လါအီးကထိဘၢၣ် ၁၁ သီ, ၂၀၂၅ နံၣ်, ခ့ၣ်အဲးစံၣ်
ဖဲလါအီးကထိဘၢၣ် ၉ သီ မုၢ်နၤခီအဆၢကတီၢ်န့ၣ် သုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ်လၢဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ် ယိၤကျါကရူၢ် ထံဖးဒိၣ်ထၣ်သဝီမုၢ်နုၥ် ကဘီယူၤပျီသဝီအဃိ ဖိသၣ်(၁၂)နံၣ်ဆူဖီလၥ် ၅ ဂၤ ဘၣ်သံဝဲဒၣ် ဆှုၣ်မဲၥ်ကဲၤမဲၥ် ဒီး ပှၤဘၣ်ဒိ(၁၂)ဂၤအကျါပၣ်ဃုၥ်ဝဲဖိသၣ်အိၣ်ဖျဲၣ်သီ(၂)လါတဂၤန့ၣ်လီၤ.
ဘၣ်ဃးတၢ်ဂ့ၢ်ကဲထီၣ်သးဖိသၣ်သံအဖီခိၣ်အံၤန့ၣ် ကညီတၢ်ဆီၣ်ထွဲမၤစၢၤတၢ်မုၥ်တၢ်ခုၣ်ပှၥ်ဘျးစဲ(KPSN) တၢ်ကစီၣ်ထုးထီၣ် ဝဲဂ့ၢ်ဂီၢ်အူလံၥ်တၢ်ပၥ်သးတဘ့ၣ်ဖဲမဟါလါအီးကထိဘၢၣ် ၁၀ သီ အနံၤန့ၣ်လီၤ.
ဒ်(KPSN)လံၥ်တၢ်ထုးထီၣ်ပၥ်ဖျါပူၤစံးဝဲအသိးန့ၣ် ထံဖးဒိၣ်ထၣ်သဝီမုၢ်နုၥ်လၢကဘီယူၤလဲၤခးလီၤတၢ်အံၤတၢ်ဒုးကဲထီၣ်တအိၣ် ပယီၤသုးကလၢၤတအိၣ်ဝဲဘၣ်ဒီးမ့မ့ၢ်တခီအိၣ်ဝဲဒၣ်ဒူသဝီကမျၢၢ်ကၠိ,တၢ်ဆါဟံၣ်ဒီးသီခါဖၠၣ်သ့ၣ်တဖၣ်န့ၣ်လီၤ.အဃိဘၣ်ဃးသုး မီၤစိရိၤအတၢ်လဲၤခးလီၤတၢ်အံၤလၢအအိၣ်ဝဲဒီးတၢ်ပညိၣ်လိၤလိၤအဃိမ့ၢ်တၢ်လုၢ်သ့ၣ်ခါပတၥ်မၤကမၣ်ဝဲထံဂုၤကီၢ်ဂၤတၢ်သိၣ်တၢ်သီတၢ်ဘျၢဖျိဖျိဖျါဖျါလီၤအဂ့ၢ်န့ၣ် စံးဝဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ်(KPSN)တၢ်ကစီၣ်မူဒါခိၣ် စီၤအဲၣ်ဒိၣ်ဝါ စံးဝဲလၢ “ခဲအံၤတၢ်လၢပှၤထံဖိကီၢ်ဖိဘၣ်ကွၢ်ဆၢၣ်မဲၥ်ဝဲန့ၣ်ပကထံၣ် ဘၣ်လၢတၢ်လီၢ်ကိးတီၤဒဲးလီၤ.သနါက့ဘၣ်မနုၤအဃိပဟံန့ၢ်ဝဲတၢ်ဂ့ၢ်တခါအံၤလဲၣ်ဒီးပပၥ်လၢအကါဒိၣ်လဲၣ်န့ၣ်တၢ်လီၢ်လၢအကဲထီၣ်န့ၣ်မ့ၢ်ဒၣ်ပှၤဒူဖိသဝီဖိအလီၢ်,တၢ်ဒုးတၢ်ယၤကဲထီၣ်တအိၣ်ဒီးပယီၤသုးကလၢၤတအိၣ်ဘူးဘၣ်.လဲၤခးနါစိၤဝဲဒ်န့ၣ်အဃိပှၤသံ(၅)ဂၤန့ၣ်မ့ၢ်ဝဲပှၤဖိဒံဖိသၣ်ပှၤကၠိဖိတဖၣ်လီၤ.အဃိမ့ၢ်တၢ်တခါလၢအဒုးသ့ၣ်နီၣ်ထီၣ်ပှၤဒ်သိးပကဒုးသ့ၣ်ညါထံဂုၤကီၢ်ဂၤလၢသုးမီၤစိရိၤအတၢ်မၤတပျုၥ်တပျီၥ်တၢ်အံၤအိၣ်ဝဲကိးကတီၢ်ကိးမုၢ်နံၤဒဲးလီၤ.အဃိထံဂုၤကီၢ်ဂၤတဖၣ်ကပၥ်သူၣ်ပၥ်သးဟံန့ၢ်ဂ့ၢ်ဝီလၢတၢ်ပတုၥ်ကွံၥ်မုၢ်ကျိၤဝဲၤကွၥ်တၢ်ဖံးတၢ်မၤ,တၢ်ဆါန့ၢ်ကသီယူၤသိဒီးကျိချံပှၥ်သၣ်တဖၣ်မီၤနီၤ.ဘၣ်မနုၤအဃိလဲၣ်ခီဖျိလၢကဘီယူၤမ့ၢ်ဂ့ၤ,ဒြိမ့ၢ်ဂ့ၤန့ၣ်စူးကါဝဲလၢဟးမၤသံမၤဝီဝဲကမျၢၢ်ထံဖိကီၢ်ဖိလၢအတၢ်ကမၣ်တအိၣ်ဘၣ်သ့ၣ်တဖၣ်မီၤနီၤ”အဂ့ၢ်န့ၣ် စံးဝဲန့ၣ် လီၤ.
တကးဒံးဘၣ်လၢန့ၣ်အမဲၥ်ညါသုးမီၤစိရိၤအံၤ ထံဂုၤကီၢ်ဂၤအတၢ်ဆီၣ်ထွဲမၤစၢၤမ့တပၣ်ဃုၥ်ပၣ်ဂီၢ်ဘၣ်န့ၣ်ကမ့ၢ်လၢအိၣ်ဆၢထၢၣ် ဝဲကသ့ဘၣ်အဃိ အလီၢ်အိၣ်လၢထံဂုၤကီၢ်ဂၤတဖၣ်ကဒီၣ်တဲၥ်ကွံၥ်ဒီးဟ့ၣ်တၢ်ဆီၣ်သနံးအါထီၣ်အဂ့ၢ်န့ၣ် (KPSN)လံၥ်တၢ်ပၥ်ဖျါ အပူၤ ပၥ်ဖျါဝဲန့ၣ်လီၤ.
ဒ်န့ၣ်အသိးလၢအတကပၤစ့ၢ်ကီးသုးမီၤစိရိၤအံၤလၢကဒိးန့ၢ်ဘၣ်က့ၤဟီၣ်ကဝီၤတၢ်လီၢ်တၢ်ကျဲလၢအဘၣ်ဟ့ၣ်ဃၣ်ကွံၥ်ဝဲတဖၣ်အံၤအဂီၢ်ဒီး လၢကဟဲလါဒံၣ်စ့ဘၢၣ်နုၥ်လီၤမၤဝဲတၢ်ဃုထၢကန့ၢ်အဂီၢ်န့ၣ် စးထီၣ်ဖဲလါအီးကထိဘၢၣ်ထီၣ်အံၤန့ၣ် ခ့ၣ်အဲၣ်ယူၣ် ဟီၣ်ကဝီၤအမဲၥ်ညါ လၢကလုၥ်ဒူၣ်တၢ်လီၢ်အါတီၤအပူၤန့ၣ် ဂုၥ်ကျဲးစၢးမၤဆူၣ်ထီၣ်ဝဲဒုးယၤတၢ်ဟူးတၢ်ဂဲၤ,သူဝဲကဘီယူၤ, ခးလီၤ ကျိဖးဒိၣ်အံၤဟဲအိၣ်ထီၣ်ဝဲတပယူၥ်ဃီအဂ့ၢ်န့ၣ် (KPSN)စံးဝဲန့ၣ်လီၤ.
“ပမ့ဘၣ်ကွၢ်က့ၤ ၂၀၂၁ လီၢ်ခံန့ၣ် လၢကလုၥ်ဒူၣ်ဟီၣ်ကဝီၤတၢ်လီၢ်အါတီၤန့ၣ်ဘၣ်ဟ့ၣ်ဃၣ်ကွံၥ်ဝဲအတၢ်လီၢ်အါမးလီၤ. ခ့ၣ်အဲၣ် ယူၣ်ဟီၣ်ကဝီၤလၢအဟးခးတပျုၥ်တပျီၥ်တၢ်အံၤခီဖျိအဝဲသ့ၣ်ဒိၣ်စိဝဲတန့ၢ်လၢၤဘၣ်အဃိတၢ်ဖးအလီၢ်တအိၣ်ဘၣ်အဖီခိၣ်ဒ်သိးအဝဲသ့ၣ်ကဒိးန့ၢ်ဘၣ်တၢ်ဖးလီၢ်ကဝီၤကအါထီၣ်အဂီၢ်န့ၣ်ဂုၥ်ကျဲးစၢးဆှၢထီၣ်ဝဲသုးဂံၢ်ဘါ,ခးတပျုၥ်တပျီၥ်တၢ်အဃိ တၢ်ဒုးကဲထီၣ်လၢ အဝဲသ့ၣ်ဒီး(KNLA)အဘၢၣ်စၢၤကိးမုၢ်နံၤဒဲးန့ၣ်ပတဲသ့လီၤ.”အဂ့ၢ်န့ၣ် စီၤအဲၣ်ဒိၣ်ဝါ စံးဝဲန့ၣ်လီၤ.
အဃိဘၣ်ဃးသုးမီၤစိရိၤအမုၢ်ကျိၤဝဲၤကွၥ်ဒီးကဘီယူၤ,ကျိချံပှၥ်သၣ်လၢအဒိးန့ၢ်ဘၣ်ဝဲလၢထံဂုၤကီၢ်ဂၤအအိၣ်တဖၣ်အံၤ တကဲထီၣ်တၢ်ဘၣ်ဘျုးအမဲၥ်ညါမ့မ့ၢ်တခီမ့ၢ်တၢ်မၤသံကဒါက့ၤကမျၢၢ်ထံဖိကီၢ်ဖိအဃိ ကမျၢၢ်ထံဖိကီၢ်ဖိဘၣ်သံ ဘၣ်ပှၢ် အနီၣ်ဂံၢ်ဟဲအါထီၣ်ဝဲတပယူၥ်ဃီအဂ့ၢ်န့ၣ် ပှၤဟူးဂဲၤလၢပှၤဂ့ၢ်ဝီခွဲးယၥ်တဖၣ်စံးဝဲန့ၣ်လီၤ.
ဒ်န့ၣ်အသိးတၢ်သံတၢ်ပှၢ်,တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤလၢအဟဲကဲထီၣ်အံၤတဖၣ်သုတအိၣ်လၢၤတဂ့ၤအဂီၢ် ကညီဂံၢ်ခီၣ်ထံးတၢ်ကရၢကရိဃုၥ်ဒီးကလုၥ်ဒူၣ်တၢ်ကရၢကရိလၢအဂၤသ့ၣ်တဖၣ် ထုးထီၣ်လံၥ်ဃ့ထီၣ်ဝဲထံဂုၤကီၢ်ဂၤဘီမုၢ်စၢ ဖှိၣ်ကရၢလၢကဟံထီၣ်ဖီၣ်ထီၣ်ဝဲသုးမီၤစိရိၤလၢအမၤကမၣ်ထံဂုၤကီၢ်ဂၤကွီၢ်မ့ၣ်အံၤအိၣ်ဝဲခဲအံၤခဲအံၤန့ၣ်လီၤ.
ဒ်ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါဝဲအသိးန့ၣ် တနံၣ်အံၤ(၂၀၂၅)လါယနူၤအါရံၤတုၤလါအီကူးလၢ ၈ လါအတီၢ်ပူၤ လၢခ့ၣ်အဲၣ်ယူၣ်ဟီၣ်ကဝီၤအပူၤ လၢတပၣ်ဃုၥ်ကျိဖးဒိၣ်,ဒြိဘၣ်န့ၣ်သုးမီၤစိရိၤသူဝဲကဘီယူၤဟးခးလီၤတၢ်အိၣ်ဝဲ(၃၉၈)ဘျီ အဃိ ကမျၢၢ်သံ(၆၄)ဂၤ,ဘၣ်ဒိ(၁၉၃)ဂၤ,ဟံၣ်(၂၄၈)ဖျၢၣ်,ကၠိ(၁၂)ဖျၢၣ်,တၢ်ဆါဟံၣ်(၄)ဖျၢၣ်,သီခါဖၠၣ်(၁၃)ဖျၢၣ်,တၢ်ဘါယွၤသရိၥ်(၄)ဖျၢၣ် ဟးဂီၤဝဲစုၥ်စုၥ်န့ၣ်လီၤ.
