ပယီၤသုးခးလီၤကျိဖးဒိၣ်အဃိ ခံလါအတီၢ်ပူၤ ကမျၢၢ်ဘၣ်သံ(၂၉)ဂၤ ဘၣ်ဒိ(၇၆)ဂၤ

လါမးရှး ၂၂ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် သုးက့(၃)ဟီၣ်က၀ီၤအပူၤ ခီဖျိပယီၤ သုးခးလီၤ ကျိဖးဒိၣ်ႇ ဟဲတ့ၢ်လီၤဒြိမ့ၣ်ပိၢ်ႇ ခးလီၤတၢ်ဒီးကဘီယူၤအဃိ စးထီၣ်(၂၀၂၄)လါယနူၤအါရံၤ တုၤလၢ လါဖ့ၤဘြူၤအါရံၤ ခံလါအတီၢ်ပူၤန့ၣ် ကမျၢၢ်သံခဲလၢာ်(၂၉)ဂၤႇ ဘၣ်ဒိ(၇၆)ဂၤအဂ့ၢ် ချၢၣ်လွံၢ်ထူၣ် ကီၢ်ရ့ၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲန့ၣ်လီၤႉ

ဘၣ်ဃးပယီၤသုးအတၢ်မၤအၢမၤသီဒ်အံၤသ့ၣ်တဖၣ်မ့ၢ်တၢ်လၢအမၤဘၣ်ဒိ၀ဲၦၤဂ့ၢ်၀ီခွဲးယာ်ထီဘိတပယူာ်ဃီအသိးသုးကီၣ်ကးအံၤတလူၤပိာ်မၤထွဲသုးတၢ်သိၣ်တၢ်သီတၢ်ဘျၢတလူၤပိာ်မၤထွဲစ့ၢ်ကီးထံဂုၤကီၢ်ဂၤၦၤဂ့ၢ်၀ီတၢ်ဒိသူၣ်ဒိသးသဲးစးတၢ်ဘျၢဘၣ်အဂ့ၢ်န့ၣ် ပဒိၣ်စီၤဟဲဂ့ၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ပမ့ၢ်ကွၢ်က့ၤမုၢ်မဆါတနံၤအံၤန့ၣ်သုးကီၣ်ကးအံၤဘၣ်ဃးဒီးတၢ်မၤဘၣ်ဒိၦၤဂ့ၢ်၀ီခွဲးယာ်သ့ၣ် တဖၣ်န့ၣ် ထီဘိတပယူာ်ဃီန့ၣ်မၤ၀ဲဒၣ်ႉ မ့ၢ်၀ံၤန့ၣ်အ၀ဲသ့ၣ်တလူၤပိာ်မၤထွဲ၀ဲဒၣ်သုးမုၢ်ဒိၣ်အတၢ်သိၣ်တၢ်သီ တၢ်ဘျၢဘၣ်ဒီး တကးဒံးဘၣ်ထံဂုၤကီၢ်ဂၤအတၢ်ပာ်လီၤပာ်၀ဲဒၣ်ဟီၣ်ခိၣ်ဒီဘ့ၣ်ၦၤဂ့ၢ်၀ီတၢ်ဒိသူၣ်ဒိသးသဲးစး တၢ်ဘျၢသ့ၣ်တဖၣ်အံၤန့ၣ်တလူၤပိာ်မၤထွဲ၀ဲဘၣ်န့ၣ်လီၤႉဘၣ်မနုၤအဃိလဲၣ်န့ၣ်သုးကီၣ်ကးအံၤခးလီၤကျိၤဖးဒိၣ်လၢကမျၢၢ်အသိးအကျါႇ မၤပျံၤမၤဖုးကမျၢၢ်ႇ မၤဘၣ်ဒိဘၣ်ထံးကမျၢၢ်တၢ်သ့ၣ်တဖၣ်အံၤန့ၣ်ထီဘိတပ ယူာ်ဃီန့ၣ်မၤ၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါချၢၣ်လွံၢ်ထူၣ်ကီၢ်ရ့ၣ်ခံလါအတီၢ်ပူၤ ခီဖျိပယီၤသုးခးလီၤကျိဖးဒိၣ်အဖီခိၣ် ကမျၢၢ်ဘၣ်သံ (၂၉)ဂၤ အကျါပာ်ဃုာ်ပိာ်မုၣ်(၉)ဂၤဒီးဒ်န့ၣ်အသိးၦၤကမျၢၢ်ဘၣ်ဒိ(၇၆)ဂၤအကျါစ့ၢ်ကီးပၣ်ဃုာ်၀ဲပိာ်မုၣ်(၂၇) ဂၤအဂ့ၢ် ချၢၣ်လွံၢ်ထူၣ် ၦၤကတိၤတၢ်ပၢ ပဒိၣ်စီၤဟဲဂ့ၤ စံး၀ဲအသိးသ့ၣ်ညါဘၣ်န့ၣ်လီၤႉ

တကးဒံးဘၣ်ခံလါအတီၢ်ပူၤအံၤကမျၢၢ်ဟံၣ်ဟးဂီၤ၀ဲ(၅၂)ဖျၢၣ်ႇ တၢ်ဆါဟံၣ်တဖျၢၣ်ဒီး ဒ်န့ၣ်အသိးလီၢ်က၀ီၤ ကမျၢၢ် လၢဘၣ်ဃ့ၢ်မှံဟးဖျိးတဖၣ်စ့ၢ်ကီးဘၣ်ကွၢ်ဆၢၣ်မဲာ်၀ဲတၢ်အီၣ်တၢ်အီတၢ်ဃံးတၢ်စ့ၤဒီးဆူၣ်ချ့တၢ်ကီ တၢ်ခဲအကလုာ် ကလုာ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

စးထီၣ် ၂၀၂၁ သုးဟံးန့ၢ်တၢ်စိတၢ်ကမီၤလီၢ်ခံ ကီၢ်ပယီၤထံကီၢ်ဒီတဘ့ၣ်အပူၤ ခီဖျိဒုးယၤတၢ်သဘံၣ်သဘုၣ် အဃိ ထံဖိကီၢ်ဖိကမျၢၢ်ဘၣ်ဃ့ၢ်မှံဟးဖျိးအနီၣ်ဂံၢ်အိၣ်၀ဲ(၂ႉ၈)ကကွဲၢ်ဘျဲၣ်လံအဂ့ၢ်န့ၣ် (United Nations OCHA Myanmar) ထုးထီၣ်ပာ်ဖျါစရီအသိး သ့ၣ်ညါဘၣ်န့ၣ်လီၤႉ