လါစဲးပထ့ဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ လါအီကူး ၁ သီတုၤ ၃၁ သီ လၢတလါအတီၢ် ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်ဝဲ(၁၉)ဘျီဒီး ဖဲန့ၣ် ပယီၤသုး တကပၤသံ(၂၂)ဂၤ,ဘၣ်ဒိ(၃၉)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ.
လၢတၢ်ဒုးကဲထီၣ်(၁၉)ဘျီအံၤအကျါန့ၣ် တၢ်လဲၤခးစဲးပြဲးကဲထီၣ်(၈)ဘျီ,တၢ်ခိးထုးပယီၤသုး(၄)ဘျီ, တၢ်ဘၣ်သဂၢၢ်ခးလိၥ်သး ကဲထီၣ် (၃)ဘျီ,တၢ်လဲၤကွံၥ်ပယီၤသုးဒီးစုကွံၥ်မ့ၣ်ပိၢ်,ဒြိ(၃)ဘျီဒီးပယီၤသုးထွဲဘၣ်မ့ၣ်ထုးမ့ၣ်ပိၢ်(၁)ဘျီကဲထီၣ်ဝဲအဃိ ပယီၤသုးသံ ဘၣ်ဒိဘၣ်ထံးဘၣ်ဟဲအိၣ်ထီၣ်ဝဲဒ်အံၤလီၤ.
ဒ်ခ့ၣ်အဲၣ်ယူၣ်တၢ်မၤနီၣ်စရီပူၤပၥ်ဖျါဝဲအသိးန့ၣ် လၢဒုၣ်ဒါသံဘၣ်ဒိဘၣ်ထံး(၆၁)ဂၤအကျါပၣ်ဃုၥ်စ့ၢ်ကီးဝဲ ဟီၣ်ကဝီၤ ဘူးဒးကညီသုးမုၢ်ဒိၣ်- DKBA သုခိၣ်ဘိၤဘံၣ်အပှၤ(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢတၢ်ခိးထုးပယီၤသုးသိလ့ၣ်ဒီးမ့ၣ်ပိၢ်အတီၢ်ပူၤန့ၣ် ပယီၤသုးအသိလ့ၣ်ဟးဂီၤ(၃)ခိၣ်ဒီး လၢန့ၣ်အမဲၥ်ညါ (KNLA) အပှၤမၤန့ၢ်ဝဲပယီၤသုး MA ကျိချံ (၈၀၀)ဖျၢၣ်,ဆ့ကၤဒီသဒၢကျိချံ(၆)ခါ,စုကွံၥ်မ့ၣ်ပိၢ်(၂)ဖျၢၣ်အဂ့ၢ်န့ၣ် ကီၢ်ရ့ၣ်တၢ်မၤနီၣ် စရီအပူၤ ပၥ်ဖျါဝဲန့ၣ်လီၤ.
တကးဒံးဘၣ်လၢတလါအတီၢ်ပူၤအံၤ တၢ်ဒုးကဲထီၣ်အိၣ်ဂ့ၤ,တအိၣ်ဂ့ၤပယီၤသုးခးလီၤဝဲကျိဖးဒိၣ်လၢကမျၢၢ်အိၣ်ဆိးလီၢ်ကျဲ, တၢ်ဖံး အီၣ်မၤအီၣ်လီၢ်ကျဲ(၄)ဘျီဒီး ကဘီယူၤစ့ၢ်ကီးလဲၤခးလီၤတၢ်အိၣ်ဝဲ(၂)ဘျီအဃိ ကမျၢၢ်သံဝဲ(၃)ဂၤအကျါပၣ်ဃုၥ်ဝဲ သီခါ(၂)ပါဒီး ဘၣ်ဒိ(၇)ဂၤအကျါပၣ်ဃုၥ်စ့ၢ်ကီးဝဲသီခါ(၅)ပါ န့ၣ်လီၤ.
လၢန့ၣ်အမဲၥ်ညါခီဖျိလၢကျိဖးဒိၣ်ဒီးကဘီယူၤအံၤအဃိ ကမျၢၢ်အဟံၣ်တၢ်သူၣ်ထီၣ်(၃)ဖျၢၣ်ဒီး သီခါဖၠၣ် တၢ်သူၣ်ထီၣ်(၂)ဖျၢၣ်, သိလ့ၣ်ဟးဂီၤ(၃)ခိၣ်, စဲးကၢး(၃)ခိၣ် ဟးဂီၤဘၣ်ဒိဘၣ်ထံးဝဲအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
(သုးက့ ၁)ဟီၣ်ကဝီၤအပူၤ အပူၤကွံၥ်လါယူၤလံတလါအတီၢ်ပူၤစ့ၢ်ကီး ခံခီခံကပၤတၢ်ဒုးကဲထီၣ်အကတီၢ်ပယီၤသုးတကပၤ သံ(၁၃)ဂၤ ဒီး ဘၣ်ဒိ(၄)ဂၤအသိး ခီဖျိလၢကျိဖးဒိၣ်ဒီးကဘီယူၤအံၤအဃိ ကမျၢၢ်သံဘၣ်ဒိဘၣ်ထံး,ဟံၣ်,ကၠိတၢ်သူၣ်ထီၣ်, စဲးကၢးတဖၣ် ဟးဂီၤကဲထီၣ်ဒံးဝဲန့ၣ်လီၤ.
