လါယူၤ ၂၀ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဒူသဝီအပူၤ ဖဲလါယူၤထီၣ် ၁၈ သီ ဒီးမဟါ ၁၉ သီအနံၤ ကဘီယူၤလဲၤ တ့ၢ်လီၤမ့ၣ်ပိၢ်(၂)သီတပယူၥ်ဃီအဃိ ဒူသဝီကမျၢၢ်အိၣ်ဘူးဖဲန့ၣ်တဖၣ်ပျံၤတၢ်အိၣ်လၢသဝီပူၤတဘူၣ်လၢၤဘၣ်ဒီး လဲၤအိၣ်က့ၤ ဝဲလၢပှၢ်ပူၤတၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲလါယူၤ ၁၈ သီအနံၤန့ၣ် လၢဆီသုးခံကရူၢ်အပူၤ သုးမီၤစိရိၤ(jet fighter)ကဘီယူၤလဲၤတ့ၢ်လီၤဝဲပီၣ်(၅၀၀)မ့ၣ်ပိၢ်လၢ သဝီသီခိၣ်ထိး ကျးဆါတၢ် ကမျၢၢ်သံ(၄)ဂၤ,ဘၣ်ဒိဘၣ်ထံး(၅)ဂၤကဲထီၣ်ဝံၤ မုၢ်ဆ့ၣ်ထီၣ်မၤကဒီး ၁၉ သီအနံၤ ကဘီယူၤ လဲၤတ့ၢ် လီၤ ကဒီးဝဲပီၣ်(၂၅၀)မ့ၣ်ပိၢ် ၂ ဖျၢၣ်လၢ ဖွ့ဖူကၢ်ကရူၢ် ကဆီပူၤသဝီဃၢၤ လၢတၢ်ဂ့ၢ်တအိၣ်နီတမံၤအံၤဘၣ်န့ၣ်လီၤ.
လၢကဘီယူၤလဲၤတ့ၣ်လီၤမ့ၣ်ပိၢ်လၢကဆီပူၤဘျီဝဲအံၤလီၤတဲၥ်ပိၢ်ဖးထီၣ်ဝဲလၢ(ဂုံညှင်းနွယ်)တိၤခိၣ်ထိး ကမျၢၢ်ကျီးပူၤအဃိ သိလ့ၣ်ယီၢ်(ကဲၤရံၤ)ကစၢ် ကိၤမီၤမီၤအံၤကျိဖးဒိၣ်အက့အခီဘၣ်ဝဲအခီၣ်ဒီး ဒ်န့ၣ်အသိးသဲးထူၣ်,တူၢ်ရ့ၣ်ထူၣ်ဘၣ်ဒိဘၣ်ထံး ဟးဂီၤ ဝဲအိၣ်အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဟီၣ်ကဝီၤဒူသဝီလၢကဘီယူၤလဲၤတ့ၢ်လီၤမ့ၣ်ပိၢ်အံၤန့ၣ်တၢ်ကစီၣ်ဟးထီၣ်ဝဲလၢကမျၢၢ်တၢ်ဒီသဒၢသုး(PDF)သုးကရူၢ်ဟူးဂဲၤ အိၣ်ဆီလီၤသးအိၣ်အဃိ ကဘၣ်မ့ၢ်ကဘီယူၤဟဲခးလီၤတၢ်ဒ်အံၤလီၤအဂ့ၢ်န့ၣ် တၢ်ပဲၥ်ထံနီၤဖးစံးဝဲအိၣ်န့ၣ်လီၤ.
တကးဒံးဘၣ်တကီၢ်ခါခဲအံၤစ့ၢ်ကီး တၢ်ကစီၣ်ဟူထီၣ်လၢကဘီယူၤကဟဲခးလီၤကဒီးတၢ်အိၣ်အဃိ သဝီသီ,ကဆီပူၤသဝီဃုၥ်ဒီး ဒူသဝီလၢအိၣ် ဘူးဒီးတၢ်ကဲထီၣ်သးအံၤအခိၣ်အဃၢၤတဖၣ် ပျံၤတၢ်ဘၣ်ယိၣ်ဘၣ်ဘှီတၢ်ဟဲအါထီၣ်ဝဲဒီး တနီၤန့ၣ်မံလၢ ဟံၣ် တဘူၣ်လၢၤ,ဟးပလဲၥ်သးလဲၤအိၣ်က့ၤဝဲလၢပှၢ်ပူၤတၢ်ဖံးအီၣ်မၤလီၢ်ကျီးပူၤဒီးတနီၤန့ၣ်သုးလီၢ်သုးကျဲလဲၤအိၣ်က့ၤလၢပှၤဒူပှၤသဝီလၢတၢ်ဘံၣ်တၢ်ဘၢလီၢ်သ့ၣ်တဖၣ်န့ၣ်လီၤ.
ဘၣ်ဃးတၢ်ဂ့ၢ်လၢအဟဲကဲထီၣ်ဘျီဝဲအံၤန့ၣ် လီၢ်ကဝီၤကမျၢၢ်လၢအိၣ်ဘူးဖဲန့ၣ်တဂၤစံးဝဲလၢ“ခဲအံၤန့ၣ်ပှၤဒိးန့ၢ်တၢ်ကစီၣ်လၢ ကဘီယူၤန့ၣ်ကဟဲထီၣ်ဒံး.ဘၣ်အိၣ်ပလီၢ်သး.ခဲအံၤပှၤဟးအိၣ်ပြံပြါကယၢ် တနီၤန့ၣ်လဲၤအိၣ်လၢကျီးပူၤ,တနီၤန့ၣ်လဲၤအိၣ် လၢပှၢ်ပူၤ ဒီးတနီၤန့ၣ်လဲၤအိၣ်လၢပှၤသဝီလၢအဂၤအိၣ်လီၤ. ပသဝီန့ၣ်သဝီသီမ့ဝံၤမဲးရူၢ်ခံ,ကီးကးသဝီ,ဆီသုးခံသဝီ,တယၤဒ့, ထံဖးဒိၣ်သဝီဃုၥ်ဒီးသဝီလၢအဂၤတဖၣ်န့ၣ်မုၢ်နၤခီပှၤမံလၢဟံၣ်တဘူၣ်ဘၣ်.ပှၤဟးအိၣ်လၢတၢ်လီၢ်လၢအဘံၣ်အဘၢလီၢ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ်ဖဲတနံၤအံၤန့ၣ်လီၤ.
ဒ်လီၢ်ကဝီၤကမျၢၢ်ဒီးဟီၣ်ကဝီၤတၢ်ကစီၣ်ပၥ်ဖျါထီၣ်ဝဲအသိးန့ၣ် အဆိကတၢၢ်အပူၤကွံၥ်လါယူၤ ၁၈ သီ ကဘီယူၤအဃိ ကမျၢၢ်(၉)ဂၤလၢအသံအဘၣ်ဒိဘၣ်ထံးသ့ၣ်တဖၣ်အံၤအကျါပၣ်ဃုၥ်ဝဲ(PDF)တၢ်ပၢၢ်ဆၢကရူၢ်အပှၤတစှၤန့ၢ်ဝဲ(၃)ဂၤအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဒူသထူၣ်ကီၢ်ရ့ၣ်(သုးက့ ၁) ကၠဲးထီၣ်,ဘံလ့,သထူၣ်ဒီးဖၣ်အၣ်ကီၢ်ဆၣ်တဖၣ်အံၤအကျါ လီၤဆီဒၣ်တၢ်မကၠဲးထိၣ်ကီၢ်ဆၣ်အံၤ မ့ၢ်ဟီၣ်ကဝီၤတဘ့ၣ်လၢဘၣ်ကွၢ်ဆၢၣ်မဲၥ်ဝဲသုးမီၤစိရိၤအတၢ်ဟူးတၢ်ဂဲၤလၢဟီၣ်ခိၣ်မဲၥ်ဖံးခိၣ်မ့ၢ်ဂ့ၤဒီးလၢကလံၤကျါမ့ၢ်ဂ့ၤ အါန့ၢ်ဒံးကီၢ်ဆၣ်လၢအဂၤဒံးဒီး တကးဒံးဘၣ်ခီဖျိလၢကျိဖးဒိၣ်,ကဘီယူၤအံၤအဃိကမျၢၢ်သံဘၣ်ဒိဘၣ်ထံးစ့ၢ်ကီးကထီၣ်ဝဲ တလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤလၢကၠဲးထိၣ်ဟီၣ်ကဝီၤအပူၤ လၢကဟဲထီၣ်ဒိၣ်စိက့ၤတၢ်လီၢ်တၢ်ကျဲလၢတၢ်ပၢၢ်ဆၢပၢဆၢဒိၣ်စိဝဲန့ၢ်တဖၣ်အံၤအဂီၢ်န့ၣ် လၢ(သ့ၤစ့ၤယၣ်)အံၤတဆီ ပယီၤသုးအံၤအိၣ်ကတီၤထီၣ်သးလၢကဟဲထီၣ်ဟူးဂဲၤဝဲအဂ့ၢ် သ့ၣ်ညါဘၣ်လၢလီၢ်ကဝီၤကမျၢၢ် အအိၣ်န့ၣ်လီၤ.
