လါဖ့ၤဘြူၤအရံၤ ၁၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ လါဒံၣ်စ့ဘၢၣ်ဒီးလါယနူၤအါရံၤလၢ(၂)လါအတီၢ်ပူၤ ဒုးယၤတၢ်ဖ့ၣ်စၢကဲထီၣ်ဝဲ (၄၁)ဘျီဒီး ဖဲန့ၣ်ပယီၤသုးတကပၤသံဝဲ(၃၃)ဂၤ,ဘၣ်ဒိဘၣ်ထံးဝဲ(၃၃)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တလါတဘျီတၢ်မၤနီၣ် စရီအပူၤန့ၣ်လီၤ.
ဒီးတၢ်ဒုးတၢ်ယၤတၢ်ဖ့ၣ်စၢသ့ၣ်တဖၣ်အံၤကဲထီၣ်ဝဲလၢကၠဲးထိၣ်,ဘံလ့,သထူၣ်,ဖၣ်အၣ်ကီၢ်ဆၣ်ဟီၣ်ကဝီၤအပူၤလၢ ပယီၤသုးဒီး ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၁, သုးရ့ၣ်-၂, သုးရ့ၣ်-၃, ကညီဒီကလုၥ်ဂၢၤသုးကရၢ(KNDO) သုးရ့ၣ်-၂ သ့ၣ်တဖၣ်အံၤဘၢၣ်စၢၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်ခံလါအတီၢ်ပူၤအံၤစ့ၢ်ကီး ပယီၤသုးသံဘၣ်ဒိၣ်ဘၣ်ထံး(၆၆)ဂၤအမဲၥ်ညါ မ့မ့ၢ်လၢဟီၣ်ကဝီၤ(KNLA)တၢ်ပၢၢ်ဆၢ သုးပၥ်ဖှိၣ် တကပၤန့ၣ် ဘၣ်ဟ့ၣ်လီၤကွံၥ်အသးသမူလၢထံကီၢ်ဒီးပှၤကလုၥ်အဂီၢ်(၃)ဂၤစ့ၢ်ကီးအဂ့ၢ်န့ၣ် ကီၢ်ရ့ၣ်တၢ်မၤစရီပူၤအသိး သ့ၣ်ညါ ဘၣ်န့ၣ်လီၤ.
တကးဒံးဘၣ်လၢခံလါအတီၢ်ပူၤအံၤ သုးမီၤစိရိၤအကဘီယူၤလဲၤခးလီၤတၢ်(၂)ဘျီဒီးပယီၤသုးခးလီၤကျိဖးဒိၣ်(၃၆)ဘျီဆူ လီၢ်ကဝီၤ ကမျၢၢ်ဒူသဝီအိၣ်ဆိးလီၢ်,တၢ်ဖံးတၢ်မၤလီၢ်သ့ၣ်တဖၣ်အဃိ ကမျၢၢ်သံဝဲ(၉)ဂၤ,ဘၣ်ဒိ(၁၆)ဂၤဒီး ဟံၣ်တၢ်သူၣ်ထီၣ်(၁၃)ဖျၢၣ်, သီခါဖၠၣ်တၢ်သူၣ်ထီၣ်(၄)ဖျၢၣ်,ကၠိ(၁)ဖျၢၣ်,ဆဲးကၢး(၂)ခိၣ်ဘၣ်ဒိဘၣ်ထံးဟးဂီၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးခီဖျိလၢသုးမီၤစိရိၤအကျိဖးဒိၣ်ဒီးကဘီယူၤအံၤအဃိ ကမျၢၢ်လၢအသံဘၣ်ဒိဘၣ်ထံးသ့ၣ်တဖၣ် အကျါပၣ်ဃုၥ်ဝဲ ဖိဒံဖိသၣ်လၢအသးနံၣ်တပှဲၤဒံးဘၣ်သ့ၣ်တဖၣ်န့ၣ်လီၤ.
လၢန့ၣ်အမဲၥ်ညါစးထီၣ်ဖဲတလါအံၤလါဖ့ၤဘြူၤအါရံၤထီၣ်တုၤလၢခဲအံၤလီၤဆီဒၣ်တၢ်လၢကၠဲးထိၣ်ကီၢ်ဆၣ်တကပၤန့ၣ် ပယီၤသုးကျိၤနုၥ်လီၤဟူးဂဲၤဝဲလၢခရၢၢ်ကရူၢ်,ဝီၢ်က့ကရူၢ်,တကွံပူၤကရူၢ်ဒီးအံလူၢ်ကရူၢ်ဒူသဝီတဖၣ်အံၤအပူၤ အါအါဂီၢ်ဂီၢ် အဖီၣ်ခိၣ် တၢ်ဒုးကဲထီၣ်,ပယီၤသုးခးလီၤစ့ၢ်ကီးကျိဖးဒိၣ်အဃိ ကမျၢၢ်သံဘၣ်ဒိဘၣ်ထံးအိၣ်အသိး ပှၤနီၣ်ဂံၢ်(၁၃၀၀၀)ဃၣ်ဃၣ် ဘၣ်ဃ့ၢ်ထီၣ် ဝဲဒၣ်တုၤလၢခဲအံၤန့ၣ်လီၤ.
တကးဒံးဘၣ်ပယီၤသုးကျိၤတဖၣ်ဖဲအဝဲသ့ၣ်နုၥ်လီၤဟူးဂဲၤလၢကရူၢ်တဖၣ်အံၤဒူသဝီပူၤအကတီၢ်စ့ၢ်ကီးခးသံဝဲကမျၢၢ်,ဖီၣ်က့ၤကိးဝဲကမျၢၢ်အိၣ်အမဲၥ်ညါ ဖဲကမျၢၢ်အိၣ်လၢဟံၣ်တဘူၣ်ဃ့ၢ်ထီၣ်အတကတီၢ်ပယီၤသုးအံၤဟံန့ၢ်ဝဲတၢ်ခွဲးတၢ်ယၥ် နုၥ်လီၤဃုခွံခွးတၢ်လၢ ပှၤဟံၣ်ပူၤဝံၤက့ၤစိၥ်ဟံဝဲကမျၢၢ်အသိလ့ၣ်,ဆဲးကၢးဃုၥ်ဒီးကျိၣ်စ့,တၢ်ဖိတၢ်လံၤလၢအလုၢ်အိၣ်ပှ့ၤအိၣ်သ့ၣ်တဖၣ်အိၣ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
အဃိတကီၢ်ခါခဲအံၤလီၤဆီဒၣ်တၢ်လၢကၠဲးထိၣ်ကီၢ်ဆၣ်ဟီၣ်ကဝီၤအပူၤန့ၣ် တုၤလၢခဲအံၤတၢ်ဖ့ၣ်စၢဆဲးကဲထီၣ်ဒံးဝဲလၢ ပယီၤသုး လၢအနုၥ်လီၤဟူးဂဲၤတဖၣ်အံၤဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၃ သုးပၥ်ဖှိၣ်သ့ၣ်တဖၣ်အံၤ အဘၢၣ်စၢၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
