သုးကီၣ်ကးအပှၤဟ့ၣ်တၢ်ဆီၣ်သနံးမၢဆူၣ်၀ဲကြုၢ်တုကမျၢၢ်ပှၤဃ့ၢ်မှံဟးဖျိးတဖၣ်ဟဲက့ၤအိၣ်လၢ၀့ၢ်ပူၤ

လါယူၤလံ ၁ သီ, ၂၀၂၅ နံၣ်, ခ့ၣ်အဲးစံၣ်

ကြုၢ်တု၀့ၢ်ပူၤကမျၢၢ်လၢအလဲၤစံၣ်အိၣ်ကဒုသးဖဲ(ကၠဲ)ထံကျိ၀ၢ်ခီ ဒူသ၀ီအပူၤသ့ၣ်တဖၣ်အံၤ သုးကီၣ်ကးစုတီၤဖီလၥ် အပှၤတဖၣ် ဟ့ၣ်၀ဲတၢ်ဆီၣ်သနံးလၢကဟဲက့ၤအိၣ်လၢအဟံၣ်အဃီ၀့ၢ်ပူၤအဂ့ၢ်န့ၣ် ကမျၢၢ်လၢအဟးပလဲၥ်သးတဖၣ်စံး၀ဲအသိး သ့ၣ်ညါဘၣ်န့ၣ်လီၤ.

ကြုၢ်တု၀့ၢ်အခိၣ်အဃၢၤစးထီၣ်ဖဲအပူၤကွံၥ်လါအ့ဖြ့ၣ်တုၤလၢလါယူၤလၢၥ်အံၤန့ၣ်တၢ်ဒုးကဲဒံး၀ဲဒီး တုၤလၢခဲအံၤခီဖျိပယီၤသုးခးလီၤကျိဖး ဒိၣ်အိၣ်ဒံးအဃိ ကမျၢၢ်လၢအိၣ်၀့ၢ်ပူၤတဖၣ်တနီၤန့ၣ်လဲၤစံၣ်အိၣ်၀ဲလၢ(ကၠဲ)ထံကျိ၀ၢ်ခီ ကၠဲကရူၢ် ခယဲသ၀ီ, မနံၤကိ, ယိမၣ်ဟၤ,ဒူၤယ့ၤ, သၤမညၣ်သ၀ီသ့ၣ်တဖၣ်အံၤအပူၤန့ၣ်လီၤ.

ဘၣ်ဆၣ်တကီၢ်ခါအံၤလီၢ်က၀ီၤကမျၢၢ်လၢအလဲၤစံၣ်အိၣ်ဖဲန့ၣ်သ့ၣ်တဖၣ် သုးကီၣ်ကးအပှၤသ့ၣ်တဖၣ်ဟ့ၣ်တၢ်ဆီၣ်သနံး မၢအဟဲ က့ၤအိၣ်လၢအကစၢ်အဟံၣ်အဃီ၀့ၢ်ပူၤအဂ့ၢ်န့ၣ် ၀့ၢ်ပူၤကမျၢၢ်လၢအဟးဆှဲးတၢ်ဒုးတၢ်ယၤတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဒ်အံၤန့ၣ်လီၤ.

“ပှၤအိၣ်လၢကြုၢ်တု၀့ၢ်ပူၤ က၀ီၤဒ့(၅)ဘ့ၣ်မ့၀ံၤ ခၠီဖၠါ,ကီၢ်၀ါလဲ,ကၠိကလ့သ၀ီဖိတဖၣ်န့ၣ် လဲၤစံၣ်အိၣ်ဟးပလဲၥ်သးတုၤလၢကၠဲ,ကၠါကလ့, သၤမညၣ်,စွ့ၤဖၠူၤန့ၣ်ညါ.ပှၤဖိဒံဖိသၣ်တဖၣ်နါက့ထီၣ်က့ၤကၠိဖဲန့ၣ်လီၤ.မ့မ့ၢ်အဖိအပါတဖၣ်န့ၣ်အိးထီၣ်ကျးဆါအီၣ်တၢ်ဖဲန့ၣ်အိၣ်.ခဲအံၤသုးကီၣ်ကးအပှၤသးပှၢ်ပှၤဘၣ်မူဘၣ်ဒါမၢပှၤက့ၤထီၣ်ကဒါကၠိ,မ့တက့ၤထီၣ်ကၠိဘၣ်န့ၣ်အဟံကွံၥ်ပှၤဟံၣ်ပှၤဃီ,ပှၤကျးဆါတၢ်, ပှၤဟီၣ်ခိၣ်လီၢ်ကျီးလီၢ်တဲ၀ဲဒ်န့ၣ်.မ့မ့ၢ်၀ဲဒၣ်ဒုပက့ၤဘူၣ်၀ဲလဲၣ်”အဂ့ၢ်န့ၣ် စံး၀ဲန့ၣ်လီၤ.

ခီဖျိတၢ်ဟ့ၣ်တၢ်ဆီၣ်သနံးအိၣ်ထီၣ်ဒ်အံၤအဖီခိၣ် ကမျၢၢ်ပှၤဃ့ၢ်မှံဟးဖျိးလၢအလဲၤအိၣ်လၢ(ကၠဲ)ထံကျိ၀ၢ်ခီတဖၣ် တနီၤန့ၣ်မုၢ်ဆါခီ က့ၤကွၢ်အဟံၣ်အဃီတစိၢ်တလီၢ်အိၣ်၀ဲဘၣ်ဆၣ် ခီဖျိကျိဖးဒိၣ်လီၤတဲၥ်ဒံးလၢ၀့ၢ်ပူၤ၀့ၢ်ချၢတလီၢ်လီၢ်အဃိ ကမျၢၢ်တဖၣ်အါဒၣ် တက့ၢ် န့ၣ်က့ၤဟံၣ်က့ၤဃီတဘူၣ်ဒံး၀ဲဘၣ်အဂ့ၢ်န့ၣ် ကမျၢၢ်လၢဃ့ၢ်တၢ်ဒုးလၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤ.

“ပက့ၤအိၣ်လၢက၀ီၤဒ့ပူၤဘူၣ်၀ဲလဲၣ်,ကျိဖးဒိၣ်လီၤတဲၥ်ကိးမုၢ်နံၤမုၢ်နၤဒဲးလီၤ.မ့၀ံၤပှၤကမျၢၢ်လၢအက့ၤအိၣ်တဖၣ်န့ၣ်စ့ၢ်ကီးပယီၤသုးတဲ၀ဲလၢအမ့ၢ်(PDF)အပှၤဘျီမၤဒၢၣ်မၤလီၤ၀ဲ,မၤသံ၀ဲ,ဖီၣ်၀ဲအိၣ်လီၤ.ဖဲအပူၤကွံၥ်(၂၀၂၃)အခါတၢ်ဒုးကဲထီၣ်အခါန့ၣ်ပယီၤသုးတပျဲပှၤကမျၢၢ်ဟးထီၣ်လၢတၢ်ချၢဘၣ်,ဟံန့ၢ်၀ဲတၢ်ဒီသဒၢလၢပှၤမျၢၢ် နၤခးယၤခးအဃိပှၤကမျၢၢ်သံဘၣ်ဒိဘၣ်ထံးကဲထီၣ်တ့ၢ်အသးဒံး”အဂ့ၢ်န့ၣ် စံး၀ဲန့ၣ်လီၤ.

တကီၢ်ခါခဲအံၤလၢကြုၢ်တု-ကီးတရံးကျဲ နွါခၠၤကိအ့ကၠံ,အိတပ့ၤ,(၇)တၢၣ်,(၉)တၢၣ်သ၀ီတကပၤန့ၣ် တၢ်ဒုးဆဲးကဲထီၣ် ဒံး၀ဲလၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤအိၣ်၀ဲကိးမုၢ်နံၤဒဲး အဂ့ၢ်န့ၣ် သ့ၣ်ညါဘၣ်န့ၣ်လီၤ.