လါစဲးပထ့ဘၢၣ် ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်, ကီးတရံးကီၢ်ဆၣ်, ဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢဟီၣ်ကဝီၤသူမှဲကျိကၢၢ်ခိၣ်ဒီတ ကျိၤန့ၣ်ပှၤလီၢ်အိၣ်ကမှံဖိသ့ၣ်တဖၣ်လၢအသီကဒီးတဘျီအနီၣ်ဂံၢ်ဟဲက့ၤအါထီၣ်ဝဲဒီးကတီၢ်အံၤလိၣ်ဘၣ်ဝဲတၢ်အခိၣ်ဒုး,ကသံၣ်ကသီဒီးတၢ်အီၣ်တၢ်အီတၢ်ဆီၣ်ထွဲအါမးအဂ့ၢ်ပှၤလီၢ်အိၣ်ကမှံဖိဒီးပှၤဘၣ်မူဘၣ်ဒါလၢကွၢ်ထွဲတၢ်သ့ၣ်တဖၣ်စံးဝဲန့ၣ်လီၤ.
ခီဖျိလၢပယီၤသုးမီၤစိရိၤဟဲက့ၤထီၣ်ဒိၣ်စိကီးတရံး-ရၤမတံအ့ၡၢၣ်ကျဲမုၢ်ဟီၣ်ကဝီၤဝံၤအလီၢ်ခံပယီၤသုးအံၤတၢ်ရဲၣ် တၢ်ကျဲၤအိၣ်လၢကမၤဝဲဒုးယၤတၢ်ထီၣ်ဒုးလၢရၤမတံၤကလံၤထံးဟီၣ်ကဝီၤစ့ၢ်ကီးအဃိလ့က့ၣ်ကီၣ်သဝီဃုၥ်ဒီးဒူသဝီလၢအိၣ်တၢ်ခိၣ်တၢ်ဃၢၤတဖၣ်ပှၤကမျၢၢ်လၢအကထိဘျဲၣ်ဘၣ်ဟဲက့ၤဃ့ၢ်အိၣ်ကဒုကဒီးအသးလၢသူမှဲကျိကၢၢ်ခိၣ်တၢ်အိၣ်ကဒုလီၢ်အဂ့ၢ် လ့က့ၣ်ကိၥ်ပှၤလီၢ်အိၣ်ကမှံဖိ နီၢ်ထံမူဆှံ နီၢ်ပိလ့ စံးဝဲဒၣ်န့ၣ်လီၤ.
“ပှၤတဲပဝဲလၢတၢ်ဒုးကကဲထီၣ်မီၤနီၤ. အဃိပှၤမၢပဟးထီၣ်ဝဲဒၣ်မီၤနီၤ. ပဘၣ်ဟဲဃ့ၢ်ထီၣ်ဝဲဒၣ်န့ၣ်လီၤ. တၢ်ကဲထီၣ်သး န့ၣ်ကျိသၣ်လီၤတဲလၢတၢ်ဆါဟံၣ်အဃိပှၤပျံၤတၢ်ဒီးပှၤဃ့ၢ်ကွံၥ်ဝဲခဲလၢၥ်လီၤ. တၢ်ဘၣ်ဂ့ၢ်ဘၣ်ဝီတအိၣ်ဘၣ်,တၢ်ကီတၢ် ခဲန့ၣ်အိၣ်ဝဲအါမးလီၤ, ကအိၣ်ကဆိးအဂီၢ်တၢ်လီၢ်တအိၣ်ဘၣ်. ဘၣ်အိၣ်နါစိးဝဲဒ်န့ၣ်န့ၣ်လီၤ.” အဂ့ၢ်စံးဝဲန့ၣ်လီၤ.
ဒူသဝီပှၤကမျၢၢ်လၢဟဲဃ့ၢ်ထီၣ်သ့ၣ်တဖၣ်အကျါပၣ်ဃုၥ်ဝဲ လ့က့ၣ်ကိၥ်, မဲးထီးသလ့, အ့ကၠ့မၠဲၣ်, ဖလူ, ထံမဲးဝါခံ, ပ ဟံၣ်ကျီး, ယသ့ၣ်ဂူၤဒီးမ့လဲၣ်ပၣ်သဝီ ပှၤလီၢ်ကဝီၤဖိသ့ၣ်တဖၣ်န့ၣ်လီၤ.
မ့ၢ်လၢပှၤလီၢ်အိၣ်ကမှံဖိသ့ၣ်တဖၣ်အံၤဘၣ်ဟဲထီၣ်ဃ့ၢ်သတူၢ်ကလၥ်ဒ်အံၤအဖီခိၣ်အဃိလၢအဝဲသ့ၣ်အဂီၢ်တၢ်လီၢ်တၢ်ကျဲတၢ်ဂ့ၢ်ကီအိၣ်ဝဲအသိးတၢ်အီၣ်တၢ်အီ, တၢ်အိၣ်ဆူၣ်အိၣ်ချ့တၢ်ကွၢ်ထွဲသ့ၣ်တဖၣ်စ့ၢ်ကီးတၢ်ကီတၢ်ခဲအိၣ်ဝဲအဂ့ၢ်ပှၤ လၢကွၢ်ထွဲမၤစၢၤပှၤလီၢ်အိၣ်ကမှံဖိနီၢ်ဖီလွဲစံးဝဲဒ်အံၤန့ၣ်လီၤ.
“ဖဲအံၤန့ၣ်တၢ်ကီတၢ်ခဲနီၣ်ဂံၢ်တၢန့ၣ်မ့ၢ်ဝဲ တၢ်ခိၣ်ဒုၣ်(တၣ်လါပၣ်)န့ၣ်လီၤ. ပှၤဟဲဟ့ၣ်လီၤမၤစၢၤတၢ်သ့ၣ်တဖၣ်စ့ၢ်ကီးတ ကူတလၢဒံးဘၣ်. ဟံၣ်ခိၣ်အိၣ်ဝဲ(၃၀၀)ဃၣ်ဃၣ်န့ၣ်ပှၤဟဲဟ့ၣ်လီၤမၤစၢၤဝဲ(၁၀၀)ဃၣ်ဃၣ်အဃိလိၣ်တ့ၢ်က့ၤဝဲ(၂၀၀) ဘျဲၣ်ဒံးန့ၣ်လီၤ. လၢခံတမံၤန့ၣ်တၢ်အီၣ်တၢ်အီတၢ်ကီတၢ်ခဲလီၤ.
ဖဲအပူၤကွံၥ်(၂)နံၤန့ၣ်တၢ်ဟ့ၣ်လီၤမၤစၢၤဝဲတဂၤန့ၣ်ဟု သး(တဘိ)ဒီးတၢ်ဒိးတၢ်လၣ်န့ၣ်လီၤ. ထံစ့ၢ်ကီးတၢ်ကီတၢ်ခဲအိၣ်ဝဲဒီးထံအီၣ်နါက့တၢ်ကီတၢ်ခဲအိၣ်မီၤနီၤ. မ့ၢ်ဝံၤတၢ်ဟး လီၢ်စ့ၢ်ကီးတၢ်ကီတၢ်ခဲအိၣ်ဝဲလီၤ. အခဲအံၤတၢ်ဟးလီၢ်(၈)ဖျၢၣ်ဒီးပှၤနီၣ်ဂံၢ်လၢအကထိဘျဲၣ်န့ၣ်တကၢကီၣ်လိၥ်သး ဘၣ်.” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါအခဲအံၤန့ၣ်ဒ်တၢ်ဒိးန့ၢ်ဘၣ်ဝဲဂ့ၢ်ဝီအူတၢ်ဆီၣ်ထွဲၤစၢၤသ့ၣ်တဖၣ်အကျါလၢကတီၢ်ဖုၣ်အဂီၢ်တၢ်ဘှါၡဲမၤစၢၤန့ၢ်ဝဲပှၤလီၢ်အိၣ်ကမှံဖိသ့ၣ်တဖၣ်အဂီၢ်ဘၣ်ဆၣ်မ့မ့ၢ်လၢကတီၢ်ယံၥ်အဂီၢ်ခီန့ၣ်ကလိၣ်ဘၣ်အါထီၣ်ဝဲတၢ်ဆီၣ်ထွဲမၤစၢၤအဂ့ၢ်နီၢ်ဖီလွဲစံးအါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါလၢတၢ်ကဟ့ၣ်ပှၤလီၢ်အိၣ်ကမှံဖိသ့ၣ်တဖၣ်ဆူၣ်ချတၢ်ကွၢ်ထွဲလၢကတီၢ်ယံၤအဂီၢ်လိၣ်ဘၣ်ဝဲကသံၣ်ကသီလၢလၢလီၣ်လီၣ်အသိးလၢတၢ်ကသူၣ်ထီၣ်တၢ်ဆါဟံၣ်အဂီၢ်စ့ၢ်ကီးတၢ်ကီတၢ်ခဲအိၣ်ဝဲအဂ့ၢ်ဆူၣ်ချ့ပှၤဘၣ်မူဘၣ်ဒါလၢကွၢ်ထွဲပှၤလီၢ်အိၣ်ကမှံဖိလၢအမ့ၢ်နီၢ်ထံမူဆှံတအဲၣ်ဒိးပၥ်ဖျါအမံၤတဂၤစံးဝဲဒၣ်န့ၣ်လီၤ.
တၢ်ကီၢ်ခါသူမှဲကျိကၢၢ်ခိၣ်ဒီတကျိၤန့ၣ်ပှၤလီၢ်အိၣ်ကမှံဖိအိၣ်ကဒု(အိၣ်ဆိးတၢ်အလီၢ်)အိၣ်ဝဲ(၇)တီၤဒီးလၢတၢ်အိၣ်ကဒုအလီၢ်သ့ၣ်တဖၣ်အံၤအပူၤပှၤလီၢ်အိၣ်ကမှံဖိဟဲက့ၤထီၣ်ဃ့ၢ်ကဒီးအနီၢ်ဂံၢ်ခဲလၢၥ်အိၣ်ဝဲ(၃,၀၀၀)ခိၣ်ဃၢၤဃၣ်ဃၣ်အသိးအပူၤကွံၥ်ပှၤလီၢ်အိၣ်ကမှံဖိလၢတက့ၤဘၣ်ဒံးသ့ၣ်တဖၣ်စ့ၢ်ကီးအိၣ်ဒံးဝဲဒၣ်အဖၢမုၢ်အဂ့ၢ်သ့ၣ်ညါဘၣ်န့ၣ်လီၤ.
