လါမ့ၤ ၂၇ သီ, ၂၀၂၅ နံၣ်, ခ့ၣ်အဲးစံၣ်
ဒူပျယၥ်ကီၢ်ရ့ၣ်,ကီးတရံးကီၢ်ဆၣ်ဟီၣ်ကဝီၤအပူၤဖဲမဟါလါမ့ၤ(၂၆)သီအနံၤဖဲမုၢ်ထူၣ်အဆၢကတီၢ်န့ၣ်ပယီၤသုးကီၣ်ကးဟဲတ့ၢ်လီၤန့ၢ်ဝဲအပှၤဒုးယၤတၢ်ပၢဆှၢရဲၣ်ကျဲၤဝဲၤလီၢ်ခိၣ်သ့ၣ်(စကခ-၁၂), ခီၣ်သုးရ့ၣ်(ခလရ-၁၂)ဒီးမျိၥ်သုးရ့ၣ်တဖၣ် တၢ်အီၣ်တၢ်အီ, တၢ်စု ကဝဲၤကျိချံပှၥ်သၣ်သ့ၣ်တဖၣ်လၢကဘီယူၤတဆီအဂ့ၢ်လီၢ်ကဝီၤဖိလၢထံၣ်ဘၣ်တဖၣ်စံးဝဲန့ၣ်လီၤ.
ပယီၤသုးကီၣ်ကးကဘီယူၤဝဲအံၤဖဲလါမ့ၤ(၂၆)သီအနံၤဖဲမုၢ်ထူၣ်ထီၣ်အဆၢကတီၢ်ဟဲတ့ၢ်လီၤန့ၢ်ဝဲအပှၤတၢ်အီၣ်တၢ်အီ,တၢ်စုကဝဲၤ,ကျိချံပှၥ်သၣ်တၢ်ဘိၣ်သ့ၣ်တဖၣ်ဒ်အံၤလီၤဒီးတၢ်ဆၢကတီၢ်တံၥ်တၥ်ဝဲလၢ(၂)နၣ်ရံၣ်အတီၢ်ပူၤအဂ့ၢ်ကမျၢၢ်လီၢ်ကဝီၤဖိလၢအထံၣ်ထွဲဝဲတဂၤစံးဝဲဒ်အံၤန့ၣ်လီၤ.
“ဖဲမုၢ်ဂီၤခီအဆၢကတီၢ်န့ၣ် ပယီၤသုး (စကခ-၁၂) ခးလီၤဝဲကျိဖးဒိၣ်လၢဒူသဝီအပူၤလီၤ. ဖဲန့ၣ်ဝံၤအလီၢ်ခံ ဘၣ်ဖဲ မုၢ်ထူၣ်(၁၂)နၣ် ရံၣ်ဘျဲၣ်အဆၢကတီၢ်န့ၣ်ကဘီယူၤဟဲယူၤဝဲဖဲ(စကခ-၁၂)အိၣ်တၢ်လီၢ်,(ခလရ-၂၃၀)သုးရ့ၣ်,မျိၥ်သုးရ့ၣ်အိၣ်တၢ်လီၢ်အဖီခိၣ်ဒီးဟဲ တ့ၢ်လီၤဝဲတၢ်ဘိၣ်အါအါဂီၢ်ဂီၢ်လီၤ. ဟဲယူၤဝ့ၢ်ဝီတဘျီတ့ၢ်လီၤတဘျီဒ်န့ၣ်တံၥ်တ့ၥ်ဝဲ(၂)နၣ်ရံၣ်ဃၣ်ဃၣ်ညါလီၤ.” အဂ့ၢ်စံးဝဲဒၣ်န့ၣ် လီၤ.
ပယီၤသုးကဘီယူၤလၢဟဲတ့ၢ်လီၤန့ၢ်ဝဲအပှၤတၢ်အီၣ်တၢ်အီ,တၢ်စုကဝဲၤ,ကျိချံပှၥ်သၣ်တၢ်ဘိၣ်သ့ၣ်တဖၣ်အံၤဝံၤအလီၢ်ခံကဘီယူၤဝဲန့ၣ်န့ၣ်က့ၤယူၤကဒါက့ၤဝဲဆူမီၣ်လမၠဲၣ်ဝ့ၢ်တကပၤအဂ့ၢ်န့ၣ်ပှၤလီၢ်ကဝီၤဖိဝဲန့ၣ်စံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါပယီၤသုးရ့ၣ်သ့ၣ်တဖၣ်လၢအိၣ်ကီးတရံးဟီၣ်ကဝီၤအပူၤခးလီၤဝဲကျိဖးဒိၣ်ဆူ ယဲၢ်တၢၣ်, ခွံတၢၣ်, နွါခၠၤကိ, ကီးတရံး အီၤဘိတဲ, နီၤတမါ, မၠၣ်ပတဲၣ်, မံၣ်ဖးလဲ ဒူသဝီသ့ၣ်တဖၣ်အံၤပူၤအဃိကမျၢၢ်ဟံၣ်ဃီ, ကျီးကရၢၢ်သ့ၣ်တဖၣ်ဘၣ်ဟးဂီၤ ကွံၥ်အိၣ်ဝဲအဂ့ၢ်ဒူသဝီဖိသ့ၣ်တဖၣ်စံးဝဲန့ၣ်လီၤ.
“သုးကီၣ်ကးန့ၣ်ခးလီၤဝဲကျိဖးဒိၣ်ကိးနံၤဒဲးလီၤ. ဒူသဝီလၢအိၣ်ကြုၢ်တုကီၢ်ဆၣ်ပူၤမ့ၢ်ဂ့ၤ, ကီးတရံးကီၢ်ဆၣ်ပူၤမ့ၢ်ဂ့ၤ ဟးဂီၤလၢၤလံ. ဘၣ်ဒိပှၤကမျၢၢ်နါက့အါမးလံမီၤနီၤ. ပှၤဘၣ်ဃ့ၢ်အိၣ်ကဒုလၢၤလံ. ပဝဲဒၣ် အ့ကၠံ, ကီးဝၣ်လဲ တကပၤန့ၣ် ဘၣ်လဲၤသုးလီၢ်သုးကျဲ လၢ(ကၠဲ)တကပၤလီၤ.” အဂ့ၢ်ကီးဝၣ်လဲသဝီဖိတဂၤစံးဝဲန့ၣ်လီၤ.
တကီၢ်ခါအခဲအံၤန့ၣ်ကြုၢ်တု,ကီးတရံးအပူၤဒီး,ရၤမတံ(အ့ၡှၢၣ်)ကျဲမုၢ်တကပၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,သိၣ်မှံၤတၢ်ပၢၢ်ဆှၢသုးပၥ်ဖှိၣ်သ့ၣ်တဖၣ်ဒီးပယီၤသုးကီၣ်ကးသ့ၣ်တဖၣ်လၢခံခီခံကပၤအဘၢၣ်စၢၤခးလိၥ်အသးဒီးကျိဖးဒိၣ်, မၤဝဲတၢ်တ့ၢ်လီၤဒြိမ့ၣ် ပိၢ်သ့ၣ်တဖၣ်အိၣ်ဝဲတပယူၥ်ဃီအဂ့ၢ်လီၢ်ကဝီၤဂံၢ်ခီၣ်ထံးစံးဝဲန့ၣ်လီၤ.
