လါယူၤ ၉ သီ, ၂၀၂၆ နံၣ်, ခ့ၣ်အဲးစံၣ်
ဖဲတနံၤလါယူၤ ၉ သီ လၢန့ၣ်ပၠံၣ်တီၣ်န့ၣ် သုးကရူၢ်(NSPNC)ဒီး 7 EAO Alliance ဖီၣ်စုကဝဲၤကရူၢ်(၇)ဒူၣ်မၤဝဲတၢ်ထံၣ် လိၥ်တၢၣ်ပီၣ်တဲသကိးဒီး လၢတၢ်တဲသကိးအံၤအပူၤ ကသူၣ်ထီၣ်ကတီၢ်ယံၤတၢ်မုၥ်တၢ်ခုၣ်လၢအဂၢၢ်အကျၢၤကန့ၢ်အဂီၢ် တၢ်ပၥ်သးအိၣ်လၢကတၢၣ်ပီၣ်တဲသကိးဝဲအဂ့ၢ်န့ၣ် (7 EAO Alliance)အလံၥ်တၢ်ပၥ်ဖျါအပူၤ သုးရိၣ်ဒိၣ်စိ စဲလ့ စံးဝဲဒၣ်န့ၣ်လီၤ.
ဒ်(7 EAO Alliance)အလံၥ်တၢ်ပၥ်ဖျါပူၤ သုးခိၣ်ဒိၣ်စိ စဲလ့ စံးဝဲအသိးန့ၣ် လၢတၢ်မၤဝဲတၢ်ထံၣ်လိၥ်တၢၣ်ပီၣ်တဲသကိး တၢ်ရဲၣ်တၢ်ကျဲၤ ဘျီ ဝဲအံၤအပူၤန့ၣ် သုးကရူၢ်တကပၤ(NSPNC) ပှၤပၢၤလီၢ်ဆ့ၣ်နီၤ သုးခိၣ်ကျၢၢ်ဒိၣ်စိ ယၤပၠ့ၣ် ဒီး ကမံးတံၥ်ဖိ တဖၣ်ဟဲထီၣ် ဝဲအသိး လၢ(7 EAO) တကပၤစ့ၢ်ကီး ခၢၣ်စးတဖၣ်ဟဲထီၣ်ဝဲခဲလၢၥ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဖဲအပူၤကွံၥ်လါအ့ဖြ့ၣ် ၂၁ သီအနံၤ လၢကတၢၣ်ပီၣ်တဲသကိးတဲတၢ်မုၥ်တၢ်ခုၣ်အံၤအဂီၢ်တၢ်ကွဲမုၥ်အိၣ်ထီၣ်ဝံၤလီၢ်ခံ (NSPNC) ကရူၢ်ကွဲမုၥ်ဝဲ ဖီၣ်စုကဝဲၤကရူၢ်(၇)ဒူၣ်လၢၥ်လၢအဆဲးလီၤဝဲ(NCA)အံၤတဖၣ်လၢလံၥ်အံၤတဆီန့ၣ်လီၤ. တကတီၢ်ဃီလၢတၢ်ကွဲမုၥ် အံၤအဖီခိၣ် ကမၤဖျါထီၣ်တၢ်မုၥ်တၢ်ခုၣ်တၢ်တိၥ်ကျဲၤလၢအလီၤပလိၥ်သးဒီးတကီၢ်ခါတၢ်အိၣ်သးအံၤဒီး ကရူၢ်ကရၢလၢအကြၢး ပၣ်ဃုၥ်တဖၣ် ကဟဲပၣ်ဃုၥ်ဝဲဒီး တကးဒံးဘၣ်တၢ်မုၥ်တၢ်ခုၣ်လၢတၢ်ကတဲသကိးဝဲအံၤကမ့ၢ်တၢ်မုၥ်တၢ်ခုၣ်လၢကတီၢ်ယံၤအဂီၢ် ကရူၢ်အံၤပညိၣ်ဒီးတၢ်ပၥ်သးအိၣ်လၢကတၢၣ်ပီၣ်တဲသကိးဝဲအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
လၢတၢ်မၤဝဲတၢ်ထံၣ်လိၥ်အိၣ်သကိးနံၤဝဲအံၤအပူၤန့ၣ် ခံခီခံကပၤတၢၣ်ပီၣ်တဲသကိးဝဲဘၣ်ဃးတၢ်မုၥ်တၢ်ခုၣ်တၢ်တိၥ်ကျဲၤ အတၢ်ဖံး တၢ်မၤအဂ့ၢ်တဖၣ်ဖျိဖျိဖျါဖျါဒီး ဒ်သိးတၢ်အစၢလၢအဂ့ၤကဟဲအိၣ်ဖျါထီၣ်အဂီၢ်ကဂုၥ်ကျဲးစၢးပၥ်ဖှိၣ်မၤသကိးတၢ်အဂ့ၢ်န့ၣ် (7 EAO Alliance) ကရူၢ်ခိၣ်နၢ်အံၤတဖၣ် ဆီၣ်တခူထီၣ်ဝဲန့ၣ်လီၤ.
ဒ်န့ၣ်အသိးလၢတၢ်တၢၣ်ပီၣ်တဲသကိးဘျီဝဲအံၤန့ၣ်ကရူၢ်တဖၣ်အကျါ မ့မ့ၢ်လၢ(DKBA) တကပၤန့ၣ် သုးခိၣ်စီၤစ့ၤဝ့, သုးခိၣ်စီၤန့ၢ်ဘျုးဒီး (KNU/KNLA-PC)တကပၤခီန့ၣ် သုးခိၣ်စီၤကၠီၤညိၣ်လဲၤထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
7 EAO ကရူၢ်လၢအပၣ်ဃုၥ်ဝဲ(KNU),(DKBA),(KNU/KNLA-PC),(PNLO) ,(CNF),(RCSS), (ALP),(LDU), (NMSP), (ABSDF)ဖီၣ်စုကဝဲၤကရူၢ်တဖၣ်အံၤ သုးဟံန့ၢ်ထံကီၢ် တၢ်စိတၢ်ကမီၤဝံၤလီၢ်ခံ ကရူၢ်အံၤအကျါမ့မ့ၢ်(ခ့ၣ်အဲၣ်ယူၣ်)ဒီး (ABSDF),(CNF) ကရူၢ် ၃ ဒူၣ်အံၤ ဟးထီၣ်ကွံၥ်ဝဲလၢကရူၢ်ပူၤထီဒါပၢၢ်ဆၢက့ၤဝဲ သုးကရူၢ်တုၤလၢခဲအံၤတစုန့ၣ်လီၤ.
