လါမ့ၤ ၂၇သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ,တးကီၢ်ရ့ၣ်ထၣ်ဆီၣ်ယါကီၢ်ဆၣ်မဲၢ်လးကညီဘၣ်ကီဘၣ်ခဲဒဲကဝီၤအပူၤတၢ်ကဘှီထီၣ်က့ၤဝဲ ဒဲကဝီၤကမျၢၢ်တၢ်ဆါဟံၣ်အခိၣ်ဒုးအဂီၢ်လိၣ်ဘၣ်ဝဲကျိၣ်စ့တၢ်ဆီၣ်ထွဲမၤစၢၤအဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်ပၥ်ဖျါထီၣ်ဝဲဒၣ်လၢတၢ်ဆါဟံၣ်အစိၤရှၢၣ်မံးဒံးယၢၣ်အပူၤန့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤအတၢ်ဆါဟံၣ်အံၤတကီၢ်ခါခဲအံၤခီဖျိအခိၣ်ဒုးဖျိဟးဂီၤဝဲဒီးတၢ်စူၤလီၤစီၤဝဲဒၣ်အဃိတၢ်လီၤဘၣ်ယိၣ်ဘၣ်ဘှီအိၣ်ဝဲလၢကမျၢၢ်ပှၤဆူးပှၤဆါတဖၣ်အဂီၢ်ဒီး,(Electric Shock)သ့ဝဲဒၣ်စ့ၢ်ကီးအဃိ,တၢ်ကဘၣ်ဘှီဂ့ၤထီၣ်က့ၤဝဲဒၣ်အဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
လၢတၢ်န့ၣ်အဃိ,လၢတၢ်ကဘှီထီၣ်က့ၤဝဲအဂီၢ်တနံၣ်အံၤတချူးလါယူၤလၢၥ်အပူၤလိၣ်ဘၣ်ဝဲကျိၣ်စ့တၢ်ဆီၣ်ထွဲမၤစၢၤ(၂၀၀၀၀၀)ဘျဲၣ်အဂ့ၢ်,မဲၢ်လးကညီဘၣ်ကီဘၣ်ခဲဒဲကဝီၤတၢ်ဆါဟံၣ်မူဒါခိၣ်(၂)စီၤန့ၢ်တၢ်ဂ့ၤစံးဝဲဒ်အံၤန့ၣ်လီၤ.
“လါယူၤအပူၤဒုတၢ်ကစူၤဒိၣ်ထီၣ်လီၤ.အဃိပကဘၣ်အိၣ်ကတီၤပၥ်ပသး,မ့တမ့ၢ်ဘၣ်ခီမူခိၣ်စူၤမ့အါတၢ်လီၤစီၤန့ၣ်ရှီးသးတဘျီဃီန့ၣ်လီၤ.ပယၥ်လီၤပၥ်စ့ခီ(၂၅၀၀၀၀)ဘးန့ၣ်လီၤ.ခဲအံၤလၢပှၤနီၢ်တဂၤဒီးဒဲကဝီၤကညီပိၥ်မုၣ်ကရၢအအိၣ်န့ၣ်ပဒိးန့ၢ်ဘၣ်ဒံးထဲ(၂၀၀၀၀)ဘျဲၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤအတၢ်ဆါဟံၣ်အံၤအပူၤကွံၥ်နံၣ်တဖၣ်အပူၤဒိးန့ၢ်ဘၣ်ဝဲတၢ်ဆီၣ်ထွဲမၤစၢၤလၢ(International Rescue Committee) (IRC)ကရူၢ်ကရၢတဖၣ်အိၣ်ဝဲဘၣ်ဆၣ်,စးထီၣ်ဖဲ(၂၀၂၅)နံၣ်လါယနူၤအါရံၤအပူၤတၢ်ဆီၣ်ထွဲမၤစၢၤလီၤစှၤကွံၥ်ဝဲဒၣ်အသိး,ဖဲ(၂၀၂၆)နံၣ်နုၥ်လီၤအလီၢ်ခံဘၣ်ဒိးသန့ၤထီၣ်က့ၤဝဲဒၣ်အသးလၢ(IRC)ဒီးကၠီၣ်တဲၣ်မဲၢ်တီၢ်တၢ်ဆါဟံၣ်ခံခီခံကပၤအအိၣ်အဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.
ဒီးကရူၢ်ကရၢ(၂)ဖုအံၤခီဖျိဆီၣ်ထွဲမၤစၢၤဝဲန့ၢ်ဒၣ်ထဲကသံၣ်ပှၤမၤတၢ်ဖိအဘူးအလဲတဆံးတက့ၢ်အဃိလၢဒဲကဝီၤတၢ်ဆါဟံၣ်ကသံၣ်ကသီတၢ်လိၣ်ဘၣ်ဒီးတၢ်ဆါဟံၣ်ကလဲၤတရံးသးအဂီၢ်,ဘၣ်ဆၢထၢၣ်ဝဲဒၣ်လၢတၢ်ဘူၣ်တၢ်ဘါကရူၢ်ကရၢဒီးနီၢ်တဂၤပှၤမၤစၢၤတၢ်ဖိတဖၣ်အတၢ်နုၥ်လီၤမၤစၢၤဆီၣ်ထွဲတဆံးတက့ၢ်အဖီခိၣ်အဂ့ၢ်,သ့ၣ်ညါဘၣ်န့ၣ်လီၤ.
မဲၢ်လးကညီဘၣ်ကီဘၣ်ခဲဒဲကဝီၤတၢ်ဆါဟံၣ်အံၤ,ဒဲကဝီၤပူၤကမျၢၢ်သ့ၣ်အမဲၥ်ညါကမျၢၢ်လၢအိၣ်ဆိးဖဲသူမွဲထံကျိကၢၢ်နံၤခံခီယၢ်ပၤတဖၣ်ပၥ်ဂံၢ်ပၥ်ဘါလဲၤကူစါယါဘျါဝဲဒၣ်အသးအိၣ်ဝဲစ့ၢ်ကီးအဂ့ၢ်,သ့ၣ်ညါဘၣ်န့ၣ်လီၤ.
တကီၢ်ခါခဲအံၤလၢတၢ်ဆါဟံၣ်တၢ်ခိၣ်ဒုးတၢ်လိၣ်ဘၣ်ကဘၣ်ဂ့ၢ်ဘၣ်ဝီဝဲအဂီၢ်,ဒဲကဝီၤခိၣ်နၢ်တဖၣ်ကွဲမုၥ်ဝဲပှၤကဒဲကဝီၤဖိတဖၣ်လၢကပၥ်ဖှိၣ်မၤသကိးတၢ်လၢနီၢ်တဂၤစုတၢ်ဟ့ၣ်စ့ယိၤ(၁)ဘးအိၣ်ဝဲအသိး,ကွဲမုၥ်စ့ကိးဝဲထံဆၢကီၢ်ဆၢတၢ်ကရၢကရိကရူၢ်ကရၢ,တၢ်ဘူၣ်တၢ်ဘါတၢ်ကရၢကရိဒီးနီၢ်တဂၤပှၤသးအိၣ်မၤစၢၤဖိတဖၣ်စ့ၢ်ကီးအဂ့ၢ်,ပၥ်ဖျါဝဲဒၣ်လၢစိၤရှၢၣ် မံးဒံးယၢၣ်အပူၤန့ၣ်လီၤ.
ဒ်န့ၣ်အသိး,လၢတၢ်သးအိၣ်ဆီၣ်ထွဲအတၢ်မၤစၢၤဒဲကဝီၤတၢ်ဆါဟံၣ်အခိၣ်ဒုးအဂီၢ်တၢ်ဆဲးကျိးဝဲဒၣ်လိၤလိၤသ့ဝဲလၢကညီဘၣ်ကီဘၣ်ခဲကမံးတံၥ်(KRC)မ့တမ့ၢ်ဒဲကဝီၤပှၤဘၣ်မူဘၣ်ဒါဒီးတၢ်ဆါဟံၣ်ခိၣ်နၢ်ပှၤဘၣ်မူဘၣ်ဒါတဖၣ်သ့ဝဲအဂ့ၢ်,ဒဲကဝီၤဆူၣ်ချ့ပှၤဘၣ်မူဘၣ်ဒါတဖၣ်ပၥ်ဖျါဝဲဒၣ်န့ၣ်လီၤ.
