လါဖ့ၤဘြူၤအါရံၤ ၁၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ တၢ်ကူၣ်လဲၤမၤကၤကျဲမုၢ်လၢပှၤဟးထီၣ်က့ၤလီၤအါဝဲအံၤတဖၣ် ပှၤမၤအီၣ်မုၢ်ကျိၤဝဲၤကွၥ်ဖိတဖၣ်ဟးထီၣ်က့ၤလီၤအခါ စိၥ်ဝဲတၢ်မုၥ်တၢ်ခုၣ်ကီၣ်ကးကရၢ (KNU/KNLA-PC)ကးဟဲအါထီၣ်ဝဲ အဂ့ၢ်န့ၣ် သ့ၣ်ညါဘၣ်လၢ ဟီၣ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
စးထီၣ်ဖဲမၠၣ်ဝတံၣ်ထံဆၢကီၢ်ဆၢကၠါဖၠၣ်တၢ်ဂ့ၢ်အိၣ်ဖျါထီၣ်သးဝံၤလီၢ်ခံန့ၣ် လၢ(သုးက့ ၁)ဟီၣ်ကဝီၤတၢ်လီၢ်လၢအမ့ၢ်ကၠဲးထိၣ်, ဘံလ့,သထူၣ်ဟီၣ်ကဝီၤတၢ်လီၢ်အါတီၤအပူၤ တၢ်ဖီၣ်န့ၢ်ဝဲ(PC)အပှၤလၢစိၥ်ဆှၢကၠါဖၠၣ်ပှၤမၤတၢ်ဖိတကးဒံးဘၣ် ပှၤမၤ အီၣ်မုၢ်ကျိၤ ဝဲၤကွၥ်ဖိလၢအမၤတၢ်တဘၣ်ဘျီးဘၣ်ဒါတဖၣ် သူဝဲ(PC)ကးဟဲအထီၣ်ဝဲအဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါဖ့ၤဘြူအါရံၤ ၂ သီ အနံၤန့ၣ် (KNU/KNLA-PC) သုးဒ့ခိၣ်လၢအိၣ်ဖဲန့ၣ်တဂၤ တၢ်ခးသံအီၤလၢဘံလ့ တီၤစိ(တောင်စွန်း)သဝီအဃၢၤ ကီၣ်ကတဲၣ်(ကော့ကတဲ့) ကျဲဖးဒ့ဒီး အဝဲန့ၣ်တၢ်သ့ၣ်ညါဘၣ်အီၤလၢအဖီၣ်ဆူၣ်သးစၢ် မၢကဲသုး, ဖီၣ်အီၣ်သိလ့ၣ်,စဲးကၢးလၢကမျၢၢ်တဖၣ်အဖီခိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
အဃိဘၣ်ဃး(KNU/KNLA-PC)အပှၤမၤသကိးတၢ်ဒီးပယီၤသုးဒီးတၢ်ဖီၣ်န့ၢ်ပှၤမၤအီၣ်မုၢ်ကျိၤဝဲၤကွၥ်ဖိလၢ အစိၥ်ဝဲကရူၢ်အံၤ အကး တၢ်ဂ့ၢ်သ့ၣ်တဖၣ်အံၤန့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤ န့ၣ်လီၤ.
“ပှၤလၢအစိၥ်(PC)ကးတဖၣ်အံၤအကဲ ပှၤကညီကလုၥ်တမ့ၢ်ဘၣ်,အကဲပယီၤကလုၥ်လီၤ.လၢလၢကါပူၤန့ၣ်အိၣ်(PC)ကး,( PC)ကွဲးန့ၢ်အီၤလံၥ်. ၂၀၂၄ အံၤ ပဖီၣ်န့ၢ် အိၣ်လၢ ၃ ဂၤ ၄ ဂၤလံ. တမ့ၢ်လၢအဒုးတၢ်ဘၣ်ပှၤတဖၣ်အံၤ အမၤမုၢ်ကျိၤဝဲၤကွၥ် လီၤ. မၤတၢ်လၢအဂၤဒုကအိၣ်ဧါသၢၣ်.မၤသကိး တၢ်ဒီးသုးကီၣ်ကးအပၢၤကီၢ်အိၣ်.ဖဲလါဖ့ၤဘြူၤအါရံၤ ၂ သီ ပှၤခးသံအီၤတဂၤန့ၣ်နါက့ အပၣ်ဃုၥ်လၢပှၤဖီၣ်သုးသီအကျါ. မၤဒီး ကသံၣ်မူၤဘှီး.ယဆိမိၣ်ဒုကမ့ၢ်(PC)အတူးလီၤ. ပဖီၣ်န့ၢ်လၢညါတဖၣ်န့ၣ်အိၣ်ဒီး (PC)ကးမူၤနီၢ်လီၤ. ပကွၢ်လၢဖီၣ်စုကဝဲၤ ကဒဲကဒဲအဃိပပျၢ်လီၤက့ၤလၢခံဟဲက့ၤမၤဆိးသးလၢၤတဂ့ၤ. အအံၤတၢ်လီၢ်ဖဲအံၤတဖၣ် န့ၣ်အဝဲသ့ၣ်ဟဲမၤဆိးသးမၢ်မၢ်လီၤ”အဂ့ၢ်န့ၣ် စံးဝဲန့ၣ်လီၤ.
(သုးက့ ၆)ဒီး(သုးက့ ၇)ဟီၣ်ကဝီၤအပူၤ (PC)အပှၤဟူးဂဲၤမ့အိၣ်ဝဲဘၣ်ဆၣ် မ့မ့ၢ်လၢ(သုးက့ ၁) သထူၣ်,ဘံလ့,ကၠဲးထိၣ်ဝ့ၢ် ဟီၣ်ကဝီၤတကပၤန့ၣ်ကရူၢ်အံၤအပှၤလဲၤအိၣ်ဆီလီၤသးတအိၣ်ဝဲဘၣ်သနါက့ပှၤမၤအီၣ်မုၢ်ကျိၤဝဲၤကွၥ်ဖိလၢအစိၥ်ဝဲ(PC)ကးအံၤလ့ၢ်ထီၣ်လိၤ ဝဲအါမးအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်ဝ့ၢ်ပူၤတဖၣ်အအိၣ်န့ၣ်လီၤ.
ဒ်န့ၣ်အသိး ဟီၣ်ကဝီၤဖဲန့ၣ်အပူၤ ပှၤလၢတၢ်မၤသံအီၤဃုၥ်ဒီးပှၤမၤအီၣ်မုၢ်ကျိၤဝဲၤကွၥ်ဖိလၢအစိၥ်(PC)တၢ်ကရၢကရိ အကး တဖၣ်အံၤ ဘၣ်သ့ၣ်သ့ၣ်တအိၣ်ဝဲဒီးကရူၢ်အနီၣ်ဂံၢ်,တၢ်ပနီၣ်ဘၣ် မ့မ့ၢ်တခီကဟံန့ၢ်တၢ်နၢ်ပၢၢ်ဖီၣ်လိၥ်စုဒီးကရူၢ်အပှၤလၢ တၢ်ဖီလၥ်တဖၣ် ဝံၤကမၤလံၣ် အီၣ်လီအီၣ်သ့ဝဲအသိး လၢအတၢ်ဖံးတၢ်မၤဒ်အံၤခိၣ်နၢ်တၢ်ဖီခိၣ်တသ့ၣ်ညါထွဲဘၣ်အဃိ မ့ၢ်ဝဲတၢ်ဂံၢ်စၢ်တခါ အဂ့ၢ်န့ၣ် (KNU/KNLA-PC)ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် စံးစ့ၢ်ကီးဝဲန့ၣ်လီၤ.
“လၢအပူၤကွံၥ်အနံၣ်(၁၀)ဘျဲၣ်န့ၣ်လၢဘံလ့န့ၣ်ပှၤ(PC)အိၣ်တဒူၣ်န့ၣ်အမ့ၢ်လီၤ.ဘၣ်ဆၣ်ပှၤတဖၣ်အံၤစးထီၣ်ဖဲအပူၤကွံၥ်(၃)နံၣ်န့ၣ်ပတထံၣ်အမဲၥ်အနါလၢၤဘၣ်.မ့ၢ်အစၢၤအသွဲၣ်ကသူပ(PC)တၢ်ပနီၣ်ဒုကအိၣ်သ့ၣ်သ့ၣ်လီၤ.ဒ်သိးပှၤမၤကၤတၢ်လ့ၢ်လိၤလ့ၢ်ထီၣ်စိၥ်ဒီး(PC)အကးန့ၣ်ယနၢ်ဟူအိၣ်တဘျီ.အဝဲသ့ၣ်မ့တအိၣ်ဒီးနီၣ်ကစၢ်နီၣ်ဂံၢ်ဘၣ်သနါက့ပှၤတဖၣ်အံၤကဘၣ်မ့ၢ်အဖီၣ်လိၥ်စုဒီးပှၤလၢအိၣ်ဖီလၥ်တဖၣ်လီၤ.တနီၤနီၤခီဒုအိၣ်လၢဘံလ့ကဆဲးကျိးဒီးပပှၤလၢအိၣ်ဒူယီၢ်ဝံၤကမၤလံၣ်မၤလီတၢ်ဒုကအိၣ်လီၤဘၣ်ဆၣ်သနါက့ပတသ့ၣ်ညါထွဲဘၣ်တၢ်ဂ့ၢ်ကီမ့တထီၣ်ဘၣ်န့ၣ်မးပတနၢ်ဟူနီတမံၤဘၣ်.ဘၣ်ဃးတၢ်သူအီၣ်တၢ်ကရၢကရိအမံၤ,အဖံဘၣ်ခိၣ်တၢ်ပနီၣ်မ့ၢ်ဂ့ၤန့ၣ်ယဆိမိၣ်ကအိၣ်သ့ၣ်သ့ၣ်လီၤ.အဝဲန့ၣ်မ့ၢ်ပတၢ်ဂံၢ်စၢ်ဘါစၢ်လီၤမီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ် န့ၣ်လီၤ.
ဘၣ်ဃးတၢ်မၤသံ(PC)အပှၤကဲထီၣ်အံၤတမ့ၢ်အကဲထီၣ် ဖဲအပူၤကွံၥ်နွံအခါတန့ၣ်ဘၣ်မ့မ့ၢ်တခီ သုးဟံန့ၢ်တၢ်စိတၢ်ကမီၤဝံၤလီၢ်ခံ ဖဲအပူၤကွံၥ် ၂၀၂၃ လါအီးကထိ ဘၢၣ်အခါန့ၣ်စ့ၢ်ကီး လၢအ့ၤကဘိၤသဝီတကပၤန့ၣ် တၢ်ခးသံဒံးဝဲ(PC) အပှၤလီၢ်လံၤလၢ အပၥ်ဖှိၣ် မၤသကိးတၢ်ဒီးသုးမီၤစိရိၤ,မၤဆါဝဲ(Without)သိလ့ၣ်,ကသံၣ်မူၤဘှီးတဂၤ ကဲထီၣ်ဒံးဝဲန့ၣ်လီၤ.
(PC)ဖီၣ်စုကဝဲၤကရူၢ်အံၤ အဝဲၤလီၢ်ခိၣ်သ့ၣ်အိၣ်ဝဲလၢဖၣ်အၣ်ကီၢ်ရ့ၣ် ဝ့ၢ်နီၣ်တယၢ် ထိၣ်ကီၤကိဒီး အါဒၣ်တက့ၢ်ကရူၢ်အံၤ အပှၤ ဟူးဂဲၤအိၣ်ဆီလီၤအသးအါလၢဖၣ်အၣ် ဒူယီၢ်, လၢမၠၣ်ဝတံၣ်-ကီးတရံးအ့ရှါကျဲလီၢ်လံၤ, တန့ခၠါကီၢ်ဆၣ်, လူၢ်ပျဲၢ်, တၢ်ြကဲၢ်, ကြုၢ်တုကီၢ်ဆၣ်ဟီၣ်ကဝီၤဒူသဝီတဖၣ်အံၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
၂၀၂၁ သုးဟံန့ၢ်တၢ်စိတၢ်ကမီၤဝံၤလီၢ်ခံ လၢကညီဖီၣ်စုကဝဲၤကရူၢ်ကရၢတၢ်ပၢဟီၣ်ကဝီၤအပူၤတဖၣ်န့ၣ် လီၤဆီဒၣ်တၢ် လၢပှၤလၢအမၤအီၣ်မုၢ်ကျိၤဝဲၤကွၥ်ဖိလၢအတမ့ၢ်တၢ်ကရၢကရိအပှၤစဲၤနီၢ်အံၤတဖၣ် ဖဲအဝဲသ့ၣ်ဟးထီၣ်က့ၤလီၤအခါဒ်သိးတၢ်သမံ သမိးအဝဲသ့ၣ်သုတအိၣ်တဂံၤအဂီၢ်န့ၣ် မၤန့ၢ်ဝဲကးအံၤလၢကရူၢ်ဘၣ်ထွဲပှၤဘၣ်မူဘၣ်ဒါအအိၣ်အိၣ်ဝဲအါမးန့ၣ်လီၤ.
ဒ်န့ၣ်အသိး ပှၤလၢအစိၥ်ဖီၣ်စုကဝဲၤကရူၢ်ကရၢအကးသ့ၣ်တဖၣ်အံၤအကျါတနီၤန့ၣ် ခီဖျိစိၥ်ဆါဝဲကသံၣ်မူၤဘှီး, စိၥ်ဆှၢဝဲသိလ့ၣ် လၢတအိၣ်ဒီးလံၥ်လဲၢ် တကးဒံးဘၣ်စိၥ်ခူသူၣ်ဝဲကၠါဖၠၣ်ပှၤမၤတၢ်ဖိ ဒီး ဖံးတၢ်မၤတၢ်လၢ အတဘၣ်လိၥ်ဖိးမံဒီး တၢ်သိၣ်တၢ်သီ အိၣ်အဃိ လၢကူၣ်လဲၤမၤကၤကျဲအံၤတဆီတၢ်ဖီၣ်ချုးဝဲအိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
