လါအီးကထိဘၢၣ် ၁၁ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ်အပူၤ ဖဲလါအီးကထိဘၢၣ် ၉ သီဟါခီ ၈း၀၀ နၣ်ရံၣ်အဆၢကတီၢ်န့ၣ် တၢ်ဒုးကဲထီၣ်တအိၣ်သုးမီၤစိရိၤအကဘီယူၤလဲၤတ့ၢ်လီၤဝဲ မ့ၣ်ပိၢ်လၢကတၢတံၥ်ကရူၢ် ပိၤမးဟဲသဝီပူၤအဃိ ကမျၢၢ်ပိၥ်ခွါသံဝဲ ၁ ဂၤ အဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲန့ၣ်လီၤ.
သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲလၢ“ဖဲမဟါတနံၤလါအီးကထိဘၢၣ် ၉ သီ ဟါခီ ၈း၀၀ နၣ်ရံၣ်န့ၣ် ဒုၣ်ဒါကဘီယူၤဟဲခးလီၤတၢ်ဖဲပိၤမးဟဲသဝီပူၤ. ပှၤသံဝဲသဝီဖိတဂၤ. အကျီၢ် ၂ ဒု နါက့သံလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ကမျၢၢ်ပိၥ်ခွါလၢအသံတဂၤန့ၣ်အံၤမ့ၢ်ဝဲ စီၤကၠီၤသါ(၃၂)နံၣ်ဒီး ခီဖျိလၢကဘီယူၤမ့ၣ်ပိၢ်အက့အခီအံၤအဃိ အဟၢဖၢအပှံၥ် ဖျိးထီၣ်ကွံၥ်ဝဲလၢတၢ်ချၢ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးတနံၤဃီဟါခီတၢ်ဆၢကတီၢ်ဝဲန့ၣ်စ့ၢ်ကီးလၢဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ယိၤကျါကရူၢ်အပူၤန့ၣ်စ့ၢ်ကီး ကဘီယူၤလဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ် လီၤတဲၥ်ပိၢ်ဖးထီၣ်ဝဲလၢထံဖးဒိၣ်ထၣ်သဝီမုၢ်နုၥ် ကဘီယူၤပျီသဝီအဃိ ဖိသၣ် (၁၂)နံၣ်ဆူဖီလၥ်သံဝဲဆှုၣ်မဲၥ်ကဲၤမဲၥ် ၅ ဂၤ ဒီးဘၣ်ဒိဘၣ်ထံး ၉ ဂၤ,ဟံၣ်တၢ်သူၣ်ထီၣ်ဟးဂီၤ(၁၁) ဖျၢၣ်တကးဒံးဘၣ်ဆၣ် ဖိကီၢ် ဖိသံဘၣ်ဒိဘၣ်ထံးဝဲအါမးကဲထီၣ်ဒံးဝဲန့ၣ်လီၤ.
(သုးက့ ၅)ဒွဲၣ်လိကီၢ်ဆၣ် ပိၤမးဟဲသဝီ ဒီး(သုးက့ ၁)ဘံလ့ကီၢ်ဆၣ် ထံဖးဒိၣ်ထၣ်သဝီမုၢ်နုၥ် ကဘီယူၤပျီသဝီ လၢကဘီယူၤလဲၤ ခးလီၤတၢ်ဘျီဝဲအံၤ တၢ်ကဲထီၣ်သးတနံၤဃီဒီးတၢ်ဆၢကတီၢ်နၣ်ရံၣ်အဘၢၣ်စၢၤအိၣ်ဒၣ်ထဲ ၁၀ မံးနံးဃၣ်ဃၣ်လီၤအဃိ ကဘီယူၤ လဲၤတ့ၢ်လီၤတၢ်အံၤကမ့ၢ်ဒၣ်တဘ့ၣ်ဃီသ့ဝဲခီဖျိလၢတၢ်လီၢ်ခံတီၤအံၤအဘၢၣ်စၢၤအိၣ်ထဲ လ့တဖျၢၣ်ဧိၤလီၤအဂ့ၢ်န့ၣ် သုးက့ခံဘ့ၣ် လၢၥ် ပှၤဘၣ်မူဘၣ်မူ ပဲၥ်ထံနီၤဖးစံးဝဲန့ၣ်လီၤ.
သုးမီၤစိရိၤအံၤစးထီၣ်ဖဲလါအီးကထိဘၢၣ်ထီၣ်အံၤန့ၣ် ခ့ၣ်အဲၣ်ယူၣ်ဟီၣ်ကဝီၤအမဲၥ်ညါလၢကလုၥ်ဒူၣ်ဟီၣ်ကဝီၤလၢအဂၤတဖၣ် စ့ၢ်ကီး သူဝဲဒၣ်ကဘီယူၤဟးတ့ၢ်လီၤဝဲမ့ၣ်ပိၢ်လၢကမျၢၢ်အိၣ်ဆိးလီၢ်ကျဲဟဲအိၣ်အါထီၣ်ကဒါဝဲဖျိဖျိဖျါဖျါအသိး ကမျၢၢ်,ဖိဒံဖိသၣ်, သူၣ်ဘီၣ်သးစၢ်ပှၤကၠိဖိဘၣ်သံဘၣ်ဒိဘၣ်ထံးကဲထီၣ်ဝဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးလၢကဟဲလါဒံၣ်စ့ဘၢၣ်ဒီးလါယနူၤအါရံၤအံၤ တၢ်ရဲၣ်တၢ်ကျဲၤအိၣ်လၢသုးမီၤစိရိၤကမၤဝဲတၢ်ဃုထၢအဃိ လီၢ်ခံအံၤ ဟီၣ်ကဝီၤသုးကလၢၤတၢ်လီၢ်လၢတၢ်ပၢၢ်ဆၢသုးကရူၢ်ဒိၣ်စိဝဲတဖၣ်သူဝဲကဘီယူၤ,အသုးဂံၢ်ဘါလၢဒိၣ်စိက့ၤဝဲသ့ဝဲဒီး သူစ့ၢ်ကီးကျဲလၢအဂၤသ့ဝဲအဂ့ၢ်န့ၣ် သုးက့ ၅ ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် ပဲၥ်ထံနီၤဖးစံးဝဲဒ်အံၤန့ၣ်လီၤ.
“ယဆိကမိၣ်န့ၣ်သုးမီၤစိရိၤအံၤဘၣ်ပၥ်တ့ၢ်ကွံၥ်အသုးကလၢၤလၢတၢ်ပၢၢ်ဆၢဟီၣ်ကဝီၤတၢ်လီၢ်အိၣ်အါတီၤအဃိ လၢကထီၣ် ဟံန့ၢ်က့ၤအတၢ်လီၢ်တၢ်ကျဲန့ၣ်ဟးခးဝဲတၢ်လၢကမျၢၢ်ထံဖိကီၢ်ဖိအိၣ်ဆိးအလီၢ်ဒီးအဲၣ်ဒိးမၤပြါဝဲကမျၢၢ်ထံဖိကီၢ်ဖိစ့ၢ်လီၤ. ကမျၢၢ်တဖၣ်ဒ်သိးဆီၣ်ထွဲမၤစၢၤတၢ်ပၢၢ်ဆၢ အပှၤတဖၣ်သုတသ့တဂ့ၤန့ၣ်အဲၣ်ဒိးမၤပြါကမျၢၢ်ဒ်န့ၣ်ကပၣ်ဃုၥ်စ့ၢ်လီၤ.မ့ဝံၤအဂၤ တခါန့ၣ်တၢ်လီၢ်တနီၤန့ၣ်ဘူးဝဲလၢဝ့ၢ်,အိၣ်ဝဲလၢတၢ်ဖးဟီၣ်ကဝီၤပူၤဒီးအဝဲသ့ၣ်မ့လဲၤခးလီၤတၢ်န့ၣ်ကမျၢၢ်တဖၣ်ကလဲၤထုးဖှိၣ်က့ၤ အသးလၢဝ့ၢ်ပူၤတကပၤန့ၣ်ဒီးပှၤဟ့ၣ်တၢ်ဖးအနီၣ်ဂံၢ်နီၣ်ဒွးကဟဲအါထီၣ်ဒ်န့ၣ်မီၤနီၤယဆိကမိၣ်အတၢ်ရဲၣ်တၢ်ကျဲၤန့ၣ်”အဂ့ၢ်န့ၣ် စံးဝဲန့ၣ်လီၤ.
တနံၤဃီ(သုးက့ ၅)ဒီး(သုးက့ ၁)အမဲၥ်ညါဖဲလါအီးကထိဘၢၣ် ၈ သီအနံၤန့ၣ်စ့ၢ်ကီး လၢဘျံးဒဝဲၢ်ကီၢ်ရ့ၣ်(သုးက့ ၄)ထံမိၢ်ပှၢ် ဟီၣ်ကဝီၤအပူၤ သုးမီၤစိရိၤကဘီယူၤလဲၤခးလီၤတၢ်ကအိၣ်လၢအဘျီ(၁၀)တ့ၢ်လီၤဝဲမ့ၣ်ပိၢ်အဖျၢၣ်(၄၀)ဘျဲၣ်အဃိ တၢ်သူၣ်ထီၣ် လီၤပှီၢ်ဟးဂီၤဝဲအါမးအသိး ဖဲမဟါလါအီးကထိဘၢၣ် ၁၀ သီအနံၤစ့ၢ်ကီးလဲၤခးလီၤကဒီးဝဲတၢ်(၂)ဘျီလၢတၢ်လီၢ်တတီၤဃိ ဖဲန့ၣ်အဃိ တၢ်သူၣ်ထီၣ်ဟးဂီၤ,ကမျၢၢ်တဖၣ်ဘၣ်ဃ့ၢ်ထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
