လါယူၤ ၂၀သီ, ၂၀၂၆နံၣ်, ခ့ၣ်အဲးစံၣ်,
တနံၤအံၤလါယူၤ(၂၀)သီလၢအလီၤဘၣ်ဝဲဟီၣ်ခိၣ်ဒီဖျၢၣ်ပှၤဘၣ်ကီဘၣ်ခဲ(World Refugee Day)မုၢ်နံၤအပူၤအံၤ ကညီတၢ်မၤစၢၤဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ဒီးကညီပိၥ်မုၣ်ကရၢ(KWO)ပၥ်ဖှိၣ်သးဃ့ထီၣ်ဝဲတၢ်ဂ့ၢ်(၅)ထံၣ်အဂ့ၢ်,ထုးထီၣ်ပၥ်ဖျါဝဲဒၣ်န့ၣ်လီၤ.
တၢ်ဂ့ၢ်(၅)ထံၣ်လၢ(KPSN)ဒီး(KWO)ဃ့ထီၣ်ဝဲသ့ၣ်တဖၣ်အံၤ (၁)တၢ်ကကွၢ်ထံဆိၣ်မိၣ်က့ၤဝဲပဒိၣ်ကိတိၥ်ကရၢအတၢ်ဆၢတဲၥ်ဒီးတၢ်ကူၣ်ဘၣ်ကူၣ်သ့ဝဲၤကျိၤ(MOE)အတၢ်နဲၣ်လီၤလၢအဘၣ်ဃးပှၤဘၣ်ကီဘၣ်ခဲတၢ်လဲၤအိၣ်ကၠိအဂ့ၢ်(၂)တၢ်ကဟ့ၣ်ဒံးတၢ်ဆီၣ်ထွဲမၤစၢၤဆူပှၤလၢအလိၣ်ဘၣ်တၢ်ဆီၣ်ထွဲမၤစၢၤလီၤဆီ(ပှၤလၢအလီၤဒ့လီၤတီၤတဖၣ်အအိၣ်(၃)ဒုးအိၣ်ထီၣ်တၢ်လုၢ်အီၣ်သးသမူအကျဲလၢပှၤလၢအဘၣ်ဟးထီၣ်မၤတၢ်လၢဒဲကဝီၤချၢတသ့ဘၣ်တဖၣ်အဂီၢ်(၄)မၤဆူၣ်ထီၣ်တၢ်ဒီသဒၢလၢပှၤဘၣ်ကီဘၣ်ခဲလၢအဟးထီၣ်မၤတၢ်လၢဒဲကဝီၤချၢတဖၣ်အဂီၢ်(၅)မၤလဲၢ်ထီၣ်လီၢ်ကဝီၤတၢ်ဖံးတၢ်မၤတၢ်ခွဲးတၢ်ယၥ်လၢအဘူးဒီးဒဲကဝီၤတဖၣ်အဂီၢ်သ့ၣ်တဖၣ်အဂ့ၢ်လံၥ်ဘိးဘၣ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
ဒီးတၢ်ထုးထီၣ်လံၥ်အံၤအတၢ်ပညိၣ်မ့ၢ်ဝဲဒ်သိးပှၤဒဲကဝီၤဖိတဖၣ်ကဒိးန့ၢ်ခွဲးယၥ်လၢအဖိးသဲးစးအဂ့ၢ်ကညီပိၥ်မုၣ်ကရၢ(KWO) နဲၣ်ရွဲၣ်သဃဲၤနီၢ်အဲၣ်တမှံၤဖီစံးဝဲဒ်အံၤန့ၣ်လီၤ.
“ပတၢ်ပညိၣ်အိၣ်လၢပအဲၣ်ဒိးဒုးသ့ၣ်ညါဝဲဒၣ်ပပှၤတဝၢကရူၢ်ကရၢမ့ၢ်ဂ့ၤ,ကၠီၣ်တဲၣ်ကရူၢ်ကရၢမ့ၢ်ဂ့ၤလၢပှၤဒဲကဝီၤဖိသ့ၣ်တဖၣ်အတၢ်အိၣ်သးအဂီၢ်န့ၣ်လီၤ.ပအဲၣ်ဒိးဃ့ထီၣ်ဝဲဒၣ်တၢ်ဒ်သိးပှၤဒဲကဝီၤဖိသ့ၣ်တဖၣ်ကဒိးန့ၢ်ဘၣ်တၢ်ခွဲးတၢ်ယၥ်လၢအဖိးသဲစးဒီးကဒိးန့ၢ်ဘၣ်စ့ၢ်ကီးဝဲတၢ်လၢပူၤဖျဲးလၢပပှၤတဝၢအပူၤန့ၣ်လီၤ”အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါဘၣ်ဃးတၢ်ဃ့ထီၣ်တဖၣ်အဖီခိၣ်ကညီတၢ်မၤစၢၤဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ပှၤကတိၤတၢ်ပၢနီၢ်ဝါခုၣ်ရှံကတိၤပၥ်ဖျါဝဲဒ်အံၤစ့ၢ်ကီးန့ၣ်လီၤ.
“ပကွၢ်က့ၤပှၤဒဲကဝီၤဖိတဖၣ်ဒိးန့ၢ်ဝဲတၢ်ခွဲးတၢ်ယၥ်လၢဟးထီၣ်မၤတၢ်လၢတၢ်ချၢဒီးဒိးန့ၢ်ဘၣ်လံၥ်အုၣ်သးတနီၤလံဘၣ်ဆၣ်တၢ်ကီတၢ်ခဲပိၥ်ထွဲတဖၣ်အိၣ်ဝဲအသိးပှၤအိၣ်တ့ၢ်လၢဒဲကဝီၤပူၤအနီၣ်ဂံၢ်အါဝဲအဃိတၢ်ဃ့ထီၣ်တဖၣ်အံၤမ့ၢ်တၢ်အရ့ဒိၣ်ဝဲအဖီခိၣ်ပဝဲပဆီၣ်တခူဒီးဃ့ထီၣ်တၢ်ဆူပှၤလၢဘၣ်ထွဲသ့ၣ်တဖၣ်လၢကဒုးအိၣ်ထီၣ်တၢ်တဖၣ်အံၤန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တနံၤအံၤဟီၣ်ခိၣ်ဒီဖျၢၣ်ပှၤဘၣ်ကီဘၣ်ခဲဖိအမုၢ်နံၤတၢ်ဂ့ၢ်မိၢ်ပှၢ်မ့ၢ်ဝဲ“တုၤလၢပှၤကိးဂၤအိၣ်ဒီးတၢ်ဘံၣ်တၢ်ဘၢတၢ်ပူၤဖျဲးတစု”အဂ့ၢ်ကရူၢ်ကရၢ(၂)ဖုလံၥ်တၢ်ရၤလီၤအပူၤပၥ်ဖျါဝဲဒၣ်န့ၣ်လီၤ.
တကတီၢ်ဃီ,တနံၤအံၤဒ်အမ့ၢ်ဝဲမုၢ်နံၤဒိၣ်ထီလၢတၢ်ကသ့ၣ်နီၣ်ထီၣ်က့ၤဝဲပှၤဘၣ်ကီဘၣ်ခဲဖိတဖၣ်အတၢ်တူၢ်ဘၣ်ခီၣ်ဘၣ်မုၢ်နံၤတနံၤအဂီၢ်အသိးန့ၣ်ကညီတၢ်မၤစၢၤဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲ(KPSN)ဒီးကညီပိၥ်မုၣ်ကရၢ(KWO)ကရူၢ်ကရၢတီခိၣ်ရိၣ်မဲမၤလၤကပီၤဝဲဒၣ်ဖဲကီၢ်ကၠီၣ်တဲၣ်ကီၢ်ပယီၤကီၢ်ဆၢမဲၢ်ဆီးဝ့ၢ်တၢ်လီၢ်တတီၤအပူၤန့ၣ်လီၤ.
ဒီးတၢ်ရဲၣ်တၢ်ကျဲၤအပူၤကညီဘၣ်ကီဘၣ်ခဲဒဲကဝီၤကမံးတံၥ်ခိၣ်နၢ်အမဲၥ်ညါထံဆၢကီၢ်ဆၢပှၤတဝၢဂ့ၢ်ဝီကရူၢ်ကရၢအါဖုထီၣ်ပၣ်ဃုၥ်ပၣ်ဂီၢ်ဝဲဒီးပၥ်ဖှိၣ်သးခဲလၢၥ်ကအိၣ်ဝဲအဂၤ(၆၀)ဘျဲၣ်ဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,တၢ်မၤလၤကပီၤဝဲဟီၣ်ခိၣ်ဒီဖျၢၣ်ပှၤဘၣ်ကီဘၣ်ခဲမုၢ်နံၤဘျီဝဲအံၤအပူၤ(KPSN)ဒီး(KWO)အိၣ်ဝဲဒီးတၢ်ဒုးနဲၣ်ဖျါထီၣ်ဝဲကီၢ်ကၠီၣ်တဲၣ်ကီၢ်ပယီၤကီၢ်ဆၢကညီဘၣ်ကီဘၣ်ခဲဒဲကဝီၤတဖၣ်အပူၤပှၤဒဲကဝီၤဖိတဖၣ်အတၢ်အိၣ်မူ,တၢ်အိၣ်တၢ်ဆိး,တၢ်ဖံးအီၣ်မၤအီၣ်ဒီးတၢ်တူၢ်ဘၣ်ခီၣ်ဘၣ်တဖၣ်စ့ၢ်ကီးန့ၣ်လီၤ.
