လါအ့ဖြ့ၣ် ၅ သီ, ၂၀၂၆ နံၣ်, ခ့ၣ်အဲးစံၣ်
ထံၣ်ညၣ်လံၣ်သဝီလၢအိၣ်ဘူးဝဲဒီးဂီၤလ့ၤဒုးယၤသုးကလၢၤအံၤ ခီဖျိသုးမီၤစိရိၤကဘီယူၤဟဲတ့ၢ်လီၤကဒီးမ့ၣ်ပိၢ်အဃိ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်ဒိၣ်စိ စီၤလါပှဲၤအဟံၣ်လီၤပှီၢ် ဟးဂီၤဝဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲမဟါလါအ့ဖြ့ၣ် ၄ သီ ဂီၤခီကဘၣ်ဖဲ ၄း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် ကဘီယူၤဟဲတ့ၢ်လီၤကဒီးမ့ၣ်ပိၢ်တဘျုးဖျၢၣ်လၢ မီခံကရူၢ် ထံညၣ်လံၣ်သဝီအပူၤန့ၣ်လီၤ.
ကဘီယူၤဟဲတ့ၢ်လီၤတၢ်ဘျီဝဲအံၤအကျါတဖျၢၣ်န့ၣ်လီၤတဲၥ်ပိၢ်ဖးထီၣ်ဝဲလၢ(DKBA)သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်ဒိၣ်စိ စီၤလါပှဲၤ(ကိး)နခါမွ့ အဟံၣ်ခိၣ်အဃိ ဖဲန့ၣ်အဟံၣ်လီၤပှီၢ်ဟးဂီၤလီၤကရဲကွံၥ်ဝဲတဝၥ်အဂ့ၢ်န့ၣ် လီၢ်ကဝီၤကမျၢၢ်လၢထံၣ်တၢ်ကဲ ထီၣ်သး ဒီးအမဲၥ်အံၤ စံးဝဲန့ၣ်လီၤ.
အဝဲစံးဝဲလၢ“ဖဲထံညၣ်လံၣ်သဝီန့ၣ်လီၤ,ဟံၣ်တဖျၢၣ်န့ၣ်အကဲထီၣ်ဖုနခါမွ့အဟံၣ်မီၤနီၤ.အဟးဂူၥ်ဟးဂီၤန့ၣ်အိၣ်ဒၣ်ဟံၣ်တဖျၢၣ်လီၤ.အကဲထီၣ်ဖဲသီခါဖၠၣ်မ့ၣ်အူအီၣ်ဝံၤလၢခံတနံၤဂီၤခီန့ၣ်ကဘီၤယူၤဟဲခးလီၤကဒီးဝဲအဃိဘၣ်ဝဲဖဲန့ၣ်.ဖုနခါမွ့အဟံၣ်န့ၣ်ဖးဒိၣ်တဖျၢၣ်ညါနီၤ.တၢ်န့ၣ်အဘၣ်တကုၥ်လီၤ,ဘၣ်ဖဲအမဲၥ်ညါဒံးလီၤတၢ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဂီၤအံၤ န့ၣ်လီၤ.
ကဘီယူၤဟဲခးလီၤတၢ်အံၤဟံၣ်တၢ်သူၣ်ထီၣ်ဃုၥ်ဒီးတၢ်ထူၣ်တၢ်ဘိမ့ၢ်ဘၣ်ဒိဘၣ်ထံးဟးဂီၤဝဲဘၣ်ဆၣ် ခီဖျိဟံၣ်ပူၤပှၤတအိၣ်နီတ ဂၤဘၣ်စးထီၣ်လၢတၢ်ဒုးကဲထီၣ်လံအဃိ ပှၤကညီတၢ်သံတၢ်ဘၣ်ဒိဘၣ်ထံးတအိၣ်ဝဲဘၣ်အဂ့ၢ်န့ၣ် လီၢ်ကဝီၤကမျၢၢ်တဂၤဃီ ဝဲန့ၣ်စံးအါထီၣ်ဝဲန့ၣ်လီၤ.
တချုးကဘီယူၤလဲၤခးလီၤတၢ်သုးခိၣ်နါမွ့အဟံၣ်လီၤပှီၢ်ဟးဂီၤကဲထီၣ်ဒံးဘၣ်ဖဲလါအ့ဖြ့ၣ် ၃ သီ ဟါခီ ၆း၀၀ နၣ်ရံၣ်ဃၣ်ဃၣ် အဆၢကတီၢ်န့ၣ်စ့ၢ်ကီး ခီဖျိလၢကဘီယူၤအံၤအဃိ ထံညၣ်လံၣ်သီခါဖၠၣ်လၢအိၣ်သဝီချၢအံၤအူအီၣ်ဟးဂီၤဝဲဒီတဖျၢၣ်ကဲထီၣ်ဒံး ဝဲန့ၣ်လီၤ.
စးထီၣ်ဖဲလါမးရှးလၢၥ် ၃၁ သီအနံၤန့ၣ်ဂီၤလ့ၤပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံကီၢ်ဆၣ်အပူၤအံၤ လၢကမၤဖျိးကွံၥ်ဝဲသုးကလၢၤအံၤအဂီၢ် ဟီၣ်ကဝီၤကညီဒီကလုၥ်တၢ်ထူၣ် ဖျဲးသုးမုၢ်ဒိၣ်(KNL) သုးပၥ်ဖှိၣ်လဲၤထီၣ်ခးဝဲသုးကလၢၤအံၤန့ၣ်လီၤ.
ဒီးစးထီၣ်ဖဲလၢတၢ်လဲၤထီၣ်ခးဝဲပယီၤသုးကလၢၤတုၤလၢတနံၤအံၤလါအ့ဖြ့ၣ် ၅ သီမုၢ်ဃ့ၢ်လီၤတစုန့ၣ် ကဘီၤယူၤဟဲခးလီၤတၢ်လၢ သုးကလၢၤအခိၣ်အဃၢၤကိးမုၢ်နံၤဒဲးအသိး လၢကဘီယူၤအံၤတဆီဟဲတ့ၢ်လီၤန့ၢ် ဝဲတၢ်ဘိၣ်သ့ၣ်တဖၣ်လၢသုးကလၢၤပူၤ အိၣ်စ့ၢ်ကီးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးခီဖျိလၢကဘီယူၤ,ဒြိအံၤအဃိစ့ၢ်ကီးလၢတၢ်ဒုးကဲထီၣ်(၅)သီအတီၢ်ပူၤအံၤကမျၢၢ်ဘၣ်ဒိတစှၤန့ၢ်(၅)ဂၤလံအသိး ဟံၣ်ဃုၥ်ဒီးသီခါဖၠၣ်တၢ်သူၣ်ထီၣ်ဟးဂီၤဝဲဒၣ်အါမးအမဲၥ်ညါလီၢ်ကဝီၤကမျၢၢ်လၢဃ့ၢ်ထီၣ်တဖၣ်စ့ၢ်ကီးတုၤလၢခဲအံၤလဲၤစံၣ်ထီၣ်အိၣ်ဝဲလၢယိၤကီၢ်တကပၤအိၣ်အသိးတနီၤန့ၣ်အိၣ်ဒံးဝဲလၢန့ၣ်တကပၤတၢ်ဘံၣ်တၢ်ဘၢလီၢ်အဖၢမုၢ်ဒံးန့ၣ်လီၤ.
