လါမးရှး ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂) ထီတထူၣ်ကီၢ်ဆၣ်အပူၤ ခီဖျိသုးမီၤစိရိၤကဘီယူၤလဲၤ ခးလီၤတၢ်အဃိ (Free Burma Ranger-FBR)ကသံၣ်သရၣ်မုၣ် နီၢ်စ့မူဖီ သံ၀ဲအဂ့ၢ်န့ၣ် (FBR)ထုးထီၣ်ပၥ်ဖျါ၀ဲဖဲလါမးရှး ၁၁ သီ အနံၤန့ၣ်လီၤ.
ဖဲအပူၤကွံၥ်လါမးရှး ၈ သီအနံၤန့ၣ် သုးမီၤစိရိၤကဘီယူၤပညိၣ်လဲၤခးလီၤ၀ဲတၢ်လၢလီၢ်က၀ီၤတၢ်ကူစါယါဘျါအလီၢ်တတီၤအဃိ ကသံၣ်သရၣ်သံ၀ဲတဘျီဃီဖဲန့ၣ်(၁)ဂၤဒီး မ့မ့ၢ်နီၢ်စ့မူဖီအံၤဘၣ်ဒိ၀ဲနးနးကျံၤကျံၤအဃိ ဖဲလါမးရှး ၁၀ သီ အနံၤန့ၣ် အသးသမူဘၣ်ဟးထီၣ်ကွံၥ်၀ဲအဂ့ၢ်န့ၣ် (FBR)လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
ကသံၣ်သရၣ်မုၣ်နီၢ်စ့မူဖီအံၤ အိၣ်ဖျဲၣ်ထီၣ်၀ဲဒၣ်ဖဲထီတထူၣ်ကီၢ်ဆၣ်ပူၤဒီးအသးသမူဟးထီၣ်အခါအသးနံၣ်အိၣ်ဒံး ဒၣ်ထဲ(၂၅)နံၣ် မ့ၢ်၀ဲပှၤနီၢ်သဘျ့တဂၤန့ၣ်လီၤ. တကးဒံးဘၣ် အ၀ဲမ့ၢ်စ့ၢ်ကီးသးစၢ်တဂၤလၢအိၣ်ဒီးတၢ်မုၢ်လၢ်ကွၢ်စိ,သူၣ်ဆူၣ်သးဂဲၤ ၀ဲဒၣ်လၢတၢ်ဖံး တၢ်မၤ ပူၤတဂၤန့ၣ်လီၤ.
ဘၣ်ဃးနီၢ်စ့မူဖီအိၣ်မူဒံးအခါအ၀ဲမ့ၢ်ပှၤဒ်လဲၣ်တဂၤအဂ့ၢ်န့ၣ် ပှၤလၢအမၤသကိးဘၣ်တၢ်ဒီးအ၀ဲတဂၤ စံး၀ဲဒ်အံၤန့ၣ်လီၤ.
အ၀ဲစံး၀ဲလၢ“အ၀ဲန့ၣ်အတၢ်ဂုၥ်ကျဲးစၢးအိၣ်လီၤ.တၢ်သ့တၢ်ဘၣ်န့ၣ်လူၤဃုသ့ၣ်ညါ၀ဲဒ်သိးပှၤဆါန့ၣ်ဘၣ်ကွၢ်ဒ်လဲၣ်. ပှၤဆါမ့ဟဲန့ၣ်ဘၣ်မၤဒ်လဲၣ်ဒ်လဲၣ်,လၢတၢ်ဘၣ်ဒိဘၣ်ထံးမ့ၢ်ဂ့ၤ,ကဘၣ်ကွဲးဘၣ်ကါတၢ်မ့ၢ်ဂ့ၤန့ၣ်သူၣ်အိၣ်သးအိၣ်မၤလိ၀ဲလီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ
လၢန့ၣ်အမဲၥ်ညါဒ်(FBR)လံၥ်တၢ်ပၥ်ဖျါပူၤစံး၀ဲအသိးန့ၣ် နီၢ်စ့မူဖီအံၤ ဖဲ(၂၀၁၃)နံၣ်အခါန့ၣ် ဖျိထီၣ်၀ဲ(Jungle School of Medicine Kawtholei -JSMK)၀ံၤ နုၥ်လီၤမၤ၀ဲကသံၣ်တၢ်မၤဖဲထီတထူၣ်ကီၢ်ဆၣ်ပူၤတၢ်ဆါဟံၣ်တဖျၢၣ်အပူၤန့ၣ်လီၤ. ဖဲန့ၣ်၀ံၤလီၢ်ခံအ၀ဲမၤသကိးတၢ်ဒီး(FBR) ဟးကူစါယါဘျါ၀ဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးဖိသံၣ်ဖိလၢ အဘၣ်ဒိ ဘၣ်ထံးသ့ၣ်တဖၣ်န့ၣ်လီၤ.
ဒ်န့ၣ်အသိးထီတထူၣ်ကီၢ်ဆၣ်အမဲၥ်ညါ လၢဒီၣ်ဖးခိၣ်ကီၢ်ဆၣ်အပူၤစ့ၢ်ကီး စးထီၣ်ဖဲလါမးရှး ၆ သီအနံၤ တၢ်ပၢၢ်ဆၢသုးကရူၢ် လဲၤခး၀ဲ(သပၠ့ၤညိၣ်) သုးကလၢၤဒီး နံၤ၀ဲန့ၣ်တုၤလၢ(၉)သီအနံၤ သုးမီၤစိရိၤအကဘီယူၤလဲၤခးလီၤ၀ဲတၢ်လွံၢ်သီ တပယူၥ်ဃီ ဖဲသုးကလၢၤခိၣ်ဃၢၤ၀ဲန့ၣ်အဃိ လီၢ်က၀ီၤကမျၢၢ်သံ၀ဲ (၄)ဂၤဒီး ဘၣ်ဒိတစှၤန့ၢ်(၇)ဂၤကဲထီၣ်ဒံးအဂ့ၢ်န့ၣ် လီၢ်က၀ီၤကမျၢၢ်စံး ဘၣ်(FBR)အသိးသ့ၣ်ညါဘၣ်န့ၣ်လီၤ.
