လါမ့ၤ ၂၇ သီ, ၂၀၂၆ နံၣ်, ခ့ၣ်အဲးစံၣ်
(ကၠါဖၠၣ်)တၢ်ဖံးတၢ်မၤလီၢ်တၢ်သူၣ်ထီၣ်လၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံကီၢ်ဆၣ် စွ့ၤကိၣ်ကိၤဟီၣ်ကဝီၤအပူၤအံၤ စးထီၣ်ဖဲလါမ့ၤ ၂၅ သီအနံၤန့ၣ် သုးမီၤစိရိၤစးထီၣ်မၤလီၤပှီၢ်မၤဟးဂီၤကဒီးဝဲ အဂ့ၢ်န့ၣ် သုးကရူၢ်အတၢ်ကစီၣ်သန့တဖၣ်ပၥ်ဖျါထီၣ်ဝဲန့ၣ်လီၤ.
တၢ်သူၣ်ထီၣ်အဖျၢၣ်(၃၀၀)ဘျဲၣ်လၢအတဖိးသဲစးလၢအိၣ်စွ့ၤကိၣ်ကိၤအံၤန့ၣ် ဖဲသုးမီၤစိရိၤအကရူၢ်နုၥ်လီၤသမံသမိး ဝဲအခါ ထံၣ်န့ၢ်ဝဲဒၣ်(ကၠါဖၠၣ်)တၢ်သူၣ်ထီၣ် ၇၇ ဖျၢၣ်လၢအမၤဝဲတၢ်တၤကျိၣ်တၤစ့,တၢ်လံၣ်အီၣ်လီအီၣ်တၢ်လၢအီၤလါပူၤ တၢ်ဖံးတၢ်မၤ အံၤသ့ၣ်တဖၣ်အဂ့ၢ်န့ၣ် စံးဝဲန့ၣ်လီၤ.
ဘၣ်ဆၣ်လၢတၢ်ပၥ်ဖျါအပူၤန့ၣ်ဘၣ်ဃး(ကၠါဖၠၣ်)တၢ်ဖံးတၢ်မၤအကစၢ်ဒီးပှၤမၤတၢ်ဖိစရီအံၤခီန့ၣ် ထံၣ်ဘၣ်လၢ တၢ်တပၥ်ဖျါထီၣ် ဃုၥ်ဝဲဘၣ်န့ၣ်လီၤ.
တၢ်သူၣ်ထီၣ်သ့ၣ်တဖၣ်အံၤတၢ်တိၥ်လီၤဃၥ်ဝဲလၢတၢ်ကမၤလီၤပှီၢ်မၤဟးဂီၤဝဲတနံၤ(၂)ဖျၢၣ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ် ဖိလၢအိၣ်စွ့ၤကိၣ်ကိၤအံၤတဂၤ စံးဝဲန့ၣ်လီၤ.
စွ့ၤကိၣ်ကိၤဟီၣ်ကဝီၤတၢ်လီၢ်လၢ(ကၠါဖၠၣ်)အိၣ်ဆီလီၤသးအံၤန့ၣ် အိၣ်ဝဲဒၣ်လၢသုးခိးကီၢ်ဆၢ(BGF)ဒီးကညီဒီကလုၥ်သုးမုၢ်ဒိၣ် (KNA) အတၢ်ပၢဟီၣ်ကဝီၤအပူၤန့ၣ်လီၤ. ဒ်န့ၣ်အသိးဘၣ်ဃးတၢ်မၤလီၤပှီၢ်ကွံၥ်(ကၠါဖၠၣ်)တၢ်သူၣ်ထီၣ်တၢ်ဂ့ၢ်အံၤ စ့ၢ်ကီးဘၣ် တၢ်ပၥ်ဖှိၣ် မၤသကိးတၢ်ဒီး(BGF/KNA)တဖၣ်လီၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤဃီဝဲန့ၣ်စံးဝဲန့ၣ်လီၤ.
တကးဒံးဘၣ်တၢ်မ့မၤဟးဂီၤဝဲ(ကၠါဖၠၣ်)တၢ်သူၣ်ထီၣ်သ့ၣ်တဖၣ်အံၤအိၣ်ဘၣ်ဆၣ်ခီဖျိ(ကၠါဖၠၣ်)တၢ်မၤကစၢ်ဒီးပှၤမၤတၢ်ဖိစရီအံၤ တၢ်ထုးထီၣ်ပၥ်ဖျါဃုၥ်ဝဲတအိၣ်ဘၣ်အဃိတၢ်ပဲၥ်ထံနီၤဖးအိၣ်ထီၣ်ဝဲအကလုၥ်ကလုၥ်န့ၣ်လီၤ.
ဘၣ်ဃးတၢ်ဂ့ၢ်အံၤဒ်သိးကသ့ၣ်ညါဘၣ်တၢ်အိၣ်သးလီၤတံၢ်လီၤဆဲးအဂီၢ်န့ၣ် ပခ့ၣ်အဲးစံၣ်-ကညီတၢ်ကစီၣ်ဆဲးကျိးဝဲ (BGF/KNA)ပှၤဘၣ်မူ ဘၣ်ဒါဘၣ်ဆၣ် ဆဲးကျိးတန့ၢ်ဝဲဘၣ်န့ၣ်လီၤ.
ဒ်န့ၣ်အသိးလၢကဟဲအံၤစ့ၢ်ကီးဒိးသန့ၤထီၣ်သးလၢတၢ်သူၣ်ထီၣ်အက့ၢ်အဂီၤအပတီၢ်အဖီခိၣ် တၢ်ကမၤလီၤပှီၢ်မၤဟးဂီၤဝဲ တၢ်သူၣ်ထီၣ် အပတီၢ်(၂)ပတီၢ်ဒီး တကီၢ်ခါခဲအံၤတုၤလၢမဟါလါမ့ၤ ၂၆ သီအံၤန့ၣ် တၢ်သူၣ်ထီၣ်အိၣ်တ့ၢ်ဒံးဝဲ(၇၄)ဖျၢၣ်လၢ တၢ်ကဘၣ်ဆဲးမၤ လီၤပှီၢ်ဝဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲအပူၤကွံၥ်(၂၀၂၅)နံၣ်လၢၥ်အခါန့ၣ် သုးမီၤစိရိၤကရူၢ်အံၤပၥ်ဖှိၣ်ထီၣ်သးဒီးကညီဖီၣ်စုကဝဲၤကရူၢ်ကရၢလၢအပၥ်ဖှိၣ်မၤသကိး တၢ်ဒီးအဝဲသ့ၣ်တဖၣ်ဝံၤ နုၥ်လီၤမၤဟးဂီၤမၤလီၤပှီၢ်တ့ၢ်ဒံးဝဲ(KK Park)ကရၢၢ်ပူၤ (ကၠါဖၠၣ်)တၢ်သူၣ်ထီၣ်တဖၣ်ဒံးန့ၣ်လီၤ.
တကးဒံးဘၣ် ဘၣ်ဃးအပူၤကွံၥ်ဒီးတၢ်အိၣ်သးလၢအဟဲအိၣ်ဖျါထီၣ်ခဲအံၤသ့ၣ်တဖၣ် မ့ၢ်ဝဲဒၣ်သုးမီၤစရိၤဒီးဖီၣ်စုကဝဲၤ ကရူၢ်ကရၢလၢ အပၥ်ဖှိၣ်မၤသကိးတၢ်အံၤတဖၣ် အတၢ်မၤပၠးဒ်သိးထံဂုၤကီၢ်ဂၤကထံၣ်ဝဲလၢအဝဲသ့ၣ်မၤပျီဆှဲကွံၥ်ဝဲ(ကၠါဖၠၣ်) လၢအိၣ်ဟီၣ်ကဝီၤပူၤအံၤလီၤအဂ့ၢ်န့ၣ် ပှၤလၢအိၣ်ခိး ကွၢ်ဟုၣ်ကွၢ်ဆူၣ်ဘၣ်ဃးတၢ်ဂ့ၢ်အံၤတဖၣ် ပဲၥ်ထံနီၤဖးစံးဝဲန့ၣ်လီၤ.
