လါယူၤလံ ၉ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်ကဝီၤ လါယူၤတလါအတီၢ်ပူၤ ခီဖျိတၢ်ဒုးကဲထီၣ်ဒီးပယီၤသုးခးလီၤ ကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်အဃိ ပယီၤသုးတကပၤသံ(၁၃)ဂၤဒီး ကမျၢၢ်သံဘၣ်ဒိဘၣ်ထံး ဝဲ(၁၆)ဂၤ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တလါတဘျီတၢ်မၤနီၣ်စရီပူၤအသိးန့ၣ်လီၤ.
ဖဲအပူၤကွံၥ်လါယူၤဒီတလါအတီၢ်ပူၤန့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ (KNDO) ဃုၥ်ဒီး(PDF)တၢ်ပၢၢ်ဆၢကရူၢ်သုးပၥ်ဖှိၣ်သ့ၣ်တဖၣ်အံၤ လဲၤခးစဲးပြဲးဝဲပယီၤသုးကလၢၤ,ခိးထုးမ့ၣ်ပိၢ်လၢ တၢ်ဒ့ၣ်စၢၤ, ဒီးတၢ်ဘၣ်သဂၢၢ်ခးလိၥ်သးကဲထီၣ်ပၥ်ဖှိၣ်ဝဲ(၁၇)ဘျီအဃိ ပယီၤသုးတကပၤသံဝဲ(၁၃)ဂၤဒီးဘၣ်ဒိဘၣ်ထံးဝဲ (၁၇)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်ဒုးဘျီဝဲအံၤအတီၢ်ပူၤ ပယီၤသုးတကပၤသံဘၣ်ဒိဘၣ်ထံးမ့အိၣ်ဝဲအဂၤ(၃၀)ညါဘၣ်ဆၣ် မ့မ့ၢ်လၢဟီၣ်ကဝီၤ တၢ်ပၢၢ်ဆၢသုးကရူၢ်တကပၤခီန့ၣ် သံတအိၣ်ဘၣ်ဒိဝဲ(၃)ဂၤအဂ့ၢ်န့ၣ် တၢ်မၤနီၣ်စရီပူၤအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဒီးလၢတလါအတီၢ်ပူၤအံၤစ့ၢ်ကီး ပယီၤသုးအံၤတၢ်ဒုးကဲထီၣ်အိၣ်ဂ့ၤ,တအိၣ်ဂ့ၤခးလီၤဝဲကျိဖးဒိၣ်(၅)ဘျီ သူစ့ၢ်ကီးဝဲ ကဘီယူၤ လဲၤတ့ၢ်လီၤမ့ၣ်ပိၢ်လၢကမျၢၢ်အိၣ်ဆိးလီၢ်ကျဲအိၣ်ဝဲ(၇)ဘျီညါန့ၣ်လီၤ.
လၢတၢ်န့ၣ်အဃိလီၢ်ကဝီၤကမျၢၢ်ဃုၥ်ဒီးဖိဒံဖိသၣ်သံဝဲ(၅)ဂၤဒီးဘၣ်ဒိဘၣ်ထံး (၁၁)ဂၤ အသိး ကမျၢၢ်ဟံၣ်,ကျးဆါတၢ်ဟးဂီၤ အမဲၥ်ညါ သဲးထူၣ်,ရီဘၢၣ်ထူၣ်,တူၢ်ရ့ၣ်ထူၣ်တၢ်ထူၣ်တၢ်ဘိသ့ၣ်တဖၣ် ဘၣ်ဒိဘၣ်ထံးဟးဂူၥ် ဟးဂီၤဝဲ အဂ့ၢ်န့ၣ် လံၥ်တၢ်မၤနီၣ် အပူၤ ပၥ်ဖျါဝဲန့ၣ်လီၤ.
ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ အပူၤကွံၥ်လါမ့ၤဒီတလါတၢ်ဒုးအကတီၢ်ပူၤန့ၣ်စ့ၢ်ကီး ပယီၤသုးဃုၥ်ဒီးဘူးဒး ကညီသုးမုၢ်ဒိၣ်(DKBA)သုးခိၣ်ဘိၤဘံၣ်အပှၤသုးပၥ်ဖှိၣ်သံဝဲ(၂၁)ဂၤဒီး ဒ်န့ၣ်အသိးခီဖျိလၢကျိဖးဒိၣ်ဒီးကဘီယူၤအံၤအဃိစ့ၢ်ကီး ကမျၢၢ်သံ ဘၣ်ဒိဘၣ်ထံးစ့ၢ်ကီးဝဲ(၅)အဂၤကဲထီၣ်ဒံးဝဲန့ၣ်လီၤ.
