လါမးရှး ၂၈ သီ, ၂၀၂၆ နံၣ်, ခ့ၣ်အဲးစံၣ်
ဒ်သိးမ့ၣ်အူအီၣ်တၢ်သုတကဲထီၣ်လၢၤတဂ့ၤအဂီၢ် ကမျၢၢ်လၢအိၣ်ဒဲကဝီၤအပူၤတဖၣ်ခဲလၢၥ်ကပလီၢ်သးလၢမ့ၣ်အူဖၣ်ဆါတၢ်လီၤ ဘၣ်ယိၣ်အဂ့ၢ်န့ၣ် ဒဲကဝီၤပှၤဘၣ်မူဘၣ်ဒါဆီၣ်တခူထီၣ်ဝဲပှၤဒဲကဝီၤဖိသ့ၣ်တဖၣ်န့ၣ်လီၤ.
ဖဲတနံၤအံၤလါမးရှး ၂၈ သီ ဂီၤခီအဆၢကတီၢ်န့ၣ် မ့ၣ်အူအီၣ်တၢ်ကဲထီၣ်ကဒီးဝဲလၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဘးဘၣ် ကီဘၣ်ခဲဒဲကဝီၤ Zone-C C1b ကဝီၤဒ့ပူၤအဃိ ဟံၣ်ဟးဂီၤလီၤကရဲကွံၥ်ဝဲ(၇)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤဂီၤခီ ၁၀း၀၀ ဃၣ်ဃၣ်အဆၢကတီၢ်န့ၣ် မ့ၣ်အူစးထီၣ်အီၣ်ဝဲဒၣ်လၢဟံၣ်နီၣ်ဂံၢ်(၂၀၅)တဖျၢၣ်အံၤအဃိ ဖဲန့ၣ်တဆီမ့ၣ်အူဘၣ်ဂၥ်အူအီၣ်ကဒီးဝဲဟံၣ်လၢအဂၤ(၇)ဖျၢၣ်လၢန့ၣ်အမဲၥ်ညါဒ်သိးဟံၣ်အူအီၣ်သုတအါထီၣ် တဂ့ၤအဂီၢ် ဟံၣ်လၢအဂၤ(၂)ဖျၢၣ်စ့ၢ်ကီးဘၣ်တၢ်ရိၢ်လီၤဆိဃၥ်ဝဲအဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
“တၢ်ဂ့ၢ်တၢ်ကျိၤန့ၣ်ဟဲကဲထီၣ်သးလၢမ့ၣ်အူစးထီၣ်အိၣ်ဝဲလၢဟံၣ်နီၣ်ဂံၢ်(၂၀၅)တဖျၢၣ်န့ၣ်.အဝဲသ့ၣ်ဟံၣ်ဖိဃီဖိန့ၣ်ဘၣ်လၢဟးတၢ် ချၢတအိၣ်လၢဟံၣ်ဘၣ်.ပသံကွၢ်န့ၣ်ဟံၣ်တဖျၢၣ်န့ၣ်အါဒၣ်တက့ၢ်ဖီအီၣ်တၢ်လၢသ့ၣ်မုၣ်လီၤ.မ့မ့ၢ်လၢဟံၣ်(၇)ဖျၢၣ်န့ၣ်အူအီၣ်ခဲလၢၥ် လီၤ.ကယဲၢ်မ့ၢ်တၢ်ဖိတၢ်လံၤတၢ်အီၣ်တၢ်အီန့ၣ်ပၣ်ဃုၥ်ခဲလၢၥ်န့ၣ်.မ့မ့ၢ်ဟံၣ်လၢအဝဲခံဖျၢၣ်န့ၣ်အိၣ်ဒၣ်ပှၤဃိလီၤဆိအီၤလီၤဘၣ်မနုၤအဃိလဲၣ်နမ့တဃိလီၤဘၣ်န့ၣ်ကအူအီၣ်ပၣ်ဃုၥ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်ဒဲကဝီၤပှၤဘၣ်မူဘၣ်ဒါစံးဝဲအသိးန့ၣ် ဟံၣ်လၢမ့ၣ်အူအီၣ်(၇)ဖျၢၣ်အံၤဒီးဟံၣ်လၢဘၣ်တၢ်ရိၢ်လီၤအီၤ(၂)ဖျၢၣ်သ့ၣ်တဖၣ်န့ၣ်မ့ၢ်ဝဲ ဟံၣ်နီၣ်ဂံၢ်(၄၃၂),(၄၃၅),(၄၃၆),(၄၃၈),(၄၄၃), ၄၄၀),(၄၃၇),(၃၃၁),(၂၀၅)ဒီးဟံၣ်နီၣ်ဂံၢ်(၃၈၅)သ့ၣ်တဖၣ်အံၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
တကီၢ်ခါခဲအံၤဟံၣ်လၢမ့ၣ်အူအီၣ်ဝဲသ့ၣ်တဖၣ်အံၤခီဖျိဟံၣ်ဃီပူၤတၢ်ဖိတၢ်လံၤပၣ်ဃုၥ်ခဲလၢၥ်အဃိ အဝဲသ့ၣ်အံၤလၢကအီၣ် ကအီဒီးကသူၣ်ထီၣ်က့ၤဝဲဟံၣ်လၢအသီအဂီၢ် ဒဲကဝီၤပှၤဘၣ်မူဘၣ်ဒါတဲသကိးတၢ်ဒီး(TBC) လၢကဆီၣ်ထွဲမၤစၢၤတၢ်လၢအလိၣ်ဝဲ သ့ၣ်တဖၣ်အဂ့ၢ်န့ၣ် ဒဲကဝီၤပှၤဘၣ်မူဘၣ်ဒါစံးဝဲန့ၣ်လီၤ.
ဒ်န့ၣ်အသိးဘၣ်ဃးမ့ၣ်အူအီၣ်တၢ်အံၤဖဲအပူၤကွံၥ်လါဖ့ၤဘြူၤအါရံၤ ၁၄ သီ အခါစ့ၢ်ကီး လၢ Zone-B B3A ကဝီဒ့အပူၤ မ့ၣ်အူ အီၣ်ကဲထီၣ်ဒံးဝဲဒီး ဟံၣ်ဟးဂီၤဒံးဝဲ(၂)ဖျၢၣ်ကဲထီၣ်ဒံးဝဲန့ၣ်လီၤ.
လၢတၢ်န့ၣ်အဃိကမျၢၢ်လၢအိၣ်ဒဲကဝီၤပူၤကိးဂၤဒဲးဒ်သိးတၢ်သ့ၣ်တဖၣ်အံၤသုတအိၣ်ထီၣ်လၢၤတဂ့ၤအဂီၢ်န့ၣ် ခါဆူမဲၥ်ညါကပလီၢ် ကပၥ်သူၣ်ပၥ်သးဘၣ်လၢမ့ၣ်အူဖၣ်ဆၣ်တၢ်လီၤဘၣ်ယိၣ်အဂ့ၢ်န့ၣ် ဒဲကဝီၤခိၣ် စီၤဆါဒ့ ဆီၣ်တခူထီၣ်ဝဲ ပှၤဒဲကဝီၤဖိတဖၣ်န့ၣ်လီၤ.
“ပမ့ကွၢ်ကဒါလၢပဒဲကဝီၤပူၤအံၤမ့ၣ်အူအီၣ်တၢ်ကိးမုၢ်နံၣ်ဒဲးဃၣ်ဃၣ်လီၤ.တချုးတၢ်ကိၢ်ထီၣ်န့ၣ်ကဝီၤဒ့ပှၤဘၣ်မူဘၣ်ဒါတဲလီၤ ဒုးသ့ၣ်ညါပှၤကမျၢၢ်အိၣ်,တကးဒံးဘၣ်လၢတၢ်ဘိးဘၣ်သ့ၣ်ညါစ့ၢ်ကီးပှၤတဲလီၤအိၣ်လီၤ.ဘၣ်ဆၣ်တၢ်ဂ့ၢ်ကီန့ၣ်အဝဲသ့ၣ်မ့ဟးန့ၣ်တအိၣ်ခိးတ့ၢ်ဟံၣ်နီတဂၤဘၣ်.အဃိအဲၣ်ဒိးတဲကမျၢၢ်လၢကပၥ်သူၣ်ပၥ်သးလၢမ့ၣ်အူဖၣ်ဆါမီၤနီၤ.ဘၣ်မနုၤအဃိလဲၣ်မ့အူမ့အီၣ်ထီၣ်န့ၣ်တၢ်အိၣ်မူတဖၣ်ဘၣ်က့ၤစးထီၣ်ကဒါလၢအခီၣ်ထံးလီၤ.”အဂ့ၢ်န့ၣ် စံးဝဲန့ၣ်လီၤ.
ဘၣ်ကီဘၣ်ခဲဒဲကဝီၤတဖၣ်အကျါလီၤဆီဒၣ်တၢ်မဲၢ်လးဒဲကဝီၤအံၤ ကိးမုၢ်နံၣ်ဒဲးမ့တုၤဃီၤလၢတၢ်ကိၢ်ခါအဆၢကတီၢ်န့ၣ် မ့ၣ်အူ အီၣ် တၢ်ကိးမုၢ်နံၤဒဲးဒီး ဒ်န့ၣ်အသိးလၢတၢ်ဒီသဒၢဆိဃၥ်မ့ၣ်အူအီၣ်တၢ်အံၤအဂီၢ်စ့ၢ်ကီးတၢ်ဒုးသ့ၣ်ညါလီၤဝဲပှၤဒဲကဝီၤဖိလၢ တၢ်ဒုးသ့ၣ်ညါပူၤတဆီအိၣ်ဝဲဒၣ်န့ၣ်လီၤ.
