လါယူၤ ၉ သီ, ၂၀၂၆ နံၣ်, ခ့ၣ်အဲးစံၣ်
လၢၢ်ဖးဒိၣ်ပယီၤသုးကလၢၤလၢအိၣ်ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်အပူၤလၢ ဟီၣ်ကဝီၤတၢ်ပၢၢ်ဆၢ သုးပၥ်ဖှိၣ်ကရူၢ်ထီၣ်မၤန့ၢ်တ့ၢ်ဝဲအံၤ ပယီၤသုးဟဲထီၣ်ဒီးဂံၢ်ဘါအါအါဂီၢ်ဂီၢ်က့ၤထီၣ်မၤန့ၢ်ကဒါဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးကလၢၤအံၤဖဲအပူၤကွံၥ်လါမ့ၤ ၂၉ သီ ဟါခီ ၄ နၣ်ရံၣ်အဆၢကတီၢ်န့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်(KNLA) ဒုးယၤနီၣ်ဂံၢ်(၁), ကညီဒီကလုၥ်ဂၢၤသးကရၢ(KNDO) သုးရ့ၣ်-၇ ဃုၥ်ဒီးသိၣ်မှံၤသုးပၥ်ဖှိၣ်ကရူၢ်တဖၣ် လၢတၢ်ဆၢကတီၢ်အသီ (၁၀)အတီၢ်ပူၤထီၣ်မၤန့ၢ်ဝဲ သုးကလၢၤအံၤဃုၥ်ဒီးကျိချံပှၥ်သၣ်အါအါဂီၢ်ဂီၢ်မၤန့ၢ်ဃုၥ်ဝဲဒၣ်န့ၣ်လီၤ.
ဘၣ်ဆၣ်တၢ်ထီၣ်သုးကလၢၤအံၤဝံၤတဘျီဃီမုၢ်ဆ့ၣ်ထီၣ်လါမ့ၤ ၃၀ သီ ဟါခီအဆၢကတီၢ်န့ၣ် ပယီၤသုးအံၤသူဝဲသုးဂံၢ်ဘါ အါအါဂီၢ်ဂီၢ်ဟဲထီၣ်မၤန့ၢ်ကဒါက့ၤဝဲသုးကလၢၤဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါလၢအိၣ်ဘူး ဖဲန့ၣ်တဂၤ စံးဝဲန့ၣ်လီၤ.
“ဒ်သိးပသ့ၣ်ညါန့ၣ်လၢၢ်ဖးဒိၣ်သုးကလၢၤန့ၣ်ပှၤထီၣ်န့ၢ်ဝံၤမုၢ်ဆ့ၣ်ထီၣ်ဟါခီန့ၣ်ပယီၤသုးဟဲက့ၤထီၣ်မၤန့ၢ်ကဒါက့ၤဝဲလီၤ. ပယီၤသုးန့ၣ်ဟဲထီၣ်အါအါဂီၢ်ဂီၢ်မီၤ.လၢညါခါန့ၣ်အဝဲသ့ၣ်ဟဲထီၣ်အသုးနီၣ်ဂံၢ်ကအိၣ်ထဲ(၁၀၀)ဘျဲၣ်ဒ်န့ၣ်လီၤ.ဘၣ်ဆၣ်ခဲအံၤတမ့ၢ်ဒ်န့ၣ် ဘၣ်,ဟဲထီၣ်အဂၤ(၂၀၀)ဘျဲၣ်,(၃၀၀)ဘျဲၣ်တုၤလၢ(၄၀၀)ဒ်န့ၣ်ညါ.မ့ဝံၤအဝဲသ့ၣ်န့ၣ်သူအါထီၣ်ကဘီယူၤဟးခးနါစိၤတၢ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
(သုးက့ ၄)ဟီၣ်ကဝီၤအပူၤ လၢၢ်မုၢ်လါကီၢ်ဆၣ်အမဲၥ်ညါ တနီသရံၣ်ကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မိဒီၢ်ဝ့ၢ်လၢ ဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်န့ၢ်ဝဲအံၤစ့ၢ်ကီး ဖဲအပူၤကွံၥ်လါမ့ၤ ၁၉ သီအနံၤ ပယီၤသုးဟဲက့ၤထီၣ်ဒိၣ်စိကဒါဝဲဒၣ် န့ၣ်လီၤ.
ဒ်န့ၣ်အသိးစးထီၣ်လၢပယီၤသုးဟဲက့ၤထီၣ်ဒိၣ်စိန့ၢ်က့ၤဝဲမိဒီၢ်ဝံၤလီၢ်ခံ လၢဝ့ၢ်ခိၣ်ဝ့ၢ်ဃၢၤဒူသဝီသ့ၣ်တဖၣ်အပူၤ ပယီၤသုးကျိၤ နုၥ်လီၤဟူးဂဲၤဝဲအါအါဂီၢ်ဂီၢ်ဒီး ဒွဲၣ်အူအီၣ်ဝဲကမျၢၢ်ဟံၣ်,တၢ်ဘူၣ်တၢ်ဘါ,ကၠိတၢ်သူၣ်ထီၣ်သ့ၣ်တဖၣ်အမဲၥ်ညါ ဖီၣ်မၤဒၢၣ်ဝဲ ကမျၢၢ် ဟဲအိၣ်ထီၣ်ဝဲတပယူၥ်ဃီန့ၣ်လီၤ.
တကီၢ်ခါခဲအံၤ(သုးက့ ၄)ဃုၥ်ဒီးကီၢ်ရ့ၣ်/သုးက့ဟီၣ်ကဝီၤလၢအဂၤတဖၣ်အပူၤစ့ၢ်ကီး ပယီၤသုးအံၤလၢကထီၣ်မၤန့ၢ်က့ၤ သုးကလၢၤအံၤဒီး အသုးကလၢၤလၢဘၣ်တၢ်ကဝီၤခးဝဲအဖၢမုၢ်အံၤတဖၣ်သုတလီၤတဂ့ၤအဂီၢ်န့ၣ် သူဝဲဒၣ်နီၣ်ဂံၢ်အါအါဂီၢ်ဂီၢ် တကးဒံးဘၣ်တကတီၢ်ဃီသူဃုၥ်စ့ၢ်ကီးဝဲကဘီယူၤ,ဒြိ,ကျိဖးဒိၣ်ဒိၣ်ဒိၣ်မုၢ်မုၢ်ဒီး တုၤလၢခဲအံၤဒုးယၤတၢ်သဘံၣ် သဘုၣ်ကဲထီၣ်ဝဲ လၢခံခီခံကပၤအဘၢၣ်စၢၤအဖၢမုၢ်န့ၣ်လီၤ.
