လါအီးကထိဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ်
တနံၣ်အံၤ ၂၀၂၅ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါသးစၢ်ခိၣ်နၢ်ဖိခိၣ်ဖးအဂီၢ် အပူၤကွံၥ် တၢ်မ့ဟ့ၣ်ဝဲတၢ်လၤကပီၤ ခိၣ်ဖးလၢစ့ဒီၣ်လၣ်(၄၀၀၀)ဘၣ်ဆၣ် တနံၣ်အံၤတၢ်မၤအါထီၣ်ခိၣ်ဖးတုၤလၢ(၅၀၀၀)ဒီၣ်လၣ် အဂ့ၢ်န့ၣ် (PhanFoundation)ထုးထီၣ်ပၥ် ဖျါဝဲဖဲမဟါလါအီးကထိဘၢၣ် ၂၂ သီအနံၤန့ၣ်လီၤ.
အဃိတနံၣ်အံၤ ပဒိၣ်မါရှၤသးစၢ်ခိၣ်နၢ်ဖိတၢ်လၤကပီၤအဂီၢ် ပယဲၢ်မ့ၢ်ကညီသူၣ်ဘီၣ်သးစၢ်လၢအိၣ်ကီၢ်ပူၤကီၢ်ချၢ, ထံဆၢကီၢ်ဆၢ တဖၣ် စးထီၣ်ဆှၢထီၣ်မံၤသ့ဝဲဖဲတလါအံၤလါအီးကထိဘၢၣ် ၂၂ သီတုၤလၢလါဒံၣ်စ့ဘၢၣ် ၃၁ သီလါလၢၥ် အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတနံၣ်အံၤသးစၢ်ခိၣ်နၢ်ဖိခိၣ်ဖးအဂီၢ် ခီဖျိကရူၢ်ကရၢတနီၤထံၣ်ဝဲလၢ(phanfoundation)အံၤကဲဘျုးလၢသးစၢ် အဂီၢ်အဖီခိၣ် ဒီးဆီၣ်ထွဲမၤစၢၤသကိးဝဲတသ့ဖဲအသ့အဃိ ဘၣ်တၢ်ဟ့ၣ်အါထီၣ်ဝဲခိၣ်ဖးစ့နီၣ်ဂံၢ်ဒ်အံၤလီၤအဂ့ၢ်န့ၣ် ပဒိၣ်မါရှၤ အဖိခွါဒိၣ် ပဒိၣ်စီၤစ့စ့ဖါ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ပကတဲဒ်လဲၣ်ပသမူသကိးလၢအထံၣ်ဝဲလၢပ(phanfoundation)တခါအံၤန့ၣ်အဘျုးအိၣ်ဒီးခီဖျိပဆီၣ်ထွဲမၤစၢၤဝဲသူၣ်ဘီၣ်သးစၢ် တဖၣ် အဃိ အဝဲသ့ၣ်ဆီၣ်ထွဲမၤစၢၤဝဲ(phanfoundation)အံၤမီၤနီၤ. အပူၤကွံၥ်သီသီတၢ်စးထီၣ်ဟ့ၣ်ဝဲ(phanfoundation)သးစၢ် ခိၣ်နၢ်ဖိခိၣ်ဖးအံၤ ထဲဒၣ်ဒီၣ်လၣ်(၂၀၀၀)ဝံၤ(၃၀၀၀)ဒီးတုၤလၢ(၄၀၀၀)လီၤ. တနံၣ်အံၤပှၤမၤစၢၤပှၤအိၣ်အဃိ ခိၣ်ဖးစ့နီၣ်ဂံၢ်ဟဲ အါထီၣ်ဝဲလီၤ.အပူၤကွံၥ်ခီအိၣ်ဒၣ်ထဲပဒီပုၢ်ဝဲၢ်ဒီးပသမူသကိးစှၤဒံစှၤဂၤပပၥ်ဖှိၣ်ထီၣ်သးအဃိပကျိၣ်စ့တန့ၢ်အါအါဘၣ်မီၤနီၤ”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢကဟဲခါဆူမဲၥ်ညါ ဘၣ်ဃး(phanfoundation)အတၢ်ဟူးတၢ်ဂဲၤအပူၤ ကရူၢ်ကရၢလၢအဂၤဟဲပၥ်ဖှိၣ်မၤသကိး တၢ်မ့အိၣ်အါထီၣ်န့ၣ် သးစၢ်ခိၣ်နၢ်ဖိခိၣ်ဖးစ့နီၣ်ဂံၢ်လၢတၢ်ဟ့ၣ်ဝဲအံၤ တၢ်ရဲၣ်တၢ်ကျဲၤအိၣ်လၢတၢ်ကဟ့ၣ်အါထီၣ်ဝဲ ကွ့ၢ်ကွ့ၢ်အိၣ်ဝဲ အဂ့ၢ်န့ၣ် ပဒိၣ်စီၤစ့စ့ဖါ စံးအါထီၣ်ဝဲန့ၣ်လီၤ.
ဘၣ်ဃးတၢ်ဆှၢထီၣ်မံၤလၢသးစၢ်ခိၣ်နၢ်ဖိခိၣ်ဖးအဂီၢ်အံၤကိးမုၢ်နံၣ်ဒဲးသးစၢ်လၢအတီၣ်ထီၣ်အမံၤသ့ၣ်တဖၣ်ကဘၣ်အိၣ်ဝဲ(၃၅)နံၣ်ဆူဖီလၥ်အသိး ကဘၣ်မ့ၢ်စ့ၢ်ကီးပှၤလၢဟူးဂဲၤ ဖံးမၤတၢ်လၢကညီပှၤတဝၢတၢ်ဖံးတၢ်မၤပူၤဘၣ်ဃးဆူၣ်ချ့,ကူၣ်သ့, လံၥ်လဲၢ်ဒီး တၢ်ဆဲးတၢ်လၤ, ပှၤဂ့ၢ်ဝီတၢ်ဖံးတၢ်မၤဒီးသုတဘၣ်မ့ၢ်ပှၤလၢကွၢ်လီၤနီၢ်ကစၢ်တၢ်ဘၣ်ဘျုးဘၣ်န့ၣ်လီၤ.
ဒီးသးစၢ်လၢအဆှၢထီၣ်အမံၤသ့ၣ်တဖၣ်အံၤ တၢ်ကရၢကရိတဖုဖုဆှၢထီၣ်န့ၢ်ဝဲမံၤသ့ဝဲဒီး ဒ်န့ၣ်အသိးမံၤ,အိၣ်ဆိးလီၢ်ကျဲ တၢ်ဂ့ၢ်တၢ်ကျိၤသ့ၣ်တဖၣ်တၢ်ကဘၣ်ကွဲးအီၤလၢကညီကျိၥ်,ကီၤလၤဝါကျိၥ် ဒီး ပယီၤကျိၥ်ဝံၤဆှၢထီၣ်ဆူ (bwabwa.phan@phanfoundation.org)နၣ်ဘွါဘွါဖါအအိၣ်သ့ဝဲဒၣ်န့ၣ်လီၤ.
ဒ်န့ၣ်အသိးသးစၢ်လၢတၢ်ဃုထၢထီၣ်ဝဲလၢအကြၢးဝဲဒီးပဒိၣ်မါရှၤသးစၢ်ခိၣ်နၢ်ဖိခိၣ်ဖးအံၤ တၢ်ကဘိးဘၣ်ရၤလီၤက့ၤအမံၤဖဲ(၂၀၂၆) နံၣ်ထီၣ်အံၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ပဒိၣ်မါရှါသးစၢ်ခိၣ်နၢ်ဖိခိၣ်ဖးအံၤ တနံၣ်တဘျီဘၣ်တၢ်ဃုထၢထီၣ်ဝဲသးစၢ်လၢအကြၢးဝဲဒီးတၢ်လၤကပီၤအံၤတဂၤဒီး ခိၣ်ဖးအံၤတၢ်စးထီၣ်ဟ့ၣ်ဝဲဖဲပဒိၣ်မါရှၤစူၥ်ကွံၥ်သးလီၢ်ခံ (၂၀၀၉)တုၤလၢမဟိ(၂၀၂၄)နံၣ်အံၤန့ၣ်ဝဲအိၣ်(၁၅)ဘျီလံအဃိ သးစၢ်မုၣ်/ခွါလၢအဒိးန့ၢ်ဘၣ်တၢ်လၤကပီၤခိၣ်ဖးအံၤအိၣ်လံဝဲ(၁၆)ဂၤလံန့ၣ်လီၤ.
တကတီၢ်ဃီပဒိၣ်မါရှၤသးစၢ်ခိၣ်နၢ်ဖိခိၣ်ဖးလၢအပူၤကွံၥ်လီၤခံကတၢၢ်တၢ်ဟ့ၣ်အီၤဖဲ(၂၀၂၄)အခါန့ၣ် ဖၣ်အၣ်ကီၢ်ရ့ၣ် ဂ့ၢ်ဂီၢ်အူတၢ်တိစၢၤမၤစၢၤ ကမံးတံၥ် ပဒိၣ်နီၢ်ဆှံဝါ ဒိးန့ၢ်ဘၣ်ဝဲဒၣ်န့ၣ်လီၤ.
ခ့ၣ်အဲၣ်ယူၣ် နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှၤလါဖါအံၤ ဖဲအပူၤကွံၥ်(၂၀၀၈)လါဖ့ၤဘြူၤအါရံၤ ၁၄ သီအနံၤန့ၣ် ဖီၣ်စုကဝဲၤလၢတၢ်တသ့ၣ်ဝဲတဖၣ်ဟဲခးသံကွံၥ်အီၤလၢကီၢ်ကၠီၣ်တဲၣ် မဲၢ်ဆီးဝ့ၢ် အဟံၣ်ပူၤဒီး အဃိအဖိမုၣ်ဖိခွါ စီၤစ့စ့ဖါ, နၣ်ဘွါဘွါဖါ, နၣ်စိၤယၤဖါဒီးစလိၣ်ဖါ ဒီပုၢ်ဝဲၢ်(၄)ဂၤအံၤ လၢတၢ်သ့ၣ်နီၣ်ထီၣ်က့ၤအပါပဒိၣ်မါရှၤဒီး အမိနၣ်ကၠ့ၤစွ့ၤ ခံဂၤအံၤအဂီၢ် စးထီၣ်ဒုးအိၣ်ထီၣ်ဝဲ (phanfoundation)သးစၢ်ခိၣ်နၢ်ဖိခိၣ်ဖးအံၤန့ၣ်လီၤ.
တကးဒံးဘၣ်(phanfoundation)အံၤ တမ့ၢ်အဟ့ၣ်သးစၢ်ခိၣ်နၢ်ဖိတၢ်လၤကပီၤခိၣ်ဖးလၢသးစၢ်အဂီၢ်တခါဧိၤဘၣ်ဒီး မ့မ့ၢ်တခီဘၣ်ဃးလၢဆူၣ်ချ့တကပၤမ့ၢ်ဂ့ၤ,ကူၣ်သ့,ဂ့ၢ်ဂီၢ်အူပှၤဃ့ၢ်မှံဟးဖျိးတၢ်လိၣ်ဘၣ် ဃုၥ်ဒီးတၢ်လိၣ်ဘၣ်လၢအဂၤအကပၤကပၤ ဆီၣ်ထွဲမၤစၢၤအိၣ်ဝဲထီဘိအဂ့ၢ်န့ၣ် သ့ၣ်ညါဘၣ်န့ၣ်လီၤ.
