လါမ့ၤ ၃၀သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၆),ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ် တီနီၢ်မုၢ်ထီၣ်ဟီၣ်ကဝီၤ ပယီၤသုးကလၢၤထုးလီၤကွံၥ်သးခံဖျၢၣ်အဂ့ၢ် သ့ၣ်ညါဘၣ်လၢ KNLA အပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးကလၢၤခံဖျၢၣ်လၢထုးလီၤသးန့ၣ်မ့ၢ်ဝဲ ထိကၠိပယီၤသုးကလၢၤဒီးမီခံပယီၤသုးကလၢၤအဂ့ၢ် KNLAသုးရ့ၣ်(၂၀၁)အပှၤဘၣ်မူစံးဝဲဒၣ်န့ၣ်လီၤ.
ထိကၠိပယီၤသုးကလၢၤအံၤ ဖဲအပူၤကွံၥ် လါမ့ၤ ၂၈သီ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးကညီဒီကလုၥ်ဂၢၤသးကရၢတီခိၣ်ရိၣ်မဲသုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲ ကနဲလ့သုးကလၢၤဝံၤအလီၢ်ခံတနၤဃီဝဲန့ၣ် န့ၣ်ပယီၤသုးလၢအအိၣ်ဖဲထိကၠိသုးကလၢၤသ့ၣ်တဖၣ်ဃ့ၢ်နုၥ်လီၤဝဲဆူကီၢ်ကၠီၣ်တဲၣ်ပူၤအသိးဖဲတဂီၤအံၤနၣ်ရံၣ် ၁၀ဘျဲၣ်အဆၢကတီၢ်န့ၣ် မီခံပယီၤသုးစ့ၢ်ကီးထုးလီၤကွံၥ်သးဒီးမ့ၢ်လဲၤတုၤဖဲလဲၣ်န့ၣ်တၢ်တသ့ၣ်ညါအီၤဒ်ဘၣ်အဂ့ၢ် သ့ၣ်ညါဘၣ်လၢ KNLA သုးရ့ၣ်(၂၀၁) အပှၤဘၣ်မူဘၣ်ဒါအအိၣ်န့ၣ်လီၤ.
ဘၣ်ဃးဒီး မီခံသုးကလၢၤဒီးထိကၠိသုးကလၢၤပယီၤသုးထုးလီၤကွံၥ်သးအဖီခိၣ်န့ၣ် KNLAသုးရ့ၣ်(၂၀၁) အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ်စီၤဘုဖီစံးဝဲဒၣ်လၢ“ကနဲလ့သုးကလၢၤအံၤ မ့ၢ်သုးကလၢၤတဖျၢၣ်လၢအရ့ဒိၣ်ကတၢၢ်လၢ ထိကၠိသုးကလၢၤဒီးမီခံသုးကလၢၤအဂီၢ်န့ၣ်လီၤ. ဘၣ်မနုၥ်အဃိလဲၣ်န့ၣ်(၁၂၀)အိၣ်ခံခိၣ်န့ၣ်လီၤ. ကနဲလ့သုးကလၢၤလီၤလံဘျီန့ၣ် ထိကၠိသုးကလၢၤပှၤခးစၢၤအဝဲသ့ၣ်ကျိဖးဒိၣ်တအိၣ်ဘၣ်အသိးမီခံစ့ၢ်ကီးပှၤခးန့ၢ်အီၤကျိဖးဒိၣ်တအိၣ်လၢၤဘၣ်.ခံခါတခါန့ၣ်အဝဲသ့ၣ်ကတူၢ်ဘၣ်ဝဲဒၣ်လၢအလီၢ်ခံန့ၣ်တၢ်ဘံၣ်တၢ်ဘၢတအိၣ်လၢၤဘၣ်အဃိလီၤသတြူၤကွံၥ်ဝဲဒ်အံၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ထိကၠိပယီၤသုးကလၢၤန့ၣ် ပယီၤသုး ခီၣ်သုးကရ့ၣ် (ခလရ-၃၂)ဒီး ခီၣ်ချ့သုးရ့ၣ်(ခမရ-၅၅၅)အိၣ်ဆီလီၤသးပှၤနီၣ်ဂံၢ်(၂၇)ဂၤဃ့ၢ်ဖျိးဆူကီၢ်ကၠီၣ်တဲၣ်ဃုၥ်ဒီးတၢ်စုကဝဲၤ,မီခံသုးကလၢၤန့ၣ်မ့ၢ်ဝဲပယီၤသုး ခီၣ်ချ့သုးရ့ၣ်(ခမရ-၅၅၅)ပှၤနီၣ်ဂံၢ်(၃၀)ဃၣ်ဃၣ်ဒီး မ့ၢ်အလဲၤဃ့ၢ်ဖဲလဲၣ်န့ၣ် တၢ်ဃုသ့ၣ်ညါအီၤအဖၢမ့ၢ်အဂ့ၢ် KNLAသုးရ့ၣ်(၂၀၁)အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ဒ်န့ၣ်အသိးလီၤ တီနီၢ်မုၢ်ထီၣ်ဟီၣ်ကဝီၤ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢ သ့ၣ်ဘီဘိပယီၤသုးကလၢၤစ့ၢ်ကီးတၢ်ခးလိၥ်သးကဲထီၣ်ဒံးဝဲအဖၢမုၢ်ဒီး လၢတၢ်ဒုးတၢ်ယၤဒ်န့ၣ်အဖီခိၣ်သုးကီၣ်ကးအကဘီယူၤဒီးကျိဖးဒိၣ်တၢ်လီၤဘၣ်ယိၣ်အဃိ ဘျၢၣ်ဒိၣ်,သ့ၣ်ဘီဘိ,ဝၣ်မံၤထၣ်,လ့ဂီၤ,စိၤစံမၠဲၣ်ခဲလၢၥ်သဝီတစှၤန့ၣ်(၅)ဖျၢၣ်လီၢ်ကဝီၤဖိသ့ၣ်တဖၣ်ဘၣ်ဃ့ၢ်ပဒ့ၣ်သးအိၣ်ဝဲအဂ့ၢ်သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
