လါဒံၣ်စ့ဘၢၣ် ၂၃ သီ, ၂၀၂၅ နံၣ်, ခ့ၣ်အဲးစံၣ်
ကညီကီၢ်စဲၣ် ကီးတရံးကလံၤစိးဟီၣ်ကဝီၤအပူၤ ဖဲလါဒံၣ်စ့ဘၢၣ် ၁၉ သီအနံၤန့ၣ် ထံဖိစီကရူၢ် ကီၣ်ဖၤ(ကော့ဖန်)သဝီဖိ ၈ ဂၤလၢ အဃ့ၢ်တၢ်ဒုးအံၤ ဖဲအဝဲသ့ၣ်က့ၤဆူအအိၣ်ဆိးလီၢ်ကျဲအခါ ဘၣ်တၢ်ဖီၣ်အဝဲသ့ၣ်လၢပယီၤသုးဒီး တုၤလၢခဲအံၤမၤတၢ်ဆဲးကျိးတန့ၢ်ဝဲ ဘၣ်အဂ့ၢ်န့ၣ် သ့ၣ်ညါဘၣ်လီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ကီၣ်ဖၤသဝီဖိ ပိၥ်မုၣ်(၄)ဂၤလၢအပၣ်ဃုၥ်ဝဲဖိသၣ်(၈)လါတဂၤ ဒီး ပိၥ်ခွါ ၄ ဂၤ ပၥ်ဖှိၣ်ခဲလၢၥ် ၈ ဂၤပှၤသ့ၣ်တဖၣ်အံၤ တၢ်ဖီၣ်အဝဲသ့ၣ် ဖဲ ကီးတရံး-ကြုၢ်တုသဝီဘၢၣ်စၢၤအံၤဖဲပယီၤသုးဒီး(DKBA)သုးခိၣ်ဘိၤဘံၣ် တၢ်သမံသမိးတြဲၤလီၢ်အံၤဒီးဖဲန့ၣ်ဝံၤတုၤလၢခဲအံၤ တၢ်ဆၢကတီၢ်အိၣ်(၄)သီလံဘၣ်ဆၣ်မၤတၢ်ဆဲးကျိးဆဲးကျၢတန့ၢ်ဒံးဝဲဘၣ်ဘၣ်ဟဲကဲထီၣ် ဝဲဒ်အံၤန့ၣ်လီၤ.
ဘၣ်ဃးတၢ်ဂ့ၢ်အံၤ ထံဖိစီသဝီဖိလၢတဂၤ စံးဝဲလၢ“စးထီၣ်လၢကြုၢ်တုတုၤဃီၤလၢနီၤထပၤ(နောင်ထပ္ပံ),ကီၢ်စူကျဲန့ၣ် အိၣ်ဒီး ပယီၤတၢ်သမံသမိး တြဲၤ. ပှၤဟံၣ်ဖိဃီဖိတဖၣ်န့ၣ်ဖဲအကဟဲက့ၤဆူ(ကီၣ်ဖၤ)အဟံၣ်အခါန့ၣ်တၢ်ဖီၣ်အီၤလၢကျဲ. အပိၥ်ခွါ ၄ ဂၤ, အမိၥ်မုၣ်န့ၣ် ၄ ဂၤ. ဖဲန့ၣ်အပၣ်ဃုၥ်ဒီးဖိသၣ်အိၣ်(၈)လါတဂၤ.တုၤလၢခဲအံၤပလူၤဃုသ့ၣ်ညါတန့ၢ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဒူသဝီလၢအိၣ်ကီးတရံး-ကြုၢ်တုဟီၣ်ကဝီၤပူၤတဖၣ် အပူၤကွံၥ်လၢညါအခါစ့ၢ်ကီးပယီၤသုးဖီၣ်ဒုးဃၥ်ကမျၢၢ်ကဲထီၣ်အိၣ်ဝဲအသိး စးထီၣ်ဖဲလါအီးကထိဘၢၣ်တုၤလၢတလါအံၤလါဒံၣ်စ့ဘၢၣ်န့ၣ် ပယီၤသုးဖီၣ်ကမျၢၢ်အိၣ်တစှၤန့ၢ်လံ(၅၀)ဂၤလံအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ လၢအကွၢ်ထွဲကမျၢၢ်ပှၤလီၢ်အိၣ်ကမှံဖိတဖၣ်စံးဝဲဒၣ်အိၣ်န့ၣ်လီၤ.
ဒ်န့ၣ်အသိးဘူးထီၣ်လၢတၢ်ဃုထၢမုၢ်နံၤမုၢ်သီလံအဃိ ခဲအံၤလၢကီးတရံးကလံၤစိး,ကလံၤထံးဒူသဝီတနီၤအပူၤန့ၣ် ပယီၤသုးတြီဃၥ်ဝဲ ကမျၢၢ်တၢ်ဟးထီၣ်က့ၤလီၤအသိး တၢ်လီၢ်လၢဟီၣ်ကဝီၤတၢ်ပၢၢ်ဆၢကရူၢ်ကရၢဟူးဂဲၤအလီၢ်တဖၣ်န့ၣ် ပယီၤသုး သူဝဲကျိဖးဒိၣ်ဒီးဟးခး လီၤတၢ်ဒီးကဘီယူၤအိၣ်ဝဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် လီၢ်ကဝီၤကမျၢၢ်တဖၣ်စံးဝဲန့ၣ်လီၤ.
ကီးတရံး-ကြုၢ်တုဟီၣ်ကဝီၤအပူၤ ဖဲအပူၤကွံၥ်လါအီးကထိဘၢၣ်အခါန့ၣ် ပယီၤသုးဒီး(DKBA)သုးခိၣ်ဘိၤဘံၣ်အပှၤတဖၣ်ဖီၣ်ဝဲ နါကီၤတ့(နန်းကော်တေး)သဝီဖိတဖၣ်ဒီး ထိတီၢ်မၤဒၢၣ်ဝဲကဲထီၣ်တ့ၢ်ဒံးအဂ့ၢ်န့ၣ် တၢ်ပၢၢ်ဆၢကရူၢ်ကရၢဒီးကမျၢၢ်တဖၣ် စံးဘၣ်တ့ၢ်ဃၥ် ခ့ၣ်အဲးစံၣ်-ကညီတၢ်ကစီၣ်အိၣ်ဝဲန့ၣ်လီၤ.
