လါယူၤလံ ၁၀သီ, ၂၀၂၆နံၣ်, ခ့ၣ်အဲးစံၣ်.
တၢ်အိးထီၣ်(BAR)တၢ်မုၥ်လၤသးဖှံကျးလၢ ကီၢ်ကၠီၣ်တဲၣ်ဘီကီးဝ့ၢ်ပူၤသ့ၣ်တဖၣ်အံၤ တၢ်ဘၣ်ထွဲဒီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အစုတီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) တအိၣ်ဝဲဘၣ်အဂ့ၢ်,(KNU)ဂ့ၢ်လိၥ်ဝဲ တဲၥ်တဲၥ်ဖျူဖျူအဂ့ၢ် ပၥ်ဖျါထီၣ်ဝဲလံၥ်ဖဲတနံၤအံၤလါယူၤလံ(၁၀)သီအနံၤန့ၣ်လီၤ.
စးထီၣ်ဖဲတလါအံၤလါယူၤလံအဆိကတၢၢ်တနွံန့ၣ် ကၠီၣ်တဲၣ်တၢ်ကစီၣ်သန့တနီၤ ရၤလီၤပၥ်ဖျါဝဲဒၣ်လၢ တၢ်ဖီၣ်န့ၢ်ဝဲပှၤကီၢ်ပယီၤဖိ အိးထီၣ်(BAR)တၢ်မုၥ်လၤသးဖှံကျး(၂)ဖျၢၣ် လၢကီၢ်ကၠီၣ်တဲၣ်ဝ့ၢ်ဘီကီးပူၤဒီး ပှၤလၢတၢ်ဖီၣ်န့ၢ်ဝဲသ့ၣ်တဖၣ်အံၤ မ့ၢ်ကညီကလုၥ်ဒူၣ်သ့ၣ်တဖၣ်အမဲၥ်ညါ မ့ၢ်ဝဲပှၤသ့ၣ်တဖၣ်လၢအတၢ်ဘၣ်ထွဲအိၣ်ဒီး ကညီဖီၣ်စုကဝဲၤကရူၢ်ကရၢ လၢအမ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အဂ့ၢ်,ပၥ်ဖျါဝဲဒၣ်န့ၣ်လီၤ.
ဒ်ကၠီၣ်တဲၣ်တၢ်ကစီၣ်သန့ (Inside Thailand) မၤဝဲတၢ်ဆဲးကျိးသံကွၢ် ကၠီၣ်တဲၣ်ပှၤဘၣ်မူဘၣ်ဒါ (မံးစထၢၣ်ဝံရပိၤ) ပၥ်ဖျါအသိးန့ၣ်,ပှၤကီၢ်ပယီၤဖိလၢ အိးထီၣ်ဝဲ(BAR) ဒီး တၢ်ဖီၣ်န့ၢ်ဝဲသ့ၣ်တဖၣ်အံၤ တၢ်ပဲၥ်ထံနီၤဖးပၥ်ဖျါဝဲလၢအမ့ၢ် (KNLA)ဘၣ်ဆၣ်,တၢ်ကတိၤပၥ်ဖျါဝဲအမံၤအသၣ်လီၤတံၢ်လီၤဆဲး ဒီးမူဒါလီၢ်လၤလၢ အဘၣ်ထွဲဒီး(KNLA) တအိၣ်ဝဲဒၣ်ဘၣ်အသိး, (BAR)ပှၤမၤတၢ်ဖိလၢတၢ်ဖီၣ်န့ၢ်ဃုၥ်သ့ၣ်တဖၣ်စ့ၢ်ကီး တၢ်ပၥ်ဖျါထီၣ်ဝဲ အဂ့ၢ်အကျိၤ လီၤတံၢ်လီၤဆဲး တအိၣ်ဝဲဒၣ်နီတဂၤဘၣ်န့ၣ်လီၤ.
လၢတၢ်န့ၣ်အဃိ,တၢ်ကဲထီၣ်သးအဖီခိၣ် စိၤရှၢၣ်မံးဒံးယၢၣ်အပူၤ ရၤလီၤက့ၤဝဲအသးအိၣ်ဝဲ အကလုၥ်ကလုၥ်ဘၣ်ဆၣ် တၢ်ဒုးနဲၣ်ဖျါဝဲလၢအမ့ၢ်(KNLA)လီၤတံၢ်လီၤဆဲးတအိၣ်ဘၣ်အသိး,ဘၣ်ထွဲဒီးတၢ်ရ့လိၥ်ဒီးကီၢ်ကၠီၣ်တဲၣ်န့ၣ် ခ့ၣ်အဲၣ်ယူၣ် အိၣ်ဒီး တၢ်သိၣ်တၢ်သီတၢ်ဘျၢလီၤတံၢ်လီၤဆဲးအဂ့ၢ် (KNU)ပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ.
အဝဲစံးဝဲလၢ“ကညီဒီကလုၥ်စၢဖှိၣ်ကရၢအံၤ ဒ်သိးကအိၣ်ဒီးတၢ်ရ့လိၥ်မုၥ်လၢအဂ့ၤဒီး ကီၢ်ကၠီၣ်တဲၣ်ထံကီၢ်အဂီၢ် ပၥ်လီၤဝဲဂံၢ်ခီၣ်ထံးတၢ်သိၣ်တၢ်သီတၢ်ဘျၢသဲစး လၢတၢ်ကဘၣ်ဃုသ့ၣ်ညါဒီး လူၤပိၥ်မၤထွဲဝဲကီၢ်ကၠီၣ်တဲၣ် တၢ်ဘျၢ သဲစးတဖၣ်အိၣ်ဝဲဒီး တၢ်ဘၣ်လူၤပိၥ်မၤထွဲသ့ၣ်တဖၣ်အံၤ (KNLA)ခိၣ်နၢ်ဒီးကရူၢ်ကရၢဖိကိးဂၤ နၢ်ပၢၢ်ဝဲ လီၤတံၢ် လီၤဆဲးအဃိ,တၢ်ဟးမၤကမၣ်တၢ်ဒ်အံၤကရူၢ်ကရၢပူၤအိၣ်ဝဲတသ့ဘၣ်အဂ့ၢ်”အဂ့ၢ်စံးဝဲဒၣ်န့ၣ်လီၤ.
ဘီကီးဝ့ၢ်,(BAR)တၢ်ကဲထီၣ်သးအံၤန့ၣ် တၢ်ပဲၤတခီတၢၤ ဝဲလၢ ပှၤလၢအဘၣ်ထွဲဒီး Bar သ့ၣ်တဖၣ်အံၤ မၤဝဲတၢ်ကူၣ်လဲၤမၤကၤ ကသံၣ်မူၤဘှီး, ဒုးကဲထီၣ်စ့သူဆူစ့ဝါ (Money Laundering), တၢ်မၤကမၣ်ကွီၢ်မ့ၣ် တၢ်ခီထံခီကီၢ် လၢအအိၣ်ပၥ်ဒီးတၢ်ရဲၣ်တၢ်ကျဲၤ (Transbational Oraganized Crime )သ့ၣ်ပၥ်ဃုၥ်ဝဲအဖီခိၣ်, တၢ်ဖံးတၢ်မၤ သ့ၣ်တဖၣ်အံၤလဲၤတက့ၤတပၣ်ဃုၥ်ဝဲဒၣ်လၢ(KNU),(KNLA)ကျဲသနူအပူၤဘၣ်အသိး,တဆီၣ်ထွဲဝဲနီတမံၤဘၣ်အမဲၥ်ညါ, တတူၢ်လိၥ်ဝဲဘၣ်ဒီး ကျဲးစၢးထီဒါမၤလီၤမၢ်ကွံၥ်ဝဲ ထီဘိဒ်သိး လီၢ်ကဝီၤတၢ်မုၥ်တၢ်ခုၣ်တၢ်ဘံၣ်တၢ်ဘၢကအိၣ်ဝဲအဂီၢ်အဂ့ၢ်, လံၥ်ဘိးဘၣ်ရၤလီၤအပူၤပၥ်ဖျါဝဲစ့ၢ်ကီးန့ၣ်လီၤ.
တကးဒံးဘၣ်,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အံၤ မ့ၢ်ဝဲကညီဒီကလုၥ်စၢဖှိၣ်ကရၢ (KNU)အသုးမုၢ်ဒိၣ် တဖု အဖီခိၣ်,တၢ်ကဲထီၣ်သးအပူၤ ပှၤတဂၤလၢ်လၢ်လၢ အမ့ၢ်စံးလီၤအသးလၢအမ့ၢ် (KNLA)န့ၣ် ကဘၣ်အိၣ်ဝဲဒီး တၢ်အုၣ်သး(တၢ်အုၣ်ကီၤ)လၢအဘၣ်ထွဲဒီး တၢ်ကရၢကရိအလံၥ်ပၥ်ဖျါ, တၢ်ကရၢကရိအတၢ်ပၢဆှၢ, တၢ်ကရၢကရိအတၢ်ဟ့ၣ် အီၤမူဒါလံၥ်လဲၢ်သ့ၣ်တဖၣ်အဃိ, တၢ်လီၤတံၢ်လီၤဆဲးတအိၣ်နီတမံၤဘၣ် အဖီခိၣ် မ့မ့ၢ်ဒၣ်တၢ်ပဲၥ်တခီတၢၤတၢ်ဒီး တၢ်တဲဟူထီၣ်သါလီၤတၢ်လၢ အလီၤတံၢ်လီၤဆဲးတအိၣ်သ့ၣ်တဖၣ်န့ၣ်, တၢ်ပၥ်ပနီၣ်လၢအမ့ၢ်(KNLA)ကရူၢ်ကရၢတသ့ဘၣ်အဂ့ၢ်,ရှဲလဲပၥ်ဖျါဃုၥ်ဝဲန့ၣ်လီၤ.
ဒ်န့ၣ်အသိး,ဘၣ်ဃးကီၢ်ကၠီၣ်တဲၣ်ဝ့ၢ်ဘီကီးပူၤတၢ်ကဲထီၣ်သးအံၤ ကီၢ်ကၠီၣ်တဲၣ်ပှၤဘၣ်မူဘၣ်ဒါတဂၤလၢ်လၢ် မ့ၢ်အိၣ်ဒီး တၢ်လီၤတံၢ်လီၤဆဲးန့ၣ်,ဆဲးကျိး(KNU)ဒီး(KNLA)သ့ဝဲအသိး,(KNU)စ့ၢ်ကီး ကွဲမုၥ်ဒီး တူၢ်လိၥ်မုၥ်ဝဲကၠီၣ်တဲၣ် ပှၤဘၣ် မူဘၣ်ဒါတဖၣ်အမဲၥ်ညါ, ကပၥ်ဖှိၣ်မၤသကိးဝဲတၢ်ဒီး ကၠီၣ်တဲၣ်ပှၤဘၣ်မူဘၣ်ဒါတဖၣ် ဒ်သိးတၢ်စူးကါကမၣ်ဝဲ(KNU-KNLA)အမံၤ လၢတၢ်မၤကမၣ်ကီၢ်ကၠီၣ်တဲၣ် ထံကီၢ်တၢ်ဘျၢသဲစး သုတအိၣ်တဂ့ၤအဂီၢ်အဂ့ၢ်,ပၥ်ဖျါဝဲစ့ၢ်ကီးန့ၣ်လီၤ.
