လါမးရှး ၂၈ သီ, ၂၀၂၆ နံၣ်, ခ့ၣ်အဲးစံၣ်
ဖဲမဟါလါမးရှး ၂၇ သီ ကီၢ်ပယီၤအသုးမုၢ်ဒိၣ်မုၢ်နံၤ မုၢ်နၤခီအဆၢကတီၢ်န့ၣ် တၢ်ဒုးကဲထီၣ်တအိၣ်ကဘီယူၤလဲၤတ့ၢ်လီၤ ပီၣ်(၅၀၀) မ့ၣ်ပိၣ်လၢ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒ့ၣ်ဘူးနိၣ်တၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ့ၣ်ပူၤနိၣ်တၢ်လီၢ်လၢအပူၤကွံၥ်သုးမီၤစိရိၤ(Jet fighter)ကဘီယူၤလဲၤတ့ၢ်လီၤမ့ၣ်ပိၢ်တလီၢ်လီၢ်အံၤန့ၣ် ဖဲမဟါကဘၣ် ဖဲမုၢ် နၤခီ ၁၁း၀၀ နၣ်ရံၣ် ဘျဲၢ်အဆၢကတီၢ်န့ၣ် တၢ်လဲၤတ့ၢ်လီၤဝဲပီၣ်(၅၀၀)မ့ၣ်ပိၢ် ၂ ဖျၢၣ်လီၤတဲၥ်ပိၢ်ဖးထီၣ်ဝဲလၢ ဒ့ၣ်ဘူးနိၣ် တီၤထီကၠိ ဆၢခိၣ်တကပၤ န့ၣ်လီၤ.
ဘၣ်ဃးတၢ်ဂ့ၢ်အံၤ(သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲလၢ“ဖဲမနၤ ၂၇ သီ ပယီၤအသုးမုၢ်ဒိၣ်အမုၢ်နံၤ မုၢ်နၤခီ ၁၁း၁၀ သုးမီၤစရိၤအ(Jet fighter)ကဘီယူၤဟဲခးလီၤကဒီးတၢ်ဖဲဒ့ၣ်ဘူးနိၣ်တီၤထီကၠိဆၢခိၣ်ကျဲမုၢ်ဂီၤထံးဖဲန့ၣ်. တ့ၢ်လီၤဝဲပီၣ်(၅၀၀) ၂ ဖျၢၣ်. ဘၣ်ဒိဘၣ်ထံးပှၤကညီဒုတအိၣ်ဘၣ်.အိၣ်ဒၣ်ဘၣ်ဟးဂီၤဝဲဂၢၤ,ပှၤသူၣ်အီၣ်ဖျးအီၣ်တၢ်လီၢ်ဒ်န့ၣ်လီၤ” အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤန့ၣ်လီၤ.
ဒ်န့ၣ်အသိးတချုးတၢ်ကဲထီၣ်သးအံၤဒံးဘၣ်ဖဲလါမးရှး ၂၆ သီဟါခီ စးထီၣ် ၈း၀၀ ဘျဲၣ်အခါန့ၣ်စ့ၢ်ကီး လၢဒွဲၣ်လိကီၢ်ဆၣ် လ့ဖိထၣ် ကရူၢ် တၢ်လီၢ်(၃)တီၢ်ပူၤ သုးမီၤစိရိၤကဘီယူၤ လဲၤတ့ၢ်လီၤမ့ၣ်ပိၢ်အဒိၣ်အဆံးအဖျၢၣ်(၅၀)အဃိ ကမျၢၢ်ဒီဖိမိၢ်ဘၣ်ဒိဘၣ်ထံးဝဲ နးနး(၂)ဂၤ အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးစ့ၢ်ကီးဝဲန့ၣ်လီၤ.
“ဖဲ ၂၆ သီန့ၣ်ကဘီယူၤဟဲခးလီၤတၢ်လၢလ့ဖိထၣ်ကရူၢ် တရီပူၤ,မဲးကၠံၣ်ခံ,ဝၣ်သိခိၣ်သဝီတၢ်လီၢ်(၃)တီၤ.စးထီၣ်ခးလီၤဝဲလၢဟါခီ ၈း၁၀ မံးနံးတုၤဃီၤဝဲလၢ ၈း၄၀ ခးဝ့ၤခးဝီၤတၢ်ဖဲန့ၣ်တံၥ်တၥ်အမံးနံး ၃၀ . ဘၣ်ဟးဂီၤပှၤဟံၣ်တဘျုးဖျၢၣ်ညါ. ဘၣ်ဒိဃုၥ်ဒီး တရီပူၤ သဝီဖိ(၂)ဂၤ,ပှၤ(၂)ဂၤအံၤအဒီဖိမိၢ်လီၤ.မ့မ့ၢ်သဝီလၢအဂၤခံဖျၢၣ်န့ၣ်အိၣ်ဒၣ်ဟးဂီၤဟံၣ်ဃီတဖၣ်လီၤ”အဂ့ၢ်န့ၣ် စံးဝဲန့ၣ် လီၤ.
ဒွဲၣ်လိကီၢ်ဆၣ်လၢသုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ် ၂၆ သီအနံၤအံၤန့ၣ်ထဲဒၣ်တလါအံၤလါမးရှးအတီၢ်ပူၤ တၢ်လဲၤတ့ၢ်လီၤဝဲမ့ၣ်ပိၢ် အိၣ်လံဝဲတစှၤန့ၢ်(၃)ဘျီလံဒီး ဒ်န့ၣ်အသိးလၢမ့ၣ်ပိၢ်အံၤအဃိ စ့ၢ်ကီးလီၢ်ကဝီၤကမျၢၢ်သံဘၣ်ဒိဘၣ်ထံး အသိး တၢ်သူၣ်ထီၣ်စ့ၢ်ကီးဟးဂီၤကဲထီၣ်ဒံးဝဲန့ၣ်လီၤ.
ဒ်န့ၣ်အသိးဒ့ၣ်ဘူးနိၣ်လၢကဘီယူၤလဲၤခးလီၤတၢ်ဖဲမဟါအံၤစ့ၢ်ကီးစးထီၣ်လၢ(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် ဟီၣ်ကဝီၤတၢ်လီၢ်လၢဘၣ်ကွၢ်ဆၢၣ်မဲၥ်ဝဲကလံၤကျါတၢ်လီၤဘၣ်ယိၣ်ဒီးကဘီယူၤလဲၤခးလီၤတၢ်ခဲအံၤခဲအံၤအံၤအကျါတၢ်လီၢ်အံၤပၣ်ဃုၥ်ဝဲန့ၣ်လီၤ.
သုးမီၤစိရိၤအံၤစးထီၣ်လၢအဝဲသ့ၣ်မၤတၢ်ဃုထၢအကူၥ်-၃ ဝံၤလီၢ်ခံန့ၣ်လီၤဆီဒၣ်တၢ်(သုးက့ ၃),(သုးက့ ၄)ဒီး(သုးက့ ၅)ဟီၣ်ကဝီၤ အပူၤတၢ်ဒုးကဲထီၣ်တအိၣ်ဘၣ်ဆၣ်သုးမီၤစိရိၤအံၤသူဝဲကျိဖးဒိၣ်,ကဘီယူၤလဲၤခးတၢ်လၢလီၢ်ကဝီၤကမျၢၢ်အိၣ်ဆိးတၢ်ဖံးအီၣ်မၤအီၣ်လီၢ် ဟဲအါထီၣ်ဝဲဖျိဖျိဖျါဖျါအဂ့ၢ်န့ၣ် သ့ၣ်ညါဘၣ်န့ၣ်လီၤ.
