လါဖ့ၤဘြူၤအါရံၤ ၄သီ,၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ကီၢ်ပယီၤကီၢ်ဆၢ,သုးခိးကီၢ်ဆၢ(BGF)ဒီး,ဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တၢ်ပၢဟီၣ်ကဝီၤရၤမတံဝ့ၢ်အပူၤ,သူၣ်စၢ်သးဘီၣ်ဒီးကၠိဖိတဖၣ်သူတၢ်မူၤတၢ်ဘှီးသုတအိၣ်လၢၤတဂ့ၤအဂီၢ်,ပံးကွံၥ်ဝဲ(GAME)တၢ်လိၣ်ကွဲလီၢ်ဒီးအၣ်ဝၣ်ဒ့တၢ်တၤကျိၣ်တၤစ့လီၢ်တဖၣ်အဂ့ၢ်,(DKBA)သုးရိၢ်မဲခိၣ်ကျၢၤ(၂)သုးခိၣ်ကျၢၢ်စိစီၤရွ့ၣ်ဝၣ်စံးဝဲဒၣ်န့ၣ်လီၤ.
(DKBA)အသုးမုၢ်သံၣ်ဘိဒီးဟံၣ်ဖိဃီဖိတဖၣ်ကအိၣ်ဘၣ်ဘၣ်ဘျီးဘၣ်ဒါအဂီၢ်,ရၤမတံဝ့ၢ်ပူၤဒီးဟီၣ်ကဝီၤခိၣ်ဃၢၤတဖၣ်တၢ်လီၢ်တဖၣ်အပူၤတၢ်အိၣ်ထီၣ်ဝဲ(GAME)တၢ်လိၣ်ကွဲအလီၢ်ဒီးအၣ်ဝၣ်ဒ့တၢ်တၤကျိၣ်တၤစ့အလီၢ်တဖၣ်အံၤ,ဒ်တၢ်အိၣ်ဖှိၣ်တၢ်ဆၢတဲၥ်အိၣ်ဝဲအသိးတၢ်ကဘၣ်ပံးကွံၥ်ဝဲဒၣ်အဂ့ၢ်,(DKBA)ဘိးဘၣ်ရၤလီၤထုးထီၣ်ဝဲဒၣ်လံၥ်ဖဲ,အပူၤကွံၥ်လါယနူၤအါရံၤ(၃၁)သီအနံၤအပူၤ,န့ၣ်လီၤ.
ဘၣ်ဃးတၢ်ဘိးဘၣ်ရၤလီၤထုးထီၣ်ပၥ်ဖျါဝဲလံၥ်အံၤန့ၣ်,ခီဖျိရၤမတံဝ့ၢ်ပူၤသူၣ်ဘီၣ်သးစၢ်ဒီးကၠိဖိတဖၣ်အံၤသူဝဲတၢ်မူၤတၢ်ဘှီးလၢ,တၢ်ဂဲၤလိၣ်ကွဲအလီၢ်ဒီးဟးဂီၤအါဝဲအဃိ,ဒ်သိးအဝဲသ့ၣ်တဖၣ်သုတသူတၢ်မူၤတၢ်ဘှီးအံၤလၢၤတဂ့ၤအဂီၢ်(DKBA)ဒီး(BGF)ပှၤဘၣ်မူဘၣ်ဒါတဖၣ်တၢၣ်ပီၣ်တဲသကိးတၢ်လၢတၢ်ကပံးကွံၥ်ဝဲအဂ့ၢ်,(DKBA)သုးရိၢ်မဲခိၣ်ကျၢၤ(၂)သုးခိၣ်ကျၢၢ်စိစီၤရွ့ၣ်ဝၣ်စံးဝဲဒၣ်ဒ်အံၤန့ၣ်လီၤ.
အဝဲစံးဝဲလၢ“ကၠိဖိ,ဖိသၣ်တဖၣ်န့ၣ်လဲၤသူဝဲကသံၣ်မူၤဘှီဒီးလၢတၢ်လိၣ်ခိၣ်လိၣ်ကွဲလီၢ်န့ၣ်လီၤ.လၢတၢ်န့ၣ်အဃိ,ပသးလီၤပလိၥ်ဒီး(BGF)လၢပကပံးကွံၥ်န့ၣ်လီၤ.အဝဲသ့ၣ်နါက့လဲၤမၤဟးဂီၤဝဲအတၢ်လိၣ်ကွဲအိၣ်,လံၥ်ထုးထီၣ်အံၤတၢ်ကဘၣ်လူၤပိၥ်မၤထွဲအီၤထီဘိလီၤ.ပထုးထီၣ်လံၥ်လံအဃိန့ၣ်,တၢ်မ့တလူၤပိၥ်ထွဲဘၣ်န့ၣ်,တၢ်ကဟံအရ့ဒီးဖီၣ်ဖၢနုၥ်အီၤလၢတၢ်ဒုးဃၥ်ပူၤအိၣ်ဝဲလီၤ.”အဂ့ၢ်စံးဝဲဒၣ်န့ၣ်လီၤ.
တၢ်ဆၢတဲၥ်ဝဲလၢတၢ်ကပံးကွံၥ်ဝဲတၢ်လိၣ်ကွဲလီၢ်တဖၣ်ဝံၤအလီၢ်ခံ,(DKBA)တကပၤပံးကွံၥ်ဝဲတၢ်လိၣ်ကွဲလီၢ်လၢဘၣ်ထွဲဒီးအဝဲသ့ၣ်တဖၣ်အဖျၢၣ်(၆၀)ဘျဲၣ်အဂ့ၢ်,(DKBA)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဆၣ်ရၤမတံဝ့ၢ်ပူၤဝ့ၢ်ချၢတၢ်လီၢ်တနီၤအပူၤတၢ်ကွံၥ်လိၣ်ကွဲညၣ်ဒီးအီၤလဲတၢ်တၤကျိၣ်တၤစ့တနီၤအိၣ်ဒံးဝဲအသိး,ဖီၣ်စုကဝဲၤကရူၢ်ကရၢတနီၤအိၣ်ခိးဟံဝဲတၢ်ဘံတၢ်ဘၢအိၣ်ဝဲအဂ့ၢ်,သ့ၣ်ညါဘၣ်ဒ်ရၤမတံလီၢ်ကဝီၤဖိတဖၣ်စံးဝဲအသိးန့ၣ်လီၤ.
ရၤမတံဝ့ၢ်လီၢ်ကဝီၤပိၥ်ခွါတဂၤစံးဝဲလၢ“(DKBA)တၢ်ရ့လိၥ်မုၥ်လိၥ်ဝဲၤဒၢးကျဲတၢ်နုၥ်လီၤအပူၤတၢ်လိၣ်ကွဲလီၢ်အိၣ်ဝဲဒၣ်န့ၣ်လီၤ.တၢ်လီၢ်တဖၣ်န့ၣ်အိးထီၣ်ဝဲတုၤလၢခဲအံၤဒံး,ဝ့ၢ်ပူၤနါက့အိၣ်အါမးလီၤ.တၢ်လိၣ်ကွဲလီၢ်တနီၤအပူၤဖီၣ်စုကဝဲၤပှၤဘၣ်မူဘၣ်ဒါတဖၣ်အိၣ်ခိးတၢ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.
တကးဒံးဘၣ်,တၢ်ပံးဝဲတၢ်လိၣ်ကွဲလီၢ်တဖၣ်အံၤန့ၣ်တၢ်ဂ့ၢ်ခိၣ်သ့ၣ်မ့ၢ်ဝဲဒ်သိးဖိဒံဖိသၣ်တဖၣ်ဟးဂုၤဟးဂီၤလၢတၢ်မူၤတၢ်ဘှီးတၢ်တၤကျိၣ်တၤစ့သုတအိၣ်လၢၤတဂ့ၤအဂီၢ်အဂ့ၢ်,(DKBA)သုးရိၢ်မဲခိၣ်ကျၢၤ(၂)ကတိၤကျၢၢ်တံၢ်ဝဲဒၣ်န့ၣ်လီၤ.ဒီးတၢ်ဆၢတဲၥ်ထုးထီၣ်ဝဲလံၥ်အလီၢ်ခံဘၣ်ဃးဒီး(BGF)တကပၤလဲၤမၤဟးဂီၤကးတံၥ်ကွံၥ်ဝဲတၢ်လိၣ်ကွဲလီၢ်တနီၤအိၣ်ဝဲအဂ့ၢ်န့ၣ်,တၢ်လူၤဃုသ့ၣ်ညါမၤလီၤတံၢ်အီၤအဖၢမုၢ်န့ၣ်လီၤ.
ရၤမတံဟီၣ်ကဝီၤအပူၤ,(GAME)တၢ်လိၣ်ကွဲလီၢ်ဒီးတၢ်တၤကျိၣ်တၤစ့အလီၢ်လၢဖီၣ်စုကဝဲၤကရူၢ်ကရၢပၣ်ဃုၥ်ပၣ်ဂီၢ်ဝဲသ့ၣ်တဖၣ်အံၤ,တၢ်ဆါဝဲကသံၣ်မူၤဘှီးအဖီခိၣ်,သူၣ်စၢ်သးဘီၣ်တဖၣ်ပှ့ၤသူဝဲန့ၢ်ညီညီအဃိ,အပူၤကွံၥ်ဝ့ၢ်လီၢ်ကဝီၤကမျၢၢ်တနီၤလဲၤတၢၣ်ဝဲဆူပှၤဘၣ်မူဘၣ်ဒါတဖၣ်အအိၣ်အိၣ်ဝဲဒၣ်ဘၣ်ဆၣ်,ပှၤဘၣ်မူဘၣ်ဒါတဖၣ်ပံးကွံၥ်ဝဲတၢ်လိၣ်ကွဲလီၢ်တနီၤအိၣ်ဝဲသနါက့,တုၤလၢတကီၢ်ခါခဲအံၤတၢ်ပံးကွံၥ်ဝဲခဲလၢၥ်ခဲဆ့တအိၣ်ဒံးဝဲဘၣ်အဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ဒ်န့ၣ်အသိး,ဖဲအပူၤကွံၥ်လါယူၤအတီၢ်ပူၤဒ်သိးတၢ်ကပံးကွံၥ်တၢ်လိၣ်ကွဲတၢ်လီၢ်တဖၣ်အဂီၢ်ရၤမတံဝ့ၢ်ပူၤ,(BGF)မၤဝဲတၢ်နုၥ်လီၤဖီၣ်တၢ်လၢဝ့ၢ်ကဝီၤဒ့တၢ်လိၣ်ကွဲလီၢ်တဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ရၤမတံဝ့ၢ်ပူၤတၢ်လိၣ်ကွဲဒီးတၢ်တၤကျိၣ်တၤစ့လၢတၢ်အိးထီၣ်ဝဲဒၣ်တဖၣ်အံၤတၢ်ဘၣ်ဟ့ၣ်ဝဲတၢ်ခိတၢ်သွဲစ့အကလီၢ်လၢအဆံ,ဆူခိသွဲပှၤဘၣ်မူဘၣ်ဒါဘၣ်ထွဲတဖၣ်အိၣ်ဝဲဒီး,တၢ်လိၣ်ကွဲလီၢ်တဖၣ်အံၤတၢ်အိးထီၣ်ဝဲအီၤလၢဖိးသဲးစးအသိး,တၢ်ဒိးန့ၢ်ဝဲတၢ်အဘျူးအဖှိၣ်အိၣ်ဝဲအါမးအဂ့ၢ်,သ့ၣ်ညါဘၣ်န့ၣ်လီၤ.
