လါဖ့ၤဘြူၤအါရံၤ ၇ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤတဘ့ၣ်လၢပှၤနီၣ်ဂံၢ်အါကတၢၢ်အံၤ ဖဲတနံၤအံၤ ကမျၢၢ်ပိၥ်ခွါ စၢၢ်သံလီၤကဒီးအကိၥ်တဂၤကဲထီၣ်ဝဲအဂ့ၢ်န့ၣ် သ့ၣ်ညါဘၣ်လၢဒဲကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ကမျၢၢ်ပိၥ်ခွါလၢအစၢၢ်သံလီၤကိၥ်တဂၤအံၤအမံၤမ့ၢ်ဝဲ စီၤမီၤဒါပံၥ် သးနံၣ်အိၣ်ဝဲ(၅၂)နံၣ် အိၣ်ဝဲလၢ(Zone-B B3-B)န့ၣ်လီၤ.
စီၤမီၤဒါပံၥ်အံၤ ဖဲမဟါလါဖ့ၤဘြူၤအါရံၤ ၆ သီမုၢ်နၤခီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ်လီၤမၢ်ဝဲဒီး မုၢ်ဆ့ၣ်ထီၣ်ဖဲတနံၤအံၤ ၇ သီ ၈ နၣ်ရံၣ်ဃၣ်ဃၣ်အဆၢကတီၢ် တၢ်လဲၤထံၣ်က့ၤအစၢၢ်လီၤကိၥ်သံဝဲလၢဒဲကဝီၤဃၢၤလ့ခီၣ်ထံးအဂ့ၢ်န့ၣ် ဒဲကဝီၤပှၤ ဘၣ်မူ ဘၣ်ဒါ စံးဝဲအသိးသ့ၣ်ညါဘၣ် န့ၣ်လီၤ.
မဲၢ်လးဒဲကဝီၤအပူၤညီနုၢ်လီၤဆီဒၣ်တၢ်ပိၥ်ခွါလၢအစၢၢ်သံလီၤကိၥ်တဖၣ်န့ၣ်ကဲထီၣ်သးခီဖျိလၢတၢ်မူၤတၢ်ဘှီးအဃိဘၣ်ဆၣ် မ့မ့ၢ်စီၤဒါပံၥ်အံၤသူတၢ်မူၤတၢ်ဘှီး,တၢ်ဘၣ်ဂံၥ်ဂူၥ်ဒီးဟံၣ်ဖိဃီဖိတအိၣ်ဘၣ်ဒီးတချုးအသံဒံးဘၣ်ဖဲအပူၤကွံၥ်လါယနူၤအါရံၤအခါန့ၣ် အလီၤမၢ်ကဲထီၣ်ဒံးဝဲတဘျီအဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“ပသံကွၢ်အဖိအမါန့ၣ်အသံလၢအကစၢ်တၢ်ဂ့ၢ်တၢ်ကျိၤလီၤ.အတၢ်ဘၣ်ဂံၥ်ဂူၥ်ဒီးဟံၣ်ဖိဃီဖိမ့ၢ်ဂ့ၤတအိၣ်နီမံၤဘၣ်.ဖဲမဟါတလါ လါယနူၤအါရံၤ ၁၇ သီ, ၁၈ သီအခါန့ၣ် အတၢ်ဂ့ၢ်န့ၣ်ကဲထီၣ်တဘျီ.ပှၤဆိမိၣ်လၢအစၢၢ်လီၤကိၥ်ပှၤလူၤဃုအီၤပှၤထံၣ်ကဒါအီၤ. ဖဲမဟါခီဒုပှၤကွၢ်ထွဲအီၤတချုးဘၣ်အလီၤမၢ်ဘျီပှၤလဲၤထံၣ်က့ၤအီၤလၢပှၢ်ကျါစၢၢ်လီၤကိၥ်ဒ်န့ၣ်”အဂ့ၢ်န့ၣ် စံးဝဲန့ၣ်လီၤ.
ဘၣ်ကီဘၣ်ခဲဒဲကဝီၤ(၉)ဘ့ၣ်အကျါလီၤဆီဒၣ်တၢ်မဲၢ်လးဘၣ်ကီဘၣ်ခဲဒဲကဝီၤလၢပှၤနီၣ်ဂံၢ်အိၣ်(၃၀၀၀၀)ဘျဲၣ်အံၤန့ၣ် လၢတၢ်မူၤ တၢ်ဘှီးဃုၥ်ဒီးတၢ်ဂ့ၢ်အကလုၥ်ကလုၥ်အဃိ ကမျၢၢ်ပိၥ်ခွါတုၤလၢပိၥ်မုၣ်အံၤစၢၢ်သံလီၤကိၥ်မၤသံလီၤသးကဲထီၣ်သးအိၣ်ဝဲ တလီၢ်လီၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ဒဲကဝီၤတၢ်မၤနီၣ်စရီပူၤအသိးန့ၣ် ထဲဒၣ်(၂၀၂၅)လါယနူၤအါရံၤတုၤလါဒံၣ်စ့ဘၢၣ် လၢတနံၣ်အတီၢ်ပူၤ မဲၢ်လးဒဲကဝီၤ အပူၤ သးစၢ်တုၤလၢပှၤဒိၣ်တုၤခိၣ်ပှဲၤစၢၢ်သံလီၤကိၥ်မၤသံလီၤသးကဲထီၣ်ခဲလၢၥ်အိၣ်ဝဲ(၈)ဂၤဒီး ပှၤသ့ၣ်တဖၣ်အံၤပိၥ်မုၣ်မ့ပၣ်ဃုၥ် ဘၣ်ဆၣ် အါဒၣ်တက့ၢ်လၢပိၥ်ခွါလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးမဲၢ်လးဘၣ်ကီဘၣ်ခဲဒဲကဝီၤအံၤပှၤစၢၢ်သံလီၤကိၥ်အမဲၥ်ညါတၢ်ဖီၣ်န့ၢ်ဝဲပှၤသူကသံၣ်မူၤဘှီးဖိဒီးပှၤမၤဆါကသံၣ်မူၤဘှီးဖိကဲထီၣ်ဝဲဒၣ်ခဲအံၤခဲအံၤန့ၣ်လီၤ.
