လါနိၣ်ဝ့ဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇)တၢ်ြကဲၢ်ကီၢ်ဆၣ် မီၤဖိက့ၣ်ဟီၣ်ကဝီၤအပူၤ လၢကတ့ထီၣ်(ကၠါဖၠၣ်)တၢ်ဖံးတၢ်မၤလီၢ်လၢ ဟီၣ်ခိၣ်ဒီဘ့ၣ် တြီဝဲအံၤအဂီၢ်န့ၣ် ကညီသုးခိးကီၢ်ဆၢ(BGF)လဲၤပှ့ၤဝဲလီၢ်ကဝီၤကမျၢၢ်အဟီၣ်ခိၣ်တၢ်လီၢ်တၢ်ကျဲအဂ့ၢ်န့ၣ် (MPA -Myanmar Pressphoto Agency)တၢ်ကစီၣ်ပၥ်ဖျါဝဲဖဲမဟါ လါနိၣ်ဝ့ဘၢၣ် ၉ သီအသိးသ့ၣ်ညါ ဘၣ်န့ၣ်လီၤ.
ဘၣ်ဆၣ်ဘၣ်ဃးတၢ်ကစီၣ်ဟးထီၣ်လၢ(BGF)လဲၤပှ့ၤဟီၣ်ခိၣ်တၢ်လီၢ်တၢ်ကျဲအံၤ(MPA)တၢ်ကစီၣ်ပၥ်ဖျါဝဲအမဲၥ်ညါ လီၢ်ကဝီၤ ပှၤဘၣ်မူဘၣ်ဒါလၢအိၣ်ဖဲန့ၣ်တနီၤစ့ၢ်ကီးစံးဘၣ်ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
လၢတၢ်ကစီၣ်ဟးထီၣ်အဖီခိၣ်အံၤ ပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ် ကညီသုးခိးကီၢ်ဆၢ(BGF)သုးခိၣ်ကျၢၢ်ဖိ စီၤတ့ၤဝ့ အခါ စံးဝဲလၢ “တတ့ဘၣ်.လဲၤကွၢ်ကွၢ်ဝဲ လဲၤတရံးကွၢ်ဝဲဒ်န့ၣ်လီၤ. လၢကတ့မနုၤမတၤဒုတအိၣ်ဒံးဘၣ်.ယသ့ၣ်ညါန့ၣ် လဲၤကွၢ်ဝဲ တၢ်အိၣ်သးလီၤ.ကဲထီၣ်တကဲထီၣ်ဒုတသ့ၣ်ညါဒံးဘၣ်”အဂ့ၢ်န့ၣ် စံးဝဲန့ၣ်လီၤ.
အပူၤကွံၥ်လါအီးကထိဘၢၣ်အခါ (KK Park)ကၠါဖၠၣ်တၢ်ဖံးတၢ်မၤလီၢ်လၢအိၣ်ဆီလီၤသးဖဲမၠၣ်ဝတံၣ်ဃ့ၢ်ဃၢၤအံၤ ပယီၤသုးပၥ် မၤသးလဲၤနုၥ်လီၤမၤဆှဲလဲ,ထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိဃုၥ်ဒီးကီၢ်ပယီၤပှၤမၤတၢ်ဖိဃ့ၢ်ထီၣ်သုးလီၢ်သုးကျဲဝံၤလီၢ်ခံ (BGF)လဲၤပှ့ၤ ဟီၣ်ခိၣ်လီၢ်တၢ်လီၢ်တၢ်ကျဲ လၢမီၤဖိက့ၣ်ဟီၣ်ကဝီၤတကပၤ ဘၣ်ဟဲအိၣ်ဖျါထီၣ်ဝဲန့ၣ်လီၤ.
ဒ်န့ၣ်အသိးဟီၣ်ကဝီၤတၢ်လီၢ်လၢ(BGF)လဲၤပှ့ၤဟီၣ်ခိၣ်ခဲအံၤန့ၣ် တမ့ၢ်မီၤဖိက့ၣ်လိၤလိၤဘၣ် အိၣ်ဝဲလၢမီၤဖိက့ၣ်-ကနိးထၣ်သဝီ ဘၢၣ်စၢၤ ဝၣ်ဆှုၣ်က့ၣ်သဝီတကပၤဒီး ခဲအံၤဒ်တၢ်ကစီၣ်ဟးထီၣ်အသိးတၢ်တ့ထီၣ်ဘှီထီၣ်ဝဲတၢ်သူၣ်ထီၣ်အိၣ်တဖျၢၣ်လံ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢတအဲၣ်ဒိးပၥ်ဖျါအမံၤတဂၤစ့ၢ်ကီး စံးဝဲန့ၣ်လီၤ.
“တၢ်တခါန့ၣ်တမ့ၢ်ဖဲမီၤဖိက့ၣ်ဟီၣ်ကဝီၤအပူၤဘၣ်လၢဝၣ်ဆှုၣ်က့ၣ်တၢ်လီၢ်တတီၤခီမီၤနီၤ.အအိၣ်န့ၣ်လၢသုးရ့ၣ်-၂၂ ဟီၣ်ကဝီၤ အပူၤလီၤ.တၢ်မ့ၢ်တၢ်လီၢ်တခါန့ၣ်(BGF)ကၢၤဃၥ်ဝဲဖးယံၤလံ.အပှ့ၤဟီၣ်ခိၣ်န့ၣ်ပသ့ၣ်ညါထွဲလၢအပှ့ၤဝဲဖဲအံၤတဘ့ၣ်လံ. ပှ့ၤဝဲဝံၤတ့ ထီၣ်တၢ်လီၢ်လံဘၣ်ဆၣ်တ့ဝဲလၢမနုၤအဂီၢ်လဲၣ်န့ၣ်ပမၤလီၤတံၢ်တန့ၢ်ဒံးဘၣ်.တသ့ၣ်ညါဘၣ်တၢ်တခါန့ၣ်မ့မၤဝဲဒီးမၤဝဲသ့လီၤပတဲလီၤတံၢ်တဘၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါဘၣ်ဃးတၢ်ကစီၣ်ဟးထီၣ်အံၤ တသ့ၣ်ညါထွဲတၢ်ဂ့ၢ်ဘၣ်အသိး တၢ်လီၢ်ဖဲန့ၣ်(BGF)အိၣ်ဆီလီၤသးန့ၢ်လၢ အနံၣ်(၁၀)ဘျဲၣ်လံဘၣ်ဆၣ် တၢ်သ့ၣ်တဖၣ်အံၤ သုတကဲထီၣ်တဂ့ၤအဂီၢ်ခံခီခံကပၤကဘၣ်တဲသကိးကျဲၤအီၤလၢအဂ့ၤကတၢၢ် အဂ့ၢ်န့ၣ် ဖၣ်အၣ်ကီၢ်ရ့ၣ်ခိၣ် ပဒိၣ်စီၤအီၤမီၤအ့ စံးဝဲန့ၣ်လီၤ.
“ယဲစ့ၢ်ကီးယထံၣ်လၢတၢ်ကစီၣ်ပူၤလီၤ.ခဲအံၤဒုပတသ့ၣ်ညါထွဲတၢ်ဂ့ၢ်နီမံၤဒံးဘၣ်.ဝၣ်ဆှုၣ်က့ၣ်တၢ်လီၢ်န့ၣ်(BGF)ဆီလီၤသးအိၣ်ဃးလၢညါကအိၣ်လၢအနံၣ်(၁၀)ဘျဲၣ်လံ.ဘၣ်ဃးတၢ်ဂ့ၢ်အံၤဒုပကဘၣ်တၢၣ်ပီၣ်တဲ သကိးအီၤဒ်အသိးလၢပတၢ်ဃူတၢ်ဖိး တၢ်နၢ်ပၢၢ် လိၥ်သးသုတဟးဂီၤတဂ့ၤအဂီၢ်ဒုပကဘၣ်ကျဲၤအီၤလၢအဂ့ၤလီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤ န့ၣ်လီၤ.
ဒ်န့ၣ်အသိးဝၣ်ဆှုၣ်က့ၣ်ဒူသဝီတၢ်လီၢ်လၢတၢ်ကစီၣ်ဟးထီၣ်လၢ(BGF)လဲၤပှ့ၤဟီၣ်ခိၣ်အံၤဒီးမီၤဖိက့ၣ်သဝီလၢ(KNLA) သုးရ့ၣ်-၂၂ အပှၤအိၣ်ဆီလီၤသးအံၤအိၣ်ဘူးလိၥ်ဝဲအသးအဃိ ဟီၣ်ကဝီၤခိၣ်ဃၢၤဖဲန့ၣ်သုးရ့ၣ်-၂၂ ဃုၥ်ဒီး(BGF),(PC)အိၣ်ဃါဃုၥ် လိၥ်သးလၢတၢ်နၢ်ပၢၢ်ဖီခိၣ်အဂ့ၢ်န့ၣ် ဖီၣ်စုကဝဲၤခိၣ်နၢ်ဘၣ်ထွဲစံးဝဲအသိးသ့ၣ်ညါဘၣ်န့ၣ်လီၤ.
ဟီၣ်ကဝီၤတၢ်လီၢ်လၢတၢ်ကစီၣ်ဟးထီၣ်လၢတၢ်ကတ့ထီၣ်(ကၠါဖၠၣ်)အံၤမ့အိၣ်ဝဲလၢအဟီၣ်ကဝီၤပူၤဘၣ်ဆၣ် ဘၣ်ဃးတၢ်ဂ့ၢ်အံၤ တၢ်ဒုးသ့ၣ်ညါတၢၣ်ပီၣ်တဲသကိးတၢ်ဒီးခိၣ်နၢ်လၢတၢ်ဖီခိၣ်တအိၣ်နီတမံၤဘၣ်အသိး တၢ်ဂ့ၢ်လၢအရၤလီၤသးအံၤမ့ၢ်အလီၤတံၢ် ဆဲး ထဲလဲၣ်န့ၣ် တၢ်ကဘၣ်ခိးကွၢ်ဝဲဒံးအဂ့ၢ်န့ၣ် (KNU/KNLA-PC)သုးခိၣ်ကျၢၢ်စိ စီၤကၠီၤညိၣ် စံးစ့ၢ်ကီး ဝဲန့ၣ်လီၤ.
“ဘၣ်ဃးတၢ်တခါအံၤဒ်သိးပှၤတဲအသိးန့ၣ်ကမ့ၢ်သ့ဒီးတမ့ၢ်ဘၣ်စ့ၢ်ကီးသ့လီၤ.မ့မ့ၢ်ယၤဒုယတနၢ်ဟူဘၣ်နီတဘျီဒံးဘၣ်.လၢကညီဖီၣ်စုကဝဲၤခိၣ်နၢ်အဘၢၣ်စၢၤစ့ၢ်ကီးတၢ်တၢၣ်ပီၣ်တဲသကိးလီၤတံၢ်လီၤဆဲးတအိၣ်နီတဘျီဘၣ်ဒီးဘၣ်ဆၣ်ခိၣ်နၢ်ဘၣ်ထွဲလၢအိၣ်ဟီၣ်ကဝီၤပူၤတဖၣ်မ့ၢ်ဆဲးကျိးလိၥ်သးအိၣ်ဧါတအိၣ်ဧါဒုပတဲတသ့ဘၣ်မီၤနီၤ.ယဲဒၣ်ယတသ့ၣ်ညါယတနၢ်ဟူဘၣ်ဘျီယတဲလၢယတသ့ၣ်ညါယတနၢ်ဟူဘၣ်လီၤမီၤ.တၢ်ဂ့ၢ်တၢ်ကျိၤတခါအံၤလၢယဂီၢ်န့ၣ်မ့ၢ်တၢ်အသီသီလီၤ.ဘၣ်ဆၣ်ပဟီၣ်ကဝီၤတၢ်လီၢ်အံၤ အဝဲအံၤ(BGF)တၢ်လီၢ်,(PC)တၢ်လီၢ်တၢ်ပၥ်ပနီၣ်အီၤလီၤတံၢ်လီၤဆဲးတအိၣ်ဘၣ်.အလုၢ်အလၢ်အိၣ်ပၥ်စၢၤလၢပျၢၤလံၤလံၤအသိး ပအိၣ်ယီနီကျဲၣ်ကျီလီၤသး,ပအိၣ်လၢတၢ်နၢ်ပၢၢ်ဒီးပတၢၣ်ပီၣ်သကိးတၢ်ဖံးတၢ်မၤအိၣ်ဘၣ်ဆၣ်လၢတၢ်ကတ့ထီၣ်တၢ်အံၤမ့ၢ်မတဂၤတီၣ်ထီၣ်တၢ်ကစီၣ်လဲၣ်,တၢ်ကသူၣ်ထီၣ်ဘှီထီၣ်မတၤဒုအကလုၥ်လဲၣ်န့ၣ်ပတသ့ၣ်ညါထွဲဘၣ်အဖီခိၣ်မ့ၢ်တၢ်လီၤတံၢ်လီၤဆဲးကအိၣ်ဒ်လဲၣ်န့ၣ်ပကဘၣ်ခိးကွၢ်အီၤပတဲအီၤလီၤတံၢ်လီၤဆဲးတသ့ဒံးဘၣ်”အဂ့ၢ်န့ၣ် စံးဝဲန့ၣ်လီၤ.
ဒ်(MPA)တၢ်ကစီၣ်ပၥ်ဖျါဝဲအသိးန့ၣ် လၢတၢ်ကတ့ထီၣ်(ကၠါဖၠၣ်)တၢ်ဖံးတၢ်မၤအလီၢ်အကျဲအဂီၢ် စးထီၣ်ဖဲတလါအံၤ လါနိၣ် ဝ့ဘၢၣ်ထီၣ် အံၤန့ၣ် မီၤဖိက့ၣ်ဟီၣ်ကဝီၤအပူၤ(BGF)ဟးပှ့ၤဝဲဟီၣ်ခိၣ်လီၢ်တအ့ကၢၣ်န့ၣ်လၢစ့ယိၤတကလီၢ်တုၤလၢခံကလီၢ် ဃၣ်ဃၣ် ညါအဃိ ကမျၢၢ်တဖၣ်ဆါလီၤဝဲအဟီၣ်ခိၣ်လီၢ်အိၣ်လံအသိး တၢ်ရဲၣ်တၢ်ကျဲၤအိၣ်လၢကပှ့ၤဝဲဟီၣ်ခိၣ်အအ့ကၢၣ်လၢ အကထိညါအဂ့ၢ်န့ၣ် လံၥ်တၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးဟီၣ်ကဝီၤတၢ်လီၢ်လၢတၢ်ကစီၣ်ဟးထီၣ်လၢတၢ်ကတ့ထီၣ်(ကၠါဖၠၣ်)တၢ်မၤအလီၢ်အကျဲအံၤန့ၣ် အိၣ်ဝဲလၢ ကီၢ်ကၠီၣ်တဲၣ် -ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤဆၢလၥ် မဲၢ်တီၢ်ဝ့ၢ် သူမှဲကျိဝၢ်ခီတကပၤအဃိ တၢ်လီၢ်အံၤအိၣ်ဝဲတယံၤတဘူးဒီး ခ့ၣ်အဲၣ်ယူၣ်လီၢ်ခၢၣ်သးဝဲၤလီၢ်သ့ၣ်ခိၣ်အံၤဘၣ်န့ၣ်လီၤ.
