လါယူၤလံ ၂၄သီ, ၂၀၂၅နံၣ်, ခ့ၣ်အဲးစံၣ်,
လါယူၤလံ(၂၀)သီအနံၤ ကညီကီၢ်စဲၣ် သုးခိးကီၢ်ဆၢ(BGF) လၢကပျိၥ်လဲက့ၤသးဆူ ကညီဒီကလုၥ်သုးမုၢ်ဒိၣ်(KNA)အဂီၢ် မၤဝဲတၢ်ဟံးန့ၢ်ကမျၢၢ်,တၢ်ဘူၣ်တၢ်ဘါခိၣ်နၢ်ဒီးကညီကီၢ်စဲၣ်ထံရူၢ်ကီၢ်သဲးပၣ်ခိၣ်နၢ်သ့ၣ်တဖၣ်အတၢ်ပၥ်သးတၢ်ရဲၣ်တၢ်ကျဲၤတခါဖဲ တၢ်လီၢ်ခီတီၢ်ပူၤန့ၣ်လီၤ. တၢ်မၤဝဲတၢ်ရဲၣ်တၢ်ကျဲၤဝဲန့ၣ်ဝံၤအလီၢ်ခံ တနံၤဃီဝဲန့ၣ်န့ၣ် လံၥ်ရၤလီၤဟးထီၣ်တဘ့ၣ်လၢအဘၣ်ဃးဒီး (KNA) အိၣ်ဝဲဒၣ်တဘ့ၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်(KNA)အလံၥ်ဘိးဘၣ်ရၤလီၤဝဲန့ၣ်အိၣ်ဝဲအသိးန့ၣ် ကွၢ်ဝဲလၢ ကီၢ်စၢဖှိၣ်သုတထုးဖးကွံၥ်သးအဂီၢ်,ကလုၥ်ဒူၣ်တၢ်ဃူတၢ်ဖိးသုးတလီၤပအၣ်ကွံၥ်တဂ့ၤအဂီၢ်,ကီၢ်စၢဖှိၣ်တၢ်စိတၢ်ကမီၤကဂၢၢ်ကျၢၤခၢၣ်သနၢၣ်အဂီၢ်,ဖဲၣ်ဒၢၣ်ရၢၣ်ကီၢ်စၢဖှိၣ်ကအိၣ်ထီၣ်အဂီၢ်,တၢ်တီတၢ်ြတၢ်ဒီးတၢ်သဘျ့ကအိၣ်အဂီၢ်အဖီခိၣ် ဒ် ၂၀၀၈ တၢ်ဘျၢခိၣ်သ့ၣ်အိၣ်ဝဲအသိး,ကညီကီၣ်စဲၣ်လၢအပၣ်ဃုၥ်လၢကီၢ်ပယီၤပူၤအံၤတမ့ၢ်လၢကထုးဖးကွံၥ်သးဒီးတထုးဖးသးဘၣ်အဂ့ၢ်စံးဝဲဒၣ်န့ၣ်လီၤ.
ဘၣ်ဃးဒီး (KNA)အလံၥ်ဘိးဘၣ်ရၤလီၤဝဲအံၤန့ၣ် တသ့ၣ်ညါဘၣ်ဝဲနီတမံၤဘၣ်ဒီးကဘၣ်မ့ၢ်တၢ်ခဲၣ်သူခဲၣ်ဂီၤလီၤအဂ့ၢ် သုးခိးကီၢ်ဆၢ(BGF)သုးဟီၣ်ကဝီၤနီၣ်ဂံၢ်(၂) အသုးဟီၣ်ကဝီၤခိၣ် သုးခိၣ်ကျၢၢ်ဖိ စီၤတ့ၤဝ့စံးဘၣ်ဝဲခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်တခါအံၤယတသ့ၣ်ညါဘၣ်.တဲတဘၣ် ဘၣ်.မ့ၢ်ပှၤထုးထီၣ်တၢ်အံၤဖဲလဲၣ်တဒူၣ်လဲၣ်န့ၣ်. အဖီလၥ်တကွဲးလီၤဃၥ်ဝဲတၢ်နီတမံၤဘၣ်.ပှၤဆဲးလီၤမံၤအလီၢ်စ့ၢ်ကီးတအိၣ်ဘၣ်.ကမ့ၢ်တၢ်ခဲၣ်သူခဲၣ်ဂီၤတခါခါလီၤ.အတမ့ၢ်ဘၣ်.ဘၣ်မနုၤအဃိလဲၣ်န့ၣ် ပတမၤဘၣ်တၢ်အိၣ်ဖှိၣ်နီတထံၣ်ဒံးဘၣ်.အိၣ်ဒၣ်ပလဲၤမၤတၢ်ရှဲလဲတၢ်ကစီၣ်ဒီးတၢ်ဟံးန့ၢ်ကမျၢၢ်တၢ်ပၥ်သးဒံးလီၤ.မ့မ့ၢ်န့ၣ်ကဘၣ်အိၣ်ဒီး(KNA)လီၢ်ခၢၣ်သးတၢ်ပနီၣ်န့ၣ်လီၤ.အအံၤတအိၣ်နီတမံၤဒီးအိၣ်ပျီပျီလီၤ.အဃိန့ၣ်မ့ၢ်ဝဲတၢ်ခဲၣ်သူခဲၣ်ဂီၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ (BGF) ကပျိၥ်လဲက့ၤသးလၢ (KNA) အံၤပယီၤသုးတပၤတအဲၣ်ဝဲဘၣ်အဖီခိၣ် ကတိၤစံးအၢစံးသီအဝဲသ့ၣ်လၢ တၢ်ကစီၣ်သန့ပူၤအိၣ်ဝဲဒီဒူၣ်အဂ့ၢ် သုးခိၣ်ကျၢၢ်ဖိစီၤတ့ၤဝ့တဲအါထီၣ်ဝဲအသိးဘၣ်ဃးဒီးတၢ်ကပျိၥ်လဲက့ၤသးလၢ(KNA)အဂီၢ် မၤဝဲတၢ်ဟံးန့ၢ်ကမျၢၢ်တၢ်ပၥ်သးဝံၤဒီးကမျၢၢ်တူၢ်လိၥ်ဝဲလံဘၣ်ဆၣ် လၢကပျိၥ်လဲက့ၤသးအဂီၢ် (BGF)ခိၣ်နၢ်ဒိၣ်ထီကဒဲကဒဲတမၤဘၣ်တၢ်အိၣ်ဖှိၣ်နီတဘျီဒံးဘၣ်အမဲၥ်ညါ တၢ်ကပျိၥ်လဲအီၤတၢ်ဆၢကတီၢ်လီၤတံၢ်လီၤဆဲးစ့ၢ်ကီးတဲတသ့ဒံးဘၣ်အဂ့ၢ် သုး သုးခိၣ်ကျၢၢ်ဖိစီၤတ့ၤဝ့စံးဝဲဒၣ်စ့ၢ်ကီးန့ၣ်လီၤ.
(BGF) လၢကက့ၤပျိၥ်လဲက့ၤဆူ (KNA) ခဲအံၤန့ၣ် အိၣ်ဝဲဒီးအသုးဟီၣ်ကဝီၤ(၄)ဘ့ၣ်,ဒုးယၤခိၣ်(၉)ဂၤ,သုးရ့ၣ်(၆၀)ရ့ၣ်ဒီးဖဲအပူၤကွံၥ် ၂၀၂၄နံၣ်, နံၣ်ထီၣ်သီအဆၢကတီၢ်န့ၣ် ထုးထီၣ်ဘိးဘၣ်ရၤလီၤဝဲဒၣ်လၢတဟံးန့ၢ်တၢ်ဆီၣ်ထွဲမၤစၢၤဒ်အမ့ၢ် လါလဲဒီးတၢ်အီၣ်တၢ်အီလၢ ပယီၤသုးကီၣ်ကးအအိၣ်လၢၤဘၣ်ဒီး ကဆၢထၢၣ်က့ၤဝဲလၢနီၢ်ကစၢ်အခီၣ်အဂ့ၢ် (BGF) ခိၣ်နၢ်ဒိၣ်ထီသ့ၣ်တဖၣ်စံးဘၣ်ဝဲတၢ်ကစီၣ်သန့အိၣ်တ့ၢ်ဝဲဒၣ်န့ၣ်လီၤ.
