လါအ့ဖြ့ၣ် ၄ သီ, ၂၀၂၅ နံၣ်, ခ့ၣ်အဲးစံၣ်
သုးကီၣ်ကးအံၤလၢတၢ်ကမၤစၢၤ၀ဲဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် လါအ့ဖြ့ၣ် ၂ သီ တုၤ ၂၂ သီ လၢအသီ(၂၀)အတီၢ်ပူၤ ဘိးဘၣ်ရၤလီၤ၀ဲလၢကပတုၥ်ဆိဃၥ်၀ဲတၢ်ခးတစိၢ်တလီၢ်အံၤဖဲလါအ့ဖြ့ၣ် ၂ သီအနံၤဒီး ဘၣ်ဆၣ်အတၢ်ဘိးဘၣ်ရၤလီၤအဖီခိၣ်အံၤ တၢ်နၥ်အီၣ်အီၤတအိၣ်၀ဲဘၣ်အဂ့ၢ်န့ၣ် ကရူၢ်ကရၢတဖၣ်စံး၀ဲန့ၣ်လီၤ.
သုးကီၣ်ကးအံၤစးထီၣ်ဖဲအဘိးဘၣ်ရၤလီၤလၢကပတုၥ်ဆိဃၥ်တၢ်ခး၀ံၤလီၢ်ခံမုၢ်ဆ့ၣ်ထီၣ်တုၤလၢခဲအံၤန့ၣ် သူ၀ဲကျိ ဖးဒိၣ်, ဒြိ,ကဘီယူၤဟးခးလီၤ၀ဲတၢ်လၢတၢ်လီၢ်သကုၤဆးဒးပူၤအဃိ ဖဲန့ၣ်တၢ်သံဘၣ်ဒိဘၣ်ထံး,တၢ်ဟးဂူၥ်ဟးဂီၤစ့ၢ်ကီး ကဲထီၣ် ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးသုးကီၣ်ကးအဘိးဘၣ်ရၤလီၤအဖီခိၣ်အံၤထံကီၢ်စှၤကိၥ်ဘ့ၣ်ကသးမံထွဲ၀ဲဘၣ်ဆၣ် ထံကီၢ်လၢအဂၤတဖၣ် ကအိၣ် ကွၢ်အ၀ဲသ့ၣ်အခီၣ်ခါဒီးဒ်န့ၣ်အသိးသုးကီၣ်ကးအံၤတမ့ၢ်စ့ၢ်ကီးပှၤလၢအသးစၢၢ်စၢ၀ဲတၢ်ပတုၥ်တၢ်ခးအံၤဘၣ်အဂ့ၢ်န့ၣ် Burma Campaign UK ပှၤနဲၣ်တၢ် နၣ်စိၤယၤဖါ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ဖဲကီၢ်ပယီၤဘၣ်ကွၢ်ဆၢၣ်မဲၥ်၀ဲတၢ်အိၣ်ဒ်အံၤအဆၢကတီၢ်န့ၣ်တၢ်ပၢၢ်ဆၢကရူၢ်ကရၢတနီၤပၥ်ဖျါထီၣ်၀ဲလၢကပတုၥ်ဃၥ်တၢ်ခးတစိၢ်တလီၢ်မီၤနီၤ.ဖဲန့ၣ်သုးမီၤစိရိၤနါက့ဘိးဘၣ်ရၤလီၤ၀ဲလၢကပတုၥ်ဃၥ်တၢ်ခးတစိၢ်တလီၢ်မီၤနီၤ.ပမ့ကွၢ်ဒ်သိးရရှါဒီးတရူးန့ၣ်ကသးမံ၀ဲလၢသုးမီၤစိရိၤအတၢ်အံၤလီၤ.ဘၣ်ဆၣ်ယဆိမိၣ်ထံဂုၤကီၢ်ဂၤလၢအဂၤတဖၣ်န့ၣ်ကဆဲးကွၢ်၀ဲအခီၣ်ခါလီၤ.မ့မ့ၢ်၀ဲဒၣ်ဒုလၢပတၢ်လဲၤခီဖျိအဖီခိၣ်န့ၣ်သုးမီၤစိရိၤအံၤတမ့ၢ်အသးစၢၢ်စၢ၀ဲဒၣ်တၢ်ပတုၥ်တၢ်ခးမူၤမူၤနီၢ်နီၢ်ဘၣ်.အ၀ဲသ့ၣ်ကတိၤထီၣ်တၢ်ဒ်အံၤကမ့ၢ်လၢတၢ်အိၣ်သးဒီးတၢ်ဆီၣ်သနံးအဖီခိၣ်လီၤ.အ၀ဲသ့ၣ်ရၤလီၤ၀ဲလၢကပတုၥ်တၢ်ခး၀ံၤအ၀ဲသ့ၣ်ကဘီယူၤန့ၣ်လဲၤခးလီၤတၢ်လၢတၢ်လီၢ်အါတီၤအပူၤလီၤ”အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါဖဲဟီၣ်ခိၣ်ဟူးကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်၀ဲတၢ်သံတၢ်ပှၢ်,တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤ ဒိၣ်ဒိၣ်မုၢ်မုၢ်အကတီၢ်အံၤန့ၣ် သုးကီၣ်ကၣ်အံၤတဟ့ၣ်၀ဲတၢ်ဆီၣ်ထွဲမၤစၢၤအမဲၥ်ညါမၤတံၥ်တၥ်၀ဲကရူၢ်ကရၢလၢ အလဲၤဟ့ၣ် မၤစၢၤတၢ်တဖၣ်အိၣ်၀ဲန့ၣ်လီၤ.
အဃိဒ်သိးတၢ်ဆီၣ်ထွဲမၤစၢၤကတုၤဃီၤလိၤလိၤဆူကမျၢၢ်လၢအတူၢ်ဘၣ်တၢ်တဖၣ်အစုပူၤအဂီၢ် (Burma Campaign UK) ပၥ်ဖျါထီၣ်ထံဂုၤကီၢ်ဂၤတဖၣ်လၢကဆှၢဃီၤတၢ်ဆီၣ်ထွဲမၤစၢၤဆူကလုၥ်ဒူၣ်တၢ်ပၢၢ်ဆၢကရူၢ်ကရၢဒီးပှၤတ၀ၢတၢ်ကရၢကရိ အစုပူၤအဂ့ၢ်န့ၣ် နၣ်စိၤယၤဖါ စံးအါထီၣ်၀ဲန့ၣ်လီၤ.
ဒ်န့ၣ်အသိးဖဲလၢကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်တၢ်နးတၢ်ဖှီၣ်အကလုၥ်ကလုၥ်အတီၢ်ပူၤအံၤ သုးကီၣ်ကးဘိးဘၣ်ရၤလီၤ လၢကပတုၥ်တၢ်ခးအိၣ်၀ဲဘၣ်ဆၣ်မၤဒံး၀ဲတၢ်ထီၣ်ဒုးလၢတၢ်လီၢ်အါတီၤအပူၤတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“၀ဲဒၣ်ဒုပအိၣ်လၢတၢ်ပလီၢ်ပဒီပူၤလီၤ. ပတနၥ်အီၣ်အီၤဘၣ်.သုးကီၣ်ကးန့ၣ်မၤ၀ဲဒ်သိးအ(image)ကဂ့ၤလၢထံဂုၤကီၢ်ဂၤအမဲၥ်ညါလီၤ.တကးဒံးဘၣ်ဟံန့ၢ်၀ဲတၢ်ခွဲးတၢ်ယၤ.တဲ၀ဲလၢတၢ်ပတုၥ်တၢ်ခးဘၣ်ဆၣ်ကတီၤအသးဆူသုးဂံၢ်ဘါလီၤ.၀ံၤဒီးအတၢ်ဖံးတၢ်မၤအိၣ်လၢကမၤထီဒါကမျၢၢ်မ့ၢ်ဂ့ၤ,ကထီၣ်ဒုးတၢ်ပၢၢ်ဆၢကရူၢ်အိၣ်တၢ်လီၢ်န့ၣ်ကဆဲးမၤ၀ဲဒ်လၢညါ အသိးလီၤ.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါခီဖျိလၢသုးကီၣ်ကးတၢ်ဟူးတၢ်ဂဲၤတၢ်ဖံးတၢ်မၤအံၤအဃိ ကီၢ်ပူၤကီၢ်ချၢကမျၢၢ်ထံဖိကီၢ်ဖိ ပၥ်ဖျါထီၣ်အတၢ်ပဲၥ်အၢပဲၥ်သီတၢ်ပဲၥ်ထံနီၤဖးအကလုၥ်ကလုၥ်လၢသုးကီၣ်ကးအတၢ်ဖံးတၢ်မၤအဖီခိၣ်အံၤအိၣ်ထီၣ်၀ဲန့ၣ်လီၤ.
ဒ်ကီၢ်ပယီၤဃူဖိးပဒိၣ်(NUG)ဒီးတၢ်ကစီၣ်သန့အတၢ်မၤနီၣ်မၤဃါပၥ်ဖျါထီၣ်၀ဲအသိးန့ၣ် ဖဲလၢဟီၣ်ခိၣ်ဟူးကဲထီၣ်သးအကတီၢ် ခီဖျိပယီၤသုးအကျိဖးဒိၣ်,ဒြိဒီး ကဘီယူၤအံၤအဃိ ကမျၢၢ်သံဘၣ်ဒိဘၣ်ထံးအမဲၥ်ညါကၠိ,ဟံၣ်တၢ်သူၣ်ထီၣ်တဖၣ် ဟးဂီၤအိၣ်၀ဲဒၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
