ဂီၤလ့ၤသုးကလၢၤသုတလီၤတဂ့ၤအဂီၢ် သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်တပယူၥ်ဃီလၢသုးကလၢၤအခိၣ်အဃၢၤ

လါအ့ဖြ့ၣ် ၆ သီ, ၂၀၂၆ နံၣ်, ခ့ၣ်အဲးစံၣ်

ဂီၤလ့ၤဒုးယၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ရၤမတံကီၢ်ဆၣ် ပူၤအံၤသုတလီၤတဂ့ၤအဂီၢ် သုးမီၤစိရိၤကဘီယူၤဟဲတ့ၢ်လီၤဝဲမ့ၣ်ပိၢ်တပယူၥ်ဃီလၢသုးကလၢၤအခိၣ်အဃၢၤအဂ့ၢ်န့ၣ် သ့ၣ်ညါဘၣ် န့ၣ်လီၤ.

စးထီၣ်ဖဲလါမးရှး ၃၁ သီအနံၤန့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် လဲၤထီၣ်ခးဝဲဂီၤလ့ၤ ဒုးယၤ သုးကလၢၤ အံၤဒီး သုးမီၤစိရိၤအံၤဒ်သိးသုးကလၢၤသုတလီၤတဂ့ၤအဂီၢ် ခးလီၤဝဲကျိဖးဒိၣ်,ဒြိအမဲၥ်ညါသူဝဲ(jet fighter), (Y-12), (Y-8)ကဘီယူၤဟဲတ့ၢ်လီၤဝဲ မ့ၣ်ပိၢ် တပယူၥ်ဃီ လၢသုးကလၢၤအခိၣ်အဃၢၤအိၣ်ဝဲကိးမုၢ်နံၤဒဲးအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.

တကးဒံးဘၣ်ဖဲတနံၤလါအ့ဖြ့ၣ် ၆ သီ ဂီၤခီ ၁၀း၀၀ ခိၣ်ဃၢၤအဆၢကတီၢ်စ့ၢ်ကီး သုးမီၤစိရိၤအ(jet fighter) ကဘီယူၤဟဲတ့ၢ်လီၤ ခးလီၤကဒီးတၢ်(၃)ဘျီ အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဖဲန့ၣ်တဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ

“ဖဲတဂီၤအံၤ ၁၀း၀၀ ခိၣ်ဃၢၤအခါန့ၣ်ကဘီယူၤ(jet fighter)တဘ့ၣ် ဟဲခးလီၤတၢ်(၃)ဘျီ.အဝဲသ့ၣ်ဟဲခးလီၤတၢ်,ဟဲတ့ၢ်လီၤ တၢ်ဘိၣ်အိၣ်ကိးမုၢ်နံၤဒဲးလီၤ. .အဝဲသ့ၣ်န့ၣ်တၢ်ကီတၢ်ခဲအိၣ်ဒီးအဝဲသ့ၣ်လၢထံမီၤ.ပနၢ်ဟူလၢပှၤဟဲတၢၤလီၤတၢ်ဘိၣ်တဖၣ်န့ၣ်ပၣ်ဒီးထံ, ယ့ၤခဲကိၣ်လိၣ် တဖၣ်မီၤ.တၢ်ဖိတၢ်လံၤလၢအဂၤဒုကပၣ်တနီၤဧါသၢၣ်ပဒွးတဘၣ်ခဲလၢၥ်ဘၣ်.”အဂ့ၢ်န့ၣ် စံးဝဲန့ၣ်လီၤ.

ဂီၤလ့ၤသုးကလၢၤလၢဟီၣ်ကဝီၤ(KNLA)သုးပၥ်ဖှိၣ်လဲၤထီၣ်ကဝီၤခးဝဲအံၤ ဒီးတနံၤအံၤတၢ်ဆၢကတီၢ်ထီၣ်ဘးဝဲလၢတနွံလံန့ၣ်လီၤ. ဒ်န့ၣ်အသိးတၢ်ဘိၣ်ဘၢ ကဘီယူၤဟဲတ့ၢ်လီၤဝဲတဖၣ်အကျါတနီၤန့ၣ်ထံအီအမဲၥ်ညါပၣ်ဃုၥ်ဝဲတၢ်အီၣ်တၢ်အီအဂ့ၢ်န့ၣ် ဂံၢ်ခီၣ်ထံး ပှၤဟ့ၣ်တၢ်ကစီၣ် ဖိဝဲအိၣ်န့ၣ်လီၤ.

ဘၣ်ဃးတၢ်ဂ့ၢ်အံၤ ဟီၣ်ကဝီၤ(KNLA)ပှၤဘၣ်မူဘၣ်ဒါလၢအိၣ်ဟီၣ်ကဝီၤပူၤဖဲန့ၣ်တဂၤ စံးဝဲလၢ “ဟဲတၢၤလီၤတၢ်အကျါပၣ်ဃုၥ်ဒီး ထံနိဒုကမ့ၢ်လီၤ.ပသ့ၣ်ညါဘၣ်န့ၣ်တဘျီတခီၣ်ဟဲတၢၤလီၤန့ၢ်ဝဲမ့ၤဘိၣ်.ထံခီန့ၣ်အဝဲသ့ၣ်ဘၣ်လဲၤလီၤဒၢၣ်ဝဲလၢတၢ်ဖီလၥ်မီၤ.လၢတၢ်ခီၣ်ထံးပှၤအိၣ်ခိးဝးဝးအဃိထံနိဒုလၢအဝဲသ့ၣ်အဂီၢ်တညီလၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

တကီၢ်ခါတုၤလၢတနံၤအံၤလါအ့ဖြ့ၣ် ၆ သီအံၤ လၢကထီၣ်မၤဆှဲကွံၥ်သုးကလၢၤအံၤအဂီၢ်န့ၣ် တၢ်ပၢၢ်ဆၢသုးပၥ်ဖှိၣ်ကရူၢ်တဖၣ် ဂုၥ်ကျဲးစၢးသူဝဲဒြိ,ကျိဖးဒိၣ်အသိး လၢပယီၤသုးတကပၤစ့ၢ်ကီးသုးကလၢၤသုတလီၤတဂ့ၤအဂီၢ် ဒြိ,ကျိဖးဒိၣ်အမဲၥ်ညါ လၢကဘီယူၤအံၤ ဆီဟဲခးစၢၤလီၤဝဲတၢ်လၢသုးကလၢၤအခိၣ်အဃၢၤအဆၢတတဲၥ်ဝဲဘၣ်န့ၣ်လီၤ.

တကးဒံးဘၣ်လၢတၢ်ဒုးဒီးတနွံအတီၢ်ပူၤအံၤစ့ၢ်ကီး ပယီၤသုးတကပၤသံဘၣ်ဒိဘၣ်ထံးအိၣ်ဝဲအသိး ခီဖျိလၢကဘီယူၤအံၤအဃိ တၢ်ပၢၢ်ဆၢသုးပၥ်ဖှိၣ်ကရူၢ်တကပၤစ့ၢ်ကီး တၢ်ဘၣ်ဒိဘၣ်ထံးအိၣ်ဝဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲအသိးသ့ၣ်ညါဘၣ် န့ၣ်လီၤ.