လါယူၤ ၂၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၣ်ဆၣ်ဟီၣ်ကဝီၤအပူၤဖဲမဟါလါယူၤ(၂၅)သီအနံၤလၢတနံၤဃီဃီအတီၢ် ပူၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးက့နီၣ်ဂံၢ်(၃)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ကွံၥ်ဝဲပယီၤသုးကလၢၤ(၄)ဖျၢၣ်ဒီးမၤဟးဂီၤကွံၥ်ဝဲအဂ့ၢ်ချၢၣ်လွံၢ်ထူၣ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ပယီၤသုးကလၢၤ(၄)ဖျၢၣ်လၢတၢ်ထီၣ်မၤန့ၢ်ကွံၥ်ဝဲအံၤန့ၣ်အိၣ်ဝဲဒၣ်ဖဲလၢၢ်ဒိၣ်ကီၢ်ဆၣ်ဟီၣ်ကဝီၤအပူၤဒီးကညီဒီကလုၥ်တၢ်ထူၣ်သုးမုၢ်ဒိၣ်(KNLA)သုးရ့ၣ်(၉),(၈)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ကွံၥ်ဝဲဝံၤမၤဟးဂီၤကွံၥ်ဝဲပယီၤသုးကလၢၤသ့ၣ်တဖၣ်အံၤအဂ့ၢ်ချၢၣ်လွံၢ်ထူၣ်နဲၣ်ရွဲၣ်သဃဲၤပဒိၣ်စီၤနဲၣ်ထူဘၠဲစံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤ န့ၣ်လီၤ.
“တၢ်ထီၣ်မၤန့ၢ်သုးကလၢၤန့ၣ်တၢ်ထီၣ်မၤန့ၢ်အီၤတနံၤဃီဖဲမဟါ(၂၅)သီအနံၤလီၤ. ပယီၤသုးကလၢၤမ့ၢ်ဝဲဒၣ်(ပယါဆ့ၣ် ကိ, တီၤဝ့ၤ, သထ့ကိ)သုးကလၢၤန့ၣ်ထီၣ်ဝဲလၢဂီၤခီတပၤဒီးမ့မ့ၢ်လၢ(တီၤစူၣ်)န့ၣ်လၢဟါခီလီၤတပၤလီၤ. သုးကလၢၤ သ့ၣ်တဖၣ်အံၤအိၣ်သူၣ်လီၤအသးလၢလၢၢ်ဒိၣ်ကီၢ်ဆၣ်အပူၤခဲလၢၥ်လီၤ.သုးကလၢၤလၢတၢ်ထီၣ်မၤန့ၢ်အီၤသ့ၣ်တဖၣ်အံၤတၢ်မၤဟးဂီၤကွံၥ်ဝဲခဲလၢၥ်လီၤ.” အဂ့ၢ်စံးဝဲဒၣ်န့ၣ် လီၤ.
ဖဲတၢ်နုၥ်လီၤထီၣ်ခးပယီၤသုးကလၢၤဘျီဝဲအံၤအပူၤန့ၣ်တၢ်မၤန့ၢ်ဃုၥ်ဝဲပယီၤသုးကျိဒိၣ်ကျိဆံးခဲလၢၥ်(၂၈)ခိၣ်ဒီးကျိချံပှၥ်သၣ်,သုးတၢ်ပီးတၢ်လီသ့ၣ်တဖၣ်အါအါဂီၢ်ဂီၢ်အဂ့ၢ်ကီၢ်ရ့ၣ်ဘၣ်မူဘၣ်ဒါစံးဝဲအသိးပယီၤသုးတကပၤအပှၤသံတစှၤန့ၢ်အဂၤ(၂၀)ဘၣ်ဒီးတၢ်ဖီၣ်မူဒံးန့ၢ်ဝဲပယီၤသုးအပှၤ(၃)ဂၤအကျါပၣ်ဃုၥ်ပယီၤပၢၤကီၢ်(၂)ဂၤအဂ့ၢ်လီၢ်ကဝီၤသုးပၥ်ဖှိၣ်ပၥ်ဖျါစ့ၢ်ကီးဝဲန့ၣ်လီၤ.
လၢတၢ်ဒုးဘျီဝဲအံၤအပူၤန့ၣ်(KNLA)သုးရ့ၣ်(၉),(၈)ဒီးမ့မ့ၢ်လၢတၢ်ပၢၢ်ဆၢသုးပၥ်ဖှိၣ်တကပၤန့ၣ်မ့ၢ်ဝဲ ဒုးယၤဟီၣ်ကဝီၤ နီၣ်ဂံၢ်(၂), ပကိကီၢ်ခီသုးဝဲၤလီၢ်, ဒုးယၤနီၣ်ဂံၢ်(၂၄)(၂၅)(၂၆), သုးရ့ၣ် နီၣ်ဂံၢ်(၃၅၀၃)ဒီး (၃၇၀၂) သုးရ့ၣ်, အၣ်နၣ်ဝၣ်ကၣ် သုးရ့ၣ်, နကါနံၤသုးကျိၤ, ဖၠူ(ပကဖ), Spring Warriors Column, တီၤဝ့ၤဒီသုးရ့ၣ်, ဒီး တီကၠံကၢသုးရ့ၣ်သ့ၣ်တဖၣ် ပၥ်ဖှိၣ်နုၥ်လီၤခးဝဲအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးမူကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါအ့ဖြ့ၣ်အတီၢ်ပူၤစ့ၢ်ကီးန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့(၃)ဒီးသုးပၥ်ဖှိၣ်သ့ၣ်တဖၣ်ထီၣ်မၤန့ၢ်ကွံၥ်ဝဲပယီၤသုးတၢ်လီၢ်လၢအိၣ်ဆီလီၤအသးဖဲ နီၤကိ, ယ့တဲးကိ, ယၣ်မၠိ အီၤ, နိၣ်ကျီၤ, တီၣ်စူးသ၀ီသ့ၣ်တဖၣ်အပူၤစ့ၢ်ကီးဒီးပယီၤသုးသံအကျါပၥ်ဃုၥ်သုးရ့ၣ်ခိၣ်ခံတဂၤအသိးတၢ်မၤန့ၢ်ဃုၥ် ဒီးတၢ်စုကဝဲၤသ့ၣ်တဖၣ်စ့ၢ်ကီးန့ၣ်လီၤ.
