လါအ့ဖြ့ၣ် ၁၁ သီ, ၂၀၂၆ နံၣ်, ခ့ၣ်အဲးစံၣ်
ပၥ်ဂၢၢ်ပၥ်ကျၢၤဝဲ“တၢ်ပၢၢ်ဆၢကတီၢ်ကီၢ်သူလ့ၤလံၥ်ဃံးဃၥ်” ပတြီၥ်လံဒီးဒုးအိၣ်ထီၣ်ဃုၥ်ဝဲကီၢ်သူလ့ၤတၢ်ကူၣ်လိၥ်ကီၣ်ကး-KCC ဒီး ကီၢ်သလ့ၤတၢ်ပၢတၢ်ပြးကီၣ်ကး(KGC)ဝံၤလံအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ထုးထီၣ်ဒုးသ့ၣ်ညါဘိးဘၣ်ရၤလီၤ ဝဲဖဲတနံၤအံၤ လါအ့ဖြ့ၣ် ၁၀ သီအံၤန့ၣ်လီၤ.
တချုးတၢ်ပၥ်ဂၢၢ်ပၥ်ကျၢၤဟဲအိၣ်ထီၣ်ဒံးဘၣ် ဖဲအပူၤကွံၥ်လါမးရှး ၃၁ သီတုၤလါအ့ဖြ့ၣ် ၂ သီ လၢသၢသီအတီၢ်ပူၤ ခ့ၣ်အဲၣ်ယူၣ် တီခိၣ်ရိၣ်မဲ မၤဝဲကီၢ်သူလ့ၤဖဲၣ်ဒရၢၣ်ယူးနံးတၢ်တၢၣ်ပီၣ်တဲသကိးတၢ်အိၣ်ဖှိၣ်တခါဒီး လၢတၢ်အိၣ်ဖှိၣ်ဘျီဝဲအံၤအပူၤ “တၢ်ပၢၢ်ဆၢ ကတီၢ် ကီၢ်သူလ့ၤလံၥ်ဃံးဃၥ်ပတြီၥ်”လၢတၢ်ကတဲၤကတီၤဃၥ်အီၤန့ၢ်ဝဲ(၂)နံၣ်ဃၣ်ဃၣ်အံၤ ဘၣ်တၢ်ပၥ်ဂၢၢ်ပၥ်ကျၢၤဝဲလံန့ၣ်လီၤ.
လၢတၢ်အိၣ်ဖှိၣ်အံၤအပူၤခ့ၣ်အဲၣ်ယူၣ်ပၥ်ဂၢၢ်ပၥ်ကျၢၤဝဲ“တၢ်ပၢၢ်ဆၢကတီၢ်ကီၢ်သူလ့ၤလံၥ်ဃံးဃၥ်”အမဲၥ်ညါလၢခါဆူမဲၥ်ညါ တၢ်ဖံးတၢ်မၤ အဂံၢ်ကဆူၣ်ထီၣ်အဂီၢ်န့ၣ်ဒုးအိၣ်ထီၣ်ဃုၥ်ဝဲကီၢ်သူလ့ၤတၢ်ကူၣ်လိၥ်ကီၣ်ကး-KCC ဒီး ကီၢ်သလ့ၤတၢ်ပၢတၢ်ပြးကီၣ်ကး(KGC)ကရူၢ် (၂)ဒူၣ်အံၤဃုၥ်ဒီးပှၤလၢကဟံမူဒါလၢတၢ်ဖံးတၢ်မၤအံၤအပူၤတဖၣ်တၢ်ဃုထၢထီၣ်ဃုၥ်ဝဲန့ၣ်လီၤ.
ဒီးကီၢ်သူလ့ၤတၢ်ကူၣ်လိၥ်ကီၣ်ကး(KCC)ကရူၢ်အံၤ ဒ်သိးဟီၣ်ကဝီၤဘၣ်ထွဲတဖၣ်ကပၣ်ဃုၥ်မၤသကိးတၢ်လၢတၢ်သူၣ်ထီၣ် ကီၢ်သူလ့ၤ ဖဲၣ်ဒရၢၣ်ယူးနံးပူၤအဂံၢ်ကဆူၣ်ထီၣ်အဂီၢ် မူဒါအိၣ်လၢအကဘၣ်တီခိၣ်ရိၣ်မဲဟံစုနဲၣ်ကျဲ,ဟ့ၣ်ကူၣ်ဟ့ၣ်ဖးဝဲအသိး, ခ့ၣ်အဲၣ်ယူၣ် ဝဲၤကျိၤ (၁၂)ဘိအကျါ(၇)ဘိပူၤတၢ်ပၢတၢ်ပြးအဂံၢ်ကဆူၣ်ထီၣ်ဒီးတၢ်ပၣ်ဃုၥ်ပၣ်ဂီၢ်ကအိၣ်ထီၣ်လဲၢ်လဲၢ်ကွၥ်ကွၥ် အဂီၢ် ကီၢ်သလ့ၤတၢ်ပၢ တၢ်ပြး ကီၣ်ကး (KGC) ကရူၢ်အံၤမူဒါအိၣ်ဝဲလၢကဘၣ်ဂုၥ်ကျဲးစၢးဝဲအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကးဒံးဘၣ်လၢကီၢ်သူလ့ၤလံၥ်ဃံးဃၥ်အပူၤန့ၣ် တၢ်ပၥ်ပနီၣ်ဝဲကရူၢ်ကရၢကဘၣ်ပၣ်ဃုၥ်ဝဲ(၅)ဖုလၢအပၣ်ဃုၥ်ဝဲ ကီၢ်စဲၣ်/ကီၢ်ခီဒိၣ်ပူၤ ခိၣ်နၢ်လၢအမၤနၢၤ(၂၀၂၀)တၢ်ဃုၢဒီးအတူၢ်လိၥ်ဝဲကီၢ်သူလ့ၤလံၥ်ဃံးဃၥ်အခၢၣ်စးသ့ၣ်တဖၣ်အံၤန့ၣ်လီၤ.
ဘၣ်ဆၣ်ဖဲတၢ်မၤဝဲတၢ်တၢၣ်ပီၣ်တဲသကိးတၢ်အိၣ်ဘျီဝဲအံၤအပူၤခီဖျိခိၣ်နၢ်ခၢၣ်စးတဖၣ်အံၤဟဲထီၣ်ဝဲတတုၤဘၣ်အဃိ (၅)ဖုအကျါ (၄)ဖုလၢအပၣ်ဃုၥ်တဖၣ်န့ၣ်မ့ၢ်ဝဲ (၁) ခ့ၣ်အဲၣ်ယူၣ် လီၢ်ခၢၣ်သးဒီး ကီၢ်ရ့ၣ်(၇)ဘ့ၣ်ခၢၣ်စးခိၣ်နၢ်, (၂)ကီၢ်ရ့ၣ်တဘ့ၣ်စုၥ်စုၥ်သးစၢ်, (၃)ပိၥ်မုၣ်ခၢၣ်စး, (၄)ကလုၥ်ဒူၣ် ခိၣ်နၢ်ခၢၣ်စးသ့ၣ်တဖၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဘၣ်ဆၣ်ဒ်သိးကီၢ်စဲၣ်/ကီၢ်ခီဒိၣ်ပူၤခၢၣ်စးသ့ၣ်တဖၣ်အံၤကပၣ်ဃုၥ်ပၣ်ဂီၢ်ဝဲလၢကရူၢ်ကရၢ(၅)ဖုပူၤကသ့အဂီၢ်န့ၣ် တၢ်ကဂဲၤလိၥ် မၤဖျါထီၣ်အမိၢ်လံၤမိၢ်ပှၢ်လၢ(၃) လါအတီၢ်ပူၤအဂ့ၢ်န့ၣ် ခ့ၣ်အဲၣ်ယူၣ် အၢၣ်လီၤစံးဝဲဒၣ်န့ၣ်လီၤ.
“တၢ်ပၢၢ်ဆၢကတီၢ်ကီၢ်သူလ့ၤလံၥ်ဃံးဃၥ်”ပတြီၥ်လၢတၢ်ပၥ်ဂၢၢ်ပၥ်ကျၢၤဝဲခဲအံၤန့ၣ် ဘၣ်တၢ်စးထီၣ်ကွဲးလီၤတ့ၢ်ဃၥ်ဝဲဖဲ ၂၀၂၃ လါဒံၣ် စ့ဘၢၣ်အခါဒီးဖဲန့ၣ်ဝံၤလီၢ်ခံတဆီဘၣ်တဆီလီၢ်ခံကတၢၢ်ဖဲတနံၣ်အံၤလါဖ့ၤ ဘြူၤအါရံၤ တၢ်မၤဝဲကညီဒီကလုၥ်တၢ်ကူၣ်လိၥ် တၢၣ်ပီၣ် တဲသကိးတၢ်အိၣ်ဖှိၣ်ပူၤအခါန့ၣ်စ့ၢ်ကီးတၢ်ထၢနုၥ်တၢၣ်ပီၣ်တဲသကိးဝဲဘၣ်ဃးတၢ်ဂ့ၢ်သ့ၣ်တဖၣ်အံၤအဂ့ၢ်န့ၣ် ခ့ၣ်အဲၣ်ယူၣ်စံးဝဲန့ၣ်လီၤ.
ကီၢ်သူလ့ၤလံၥ်ဃံးဃၥ်အံၤလၢတၢ်ကဂဲၤလိၥ်သူၣ်ထီၣ်ဝဲဖဲၣ်ဒရၢၣ်သနူလၢ “တၢ်ဖီလၥ်ဆူတၢ်ဖီခိၣ်” အက့ၢ်အဂီၤလၢအအိၣ်ဒီး နီၢ်ကစၢ်တၢ် စံၣ်ညီၣ်ပၢလီၤသးခွဲးယၥ်အဂီၢ်ဒီးတကးဒံးဘၣ် ကသူၣ်ထီၣ်ဝဲကီၢ်သူလ့ၤဖဲၣ်ဒရၢၣ်ယူးနံးဒ်ဒံၣ်မိၣ်ခြ့ၣ်စံၣ်သနူအမဲၥ်ညါ ကမၤသကိး တၢ်ဒီးဖဲၣ်ဒရၢၣ်ယူးနံးလၢ အဂၤတဖၣ်လၢကထီဒါဝဲသုးမီၤစိရိၤသနူအဃိ မ့ၢ်ဝဲခီၣ်ခါလၢအရ့ဒိၣ်ဝဲတခါအဂ့ၢ်န့ၣ် ခ့ၣ်အဲၣ်ယူၣ် စံးစ့ၢ်ကီးဝဲန့ၣ်လီၤ.
