၁၅ သီအတီၢ်ပူၤ ပယီၤသုးသံ ၁၃ ဂၤႇ ဘၣ်ဒိ ၂၉ ဂၤအဂ့ၢ် (သုးက့ ၅)ထုးထီၣ်ပ၁်ဖျါ

လါအီးကထိဘၢၣ် ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ တလါအံၤလါအီးကထိဘၢၣ် ၁ သီ တုၤ ၁၅ သီ လၢတဆံယဲၢ်သီအတီၢ်ပူၤ တၢ်ဒုးကဲထီၣ် ၃၈ ဘျီဒီး ဖဲန့ၣ်ပယီၤသုးတကပၤသံ ၁၃ ဂၤႇ ဘၣ်ဒိ ၂၉ ဂၤ အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ် ထုးထီၣ်ပာ်ဖျါ၀ဲဖဲလါအီးကထိဘၢၣ် ၁၈ သီအနံၤန့ၣ်လီၤႉ

ခံခီခံကပၤတၢ်ဒုးကဲထီၣ်အတီၢ်ပူၤပယီၤသုးတကပၤသံဘၣ်ဒိဘၣ်ထံးအါအသိး မ့မ့ၢ်လၢ(KNLA)တကပၤစ့ၢ်ကီး ဘၣ်ဒိ၀ဲဒၣ်တဂၤအဂ့ၢ်န့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

တၢ်ဒုးကဲထီၣ်အကတီၢ်ပယီၤသုးခးလီၤ(၁၂၂ မမ)ဒီး(၁၂၀ မမ)ကျိဖးဒိၣ်အဖျၢၣ်(၁၀)ဃၣ်ဃၣ်ဆူ ဘူသိၣ်ကီၢ်ဆၣ် ဖၣ်ပူၣ်၀့ၢ် ပာ်ဟဲးကရူၢ်ႇမဲၢ်ခူၣ်ကရူၢ်ပူၤဒီး ဒ်န့ၣ်အသိးဖဲလါအီးကထိဘၢၣ် ၅ သီအနံၤ ကဘီယူၤဟဲခးလီၤ၀ဲ ကလဲၤစ်တၤဘိ(Cluster Bomb)ကျိဖးဒိၣ်ခံဖျၢၣ်ဆူလူၤသီကီၢ်ဆၣ် ဘီလ့ဒၢသ၀ီၤပူၤအဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤႉ

ခ့ၣ်အဲၣ်ယူၣ်(သုးက့ ၅)ဟီၣ်က၀ီၤဒူသ၀ီတဖၣ်အပူၤ ခီဖျိတၢ်ဒုးကဲထီၣ်၀ဲလၢပယီၤသုးဒီး(KNLA)အဘၢၣ်စၢၤအဃိ လီၢ်က၀ီၤၦၤသ၀ီဖိတဖၣ်လဲၤဖံးလဲၤမၤတၢ်လၢကျီးပူၤတဘူၣ်လၢၤဘၣ်ဒီးဘၣ်ဃ့ၢ်ထီၣ်၀ဲတဂ့ၢ်န့ၣ် ဖၣ်ပူၣ်ကမျၢၢ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ“အပူၤကွံာ်စှၤသီအခါန့ၣ်ပနၢ်ဟူကျိဖိသီၣ်ဒံးမီၤနီၤႉမ့မ့ၢ်ကျိဖိဒုနၢ်ဟူအိၣ်ကိးမုၢ်နံၤဒဲးလီၤႉဂီၤခီန့ၣ် နကလဲၤလၢကျီးပူၤန့ၣ်နလဲၤတဘူၣ်ညီညီဘၣ်ႉဘၣ်မၤနုၤအဃိလဲၣ်န့ၣ်မ့ၢ်ကျိဖးဒိၣ်ကလီၤတဲာ်လၢပမဲာ်ညါအခါဖဲလဲၣ်န့ၣ်ပတသ့ၣ်ညါဘၣ်ႉမ့သီၣ်ဘူးထီၣ်ဒုအိၣ်ဒၣ်ပဘၣ်နုာ်လီၤအိၣ်ခူသူၣ်လၢဘုခ့ကျီးပူၤန့ၣ်လီၤႉအိၣ်ဒၣ်ဘၣ်အိၣ်ဘၣ်စံၣ်ဘၣ်ဃုဒ်အံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ ဖၣ်ပူၣ်၀့ၢ်ပူၤ ခီဖျိတၢ်ပံာ်ဃာ်၀ဲပယီၤသုးအဟံၣ်ဖိဃီဖိအတၢ်အီၣ်တၢ်အီကျဲ အဃိ အ၀ဲသ့ၣ်သဂၢၢ်ဘၣ်၀ဲတၢ်အီၣ်တၢ်အီလီၤတူာ်ထီၣ်အဂ့ၢ်န့ၣ် သ့ၣ်ညါဘၣ်လၢၦၤဘူးဒီးပယီၤသုးတဖၣ်အအိၣ် န့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤကျဲဒီတကျိၤန့ၣ်ပယီၤသုးဒီး(BGF)ဒိးလီၤဃာ်၀ဲဟီၣ်လာ်မ့ၣ်ပိၢ်ဒီး ပံးဃာ်၀ဲခိကျဲထံကျဲခံဘိလၢာ်စ့ၢ်ကီးအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ

တလါအံၤအတီၢ်ပူၤလၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤပူၤအံၤခံခီခံကပၤအဘၢၣ်စၢၤတၢ်ဒုးကဲထီၣ်လီၤစှၤ၀ဲဒီး တၢ်ဒုးက့ၤဆူၣ်ထီၣ်ကဒါလၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤတကပၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ