၤစုၤန့ၣ်ကအိၣ်(၁၅)ပ့ၣ်လီၤ.အလီၤတဲၥ်ခံဖျၢၣ်န့ၣ်တယံၤတဘူးလီၤ.တၢ်သူၣ်ထီၣ်ဟးဂူၥ်ဟးဂီၤအိၣ်,မ့၀ံၤဆဲးကဲးဟးဂီၤတခိၣ်.မ့မ့ၢ်ပှၤရီဘၢၣ်ကျီးတဘ့ၣ်န့ၣ်ဘျ့ၣ်မးလီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
လၢန့ၣ်အမဲၥ်ညါတချုးကဘီယူၤဟဲတ့ၢ်လီၤမ့ၣ်ပိၢ်ဒံးဘၣ်န့ၣ် ကဘီယူၤဟဲဆှၣ်တၢ်လၢမုၢ်ဆါခီကအိၣ်လၢ(၃)ဘျီညါအဖီခိၣ် ပှၤသ၀ီဖိသ့ၣ်တဖၣ်စံၣ်ပလဲၥ်စိဃၥ်သးလၢတၢ်ဘံၣ်တၢ်ဘၢလီၢ်ဒီး တနီၤနုၥ်လီၤစံၣ်အိၣ်တၢ်ပူၤအဃိ ပှၤကညီတၢ်ဘၣ်ဒိၣ် ဘၣ်ထံးတအိၣ်၀ဲဘၣ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ သ့ၣ်ညါဘၣ်န့ၣ်လီၤ.
ဒ်န့ၣ်အသိးတချုးဖဲမဟါတၢ်ကဲထီၣ်သးဒံးဘၣ်န့ၣ် အပူၤကွံၥ်လါယနူၤအါရံၤ ၂၁ သီ ဟါခီ ၃ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး သုးကီၣ်ကးအ(Jet fighter)ကဘီယူၤ လဲၤတ့ၢ်လီၤဒံးမ့ၣ်ပိၢ်(၂)ဖျၢၣ်လီၤတဲၥ်ပိၢ်ဖးထီၣ်၀ဲလၢကျူကၠံဒီးဖှၣ်ဂီၤသ၀ီဘၢၣ်စၢၤ ရီဘၢၣ်ကျီးပူၤအဃိ ရီဘၢၣ်ထူၣ်ကၢ်လီၤဟးဂီၤဟးကဲထီၣ်တ့ၢ် အသးဒံးန့ၣ်လီၤ.
တကတီၢ်ဃီသုးကီၣ်ကးအကဘီယူၤဟဲခးလီၤတၢ်ခံသီဆဲးတဲးလၢဖှၣ်ဂီၤဒီးကျူကၠံသ၀ီဒ်အံၤအဖီခိၣ် အတၢ်ပညိၣ်အိၣ်၀ဲ လိၤလိၤလၢ အဲၣ်ဒိး မၤပျံၤမၤဖုး,မၤသံမၤ၀ီ၀ဲကမျၢၢ်ထံဖိကီၢ်ဖိလီၤအဂ့ၢ်န့ၣ် သုးက့ပှၤဘၣ်မူဘၣ်ဒါ ပဲၥ်ထံနီၤဖးစံး၀ဲန့ၣ်လီၤ.
တကီၢ်ခါခဲအံၤခီဖျိကဘီယူၤဟဲခးလီၤကဒီးတၢ်ဒ်အံၤအဃိကမျၢၢ်လၢအိၣ်ဘူးဖဲကျူကၠံဒီးဖှၣ်ဂီၤသ၀ီအခိၣ်အဃၢၤတဖၣ် အါဒၣ်တက့ၢ်ဟးစံၣ်မံစံၣ်ပလဲၥ်သးလဲၤအိၣ်၀ဲလၢကျီးပူၤ,ပှၤဒူပှၤသ၀ီလၢတၢ်ဘံၣ်တၢ်ဘၢအလီၢ်အိၣ်၀ဲအသိး မ့မ့ၢ်ပှၤလၢအတဟး ပလဲၥ်သးသ့ၣ်တဖၣ်န့ၣ်ဘၣ်အိၣ်၀ဲလၢတၢ်ပလီၢ်ပဒီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
